___🍁🍁___
"يا اماااالي الدار وينكم؟! "
وقف في الوسطية وهو يحط قفاف القضية ويبدا ينحي في الزنار من على اكتافو "هيااااا وييينك "
_" هووووني ..هوني سي اسماعيل"
ظهرت من وراء باب الكوجينة مرا في أول الاربعين بضفاير طوال مهدلين ع الاكتاف و محرمة روز صغيرة لامة شعرها ، وجها ابيض شمعة ضاو ي بحمرة خدودها وشفايفها , تمايلت وهي تتبسم " على سلامتك "
خذات منو الزنار بيد والثانية تلمست رقبة الدنڨري ايلي لابسو "تي شبيك ليوم طولت ...الفطور برد وأنا ماك تعرفني ...نخاف عليك تاكل لقمة باردة "
تبسم وهو ياخو ضفيرتها بين صوابعو ويشمها " ماك تعرف السوق للاتنا البية ..ايا برا هات اك الفطور خلي الواحد يعبي كرشو ...وهاوكا قضيتلك ايلي وصيتني عليه "
خزرت للقفاف المليانين ...طلبت عنبة ...جاتها كرمة " يعطيك من خيرو وبركتو ...دايمة طلتك وقضيتك "
باس جبينها " الله لا ينحيك عليا "
فاتها بالشوية للطوالات غسل حالتو ونشفها وكيف خرج لقى كل شي حاضر يستنى فيه ماعليه كان بسمل وبدأ " الله على فم ها المقرونة ..يعطيك الف صحة "
_"فيه الشفاء "
تعجبها بارشا كي يشكرها حتى على أقل التفاصيل ...بعد اكثر من عشرين عام عرس مازالو خدودها يحمارو للكلمة الحلوة و تغطس في الحشمة وقت عينو تشوفها بهاك اللهفة ايلي ماتبدلتش ...لكن عيونها هي مع كل عام يزيد تطفى فيهم حاجة ويغرقو في الظلام ...حبها وعشقها من أول ماراتها عينو وشهلت فيه وحيت وماتت في محبتو ...لكن الدنيا عمرها ماتعطي حاجة كاملة ...موش باش يسألها شبيك حزينة والا شنوة مقلقك ...خاطر لو سألها ...تبكي وتقلو السبة ...هاك السبة ايلي ماتتبدلش وأيلي تحرقو طول في جاشو ..خلي السكوت حاكم وموش لازم يتفتق الجرح...هو زادا بالكاد صابر .
_" سي اسماعيل صحيح لبارح ضربتو ولد السيدة ...امو ليوم جات تشكي وتبكي وقالت عملت فيه ...قلتلها سي اسماعيل عمرو مايظلم لازم ولدك عمل حاجة استاهل عليها "
تنهد " الطفل ضايع جملة يا شريفة...اخرتها شد مو..س على اك الطفلة اليتيمة اسراء "
شهقت مرعوبة " يالطيف...هذا موش في عقلو ..."
اشر براسو موافقها " أي أي ...الاولاد بربشو وراه ولقاوه يتعا..طى و يبيع "
_" ياااا شومي ؟! هذا في حومتنا ؟! "
_" ايه حومة السْرّد بدأت تخمـ..ج وشبابها ماشي ويضيع ...وأنا مانيش باش نقعد مكتف يدي ونتفرج ...اذا ولد السيدة حابب يفسد...يفسد مع روحو من اولو فريفط وموش قد المسؤولية وامو بيدها هازة يدها منو ...أما باش يزيد يفسدلي وليدات صغار في المدارس والليسيات ...لا"
أنت تقرأ
تــجاعيٕد ســامّة ☘️( مكتب التحقيقات الخاصة ) ☘️
Action🌼الإسـم : 🦋تـجـاعـيـد ســامّــة 🦋( toxic wrinkles ) 🌼الكاتـبـة :🦋 ňòùdã🦋 🌼النــوع :بوليسي ،جريمة ،اثارة ،تحقيق رومنسي ، اجتماعي 🚔 🌼تاريـخ النـشر : 2023 : قريبا 🌼القـصّـة : تدور احداث القصّة حول محقق من مكتب التحقيقات الخاصة يسعئ رفقة فري...
