Lemmer di yetteε lxaṭer
Ddiq deg wul ma ad yili
A nettweḥḥid netḥeyyeṛ
Imɣi n ṣṣwab a ifetti
Agni n liser mi ɣ-d-iḍheṛ
Nettḥiri ad t-nerr d asuki
Negguma ad nwexxeṛ i lewhi
N widak i ɣ-yesmunedlen
Ula d tamaziɣt-nni
I nenwa ara ɣ-yesduklen
Bḍan-tt ark d leqsabi
Ijqerra mačči yiwen.
Mi nɣil neffɣ-d ɣer luḍa
Ad aɣ-d-immager usawen
Leqbayel si zzman akka
Di tegmatt i deg i tt-uɣen
Acḥal n yergazen at ṣṣfa
Nesɣim-asen-d nekkes-iten
Amek ara ɣ-yebru facal ?
Amek ara nqabel azekka ?
Ma nekna i uhubbu n temsal
Aεdaw ur ɣ-izeggel ara
Akken ad d-nerret i ccetla azal
Ad nḥelles, ad nbeddel ssira.
Mi ɣ-tekkes tuqqsa usemmiḍ
Tayeḍ ad tt-id-nesnulfu
Yeggumma ad ɣ-yeffeɣ yiṣṣiḍ
Nefhem izedɣ-aɣ waḍu
Deg yiẓri n leğnas nettɣiḍ
Qqaren-as amek ara tefru
Neẓra ass-n mara tefru
A tt-ɣelten wid tt-iceεlen
Ma d wid yewwin deεwessu
Lfeṛḥ-is ur s-ḥeddṛen
Ad d-teggri tağğalt tettru
Ad tezzağğaw deg yimeṭṭawen
D tteɣzizat i ɣ-yenɣan
Nettṛebbi afud i tismin
Gar-aneɣ argaz mi d-iban
Ad d-nexleq deg-s amqennin
D winna i ken-yeğğan εeryan.
# Matoub Lounès.
