Sefṛeḥ-itt, ini-as dayen yenfa
Yeffi-d udeddi
Xas lǧerḥ ur yeḥli ara
D isin, ad as-tafem amdawi
Ass-nni, mi ǧǧiɣ yemma
I ẓriɣ yid-k nemsebra
Isem-ik deg yimi-w a baba
Lbenna-s, ur d-tettɣimi ..
Mi ɛeqleɣ aggus n yemma
Telsa-t tayeḍ di tmeɣra
Fell-i tɣab tafrara
D isin, ur d-nettemlili ..
Tettefriwis ṣṣura
Lefraq d amqennin
Ttkukruɣ abrid n tala
Mara maggreɣ tulawin
Mi yuẓaf yiwen a yemma
Ttmektayeɣ-d aẓekka
I kem-ijemɛen lebda
Amek ara qeddmeɣ lesnin ?
Imi ulac-ikem a yemma
Ma bdeɣ-d i zzwaǧ azekka
Muḥal ad d-teḍru tmeɣra
Akken bɣan medden ad ilin !
Ur ttaǧǧaɣ udmim, uzzu
Ad am-ḍlun tama
Ad beddeɣ i lweṛd, ad yefsu
Ad iyi-d-yettader ṣṣifa
Xas ad yiqsiḥ unebdu
Ɣef medden ad yizid wuṛɣu
Ad beddeɣ i lweṛd, ad yeḥyu
S tḥemmal, ad n-nruɣ fell-am ..
Ma ɛeṭleɣ, aṛǧu Mayyu
Aḍar-iw ɣur-m ad d-yejbu
Ad am-n-beddeɣ ɣef uqerru
Akken bɣun qesḥit leɛwam !
" A mmi, ḥader weltma-k
Ur tt-ttaǧǧa ara
Nadi-tt ma yella teɛreq-ak
Fell-awen i tecweḍ tassa
Ur ttlummu di baba-k
Fhem-it, senqes-as lehlak
Yeɛweq, ur yufi leslak
Ass mi d-teṣṣnhel tiyita
Mi akken mecṭuḥeḍ isneεt-ak
Iberdan yeffɣen fell-ak
Tura tezzi-d, d nnuba-k
Ur ttkukru, sǧuǧǧeg-as tama .."
# Matoub Lounès.
