Ul-iw gzem-it,
Celeḥ-it ḍegger-it s aman
D ṛṛuḥ-iw ,
Ddem-it uqbel lawan
Ad yestaɛfu,
Ad yeḥlu seg yir attan
Ur yettraju,
Ttreǧriǧeɣ deg uḍan
Sina ad ḥluɣ,
Ad zedɣeɣ ger iẓekwan.
Ṣsura-w tezwi,
Kkfi-ɣ seg yir attan
Waggi d wadi,
ḥkiɣ-d d acu id-nnan
Nnan-iyi-d,
Ṛuḥ ad tqelbeḍ ayen yeṣfan
Ul-iw yugi,
Syin-a ad yezwi ilefḍan
D yir tayri,
Iyi-yeǧǧan ger imeḍqan
Carwaɣ tidi,
Deg yiẓri, imeṭṭawen fnan.
Kkawen yifadden-iw,
Γliɣ ur d-kkireɣ
Greɣ afus-iw,
Kniɣ ɣer wid karheɣ
Ur d-tdewreḍ,
Teddmeḍ abrid s teḍsa
Ul-im semmeḍ,
Imeqwar iɣleb tanica
Mara ad tḥusseḍ
Teqqes-ikem-id lmeḥna
Ad iḥnineḍ,
A yi-d-tzureḍ s lehna.
Deg-i ur d-celgeḍ,
ḥnunfeɣ di lqaɛa
Ul-im d ablaḍ,
Ur yettḥulfu ara
Yibbwas albaɛḍ,
Deg-m ad yezzu lmehna
Ur kem-issawaḍ,
S anda akken ul-im imenna
Ad kem-iṭṭef ccyaḍ,
Tiqit ur tt-tettafeḍ ara
Mazal tiyaḍ,
Ad tent-teẓreḍ s nnuba.
Ggal, ḥennet,
Xdem aken i m-yehwa
Ruḥ xas sarwet,
Yid-m ar tagara
Yak ad nemmet,
D tin aɣ-ijemɛen deg uẓẓekka
Ad kem-isarwet,
Ṛṛuḥ-iw i teǧǧiḍ yezza
Ad kem-isseḥnet,
Zin-im, tegguleḍ ur yefna
Ad kem-yewwet,
Ɛazrayen ur kem-yezgal ara.
# Matoub Lounès.
