Ṭṭlam irfed acḍaḍ-is
Agris a ifettin s imi-s
Iṭij iɛeǧer deg umkan
Lǧundi issumet iɣil-is
Yiwen ufus ɣef yidmaren-is
Igen amzun d ṣṣebyan
Ur d-yecliɛ deg uqebli neɣ agris
Tebɛed, tḍul targit-is
Yewweḍ ɣer widen yefnan ..
Mi tɣefleḍ, teṭseḍ
Tawwurt ad tt-medlaɣ
Axir ur d-iyi-tẓeṛṛeḍ
Amnar ma t-kkaɣ
Abrid ad t-awiɣ
Wissen ma ad d-zziɣ
Lḥukkam ceggεen-d lkaɣeḍ
Di lgirra ad ttekkiɣ !
Heggaɣ aɛwin-iw
Cergaɣ tawriqt-iw
D lmuḥal, mačči ar ɣur-sen
Ad yeddu uḍar-iw !
Adrar, tiɣaltin
Tuddar, timdinin
Ar d ad zerɛaɣ lehdur-iw,
Deg ulawen-nwen ad d-mɣin !
Ɣurwat a medden
Ur ttṛuḥut ara
Ad ceggɛen arraw-nsen
Ma bɣan lgirra !
Iɛdawen ass-agi
Ass-a neɣ iḍelli
D nitni i ten-id-ixelqen
I ten-ittqabalen d nekkni !
A wid iḥekkmen
Xḍiɣ i waya
Ma tebɣam ad iyi-tenɣem
Ur rwileɣ ara
Xas ɛeggnet-asen
Isurḍiyen-nwen
Xas ɛeggnet-asen
Iǧadarmiyen
Ad jebden melba cceḥḥa
Nekk ifassen-iw d ilmawen !
# Matoub Lounès.
