Kecmeɣ di ssuq n tlufa
Qḍiɣ-d leqsabi n lmeḥna
Seg-sent hemmjeɣ kullas
F ul-iw ur tnuqel ccetwa
Lebreq, ṛṛεud d usigna
Rniɣ ṭṭlam timḍellas
Lmutt fell-i ur d-tnuda
Yif-it lemmer i d-testeqsa
Ad tɣum leεyub-iw meṛṛa
Imi seg-i fukkent tissas
Wiss ma d aɣrib ara mmteɣ,
Neɣ yibbwass ad uɣaleɣ
S akal i d-iyi-d-yessekren
Leḥbab ukkud tturareɣ
Deg uɣebbaṛ ukkud mṛaṛɣeɣ
Wissen kan ma ad i-εeqlen
Ma d taqcict-nni kellxeɣ
Asmi i as-nniɣ: "ad kem-aɣeɣ"
Taggara hujreɣ
Ay hujṛeɣ rewleɣ
Amek ara ad tt-qablent wallen ?
Tseḥḥer-iyi lɣerba m leqwas
S uḍar-iw εefseɣ tissas
Di taddart rẓag yisem-iw
Ğğiɣ lalla-s n tullas
Di tala, reggment-tt tizzya-s
Wwiɣ ddnub i yiri-w
Ay afrux ɣef ṭṭaq bedd-as
Γef wucmit iyi-icban hdeṛ-as
Fell-i ar teqḍeε layas
Ad tezweğ d win xiṛ-iw
Ad textiṛ aqcic yeɣran
Aneεmar i ten-ijemmεen
Mačči am nekk iwumi yefla lğib
Bezzaf yettazzal lawan
Aṭṭan n temẓi d wussan
Ddwa-s, bnadem ur t-yeksib
Nekk dayen yečča-yi zzman
S ufus i d-uğğweɣ qeḍran
Ḍliɣ-t i wudem-iw
Ay i wudem-iw yuzzan
Ur d-yeggri deg jifeṛ-iw weḥbib
Wiss ma d aɣrib ara mmteɣ.
# Matoub Lounès.
