Iṭij yekker-d ad ten-yefru
Yuẓa uksum s ajenwi
I s-yemudden lḥeq a yettru
Ma tecfam-d i wass-nni
Mi as-d-ssawlen ad ten-yefru
Ɛebban Remḍan mi yeɣli ..
Ṣṣut-is, yeddem-it waḍu.
Arǧut, arǧut,
Arǧut ur ttruḥut ad twalim
Iɣsan n wid ur nemmut !
Arǧut, arǧut,
Ad twalim tamurt ..
Ffɣen-d yizerman si dduḥ n tmeṭṭut !
Yedda yid-sen
Nitni uɣalen-d
Ifassen urzen
Lqid yeǧhed
Di tregwa a yettazzal
A yettraǧu lḥal
Lḥal ad as-d-yefk nnuba
Iṣuḍ-d lbaṭel aderɣal
Ɛemmren-t-id d uzzal
Imdanen ur ten-yezgil ara
Am ccetwa, am uzal
Ɛemren-d ddubbal
Am wakken terra tmara ..
Yekfa wawal
Lehna ur d-tḍal
Mi truḥ teḍṣa
Wissen ma ad d-tuɣal ?
Iṭij mi d-yerǧem tamurt
Yeggul ur s-yettaxer ara
Ageffur, dayen nettu-t
Γaben waman di tliwa
Igenni mi s-d-ṣaḥ tagut
Ṣṣexḍ ur d-yeǧǧi acemma
Qqaren "Ayen ifaten yemmut"
Ma d nekk ur umineɣ ara ..
Arǧut, arǧut,
Arǧut ur ttruḥut ad twalim
Iɣsan n wid ur nemmut !
Arǧut, arǧut,
Ad twalim tamurt ..
Ffɣen-d yizerman si dduḥ n tmeṭṭut !
Ibuεemmaren
Mcawaren
Adrar yenhed
Raḥen idammen
Uzzu mi t-ɣummen s leḥrir
Yewweḍ-iten-id uxbir
Di Lmarruk d acu iṣaṛen ?
Yuɣe-d lḥerma n jjir
Xas daxel n uɣbir
Iẓuran-is ma ad beddlen
Aɣyul irkeb-it lḥir
Mi yesla i zzhir
S atemmu yedhem yekcem ..
Iɣil yeffer,
Ḥedd ur t-iẓar
Mi t-id-leḥqen
Yebda icexxer ..
Raḥen idammen di tɣummar
Raḥen deg umadaɣ n zzan
Yeǧǧa-d taluft, tisigar
D leεyub d ad sḍehren wussan
Ihi ass-a, yegzem umrar
Ad d-iniɣ nekk wi yilan
Lekdeb xas ur yettwaffar
Tuli-d zzit ɣef waman
Arǧut, arǧut,
Arǧut ur ttruḥut ad twalim
Iɣsan n wid ur nemmut !
Arǧut, arǧut,
Ad twalim tamurt ..
Ffɣen-d yizerman si dduḥ n tmeṭṭut !
# Matoub Lounès.
