Axxam aqdim wi t-yebnan ?
Wi s-yezlan
Asfel mi yuli lsas-is ?
Baba-k ɣeḍlen-t s laman
Ur k-t-mlan
Asmi tettnadiḍ later-is
Siked kan legrad I sen-fkan
I wid yeddmen ṛṛuḥ-is
Ma d keččini fkan-ak leɛlam
Deg yizenqan ttzuxxu yis-s !Iqdimen nnuɣen xesren
Kelxen-ten
Asmi llin tawwurt I ccerq
Deg wannar i deg ttmettaten
I qeblen
Rran aɛrab d imsewweq
Wikkid i terram d atmaten
Ad zzin aɛrur I lḥeq
Ma mazal tettamnem yis-sen
Nekkini fɣeɣ d amnafeq !Tidett ɣeḍlen-tt imawlan
Mi tt-fkan
Ɣer lbaṭel tedda d tislit
Arrac ḥeffḍen ur ẓṛan
Ayen uran
A seg yeffus a gma senṭeq-it
Wiggi i yeṭṭfen imukan
Widen yuklalen qlil-it
Ihi ma ttuɣ ayen iɛeddan
Yemma mačči d Taqbaylit !Amek akka ara as-ggeɣ leqrar
I uɛeṭṭar
Yeččan tigemi n yimawlan
Ass-agi, cebbḥen lɛar
Am lefnar
A ttwalin yis-s iberdan
Ma walan yekker-d ccaṭar
Ad t-ɣeḍlen qbel ad d-iban
Gar-asen Aqbayli ma yeẓwar
Ad xelṣen win ad t-yerfɛen !# Matoub Lounès.