A yettseggix wul-iw
A ijeffel ɣef win i t-yeğğan
D wagi i d ẓẓher-iw
Ad ğğleɣ ur d-yewwiḍ lawan
A gma ur k-ttayseɣ
Xas zewğeɣ
A k-id-ttaddren wuḍan
Muḥal ad t-ḥemmleɣ
Akken i k-ḥemmleɣ
Di sin i ɣ-cerḍen wussan
Udem-ik muḥal a gma ad yesfeḍ
Xas zzman-agi ad iyi-yeṛkeḍ
Ḥṣu ur d-ttaddreɣ wayeḍ
Siwa s tmara
Xas ger wallen-iw ass-a tɣabeḍ
Deg wul-iw mazal-ik teddreḍ
Ayen yakk i d iyi-d-txulfeḍ
Ur s-zmireɣ ara
Yis-k i zehhuɣ
Ass-a ttruɣ
Allen-iw ur nneḥtament ara
Akka ara ttṛağuɣ
Melmi ara n-rnuɣ
Ad nemyekkes lweḥc uẓekka
Ṭṭṣen waman akked yisɣaren
Gummant ad medlent wallen
Yir ussan i yi-d-yemmalen
Ur sen-zmireɣ ara
Tasa-w tebḍa akk d icriḥen
A nefqent seg-s lemḥayen
Ulac tin i tt-izelgen
A tneggi tekfa
A ttεeddin leεyud
Ul-iw yeffud
Ṣṣber fell-i ur d-isteqsa
A Ṛebbi lmeεbud
Rnu-d ṛṛεud
D wayen akk yeɣlebn aya.
# Matoub Lounès.
