Ussan a zerben, ḥemqen,
Si laεmer neqṣen
A tfettiḍ am tcemaεt,
Hubeɣ ad d-yeḥdeṛ wass-n
Ma nedment wallen
Ṭlam ad ak-isum tafat,
S idis-ik, wa ara iḥeḍṛen
Tinna akken iɣaben
Ma d-teḥleli ger lxalat,
A yaɣṛib-iw...
Ttewḥiceɣ ayen mellulen
Yeččabin lekfen
Ttewḥiceɣ ad muqleɣ udem-ik,
Deg wul-ik tirgett yeṭfen
Wa ara k tt-yesensen
Yaεweq, yemundel yixef-ik,
A tiyita deg-i a yersen
Mara ad k-id-refden
Ad taɣeḍ abrid s amḍiq-ik,
A yaɣṛib-iw...
Lehlak-ik dayen ṛẓagen
Sekra n win i t-yeṭfen
Leṣṛa ines d aẓeka,
D lesnin ttqelliben
Ṭebba ṭqelqen
Guman ad as-d-afen ddwa,
I nekk a gma, i k-iḥemlen
D amcum-iw wass-n
Ugadeɣ ur d-ṣebḥeɣ ara,
A yaɣṛib-iw...
Yemma-k amek ara tt-ṣebṛeɣ ?
Amek ara tt-muqleɣ ?
Ma terfed tijgi ad tiɣwis,
Teẓra yid-k i dukuleɣ
Am gma i k-ḥemleɣ,
Mi d-twala deg-i, amzun d mmi-s,
Fkiɣ-ak laεhd, ur ḥenteɣ
Ṛeḥba i ḥeḍṛeɣ
Isem-ik ur yeɣli lqedṛ-is...
# Matoub Lounès.
