Wiss ma d tiɣri-w ur newwiḍ
Neɣ d medden i d iyi-zwaren
Akken ad am-iniɣ texliḍ
A tungift i t-yettamnen ..
Tecfiḍ i wayen i m-yexdem
Yegzem lemεahda txaḍem
Ass-a yeḥnunef-d ɣur-m
Ma tezziḍ ɣur-s texliḍ
A tungift i t-yettamnen ..
Mačči d yiwet i d am-ḥkan
Mi akken texṛeb tuɣalin
Tassa-w turew-d ineẓman
Ul amcum yebḍa ɣef sin
Γef uxxam-nni aqdim tecfiḍ
D tislit ɣur-s i d-teddiḍ
Ass-a dayen yerka am ceṭṭiḍ
Ufan ɣur-s abrid wussan
Ussan-nni i d-aɣ-yerwin ..
Axxam amaynut nebna
Leḥzen fell-as d aεessas
S anda rriɣ, udem-im yella
Ttemḥebbakeɣ d lweswas
Lehlak yerẓa-d tiwwura
Γer tezmert i d-yesteqsa
Γer tama-w ḥedd ur yella
A yi-d-xeṭṭeb lmut yal ass
Uggadeɣ ur kem-ẓerreɣ ara ..
Ula d dderya ur nesεi
Aɣ-iǧazin ad nemlil
Deg-neɣ yezga wesweεdi
Yal taluft ur d-aɣ-tezgil
Anda tella tallit-nni
N wass mi teǧǧuǧǧeg tayri ..
Ass-a, iceṭṭeb-itt ubruri
Ad nkemmel i lmeḥna lkil
N wussan n tizzelgi ..
#Matoub Lounès.
