Beautiful Pain [Completed]

နားလည်ခြင်း JEON

(Unicode)

နားလည်ခြင်းဂျွန်

အဘွားအိုကထယ်ယောင်း၏ လက်ကောက်ဝတ်ကို
စမ်းသပ်ကာ အသက်ပြင်းပြင်းရှူလိုက်သည်။
အဘွားအို အနီးအနားတွင် ထယ်ယောင်းကို
စူးစိုက်ကြည့်နေသည့်ဂျုံးဂုရှိသည်။

တည်ငြိမ်ဟန်ရသော်လည်း အနည်းငယ်
နီရဲနေသောအကြည့်တို့မှာ ပူပန်နေသလို။
ပါးရေနားရေတွန့်နေသည့်အဘွားအိုက
ဂျုံးဂုကိုအသက်ပါစွာပြုံး၍ကြည့်ရင်း...

" အစာအဆိပ်သင့်တာပါ။ ထယ်ယောင်းလေး
ဘာတွေစားသေးလဲ "

ဂျုံးဂုကစဉ်းစားဟန်ပြုပြီးနောက်၊

" ရိုးရာမုန့်ထင်တယ်... စားတယ် "

ထိုအချိန်၌ ဂျီမင်အခန့်သင့်စွာဝင်လာခဲ့သည်။
ဂျုံးဂုအခန်းသို့တံခါးမရှိ၊ ဓားမရှိ အချိန်မရွေး
ဝင်ရောက်ခွင့်ပြုထားသူမှာ ဂျီမင်နှင့်ဟိုဆော့
နှစ်ယောက်တည်းသာဖြစ်သည်။

" ဂျီမင် မင်းရောစားခဲ့သေးလား "

" အင်း... စားခဲ့တယ်။ ထယ်ယောင်းကျမှ... ဘာလို့... "

ဂျီမင် စကားဆက်မပြောနိုင်တော့ဘဲ အားနာစွာ
တိုးတိမ်သွားခဲ့သည်။ ထယ်ယောင်း အစာအဆိပ်
သင့်တာသူ့ပယောဂလည်း မကင်းသောကြောင့်
ဂျုံးဂုအား မျက်နှာမပြဝံ့။

နှစ်ယောက်အတူတူစားပါလျက်နှင့်
ဂျီမင်ကမည်သို့သော လက္ခဏာဝေဒနာ
မျှမရှိဘဲ၊ ထယ်ယောင်းမှာ အစာအဆိပ်သင့်
ရသည်။ ထယ်ယောင်းနှင့် မတည့်သော
အစားအစာဖြစ်၍သော်လည်းကောင်း၊
တစ်စုံတစ်ဦး၏ ယုတ်မာမှု့ကြောင့်သော်လည်းကောင်း
ဖြစ်နိုင်ချေနှစ်မျိုးရှိမည်ဟု ဂျုံးဂုသံသယရှိစွာ
တွေးသည်။

ဖြူဖွေးဖွာလန်နေသော ဆံပင်များကို
လက်နဲ့သပ်ချကာ အဘွားအိုကထလိုက်ပြီး.....

" အန်ပြီးသွားပြီဆိုတော့ကောင်းလောက်ပါပြီ။
ခဏနေရင် ဆေးရည်ပို့ပေးလိုက်မယ် "

" သေချာလား... ဘာမှမဖြစ်တော့ဘူးဆိုတာ "

အဘွားအို၏ပိန်လှီသော လက်ကောက်ဝတ်ကို
ဖမ်းဆွဲရင်း ဂျုံးဂုကပြတ်သားစွာမေးသည်။