طفله بعمر الستين

p1

اني زهور مواليد ١٩٨٧
اعيش في بغداد
من عائله محافظه ومتدينه
اعيش مع الام والاب واخت اصغر مني بسنه واخواني ال 7

ابويه كان يهتم فقط بنفسه ودائما يحرمني الاختلاط مع الاطفال

اني جنت احب المرح اتمنى يكون عندي صديقات احجي وياهم

اختي الاصغر مني مدلله جدا كان ابويه دائما ياخذ اماني وهيه الاخت الصغرى للنزهه وللتسوق

بينما اني وحيده محد يحجي ويايه محد يتقربلي بس يرزلون بيه
كل هذا واني كنت طفله عمري 9 سنوات
بيوم رحت على امي :

- ماما ماما ليش متخلوني العب ويه البنات ليش تحبون اماني اكثر مني

امي جانت تخبز :

- يمه زهور وخري مني هسه اني روحي فايره من الخبز ومن عماتج

امي جانت عايشه ويه عيالها وحمواتها 7 ومسؤليه البيت كله عليها

رحت بالحديقه شفت بنات عمتي جايات خطار
فرحت بيهن بقيت العب وياهن ممصدكه نفسي من الفرحه اول مره العب ويه بنات عماتي
لان كل ما يجن ابويه وامي ميخلوني العب وياهن فجنت من اشوفهن ايلعبن من بعيد بالنسبه الي حلم اروح اكعد والعب وياهم
صدفه واني بقمه السعاده والضحك شفت ابويه فات باوع عليه بنظره عصرت كلبي
بسرعه سكتت من الضحك وكعدت ع صفحه عبالك شايفه ملك الموت مو ابويه
وره شوي اجه اخويه محمد هوه صف ثالث متوسط صاح علينا بصوت مرعب

- زهوور بابا يريدج

واني والدمعه بعيني اي جايه
واني امشي عبالك ماخذيني للاعدام مو عبالك ابويه صاحني

دخلت الغرفه لكيت ابويه كاعد ويمه صونده ويباوع عليه نظره احتقار :
- ها بابا
ابويه :
- شنو ها بابا شنو تكوليلي ها بابا

- اسفه والله نسيت نعم بابا

ابويه :

- الج عين تحجين وتباوعين دنكي راسج من تحجين وياي

اني وجهي اصفر وكوه واكفه :

- بابا والله مدنكه

جان يكول

- اش اشششش ولا كلمه
اني كم مره كتلج متلعبين ومطلعين من البيت

- بابا والله همه صاحوني

ابويه

- اشششش ولااااا كلمه مو كتلج لتجاوبين بعدج زغيره وهيج السانج

وضربني بالصونده واني ابجي واتوسل ابويه يعوفني وماكو الى ان صار جسمي ازرك
اجت امي للبيت شافتني ابجي جلبت بايد امي

- يمه لحكيلي

امي
- شكو هاي ليش

ابويه جان يكول :

-بتج صلفه والسان مو كتلج متحجي ويه احد

امي متكدر تجاوبه لان هوه فارض كلمته بقت ساكته

شالتني امي صعدتني فوك حضنتني بقت تبوس بيه
- سوده عليه بنيتي بيه ولا بيج
شلون راح يخلص العمر ويه ابوج وعماتج

امي متعرف عليمن تبجي
تبجي على بتها لو على حظها
ثاني يوم ماكدرت اروح للمدرسه من كثره الضرب على جسمي
كعدت الصبح بالغرفه
دخل ابويه الغرفه :

- هاي ليش ممداومه شعندج كاعده هنا

- بابا مااكدر رجليه توجعني

- شبيج مابيج شي يله كومي بدلي ولي للمدرسه لا اموتج هسه

من الخوف بدلت ورحت المدرسه حتى بدون مااغسل وجهي وبدون ما اكل
بالكوه امشي بالشارع ومن الوجع ابجي
وصلت المدرسه
وشافتني المعلمه
كلتلي
- ماما رجعي البيت شنو هاي حالتج وبس تشوفج المديره يدزون ع اهلج ويسون تحقيق وياهم ويسجنون ابوج من وراج

كتلها
- ست والله ماكدر امشي بالكوه وصلت وبس ارجع ابويه يكتلني

المعلمه

- لا ميسويلج شي كوليله المعلمه رجعتني

رجعت وبالطريق اكول بيني وبين نفسي بالكي الكه ابويه طالع الشغل
وصلت البيت وتفاجئت باابويه بكراج البيت

-ها ولج ليش رجعتي مو كتلج روحي المدرسه
 
- لج ليش اتجذبين عليه ولج اجذبين انتي اصلا مرحتي المدرسه

- بابا والله رحت

لزمني كتلني بالكراج

- يله صعدي بالسياره وخل اشوف صدك المعلمه كلتلج رجعي واذا جذابه قسم بالله اذبحج واخلص منج

واني جنت الطفله الي عمري بعمر الورده من ابويه كال هيج بيني وبين نفسي اتمنى ابويه يذبحني واموت
وصلت المدرسه سأل ع المعلمه ف اجت المعلمه

-كالت حبيبتي ليش رجعتي مو كتلج رجعي البيت ارتاحي

ابويه سكت
ميعرف شيحجي صعدت بالسياره
وابويه نضراته على المعلمه عبالك يريد ياكلها
صعد ابويه السياره

- يله نزلي هنا براس الشارع وولي للبيت

امشي واوكع بالشارع وابجي
بيني وبين نفسي اكول هاي كل الاباء هيج ويه بناتهم بعدين تذكرت اختي شلون يعاملوها ب دلال وبجيت

-------------------