بعدها بيبيتي ام امي توفت وسائت حاله امي بالزايد امي بقت عازله نفسها متطلع من الغرفه
واني بقيت شايله مسؤليه البيت اغسل ملابس واكوي واسوي اكل وحالتنه الماديه تعبت من توفه محمد اخويه الله يرحمه وابويه ينطي مصرف يادوب ايكفي اكل
خاف جانت امي اجيب صدريه من البسطيه الي هسه حته هاي الصدريه صارت حصره عليه
انوب صارت حفله تخرج مال ثالث متوسط والبنات كلهن اشوفهن كاعدات مجاميع اشوفهن ايخططن شيلبسن
اني جنت حزينه على اخويه محمد مرحت بس جنت اتونس من اسمع سوالفهن
هاي تكول راح اسوي تسريحه وذيج تكول راح الف شعري والخ تكول شنو انسوي طبخ واني بداخلي اكول شيصير لو عندي صديقه احجيلها واكعد وياه ونسولف
بس شسوي اني حته ماعرف اجامل ولا اعرف شلون اصير صديقه وحده لان البنات اصلا ميتقربون مني كله يكولون عني معقده
واني اصلا فكري مشغول بالتنظيف مال بيت وشسوي غده وشسوي عشه وافكر خاف ماعدنه مسواك
اني طلعلي شيب واني عمري 14 سنه من القهر والتفكير لا عشت طفوله ولا عرفت شي اسمه طفوله
بنهايه الدوام اتفقن البنات ايسون الحفله نهايه الاسبوع طبعا بنات شعبتنه واصلا ولا وحده اجت وسئلتني راح اتشاركين بالحفله ويانه لو لاء وحتى لو سائليني اكلهم ما اجي
رجعت للبيت ضايجه وطالعه روحي ومقهوره حيل اني من جنت زغيره ابويه ميقبل احجي ويه بنات عماتي وهسه اني حته صديقات ماعندي شلون راح اضل هيج اني طول حياتي
بعدين كطعت تفكيري بدلت ملابسي وصليت ورحت على امي لكيتها كاعده تقره قرآن من دخلت صدقت ع القران وسدته وبقت صافنه عليه
كتلها
- شبيج يمه حبيبتي
كالت
- مابيه شي بس اريد احجي وياج انتي صرتي مره هسه
كتلها
-اي
كالت
- البنيه من تكبر توصل مرحله معينه يصير وياها شي بحيث من يصير هالشي هيه تصير جبيره وتصير حلوه
اني بقيت صافنه
-شنو هذا الشي يمه
امي كالت
- يعني انتو البنات متسولفون بالمدرسه ؟؟
كتلهه
- يمه انتي مو تعرفين اني ماعرف بنات وابويه مانعني احجي ويه اي بنيه واني اصلا البنات ميتقربولي
امي سكتت كالت
-يله يله حبيبتي سدي الموضوع
بقيت اني الح على امي
عاد بقت تشرحلى ع مرحله نمو البنت والتغيرات الي تصير وفهمتني شنو اسوي
اول مره اسمع بهيج حجي بقيت صافنه
المهم من دنحجي فاتو اخوتي التوم راجعين من المدرسه وحسن وحسين بالجيش جانو
كمت سويت الغده وغسلت ملابسهم واني بس اريد اكمل جان عاجبني اكعد بالحديقه
واصفن ويه نفسي شنو راح اسوي بحياتي لازم اخطط اسوي فد شي مهم مااريد ابقى هيج ماريد اكمل ثالث متوسط واتزوج هاهيه اني شفت ظلم من ابويه بس لازم اني انتبه النفسي لازم يصير عندي هدف بالحياه شنو حياتي اتزوج واحد مثل ابويه وهم ايذلني
لاااااااا اني ما اتحمل اله اشنق نفسي اذا تزوجت هيج واحد اني لازم اساعد امي اخليها
ترتاح بعد العذاب الي شافته اريد ارجع الحياه والضحكه بوجها اني قررت هاي القرارات من جنت كاعده بوحدي
من اجه ابويه كعد صبيتله اكل واني مبتسمه ورحت طلعت كتبي وكعدت اقره واتامل خير واكول
-يارب تفتحهه بوجهي
أنت تقرأ
طفله بعمر الستين
General Fictionالشيء الذي كانت تريده الشيء الذي رغبت به بشده قد نراه نحن امرا سهلا وليس بذلك التعقيد فكلنا قادرون عليه هي اعتبرته حلماً صعب الوصول بسبب والدها كل ما ارادته ان تنهي دراستها لتخرج من جبروت والدها الظالم ، الذي حطمها وفقدت بسببه اثنين من اخوانها واحد...
