طفله بعمر الستين

p6

اول يوم كعدنه بي بالحله حسيته يوم حلو لان كرايبنه الي كعدنه يمهم كلش متفاهمين صح حياتهم كلش بسيطه بس حسيتهم عايشين احلى حياة.

جان اكلهم كلش طيب وبسيط وحتى من يصبون الاكل فرحانين ...ووجوهم تضحك مو مثلنا

احنه جنه انسوي اطيب اكل ومنحس بطعمه خاصه من يجي ابويه عبالك الاكل مابي طعم

بالحله عدهم بساتين وابقار وغنم يرعون بيهن وجان سامر يوميه الصبح يكعد يحلب الابقار وياخذ ويحش الخس ويحمل التمر ويروح ايبيعهن عمتي كامت يوميه تكعد من الصبح علمود تتريك هيه ويا وتساعده بالتحميل مع العلم من جانت بالبيت ورقايه متشيل من الكاع ومن شافت سامر صارت زاحفه خطيه

المهم عمتي اسمه نجلاء وكلش متعصبه من ناحيه الدين والبس شو هاي من شافت سامر المكياج والكحله والباودر وكامت تعتني بنفسها

جان جدو ابو سامر بس يريد يتزوج على مرته وكاتل نفسه على مره ويوميه عركه هوه ومرته اريد مره واريد مره وهوه عنده فيلق مال جهال 12 واحد ويمكن اكثر

سامر جان اكبر واحد بيهم

وره كم يوم اجت عمتي على امب كالت

-ام محمد اريد احاجيج

طبعا مفديوم حاجت امي بهالطريقه وامي مبينت انو هي مستغربه
فكعدت يم امي جان تكول

- اني من اجيت اهنا اول مره احس نفسي عايشه اني ماعرف شكولج

امي

-احجي عيوني نجلاء شكو بداخلج يجوز اكدر اساعدج

عمتي

-صح سامر كرايبنه بس اني صارلي 15 سنه مشايفته واول ما اجينه هنا وشفته حسيت مثل السهم وفات بكلبي يعني حب من اول نظره واني احسه اخذ كلبي وعقلي وروحي حته مدا اكدر انام بليل بس افكر بي

طبعا عمتي نجلاء اكبر من امي بس تحس نفسه زغيره ---
امي كلتله

-عيوني انتي فاهمه وتعرفين ودارسه بس اني اشوف انو هو ميوالمج يعني اول شي فرق العمر وثانيا هو... ممكمل دراسه وحته اذا تزوجتي متكدرين....
تعيشين هنا ولا اتوقع هوه يكدر يجي يعيش بغداد اذا خلصت الحرب بخير وسلامه

عمتي كالت

-اني اتنازل عن كولشي واجي اعيش يمه هنا بس اني ما متاكده من حبه الي ولا اعرف هو شنو مشاعره من ناحيتي

امي كلتله

- اني اعرف هو بشنو يفكر بس خلي نكعد ويا كم مره حتى بعدها يكدر يحجيلي الي بداخله وانشالله خير

لهناك سمعنه صوت مال صياح طلعنه ونلكه جدوه مسفط جهال ع جسر وصاير عصبي وديشمر بيهم بالشط وسامر واخوتي بالشط جدو عصبي ويشمر منا واخوتي وسامر يسبحون ويطلعون بالجهال منا اخر شي اجت مرت جدو وهي سمينه وكوه تركض وتصيح عليه

-ولك شكووووو من فلك صابك شهرتنه

باوع عليه كله

ولج موتوني انتي وجهالج لانومتي نومه لاكعدتي مثل الاوادم

عاد هيه بقت تفر بركبته

-هاااا وجا شلون تريد تزوج وتخلف بعد

جان جدي يلزمه ويشمرها بالشط خطيه والولد كوه طلعوها
بقت تباوع وتسب بي بكلبه واحنه واكفين وخربانين ضحك عليهم عبالك مسرحيه
.
.
.
.
اول مره اشوف ابويه يضحك هيج من شفته يضحك حسيت الدنيه صار لونه وردي بقيت بس صافنه عليه من يضحك واكول بكلبي

- فدوه اروحلك يابه شكد حلو من تضحك شيصير لو انت يوميه تكعد وتضحك ويانه

وره شويه راحت امي على ام سامر انطتها دشداشه كله
خرز وملمعه اتخبلت عليه ام سامر

- يا خيه شو خل اكوم البسها

كامت ولبستها
وبقت صافنه .....

-يا......
خيه اليوم الرجال يتخبل اذا يشوفني لابسته من عين ابو سامر ايموت على الملمع واللمع

صح بيبي ام سامر انكول عليه بيبي بس هي
وزغيره متزوجه واذا واحد ايشوفها ايكول عمرهه 30 سنه من كد ماحلوه ولا عبالك عدهه 13 مدري 12 نفر صح جسمها دبدوب بس بيضه وجه
سمين ومابي تجاعيد وتخبل

كامت امي راحت على عمتي نجلاء وبقت كاعده يمه
طبعا عماتي الباقيات عازلات نفسهن ولا الهن علاقه بينه حته اكلهن وحد بس نجلاء قوت علاقته
ويه امي حتى تنسقلها ويه سامر
وره اسبوع
او يمكن 10 ايام اجو كرايبنه من عمام ابويه هم من بغداد ومهزومين جانو ثنين رياجيل وبنيه تقريبا بعمري اسمها اسراء
كعدو ورحبو بيهم اسراء اجت عليه دتحجي ويايه جان يصيحني ابويه

-روحي كعدي يم امج

رحت يم امي بقيت كاعده يمه
اول يوم وثاني يوم اسراء عاقله ومسوت شي وحتى تستحي تاكل ويانه
اني حياتي هناك جنت اكعد اطلع كتبي واقره وامي تكعد تقره قران