طفله بعمر الستين

p5

ابويه يباوع عليه وعلئ امي

كلها

-حجيتي وياهها

امي كلتله

- مو بسرعه اكلها لازم شويه شويه

اني زاد عندي الفضول اريد اعرف شديحجون
المهم
ابويه كلهه

- الرجال اليوم اجه يريد يزوج ابنه واني منطي حجايه بس كتله اشوف الاهل واردلك خبر

امي كلتله

- والله بعدها زغيره خلي تخلص الثالث وانطيها ع الاقل عدها شهاده ثالث متوسط

ابويه كلها

- يا شهاده المره شسوي بالشهاده المره شغلتها تخدم بيت زوجها واني الرجال منطي حجايه والموضوع مابي مناقشه

امي كلتله

- زين ال؛؛؛؛؛؛؛؛ بعدها حتى مجايتها

كلها

-باجر تاخذيها للدكتوره وخل اشوفله حل

اني كاعده وصافنه ودموعي تتجاره على خدودي مدري من القهر مدري من الصدمه مدري من احلامي وحياتي الي خططت الهه قبل ساعه واجه ابويه خرب كلشي عليه

المهم طبيت للحمام بقيت ابجي ابجي انوب سبحت وطلعت وره شويه اجت امي جان تكلي

- حبيبتي باجر شعندج

كتلهه

- عندي امتحان

كالت

-هاااا ماشي يمه من ترجعين نروح اني وياج للدكتوره

اني سويت نفسي مسامعه الكلام مالتهم
كتلهه

-ليش يمه

جان تكلي

- لازم انسويلج فحوصات انتي هسه كبرتي مو طفله

كتلهه

-ماشي يمه

وطبعا اني ماعندي امتحان وحته دوام شبه ماكو جان بس اريد اروح للمدرسه علمود افكر براحتي والكه حل النفسي شنو اسوي ويه هاي القضيه

وره مرحت المدرسه شافتني المعلمه كالت

- ماكو دوام

كتلها

- ست دا اخذ المرشحات مال امتحان

انوب رحت كعدت بالساحه وبقيت صافنه شراح اسوي ابويه المن يريد يزوجني شلون بيه يارب ساعه ابجي ساعه اكول خلي اتزوج واخلص من هاي العيشه

بعدين صفنت كلت لازم يصير عندي اراده ميصير انهز من... اول موقف لازم امي توكف ويايه وتساندني امي فقيره من اهل الله متعرف تتصرف ...ف لازم اني الي اتصرف اني اذا تزوجت راح تخرب حياتي لان اني بعدني ممكمله دراسه اوف ربي شلون ورطه

بعدين قررت احاجي امي واكله اني سمعت حجيكم وفهمه
انو اني عندي طموح

من رجعت البيت تغدينه وامي تنظرني اكمل حته تاخذني للدكتوره ف كملت ورحت وياهه بملابس المدرسه
بالطريق حجيت وياهه كتله

- يمه تذكرين من جنت زغيره وتكليلي لتزوجين اله تكملين دراستج

امي باوعت عليهه عيونه.... دمعت اني كلت لازم اكمل كلامي وياه....
كتله...

- يمه اذا نضل وره ابويه حياتنه تدمر شفتي اماني ومحمد راحو من ايدنه من وره ابويه
يمه انتي جنتي تزرعين بيه الثقه انتي خيلتي عندي طموح اكمل الدراسه الي انتي ماكملتيهه ليش.... هسه تردون تزوجوني شنو لكمتي ثكيله عليكم
باوعت عليه ولزمت ايدي

- فدوه اروحلج زهوره حبيبتي....

وبقت اتبوس بيه

- يمه صايره تعرفين تحجين

وبقت تبجي كلتلي

- يمه انتي هواي تحملتي ضلم من ابوج واني وافقت ع زواجج اكول بلكي ترتاحين بالزواج وتخلصين من ابوج وهم ابوج

كتلهه

-يمه مهما يكون هوه ابويه كلشي اتحمل منه يضربني ايهين بيه يغلط عليه اتحمل منه ...كلشي بس مو ....اتزوج واحد لا اعرفه ولا يعرفني ولا اعرف شنو مصير حياتي ويا يمه فدوه اروحلج سدي هذا الموضوع انتي تعرفين شلون تسكتين ابويه

امي كلتلي

-ماشي حبيبتي

من دخلنا الدكتوره...
امي طلبت منها تكتبله تقرير انو الرحم بعده مو كامل النمو وميصير تتزوج هسه
امي اخذت التقرير شوفته الابويه ياله ابويه صرف نظر عني وعافني
من اقترب موعد الامتحانات اجه ابويه كال

- يله لمو غراضكم والاشياء والاوراق المهمه وامشو للحله راح تصير حرب

راح ابويه جاب سياره كيا وحمل بيه
غراض مال بيت جدي واخذ عماتي من الصبح ذبهن بالحله ورجع علينه
هم حملنه غراض ورحنه للحله
يم كرايب ابويه رحنه استقبلونه العالم وفرغولنه غرفتين
بقينه احنه نسفط الغراض وعماتي عايفات غراضهن وملتهيات بالسوالف والضحك
اخوتي حسن وحسين ابد منزلو جانو بالجيش وحتى
منعرف شلون نوصل الهم

وامي باله يمهم بس تفكر بيهم وتبجي عليهم
واني وياهه ابجي عليهم

مع العلم همه حته قبل ما يرحون الجيش مالهم علاقه باحد بس بنفسهم حته ميدخلون بشي
ف مجنت حاسه بوجودهم بس مهما يكون همه اخوتي واني احبهم

عندي عمتي ممتزوجه حطت عينهه ع واحد من ولد الحله اسمه سامر
طبعا سامر طويل ابيض وعيونه عسليات وشعره اشكر وعمتي اكبر منه ب 6 سنوات بس هيه كتلت نفسه عليه طول الوقت كاعده وتسولف ويا ومن تشوفني احجي ويا تتخبل وتضل تصيح عليه روحي طبي جوه جانت دائما هيه ويا يفترون بالبساتين مالتهم ساعه ساعتين وترجع

طبعا ابويه ميدري بيهه باعتباره جبيره وفاهمه الامور وماعدها هاي السوالف