عايشه >> حطيتهن في الدولاب في وحده فيهن سوده سمحه تو انوتيها لك
انا >> السوده لالا ما نبيهاش " اذكرت أنها هذه السوريه اللي تحبها ديدا "
عايشه >> عليش ؟ سمحه و من أول ما جيت ما شفتكش لابسها
انا >> كذا جيبيها
خشت عويشه جوا و جابتها ليا // و لما مدتها ليا طاحت منها ورقه
طبست خذيتها و فتحتها // و أول ما جت عيني عليها عرفت الخط ع طول خط فريده
كنت نذكر أيام قريتها في الجامعه و كانت تكتب جنبي
عايشه >> في حاجه ؟؟
انا >> لالا / خوذي السوريه و حدديها خلاص
عايشه >> تم باه " و خشت جوا "
كان مكتوب في الورقه " اكريم ليا كم يوم انجي لحوشكم و مش قادره نشوفك ، معش عرفت شن ندير بس قلت نكتبلك الرساله هذه و عارفتك تحب السوريه هذه كيف ما انا نحبها ، رايفت عليك واجد و عارفني نتحملش نقعد بدونك ، لما تقرأ الرساله هنكون محتاجتلك بجد لأنك طالما مازلت ماشفتها معناها مازلت ما حكيت معاك ، نحبك انا "
فنصت زين و حواجبي ارتفعن بروحهن / هه أمتي كتبتها ازعمك ؟؟ عصرتها بين أيديا بس في آخر لحظه رديت فتحتها و طبقتها كويس و حطيتها في جيبي
شويه هكي و خذيت السوريه و خشيت غيرت أدبشي و طلعت للمحل
#
#
#
سنـدس >> وين ماشيه ؟؟
فـريده >> اكريم هوا اللي ع الباب
سنـدس >> بالك تبطلي هبال يا بنت راك تمرضي بس
فـريده >> انتي ما تعرفيش اكريم تي هوا يحبني و يموت فيا
سنـدس >> عطه موته تأخذه باهي 😒
فـريده >> بعيد السو عليه تي اسكتي
سيـف >> ديدا // وينك
سنـدس >> خش خش
سيـف >> وين اختك ؟!
سنـدس >> أهي امصبيه عند الروشن
سيـف >> كنها ما ترد باهي ؟
فـريده >> نعم نعم
سيـف >> عادل كان لوطا
فـريده >> كنه ؟؟ صاير شي ؟؟!
سيـف >> لالا ما في شي // كان امخطم بالصدفه و قالي البنات يبنك غادي
فـريده >> و أنت شن قتله ؟
سيـف >> قتله تو نقوللهآ و كان تبي تمشي تو نشيلها
فـريده >> خلاص معناها مع العصر هكي
سيـف >> تمام باه /
فـريده >> دوسا شن رأيك تمشي حتي انتي ؟
سنـدس >> لالا امشي انتي و غيري جوك
فـريده >> براحتك
#
#
#
عادل >> أها كنت عندهم و قلت ل سيف
أميـره >> باهي تمام
رحمه >> أميره تبيك عمتي
أميـره >> حاضر هي
عادل >> اووو رحمه ليا أيام عليك / شن اخبارك و شن دايره
رحمه >> الحمد لله امكسدين و خلاص
عادل >> و شن اخبارك انتي و عصام ؟
رحمـه >> بخير
عادل >> باهي كويس
عصام >> رحمه تعالي شويه
عادل >> غير اطلق السلام بس
عصام >> مش وقتك انت توا
رحمه >> نعم
عصام >> الحقيني فوق
رحمه >> حاضر
<
<
<
رحمه >> نعم ؟ كنك شكلك مضايق ؟
عصام >> مش عيشه هذه الصراحه و صبرت عليك قلت بالك البنت اتغير و انتي شي
رحمه >> بسم الله شن في ؟
عصام >> مش عارفه شن في ؟ فهميني كان ما تبينيش ليش وافقتي من الأول ؟
رحمه >> قتلك نبي شوية وقت
عصام >> شويه قد ايش ؟؟ شوفي انا كم متزوجين
رحمه >> بس مش قلت نصبر عليك
عصام >> و لصبر حدود يا ستي // قدام هلي ع أساس جونا تمام و انتي عند توا مش قادره تبحتي فيا كويس و انا نحكي معاك
رحمه >> يعني معش تبي تراجي ؟ تبي كل حد يمشي في حاله ؟
عصام >> كان هذا اللي يريحك ما عندكش مشكله و يا دار ما دخلك شر
رحمه >> تمام باه
/
/
/
سيـف >> واتيه و لا مازلتي ؟
فـريده >> هيا آهو طالعه
سيـف >> خذيتي نقالك ؟
فـريده >> أها في الشنطه
سيـف >> تغديتي تمام ؟؟
فـريده >> أها و ما تخفش كويسه انا
سيـف >> اركبي باه
فـريده >> في حاجه تبي تقولها ؟
سيـف >> صاير شي بينك و بين اكريم ؟؟
فـريده >> شي كيف شنو ؟
سيـف >> مش عارف بس حاسس انه في حاجه
فـريده >> و شن اللي خلاك تحس هكي ؟
سيـف >> غيبته هكي فجأه مش شو بلاش
فـريده >> الله أعلم عاد
سيـف >> اهم شي جوك تمام انتي ؟
فـريده >> الحمد لله
#
#
#
كاين جوي عادي في المحل بس ما تجي عيني ع الدبله اللي في يدي يقعد خاطري نرن عليها // عشان نعرف ليش دارت هكي بس ؟؟ في شنو غلطت معاها انا ؟ في ايش قصرت بس ؟؟
زعمك شن جو الشباب و شن دايرين بدوني ؟؟ عارف روحي لو قلتلهم ع مكاني ه ايجو و يروحو بيا و هذا ليش ما نبيش حد يعرف
صاح رايفت عليهم كلهم بس لازم نقعد قد قراري و مهما يصير مش ه نضعف و نرد
~
~
~
أسمـاء >> اهلين اهلين
فـريده >> اهلين بيك
أسمـاء >> تفضلي
فـريده >> سيف خلاص لما نبي نروح تو نكلمك
أسمـاء >> تفضل يا سيف / الشباب قاعدين جوا
سيـف >> السلام عليكم
أسمـاء >> و عليكم السلام // خشو خشو
عماد >> اوو اوسيفا يا مرحبا
سيـف >> مرحبتين
عصام >> باهي اللي شفناك
سيـف >> و الله معش نفضى واجد
عادل >> ربي يزيدك يا سي
سيـف >> باهي شن اخباركم ؟
عماد >> كويسين عمل و قعده في الحوش
سيـف >> ما فش أخبار جديده ع اكريم ؟؟
عصام >> آخر رساله دزها ل عادل كانت من 3 أيام هكي
سيـف >> باهي شن نظامه ؟؟ يعني عند أمتي ؟
عادل >> العلم عند اللہ
#
#
#
أميـره >> خير خير يا خيا
فـريده >> اهلين أميره " و اضبطتها و قعدت تبكي "
أسمـاء >> لا حول ولا قوة إلا بالله
رحمه >> غير اتوجعي عيونك يا فريده
أميـره >> ابكي ابكي حاسه بيك
فـريده >> خلاص مش قادره نتحمل بدونه
أميـره >> أن شاء الله ه تردو لبعضكم
فـريده >> هوآ قالك هكي ؟؟
رحمـه >> قعمزي بس و خوذي نفس
فـريده >> أميره احكي ؟؟ اتصل بيك ؟؟ قالك مازلت نحب فريده صاح ؟
أميـره >> كيف ما انتي تحبيه حتي هوا يحبك
أسمـاء >> كان عندكم نصيب في بعضكم ه يردلك أن شاء الله
رحمه >> أن شاء الله // نمشي ندير قهوه ما تهدرزنش شي إلا لما انجي
أميـره >> باه تمام
أسمـاء >> ديدا شن رأيك اليوم اتبتي هنا
فـريده >> لالا / ماما رايحه امدققه عليا
أميـره >> تو يحكي معاها عادل و اصلا بكرا نبو نمشو لحوشنا غادي و تو تمشي معانا
فـريده >> مش عارفه عاد
#
#
#
روحت لحوش عمي في الليل و راسي صداع بكل
نوريه >> كنك ؟ مريض و لا ايش ؟؟
انا >> راسي يوجع فيا و مش ناقصك را
نوريه >> باهي تو نجيبلك شي دواء
انا >> غير اطلعي و سكري الباب نبي نرقد
نوريه >> راجي بس
انا >> يا عليك موال درته لروحي 😒
طلعت نوريه و شويه هكي جت و معاها الحبوب و طاسة اميه
خذيت الدواء و مازالت امصبيه
انا >> كنك ؟
نوريه >> نبي نحكي معاك في حاجه
انا >> احكي و لخصي
نوريه >> شن يبي يصير توا ؟
انا >> في شنو ؟
نوريه >> فيك انت و هذك
انا >> سكري ع القصه يكون خير
نوريه >> فات فيك معش تبيها خلاص افسخ الخطبه و خليها تشوف حياتها
انا >> حتي هيا ه تشوف حياتها يعني مش واقفه عليا انا
نوريه >> بس يكون احسن لو يعني الكل يعرف
انا >> انتي غير ريحي روحك بس
نوريه >> نحكي عشان مصلحتك
انا >> مصلحتي نعرفها بروحي
نوريه >> كان تعرفها را ما سيبت بنت عمتك و مشيت خطبت وحده آخره
انا >> تسكري ع الموضوع و تطلعي و لا انا نمشي برا ؟؟
نوريه >> تو نطلع و فكر في كلامي كويس
طلعت نوريه و انا رديت ع السرير و نبحت في السقف // تي من جدها هذه ؟؟ عويشه كيف أميره بضبط و عمري ما فكرت فيها أكثر من هكي
عنجد هذه و خلاص ،، نرقد خيرلي
<<
<<
<<
أميـره >> رحمه // ديدا هيا نوضن عاد
أسمـاء >> مش منهن أمس ساهرات
رحمه >> نضت خلاص / شوفن فريده
فـريده >> واعيه اصلا
أسمـاء >> صبن باه عشان نفطرو بالمره
رحمه >> هيا هي
أميـره >> نركب نشوف عادل شويه و انجي
أسمـاء >> باهي بس ما اطوليش
فـريده >> عماد وين ؟؟
أسمـاء >> كان في المربوعه بس نزل لوطا
فـريده >> تمام باه
/
/
/
أميـره >> صباح الخير
عادل >> صباح النور
أميـره >> فطرت و لا نديرلك ؟
عادل >> فطرنا لوطا كلنا
أميـره >> باهي صحه
عادل >> بس امي كانت منفصله را
أميـره >> عليش ؟
عادل >> قالت زوجتكم عشان انتريح مش نرد انفطركم من جديد
أميـره >> معاها حق و الله
عادل >> نبصر يا هبله تي هيا في صفك انتي و الكنات الاخرات أكثر من عيالها
أميـره >> ربي يخليها لنا
عادل >> آمين يا رب // فطرتي انتي ؟
أميـره >> البنات توا كيف ناضن و اسماء اتوتي في الفطور
عادل >> باهي تمام / قالي عماد يبي يشيلكن بس قتله تو نشيلكن انا
أميـره >> باهي تمام
عادل >> خلاص عدي افطري و بعد توتن قوليلي
أميـره >> تم باه
~
~
~
رحمه >> تي هيا نراجو فيك
أميـره >> كنت نحكي مع عادل و قالي تو نشيلكن انا
أسمـاء >> باهي كويس
أميـره >> فريده كنك ما تأكلي ؟
فـريده >> ما عندش نيه
رحمه >> حتي أمس ما تعشيتيش كويس
فـريده >> لما انجوع تو نأكل
أسمـاء >> اشربي طاسة الحليب باه
فـريده >> بجد مآ عندش نيه
أميـره >> عشان خاطر اكريم باه
رحمه >> خلاص ما تقدريش تقولي لا توا
فـريده >> هاتيها باه
أسمـاء >> نمشي انلبس حمادي و سقدنا انتن
رحمه >> و انا نركب انوتي شنطتي
أميـره >> شنطة شنو ؟
رحمه >> نبي انبات عند ماما كم يوم هكي
أميـره >> صاير شي ؟
رحمـه >> تو نحكيلك غادي
أميـره >> باه
>
>
>
طلعن من الحوش و شالهن عادل غادي
أميـره >> وين نازل ؟
عادل >> نبي نخش جوا كيف وين نازل ؟
أميـره >> نبو انضمو الحوش و بعد نكملو تو نرن عليك
عادل >> باهي ننزل نشرب قهوه و بعدها نطلع
أميـره >> باه
و أول ما خشت أميره للحوش بدت تبكي
عادل >> توا ليش البكاء يا روحي
أميـره >> مش متخايله الحوش بدونهم 😭
عادل >> وسعي بالك " و اضبطها "
أميـره >> رايفت عليهم و ع اكريم يا عادل 😭
عادل >> كان مر شهر آخر و ما جاش ه نعرف المكان و نمشو
أميـره >> وعد ؟
عادل >> اكيد
أميـره >> باهي تريح في المربوعه و تو نديرلك قهوه
عادل >> باه بس ما اطوليش عليا
أميـره >> حاضر
~
~
أميـره >> رحمه مشت لحوشهم ؟
أسمـاء >> أها
أميـره >> باهي خلينا انضمو عشان نمشو نسلمو ع عمتي صالحه
أسمـاء >> تم و بالمره نسلمو ع عمتي نعيمه قالو يبو يطلعو عرس موسى بس عائلي عشان ماما
أميـره >> حي كان ما تسمعها رحمه القصه هذه
أسمـاء >> تو أمها تقولها لها
أميـره >> وين فريده ؟؟
أسمـاء >> كانت امصبيه هنا مش عارفه وين مشت
أميـره >> دار اكريم مفتوحه اكيده فيها
خشت أميره لدار و لقيت فريده طايحه ع الوطا و في ايديها الصور و طلعت تجري تنادي في عادل
<
<
<
#بعد_مرور_سنه
انا >> خلاص توا طالع من غادي
عادل >> و اتجيب كل ادبشك معاك يعني خلاص ترد هنا رسمي
انا >> تم يرا و انت ساكن
عادل >> ه نرجوك ع الغداء را
انا >> تمام باه
عادل >> تشاو
انا >> سلام
سكرت من عادل و قعدت انحط في باقي أدبشي في الشنطه
عايشه >> ليش وأخذ الدبش كله ؟ معش تبي اتجي صاح ؟ 😞
انا >> سنه كامله و انا هنا خلاص
عايشه >> في حد ضايقك هنا ؟ تعودنا عليك و الله
انا >> لا و الله ما حد ضايقني و جميلكم فوق راسي بس ما قعدت إلا واجد // نبي نرد لحوشنا و نشوف عملي و البنات
عايشه >> ما هو قعدنا كل بعد فتره ايجن
انا >> مهما كان خلاص و أن شاء الله ه نجي زياره
عايشه >> تمام أهم شي تكون متريح و كيف ما قتلك من قبل " الدنيا ما توقف ع حد "
انا >> اصلا كان في حاجه تبي تخليني نرد غادي هوا كلامك هذا ^_*
لميت باقي الدبش و سلمت عليهم و طلعت شور بنغازي
#
#
#
أميـره >> مش مصدقه انه يبي يرد آخره
عادل >> خلاص كلمته و طلع غير وتو غداء كويس
أسمـاء >> من أمس و نحن انوتو
عصام >> رايفنا عليه و الله
رحمه >> أميره كلمتي فريده ؟؟
أميـره >> أها من أمس رنيت عليها
عادل >> اصلا كلمت عيت عمي كلهم ع الغداء بس مش عارف ه يجيو كلهم و لا لا
عصام >> اهم شي كلمتهم و هما أحرار
أسمـاء >> و بعدين كان ما جوش معاهم حق يعني واحد خاطب بنتهم و سنه كامله ما يدورهش يعني لهم حق يديرو أي شي
عادل >> خلاص فكونا من الدوه هذه و اللي عندها حاجه اتصبي اديرها
عصام >> و تهزب آخره :D
عادل >> صوت الباب صبي شوف من
أسمـاء >> زعمك اكريم
عادل >> لالا عاد دوبه طالع قلنا
~
~
~
و انا في الطريق كنت نسوق بسرعه و متحمس يعني مش عارف ليش فرحان اني نبي نرد
و نبي نشوف الشباب و أخيرا // زعمك شن صاير معاهم ؟؟ مازالو نفس ما هما و لا تغيرو ؟؟
#
#
فـريده >> دوسا مازلتي ؟ سيف يراجي لوطا
سنـدس >> شويه بس نرد ع سالم و ننزل
فـريده >> بسرعه باه
~
~
سنـدس >> الو
سالم >> ضروري بعد نص ساعه تردي ؟
سنـدس >> كنت نلبس بس
سالم >> ع وين ؟
سنـدس >> ما هو قتلك نبو نمشو لعيت عمي عشان اكريم امروح
سالم >> أها باهي كويس
سنـدس >> اكيده تراجو فيه ؟؟
سالم >> لالا و فوتي القصه
سنـدس >> تمام باه
سالم >> خلاص ما نعطلكش و بعد تروحي تو نحكو
سنـدس >> تم
طلعت فريده مع سندس و سيف و مشو غادي
~
~
عمران >> قالو اكريم امروح
سفيان >> يوصل طيب شن نبو نديروله
عمران >> يعني مهما كان مش مفروض نمشو
سفيان >> تبي تمشي امشي كلا انا مش شوري / شوف صاحبه هذك ؟
عمران >> حتي منعم راقيله و قال مش ماشي
سفيان >> احسن
#
#
#
و أخيرا خشيت بنغازي و قلبي يدق بسرعه // و طول الطريق و عادل يرن و نقوله مازلت
خشيت شارعهم و درست غادي لقيت سيارة سيف و قلت يستر الله
نزلت و دقيت ع الباب الرئيسي و شويه هكي و انفتح الباب و كانت رحمه
انا >> السلام عليكم :D
رحمه >> ححححي جيت اهلين اهلين
انا >> وطي صوتك بس :D
رحمه >> و أخيرا تي أميره ه تنهبل
انا >> وين قاعده ؟؟
رحمـه >> في شقتها فوق / تفضل تبي تقعد امصبي هنا
خشيت مع رحمه و ما شاء الله كانت حامل // خشيت للمربوعه و لقيتهم ملتمين
سلمت عليهم و لما جيت عند سيف مش عارف ليش حسيت بحاجه غلط و اضايقت
عادل >> اركب فوق ل أميره مش ه تقدر تنزل
انا >> تم
عصام >> نراجو فيك بالغداء جعنا را :D
انا >> شويه باه :D
سيـف >> شن اخبارك يا أكريم ؟؟
انا >> الحمد لله // تو ننزل و نهدرزو
ركبت فوق لدور ال 3 اللي فيه شقة أميره و دقيت الباب
و فجأه فرررريده هيا اللي فتحت الباب !! فريده أها ؟؟ نفسها فريده
بس كانت ماسكه عيل صغير في يدها // مش عارف شن حسيت بس عرم مشاعر جن في نفس الوقت و اللي جا وقتها ع لساني
انا >> مبروك مبروك
فـريده >> الله يبارك فيك و عقبالك 😌
