39
ومتدرين ...
سماره: والمتواعد يتواعد الصبح ....
رؤى : بكل وكت ... يجوز طلبه وتطلع من المدرسه ... متكدر الا الصبح ... هو يحب المزعطه ... كل صديقاته قبل بعمرج وشويه اكبر ... بس فرح حبها بعمره
سماره: هذا الحجي قبل الزواج هسه ماعنده شي
رؤى : بكيفج اني ردت انبهج ...
سماره: تسلمين ... لعد غير انتِ اختي وتنبهيني.. خايفه على بيت اخوج
رؤى: اي طبعا ما اقبل عليه يدور وراج ... يله اني اروح
سماره: صح اعرفها دنغيزه ... بس لعب قلبي گلت اخاف هاي تعرف شي وددك على هيج موضوع .... وصدك تريد تنبهني
بقيت ألوب ... وبس اريده يرجع ... لان تأخر ... روحي طلعت الى ان فتحتله الباب ... صاير احمر من الحر ...
سماره : هلو وين جنت
منذر: هاي شكو شنو هالاستقبال ...
سماره: فشلت لان يوميه من يجي احضنه وابوسه واگله حبيبي وحياتي و الله يساعدك لو اواسي على الحر والتعب ...)
جاوبته لا حبيبي مو بقى بالي
منذر: حبيبتي طلعت اكمل ... اوراق النقل مالتج لهاي المدرسه الي بظهرنا ...هسه يله كملت ...
سماره: بداخلي اتندمت على كل دقيقه شكيت بي ... وطلع الرجال يركض وشايل هم مدرستي ... وهاي خلتني اصدك بيها
مرت العطله ... وبدت المدرسه ....
اول ايام يوصلني الصبح واني ارجع ...
بعدها تعلمت... اروح وارجع ... وهو ممقصر ويايه ... حتى يدرسني ... ومن يشوفني التهي بالشغل والطبخ يصير عصبي ... ويگلي كلشي لتسووين ... اقري ... حتى اكله غيره لخاطري
گام ياكل اي شي بسيط ... حتى ما التهي ...هو هم طموح وهالشي ساعدني ...لان يعتبر نجاحي نجاحه ...وجانت شغلة
تحدي لاهله ... لان كلها بالها يمي ... ومترقبه شطلع ويسألوني على درجاتي ومستوايه ...
بهالسنه يرجع من الدوام ميطلع من البيت لو ويايه ... نروح لبيت اهله لو لبيت اخوته وخواته لو نطلع ... بأيام العطل وبقيه الايام من عدنا دوام مكابلني ...
وشكد احسه يحبني ويخاف عليه بس ... مو مثل من اتمرضت بالشتا ... عبالي افلاونزا ... تخبل مخليتي بخضنه وكاعد ... بنص الليل صارت عندي ألام ... راح يركض على بيت رؤى ... تجي وياه اخذني للمستشفى ...صار عندي اجهاض ... هستوني حامل ... وما ادري بنفسي ... وصاير عندي داء القطط
بسببه اجهضت ...همسه بوكتها گلتلي وصلنا للمستشفى لگينا منذر عيونه حمره مبين جان يبچي ... وخاله بقت تهدي ماكو شي لتخاف ...
وراها طلعت من المستشفى ... رجعت للبيت بنفس اليوم ذبح ذبيحه ... وبقى مداريني .. مقبل احد يبقى يمي گلهم اني يمها
وراها بديت اتعالج ... لان خفت اهمل نفسي وبعدين من نريد طفل ميصير
....وصلت للاربعين يوم ... حياتي بس دراسه وهو ويايه ...
بهالفتره مو رجلي ابويه ... يجي من الدوام يرتاح ساعه ساعتين
وراها يجيني للهول يتمدد وياخذ الملازم ... ويسألني واني اجاوبه ( المواد الحفظ) ... لو يكتبلي مسائل ... اغلب الطلاب يخلون مدرسين اني محتاجيت لان هو ساعدني بالاخص بالمواد العلميه ... الي من ضمن اختصاصه ...
ومرات يشاقى ويايه يگلي اذا مطلعتي مجموعه طبيه وفشلتيني ارجعج لاهلج اگلهم ... غشيتوني
كملت الامتحانات .... وطلع قبولي .... طب محافظات ...
لليوم اتذكر ...ابتسامته وفرحته من عرفنا نتيجة القبول ومن دخلنا لبيت اهله وجان گايللهم بالتلفون طلعلها طب .... ولليوم اتذكر احساس النصر الي جان بداخلي كدامهم ... كدرت اوصل للي اريده ... واتذكر فرحة امي ...
واتذكر كل گلمه گالها منذر من رجعنا بليل نايمه بحضنه
منذر: لج والله رفعتي راسي ... اني اول واحد صدمتي بقوة الاراده الي عندج ... لان الصدك ورا ما صار عندج اسقاط
خفت لا يأثر على نفسيتج وشفتج تعبانه كلت ... بس لا ...
مراح اطلع ...معدل والحظ يخونها
بس والله طلعتي سباعيه ... وهالاسبوع ادخلج دوره اعلمج سياقه .... واشتريلج سياره اداومين بها كليه
سماره: لو ما انت بظهري .. مجان كدرت اطلع هالمعدل ...
منذر لو تدري شكد احبك ... مرات احسك ابويه ... مو رجلي
