40
سماره: بهالفتره بدا منذر يعلمني ... سياقه ... لان مقبل اتعلم على ايد مدرب ...ووقت الحصص اغلبها هو ميكدر يتواجد ويايه لذلك قرر هو يعلمني العصر ... بداخل المجمع بعدين بدينا نطلع بين الافرع ... الى ان اتعلمت ... بفتره الي جنت بيها بالسادس ... بحكم ملتهيه دراسه ... قليل التقي باهل منذر ...
ورؤى ولدت التهت بأبنها وخاله التهت وياها ... جنت خلصانه
من الحجي والتدخلات ... لكن بدت تصير مشاكل بيني بين منذر بسبب القبول ... مقبل .... اداوم طب بالمحافظه الي طلع بيها قبولي .... واني جنت بالاول مصره .... ادخل طب ....
بقى فتره زعلان مني ...
سماره: منذر اني تعبت حتى احصل هالكليه .... وانت معارض
منذر:انت تشوفيها راهمه اداومين ... خارج بغداد ...
سماره: شكو بيها لخاطري وافق
منذر: لا ما اوافق ... الي عندي گلته وانت بعد بكيفج اذا تكدرين تعوفيني ... ونبقى كل واحد بمكان .... روحي قدمي اوراقج ...
سماره: منذر هو فرض رأي ... ولازم اني اقبل بي بالغصب
منذر : ما اغصبج على شي گتلج فكري ... وشوفيها ترهم
سماره: انت اول واحد فرح من طلعلي طب
منذر: صح فرحت... ورفعتي راسي كدام اهلي ولو مطلعة طب ببغداد ما اعترض ...
سماره: بس اني اريد طب ...
منذر: سوي الي تريدي .... لترجعيلي ....
سماره: عافني وراح للهول سد الباب .... لليل دكيت عليه الباب
تعال تعشا
منذر : ما اشتهي .....
سماره: ترى ميصير انت تزعل ... على شي انت تريده ومتفكر بيه
منذر : سدي الموضوع ... سوي الي تريدي ...تصبحين على خير
سماره : ثاني يوم راح للدوام حتى مكعدني اسويله ريوك .... ورجع من الدوام ... محجيت ويا شي ... دخلت للمطبخ اصب الغدا
رحت اصيحه لگيته نايم .... رحت كعدته ... منذر كوم تغدا
منذر: اكلت ...انت تغدي وعوفيني انام
سماره: ضجت من تصرفاته ... منذر كافي هالاسلوب ....
انت تگلي سوي الي تردي ... وانت دتتبع ويايه اسلوب ...
تريد تجبرني ... اسوي الي تريده ... گام من الفراش ... بدل ملابسه وطلع .... عصبني ... بداخلي گلت خلص خلي يزعل وبعدين يرضا....
بقينا على هالحال اسبوع يجي من الدوام ... لو ينام لو يدخل للهول يقفل الباب عليه لو يروح يم علي ....العصر لو يطلع ويجي
بالليل
طگت روحي ... دخلت عليه للغرفه باليل ... لگيته متمدد ويسمع
عبد الحليم ... مغمض عينه
انت مقتنع بوضعك ... عايفني وحدي طول اليوم ... وحتى من موجود بالبيت ... كأنه مموجود ...
منذر: لا والله ما مقتنع ... ومصدوم بيج ....
سماره: بعدني محجيت شي ... اخذ مخدته ... وطلع ... نام بالهول ... بيومها قفلت ادخل طب ...
وبقيت الليل كله ابچي ... لان احس نفسي تايهه بلياه ...
وهو هم ... مبتعد عني ...
ورا كم يوم ...سمعته يحجي بالتلفون ويا اهله ... افتهمت ديگلوله
شو مدتمرون ... گلهم ملتهي بشغله ... ان شاء الله باجر امرلكم ... من اودي سماره لبيت جدها ....
بقى يسولف وياهم ...
من خلص ... رحتله
باجر من توديني لبيت جدي ... ابقى يمهم ... حتى نطلع الصبح اني وجدو اروح للتربيه
منذر: براحتج ... مر من يمي ... راح للغرفه بدل و طلع ... جنت محتصره ... محبوسه بالبيت .... طلعت كعدت بالبلكون ... جنت كلش مقهوره منه ...
ومشتاقه اكعد وياه ونسولف مثل قبل ... مشتاقه لاهتمامه بيه
بقيت ابچي وما اعرف الي اني رايدته ... ولا شنو اختار ...
حسيت بي من رجع ... بس بقيت كاعده بالبلكونه وحدي ...
لان اعرف لو حينام لو يكعد وحده ....
ورا شويه دخل للمطبخ ... وطلع ... شويه ورجع مد راسه من باب البلكونه شافني كاعده ... دخل ... عرفت جان يدور عليه ...
ورا نص ساعة ... اجى
منذر: تعالي يمي
سماره: شتريد ..
منذر: اريد مرتي ... باجر اروح اني اكمل شغلة التقديم ...
سماره: وراح تبقى زعلان
منذر: لا ميفيد الزعل ...أ فتهمت عندج عادي تعوفيني ... كل هالايام ... قنعت تكدرين اداومين وتعوفيني ...
سماره: حسيت بي مقهور وتعبان .... حسيت على نفسي شكد
اني انانيه ودا افكر بشي ونسيت اني اصلا ما اكدر بلياه
مرت عشر ايام ويوميه اشوفه ... ومتحملت لان بعيد عني وميحجي ويايه ... شلون اريد اداوم بمكان بعيد ... وما اشوفه
نزلت دموعي ...
منذر: سماره لتعبيني ... باجر اروح اقدملج ... شكو هالدموع
سماره : منذر اشتاقيتلك .... وصدك ما اكدر بلياك
منذر: لا سماره كدرتي ... وعلمتيني ابقى وحدي ... واني هم
ما اريد افرض عليج شي تبقين العمر كله تعاتبيني عليه
سماره: انقهرت من كلامه لان حسيته مقهور اكثر من عندي ..
