قسيم ريدي

1

بناتي في رقبتك اووع يا احمد ااا اوع تجيب ليهم ضضرة يا احمد خلي بالك منهم ،، و بتي دي تتربي في نص اخواتا حلفتك م تجيب ليهم ضرة يا احمد ،،

يا مرة قولي بسم الله دد ددا دا ككا كلام شنو اذذكري الله انتي حتتعافي و تبقي كويسه و ترجعي بيتك و تربي بنياتك براكي ، و بعدين يا عويرة انا لي حب غيرك اااااااخ يا زهرة آخ مشكلتك ما عارفه انا عايش بيك ، اليوم الما اصطبح فيهو بي وشك دا ماااا بيبقي يوم يا ام البنات ،،

احمد لا اله ......

زهرة بسم الله زهرة لا زهرة لالا يا زهرة اوعي تعمليها يا زهرة لالا ، ققولي وراي قولي يا ززز زز زهرة ، لا اله الا الله سسيدنا محمد رسول الله ،،

لالا .... لااله الا الله س س ..سيدنا محمدا رسول الله ..

لا حول ولا قوة الا بالله العلي العظيم ، انا لله و انا اليه لراجعون ، اللهم لا اعتراض اللهم الثبات لا حول ولا قوة الا بالله ربنا يرحمك يا يا زهرة ...ااااااااااااااخ الله يصبرني علي فراقك مشيتي وخليتي لي حمل تقيييييل يا زهرة الله يرحمك ....

" بعد مرور 20 سنة "

لو سمحت ....

لو سمحت يا استاذ ...

اووف الزول دا اطرش ولا شنو اللهم يطولك يا روح .. يا استاذ بتكلم معاك انا

_ ايووة اتفضلي

انا لي ساعه واقفه عشان اتكلم معاك كلمتين ما بترد علي

_شايفاني فاضي ؟

الرد علي حياخد منك زمن يعني ! و بعدين انت قاعد هنا دا شغلك التطنيش ما حبابو ّ

_خلاص يا اخت انتي حتديني محاضرة في الاخلاق قولي العندك وخلصيني من الوش دا،

لالا كدي لحظة اسي دا اسلوب تكلمني بيهو لا والله لو دا اسلوبك مع الناس تبقي دي عوجة و المكان دا كلووو حيروح ورا الشمس انا ما بشرفني اجادل انسان سطحي زيك م عندو احترام للناس ، عن اذنك ....

_اذنك معاكي ..

اتوكلت و مشيت بس لاخر لحظة و انا ماشه سمعت صوت جهور خلفي ، طبيعي اتلفت

م اداني فرصه و طوالي دخل في الكلام قال لي : ممكن اعرف سبب الجوطة الحاصله دي ؟ و الله يا افندم تقدر تسأل الاستاذ داا لي ساعه بنادي فيهو وشايفني و مطنشني و بتكلم معاي بأسلوب بايخ شديد ..

اتلفت عاين ليهوو .. و قال لي : اتفضلي كنتي عايزة شنو ؟

قلت ليهو ما مهم كنت مقدمة اوارقي و شهاداتي عندكم ليها اسبوعين و اول امس عملت معاينه و الليله مفروض اقابل استاذة وفاق وكيلة السفر والسياحه عشان اعرف اتقبلت ولا لا .. بس حتي لو اتقبلت ما دايره

،، شوفي يا ....

اسمي زهرة ، ززززهرة !!

انتي زهراء احمد ..الخ ، عاينت ليهو بي انتباه

قلت ليهو ايوة انا ، قال لي الملف بتاعك كان في يدي وشفتا شهاداتك واوراقك صراحه انحنا بنعتذر عن الخلاف الحصل مع الاستاذ و بتمني ما تاخدي كلامو علي محمل الجد امسحيها في وشي انا ..

لا عادي يا استاذ حصل خير ،،

طيب ممكن تتفضلي معاي المكتب ثواني ،، تمام .. ( يمكن تكونو استنتجتو انا منو بس حعرفكم بي ) انا زهراء عمري 20 سنة ، ابوي سماني علي امي الله يرحما ، اتوفت يوم ولادتي ، و اسماء اختي الكبيرة هي الربتني عمرها 28 سنة ، انحنا ما شاء الله 7 بنات ما عندنا اخوان اولاد ، اكبرنا اسماء

ماخدة مكان امنا ، بعدها طوالي وجدان 26 سنه مخطوبه لود عمتنا ، و بعدها اشواق عمرها 25 سنة برضو مخطوبه ، و سماح 23 سنة ، و امنيه و اماني تومات22، وانا زهرة اصغر اخواتي 20 سنة ، ابوي الله يديهو العافيه عايش علي ذكري امي اصلو ما فكر يتزوج بعدهاا مرات بحمل نفسي ذنب موتا يمكن لو ما انا جيت ما كان امي اتوفت ، لكن ارجع واقول ربنا عايز كداا ، وضعنا المادي متوسط و مايل للاحسن بفضل ابوي ما مقصر علينا بحاجه ، عندو مكتب عقارات و بيت ملك و في البلد كمان عندنا بيت جدي ورث .. ( الباقي حتعرفو لقدام ) ..

مشيت المكتب صراحه في نفسي انا استغربتا ليه معاملتو معاي كانت بالاحترام دا و التمسك دا ، رغم اني قدمت بنفسي و واسطتي رب العالمين في خطوط جويه كميه و ملفي كان بترفض قبل يتفتح .. قطع تفكيري ، قال لي : انتي ماشاء عمرك 20 سنة و مثقفه و معاكي شهادات بالعدد دا و خريجة طيران كيف بس فهميني ، قلت ليهو انحنا هنا جاين نتكلم في الشغل مافي حياتي ، قال لي اسف بس حاجة اثارت فضولي ، سكتت ما رديت ، قالي حتنزلي تدريب لمدة تلاته شهور بنص الراتب و بعدها حتستلمي وظيفتك ، قلت ليهو عفواً بس اتدرب ليه وانا ماخدة كورس مكثف و عندي خبرة كافيه و الشهادة قدامك موثقه ،

لحظة ما انتبهتا ، يعني انتي كنتي شغاله قبل كدا ؟ لا كنت بتدرب فترة الدراسه والتطبيق العملي عشان انزل شغل طوالي ، قالي حلو صراحه ما قادر اخفي انبهاري بيكي ، قلت ليهو لا عليك الله اخفيهو ....

استكانة☕️~