قسيم ريدي

15

قمتا ناطه ، ولا شعورياً

قلت ليهم مستحيل بصوت عالي و غضب ظاهر فيني ، طبعا ردت فعلي غريبه شديد

و اكيد اسماء ما حتفوتا ، قالت لي طيب كان ممكن ترفضي براحه ، بس ردة فعلك دي ما طبيعيه زي الكاتلين ليكي رقبه ،

قلت ليها اسفه ما بقصد بس انا ما دايراهو ، قالت لي اها دايرة منو ؟

سكتا و قلت ليها ما شرط اكون دايرة زول المهم الشخص دا انا ما دايراهو ، قالت لي لحقتي عرفتي وين ومتين ولا شفتي اساساً عشان ترفضي .. طبعا لساني اتربط و عشان اتحل من الموقف دا قلت في سري خير وسيلة للدفاع هي الهجوم ، وطوالي قلت ليها اسماء انتي وقت كنتي بترفضي في زول كان بجي يطلب منك مبررات لرفضك ؟ّ

طوالي طيرت عيونا و عاينت لي من نظرتا لي عرفت ان كلامي كان غلط و كسرتا بخاطراا ، وجدان قالت لي انتي بقيتي ما عندك اسلووب و حالك دا ما عاجبني لكن وحات الله يا زهرة اعلمك الادب ما تش في طولك دا و تقولي كبرتي ، انتي مهما كبرتي حتفضلي في نصنا صغيرة ، فاهمة ولا لا و قبل تطلعي الكلام اوزنيهوو ، اعتذري لاختك ، اسماء قالت ليها تعتذر في شنو وعلي شنو ؟

هي ما قالت الا الحق و ماف زول بقدر يجبرا

، قلت ليها حقك علي بس انا التعبير خاني الناس ديل ما ارتحت ليهم من يوم مشيت ليهم و .... ( انا عارفه ان دي ما حجة ولا سبب و نظراتهم لي زي البقولو لي كاشفنك و ما لقيت عندي سبب مقنع و فجأه قلت ليهم )

انا دايرة رماح لمن انا زاني اتخلعتا في روحي ، عارفاكم حتقولو ان انا زاتي م عارفه روحي دايرة شنوو ، بس حقوليكم انا بحب عمار و دايراهو و ما فكرت في غيرو انما حسام ورماح هما الدهلو حياتي بس انما انا محددة خياري ، بعد كلامي ليهم حسيتهم اقتنعو وملامح وشهم اتحولت بهجه كداا بس حسيت اني مرقت روحي من حفرة وقعت في حفرة اكبر ، قلت الحق اصلح الموقف ، قلت ليهم بس ياريت الكلام دا يفضل بينا لاني لسه بفكر و ما اخدت قرار نهائي ف موافقتي ، و اقتنعو بكدااا و طلعو ليهم والله اعلم حلوها كيف لحد ما فاتو مننا ،

جات الساعه 9 بليل ، اتزكرت كلام ابوي اني طولتا ما سمعتا فقلت امشي الديوان حقو ، الديوان دا مكان ابوي لصق الصالون بس في حوش كدا منو وحمامات الرجال ، مشيت بقيت انادي في ابوي ، ما رد علي مريت بالصالون علي الديوان مافي ، ولعت النور عاينت م لقيتو وابوي مرتب حاجاتو ما بهبش الا هو يديني ، قلت بكون قاعد برا الشارع ، طفيت النور و جيت مارقه لقيت رماح طالع من الحمام اتخلعنا الاتنين ، م عارفه اتوترتا وانا اصلا بتهرب منه ، قلت ليهو "بتمتمة"

ابوي وين ؟ قالي طلع مع ابوي ، قلت ليها اهاا و بقيت ماشه ، قال لي زهره ....

وقفت وما عاينت ليهو ، قالي الناس الجو قبيل ديل كانو دايرنك صح ، عاينت ليهو قلت ليهو انت ما كنت حاضر ؟ قالي كنت موجود و من لحظة دخولهم انا عرفت دي فيها سيرة زواج بس قلت يمكن وحدة من اخواتك ، بس لمن جات سيرة اسمك استاذنت و طلعتاا ما قدرت اتم الجلسه للاخر ..

بي حماقه مني قلت اختبر ردة فعلو ، قلت ليهو ااي فعلا قالو دايرني و شكلهم ناس محترمين فاا انا و .. و" بقيت بقطع ف الكلام متعمدة" .. قالي اها فهمتا و صر و شو ومشاا ، والله ما قدرت اتحمل صرة وشو دي من غير ما احس قلت ليهو لحظة و مسكتو من يدو بس قصدي اوقفو ، بس وقف وانتبهت اني ماسكة يدوو ، فكيتا لمن قبل عاين لي الكلام لمن راح ، قلت ليهو اسفه مسكتك عشان انبهك ماا بقصد "و باقي الكلام خارم بارم" 😂 ، هو ابتسم كداا قالي الموضوع م محتاج الشرح دا كلوو ، قلت ليهو اااا انا ، اناا بب بس كنت عايزة اقوليك اني كنت بهزر معاك م وافقتا عليه و ... بس م حسيت الا بيدو علي شفايفي قالي اششش دا المهم ما تكملي و انا لسه عندي فيك امل انك تكوني لي و حكون منتظر و ما ح ازهج لحد اليوم دااك .. بقيت منططة عيوني و جري علي الغرفه و كنت بدعي م القي وحدة من البنات في وشي لاني متوتره و ظاهر فيني شديد .. بس خشيت الغرفه قلعت التوب وبقيت قاعده لمن عرقتا من التوتر احساس غريب كداا ..

حتي وانا بأحساسي دا مسكت التلفون علي امل القي حاجه من عمار و للاسف ما لقيت ، و جات وجدان ،، قالت لي والله ياخ محرجه ، قلت ليها من شنو ؟

قالت لي م عارفه اقول لنعمة شنو ،

قلت ليها نفكر و كمان يومين كدااا بنديكم رد

قلت ليها دي م فيها احراج ، دا زواج م لعب

قالت لي فعلاا و مشت ..

رغده اتصلت علي قالت لي ياخ طولنا من بعض دايرين نتلاقى ، طبعا اتحججتا ليها و ما ناويه اشوفهم تاني كفاية القرف الدخلتا روحي فيهو وصغرتا نفسي شديد ،

جا يوم السبت و من البيت ما طلعتا قاعده احفظ عشان اسمع لابوي ، و مرة اتونس مع اخواتي بحاول اصلح غلط الايام الفاتت ، لحد ما جا الاحد المنتظر و لسه في تفاؤلي الشديد داااك ، لحد ما صحيت و لبستا و فطرنا

و اتحركنا انا واسماء و اشواق ، كانت الساعه 9:30 .. و صلنا هناك عشرة

ما نزلو معاي انتظروني في العربيه ، و انا منتظرة ادخل مكان المقابله بتاعت المرة الفاتت ،، اكتر من ساعه الا ربع انا قاعده في مكاني دا ، قريب ساعه ، جاتني وحدة قالت لي انتي ريم احمد ؟

قلت ليها لالا انا زهرة احمد .. قالت لي اممم وعاينت للورقه الفي يدها ، قالت لي بعد اذنك اتفضلي معاي ، قمتا وراهاا ، لمن دخلنا ، ياهم نفس الناس بس الزياده ان في واحد قاعد في كمبيوتر لابس جلابيه و شماغ وكداا ، سلمت ، وقالو لي اقعدي قعده و هاك يا الودوة والهمس والكلام و انا خلااااص اعصابي تلفت ، المرة القاعده معاهم رنت جرس السكرتاريه ، و السكرتيرة جات داخله ، قالت ليها وصل ؟

قالت ليهو ايوة ، قالت ليها خلي يدخل ..

دقايق مافي جاا ضابط داخل و قعد في الكرسي المقابلني ، و شكلو زول 30 سنة كو ما كبير ..

سكت مسافه كدا و انا قلت الناس ديل نسو وجودي ولا شنوو .. بس فجأة الضابط القدامي داا قالي اسمك بالكامل و هو ماسك ملفي ... الكان قدمتو

حسيت بتوتر شديد لمن الكلام راح لي

قلت ليهو انا ؟ ..

استككانة☕️~

يتبع .....