قسيم ريدي

6

قفلت من حسام و فضلت راقدة و نوم مافي
والبيت كله نايم ، اممممم اعمل شنووو اسوي شنوووو امممم ايووووة ، لقيتا ..
مشيت جبت الابتوب حقي ، ايييك زمن منه اخر مرة كان ايام المشاريع ، فتحتو و بقيت ابحث عن اي شركة او خطوط جويه محتاجه لشهاداتي ، فتشتا لمن زهجتا بلا جدوى ..
كدي نشوف الفيس دا مطوله منو عديل ،
للحظة حسيت اني في عالم تاني خالص ، فتحت حسابي ، بعاين في الرسايل ، في نفس اللحظة جاتني رساله من زول اصبا متضاف عندي ، قالي صباح الخيرر
عاينتا كداا مافي بينا رسايل قديمة بس هو صديقي ، اتجاهلت رساله متعمدة ، تاني رجعت قلت ليهو صباح النور و طلعتا ، دخلت حسابي في التلفون و نزلت الماسينجر و قفلتا الابتوب و نشطتا خدمتي ، بعد 10 دقايق رد لي ، رد مني و رد منو لقيت نفسي متجاوبة و بتونس كأنه البتتكلم دي زوله تانيه ، اسمو عمار عشان تكونو متابعين ، لمن جات الساعه 9 لاحظت للزمن و استأذنت و طلعتا ، مشيت جهزت الفطور و صبحت علي ابوي و قضيت يومي عادي مافيهو حاجه تذكر ، لحد قريب المغرب اتصلت علي سلافه ، ما اتوقعتها تتصل ، رديت ليها
*اووه سلاف والله ما اتوقعتك تتصلي
_ ههههه ليه يا زيزي قالو ليك عني كعبه ولا كعبه ، اتذكري كدي انا الشلتا رقمك ي حلوة
*وووب منك ياخ بهظر ، كيفك بالله والله مشتاقة ليكم زي البعرفكم لي سنين
_ والله واحنا كمان اقيفي ادخل رغده في الخط
* اجي و دي كيف كمان !!
_اسكتي ي حبوبه انتي قديمة يختي هههه
.. دخلت رغده و دقيناها و نسه اكتر من ساعه ضحك و هزار ، فجاة سلاف قالت ان عرس اخوها بعد بكرة وان لازم اجي ، و انا موضوع الاعراس دا ما بريدوو ، لكن فعلا انا محتاجة اطل علي العالم دا
قلت ليها خير ي زوله بشوف البنلت واديكي خبر ، قالت لي عديله ، ما قفلت منهم الا لمن جاتني رساله من عمار وحات الله قلبي دا لمن فز ، قفلت طوالي ، و خشيت رديت
** انتي ما بترسلي الا ارسل انا
* لا انا ما لي في الفيس ياداب امس فتحت حسابي
** دا شنو دا قصدك اني تاني ما حقدر اتكلم معاكي !!
*سمح عادي وانت مخلوع مالك حتي لو ما دخلتا
** والله يا زهرة انتي زولة محترمة من اسلوبك عكس بنات الايام دي و غير كدا زوله عاقله و عندك اهداف ..
* م للدرجة دي
**لا للدرجة دي المهم م تغيبي عني و ما لازم انا ارسل ليكي امانه عليكي
* ان شاء الله ( كتبتها بي انبهار و خلعه كدا )
، قفلت منو و واصلنا تاني بعدها ونسه للفجر و كانت اول مرة لي اسهر فيها وانا راضيه ، فات يوم و حاسه اني عندي انسان شخصي بير اسراري و مبسوطه بيهو شديد ،،
جا يوم زواج اخو سلاف زي الضهر كداا ، كلمت البنات رفضو واولهم اسماء ، بس وافقت اني اسوق التومات و ديل اصلا ما بصدقوو ، لبسنا و قشرنا بالمقدور ، و طلعنا علي الصاله ، ( ما حنخش في تفاصيل ، احداثنا لسه طويله ) .. كنت متواصله مع رغده و سلاف لمن دخلنا الصاله اتلاقينا و عرفتهم بالتومات ، عاينت لي رغده و سلافّ
قلت ليهم : دا شنو دااااا ؟
قالو لي بصوت واحد مالك ؟
انتو وين طرحكم ؟
سلاف : ههههههههه دا عرس اخوي ي بت
قلت ليها اها ويعني عرس اخوك مذكور في القران تقلعي طرختك استغفر الله ، جنيتي انتي ؟ فرضا اتحججتي بفرحة اخوي و الطيرة الجمبك دي ، قالعاها مالك ؟
رغده : عرس اخو انتيمتي هههههههه
قلت ليهم اغسم بالله انتو ما نصاح ي بنات فتشن طرحكن الموت والحياة ما معروف اسمعو كلامي .. قاطعنا صوت
انتي يا سلاف الوصله الزرقا القبيل اديتك ليها وينا ؟
قالت ليهو انا كلمتك تلمها بيدك البيت مقلوب محل تلم فيهو حاجه مافي
قاليها بس اديتك ليها يا سلاف ، دي وصلة الساوند بلاها ربة و زنق ماف ... عاين لي شديد اثناء كلامه و ابتسم و وطا صوتو ، قاليها ماشاء الله مش تعرفيناا ، قالت ليهو امنيه واماني م احتاج اقوليك تومات فرق النمش بس ، و دي زيزي ، زهره زمالة شغل وكداا ، قاليها والله سبحان الله ما بتشبهكم عاينو الحجاب والرزانه والحشمة حمدلله غايتو ، و مشا علي كداا ، و انتهت الحفله ، ورجعنا البيت عادي و كالعاده بقيت بتونس مع عمار رغم ان هو برضوو جا داخل متاخر ، فاتو يومين و ابتديت اقول لاخواتي يلا نطلع نتمشي نتسوق كداا ، دايما بيرفضو و قالو لي انتي اتغيرتي يا زهره ، و بيرفضوو يطلعو ، يومي كله مع عمار ،
لحد ما جااا يوم و انا بتونس مع عمار
و ......

يتبع .....