قسيم ريدي

17

رغدة : حصل شنو في شنو مالكم ؟ سلاف اتكلمي في شنو حصل

سلاف : ابداً مافي حاجه ، بس بدت #رحلة_انتقامي_من_زهرة

رغدة : ههههههههه سلاف انتي جنيتي ههه

اسي دخل زهرة شنوو بسم الله

سلاف : رغدة انا ما قعد اضحك ولا بهزر انا عارفه انا بتكلم في شنو كويس

رغدة : سلافه انا بتكلم عن حسام شفتكم منفعلين و ما فاهمه مالكم تجي تقولي لي زهره ..

سلاف : اقعدي اشرح ليكي الموضوع ...

( .....)

نرجع لي صدمتي انااا ، اسماء قالت لي اسي الببكي شنو فيها شنو يعني كان ما قبلوكي دي ما اخر الدنيا في مليون شغل والليله انتي ما عندك شهادة ولا شهادتين ، ملفك دا اي شركة بتتمنى وحدة زيك ،

يا اسماء ارح نتحرك من هنا انا ما عايزة اقيف في المكان دا دقيقة وحدة ، اتحركي يا اسماء عليكي الله ، اشواق قالت ليها اتحركي يا اسماء نصل البيت نفهم الحاصل شنو ،

فعلا اتحركنااا و من الصدمة لمن جسمي ولع نار ، وصلنا البيت بس بقوليهم انا بردانه غطوني غطوني ، و بعدها نمتا و ما حسيت بأي حاجه ، صحيت بعد الفجر لقيت اخواتي كلهم نايمين حولي الفارشه في الارض والراقده جمبي والمدفوسين ف السرير ، انا بالجد عمري ما حأقدر انسي المنظر طول حياتي ، اقسم بالله انا في نعمة من رب العالمين لو عشت عمري كله اركع واسجد لرب العالمين دا ما حيكفي ، فعلا ربنا حرمني من نعمة الام و للحظة بحس اني الحرمت اخواتي كمان من حضن امي و تاني استغفر ربنا ان دي ارادة ربنا ، بس ربنا عوضني بيهم و بي حنانهم واخدت عهد علي نفسي اني م اعمل حاجه تكسرهم ولا تزعلهم مني و زي ما ربوني حيلقوني دايمااً ..

صحيت الحمة نزلت حمدلله ، بقيت دايرة انزل من السرير اخد حمام و اصلي ، بس وجدان نايمة بالطرف ، و ما عايزة اصحيهم شكلي ساهرت بيهم ، تاني قلت احسن اصحيهم يمشو غرفهم ينومو كويس ،، بديت اصحي فيهم وحدة وحدة قامو مخلوعين قايلين فيني حاجه ، كل وحدة تجي تلمس راسي و تقيس حرارتي بيدهاا ، بالجد حنييين و بتمتي ربنا ياخد امانتو مني قبلهم وقبل م اشوف شين فيهم ، كل وحدة مشت سريراا و قمت استحميت و صليت و قعدت في السجادة رفعت يدي انه ينصرني و يبعد عني كل شر و كل شين في حياتي ، قمت مرتاحه

و مشيت علي المكتب البقرا فيهو ، فتحت السهارة و طلعت الملف من شنطتي ، و جبت تلفوني جمبي ، لقيت مكالمات كميه .. اغلبا من عمار لمن اتخلعتا ، بعد عدم ردو و انقطاعو المفاجئ متي معقول يرجع يتصل علي تاني ، و مكالمات كلها من رغده و رقم غريب ، راسي جااط شديد ، قلت الزمن لسه بدري ما بينفع اتصل عليهم عيب في زمن زي داا ، ختيت التلفون و فتحت الملف ،،

عاين للشهادات الانا عامله منهم نسخ و ما خاته الاصلين لقيتهم زي ما هماا ، بس لاحظت لشهادة الجامعه حقتي بتاعت هاي ليفل لاحظت حاجه غريبه ، ان الامضاء بالقلم الاسود ، و الشهادة حقتي الاصليه بخط اليد و القلم حبر ازرق ، بس عرفت ان في حاجه غلط و ان دي ما شهادتي ،،

اتوترتا و جسمي دا كلو بدا يرجف ، قدر ما حاولتا ارتب الاحداث ما قدرت افهم حاجه ، مسكت راسي و قعدت ابكي .. بس فجأة اتزكرتا حاجه ...

*باك فلاش*

تتزكرو لمن كنته قاعده منتظرة دوري دا بعد رسلو لي الرساله لمقابلتهم ، والسكرتيرة جات نادتني و قالت لي انتي ريم احمد ... ! و ف نفس الوقت الضابط قالي الشهاده دي بأسم ريم .. هنا انا فهمت كل حاجه ... و حقي بالدم بجيبوو ..

مسكت تلفوني و اتصلت علي حسام لانو هو الوحيد علي الاغلب بكون صاحي الوقت دا واصلا كان في منو مكالمتين ، سبحان الله لسه الجرس ما رن زي الناس رد علي بلهفه .. صبحتا عليهو و سلمتا ..

*حسام صباح الخيرر بعتذر علي الاتصال

في الوقت دا ..

_لالا انا اصلا صاحي اتصالك دا اعتبري دعوه وربنا استجابا لي

* تسلم ، بس حسام انا كنت محتاجه اقابلك ضروري و ياريت لو اليوم اذا م عندك مانع

_يااااااريت يا زهرة انتي بتتكلمي بجد ؟

*حسام م للدرجة دي مالك خلعتني انا كنت عايزاك في موضوع بس لو م عندك طريقه ممكن نأجلا لمن تفضا بس والله مصروعه و مستعجله ..

_شنو مافاضي يا زهرة انا لو اقدم استقالتي من السغل واجي الاقيكي والله ما حتاخر عليكي ..

*تسلم ي حسام خلاص انا في انتظار اتصال منك بس كلمني قبلها بساعه .. ( بقلم/سحر سمير )

_ عديلة يا زوله .. يلا ف امان الله

و قفلت وجاتني اسماء .. لمست راسي

قالت لي انتي تعبانه مقعدك كدا شنو ؟ قلت ليها والله ي اسماء راسي جايط . قالت لي قليتي اول حاجه ؟ قلت ليها اكيد حمدلله ربنا يتقبل .. قالت لي امين و جرت الكرسي وقعدت قالت لي احكي لي قبيل مالك وراسك جايط من شنو واسي كنتي بتتكلمي مع منو ؟ ،، اتخيلي يا اسماء اتهموني ان شهاداتي مزورة صدموني و اتكلمو معاي بطريقه مهينه شديد والله زلوني و ضيعو تعب سنيني كلهاا ، واسي قعدت هنا عشان اراجع الملف فعلا لاحظت حاجه غريبه علي شهادتي ان ف اختلاف ف الامضاء ، عايني ليها هناا ....

قالت لي كيف الكلام دي انتي ملفك دا لمن قدمتي بيهو مش قبلو عادي و دي امانات الملفات دي خاصه هما المسؤلين عن اي غلط او ضياع حاجه من الملف ،،، بس يا اسماء دا ما ضياع ، دي حركة مقصودة دا انسان قاصد يدمر مستقبلي ...لا حبيبتي مستقبلك ما عاش اليدمرو وانا راسي شامي الهوااا وخلي النور يمرق وانا حوريكي حعمل شنوو ،، قلت ليها حتعملي شنو يعني ، قالت لي الصبر يا روح اختك ما عاش اليزعلك ..

سالتيني كنت بتكلم مع منو قبل شويه . دا واحد اسمو حسام انا اتعرفت عليهو في الخطوط السودانيه يوم عملتا شكله وقف معاي هو بشتغل في الكاميرات و كلمتو اني عايزة اقابلو لانو هو البقدر يساعدني لاني م عندي عداوة غير مع الناس ديل ولو في حاجه حتبقي منهم بس كمان غلطتي اني ما راجعت ملفي بعد اخدتو منهم و قعدتا المدة دي كلهااا ....

استككانة~🍹

يتبع ......