جنس آدم

البارت الثامن

البارت الثامن ..
#جنس_آدم💔
#بقلمي_شمس

رامي .. بعد كم يوم رحت يم وليد لگيت اصدقائنا كولهم مجتمعين ..
غيرت جو لان ضجت حيل .. اول مره بنيه تطير مني ..
اني صافن وافكر ..

وليد .. ها رامي اشو صافن لازم نطتك بلوك الي صارلك شگد تركض وراها 😂😂

رامي .. شفتهم گاموا يضحكون عليه مااتحملت كرامتي تنهز ..
ههههههه ليش اكو بنيه تنطيني بلوك .. مو انت تعرفني الي اخليها ببالي مااضيعها ..
واصلا هي مصدگت من لمسه وحده ذابت بيدي ..
وبراضاتها سويت الاريده ..

محمد .. لك شلون توگعهن ماتگلي .. والمشكله يطلع منها مثل الشعره من العجينه ..
محد تشتكي عليه لو تجيب اسمه ..

رامي .. ههههههه اني رامي الكرادي ليش شويه ..
هن يركضن وراي ..

بس انتو شايفين جسمها قطعه جبن تخبل والجسم مليان رغم ماهي رشيقه ..

وليد .. هي هاي نفسها الي منا بالمنصور ..
اي .. اسمها شاهيستا يعني الورد الابيض بس هي وسخه 😂😂
ابوها مدير مدرسه وامها مدرسه فوگاها .. وهي استغفر الله ..

(ادري حميت زايد عليها بس مااعرف ليش هيج حجيت انتقام او غضب او لان ماحصلتها مااعرف )

وليد .. لك بس لا هذا المدير الي درسنا كان مدرس بوقتنا ..
اتذكر عنده بنيه اسمها شاهيستا ..
هذا خوش انسان معقوله تطلع بنته سگط ..
الله لاينطيهن يشوهن سمعت اهلهن ..

…………………………………………

رجعت للبيت .. احس نفسي مخنوگ تلگتني اختي ريما گالت اسويلك عشا ..
گلتلها تعشيت يم وليد ..

راحت صحت وراها .. گلتلها بعد شگد للدوام ..
ريما .. بعد كم يوم ليش ..
رامي .. لا هيج بس ديري بالج ع نفسج مو يقشمرج واحد ..

ريما .. هااا شنو هذا الحجي رامي ماتعرفني ..
رامي .. لاحبيبتي اعرفج بس اخاف عليج ..

ريما .. تركته ومشيت للغرفه .. تلعثمت من حجى هيج عبالي يدري بعلاقتي وي بدر اخو احمد صديقه  ..

اني ريما ادرس سادس ادبي .. اهلي مخلين خط يوصلني اخو صديق رامي ..
الولد حلو .. عجبني .. وهو بمرور الوقت صارحني ..
وكنت ممصدگه انه كان يبادلني نفس المشاعر ..

اسمه بدر .. يموت عليه .. يوصلني ويرجعني بدون فلوس .. ميقبل ياخذ ..
وكنت اخذهم اجمعهم .. لأن مااگدر اگول الاهلي مياخذ كروه اكيد حيشكون ..
گلي عجبني بيج اخلاقح وحجابج ..
رامي من كثر علاقاته وي البنات .. صارت بي فوبيا وشكاك هوايه ..
حتى حجاب لبسني واني صغيره ..

رغم كنت اتمنى البس مثل البنات واتونس بحياتي ..
اني عندي اثنين اخوان اكبر مني وبس اني بنيه ..
لهذا احس نفسي مخنوگه ..
محاوطيني من كل الجهات .. حتى تعاملهم محلو وياي
بعكس بدر .. الي شفت الحنيه والكلام الحلو والاهتمام هذا الي خلاني اتقرب منه واحبه ..

صار كولشي بحياتي .. وكنت اشوفه من اروح وارجع للمدرسه .. ومرات اغيب من المدرسه ونروح للزوراء او اي مكان نتونس ونطلع الاماكن مطالعتها ولا شايفتها رغم احنه من بغداد ابا عن جد ..

بس بابا واخواني دايما بالمحلات . فما نگدر نطلع هوايه
بس الاقاربنا ونرجع ..

تطورت علاقتي ببدر وصار مثل النفس الي اتنفسه ..
كانت عندي صديقه .. بس هي متحرره اكثر مني
تدري بعلاقتي وي بدر ..
كانت دايما تگولي لتخليه يمل منج ..
اكسبيه وارضيه .. ولتصرين معقده .. وعلمتني شلون الف الشال وشلون البس ..

ماما شغلها البيت والطبخ . مو دايما نگعد سويه .
اغلب الاحيان لو اقرأ لو اتصل ع بدر ونسولف ..

رغم رامي اخويه عصبي ويشك .. بس اني كنت حذره بتصرفاتي ومااخليه يحس ع شي ..

…………………………….………..  

شاهيستا .. خلصت العطله وداومنا نطونا الدرجات كنت متميزه كالعاده ..
بس احس نفسي مفرحانه ولا الي واهس للدراسه مكسوره وتعبانه ..
صديقاتي كولهم يباركون ع الخطوبه .. واني ماكو فرحه بداخلي .. ابتسم مجامله الهم ..

بسنت دايما تواسيني وتگولي جربي بلكي تحبين ياسر وتنسين رامي ..
بس مااگدر مااحب ياسر .. متخلف يمثل الرجل الشرقي القديم مااحس عنده تطور او تفاهم ..
عنده المرأة جاريه وبس ..
داومت و كولشي يذكرني برامي حتى الحديقه الي مقابيل المدرسه ..
تذكرني بي لان ياما عشنا لحظات حلوه بيها ..
هذا الشي ميخليني احبه او اشتاقله .. بالعكس خلاني اكرها بگد حبي اله ..

لان هو السبب بأرتباطي بياسر .. وكسر گلبي وضيع سعادتي وفرحتي ..

طلعنا من المدرسه .  لگيت ياسر واگف بالباب استغربت نزل ..
هاي شتسوي هنايه ..
طلبت الاذن من عمو اخذج .. ونتغدا عند اهلي عازمينا
شاهيستا .. غير تگول هي هيج فجأة وبملابس المدرسه
روح وخليها غير يوم لان تعبانه ..
وياليت يكون بأيام العطل ..

ياسر .. اهلي طابخين شنو اگلهم عيب ..
شاهيستا .. مو مشكلتي
ياسر .. اسمعي انتي مو انطيج وجه . تنغرين عليه
ترحين غصب عنج , شيگولون عليه بنيه هالطولها تمشي كلامها عليه ..

شاهيستا .. هههههه اصلا اتعجب اذا طلع تفكيرك غير هيج ..
ياسر .. شتقصدين ..
مااقصد شي .. بس خليني اروح للبيت اغير ملابسي ونروح مااروح بملابس المدرسه ..

بسنت راحت وي الخط قبلي ..
واني صعدت وي ياسر ..
بالطريق ..
ياسر استلمت النتيجه وناجحه بأمتياز .. اشو مسألت
ياسر .. ها اي بالعافيه يمعوده الشهاده شتسوي اشو اهل الشهادات يشتغلون عمال بالبلديه ..
لو يبيعون مخضر ..
شوفي هسا اني اشغال حره .. ونعمه من الله الفلوس العب بيها لعب رغم اني ممكمل ..

اتباوعتله بأشمئزاز .. صدوگ جاهل ولاعنده ثقافه هذا شلون اعيش وياه ..
حتى رومانسيه ماكو ( احجي بداخلي )..
#بقلمي_شمس
يتبع…
…………………………………

اعذروني حبايب لان اليوم مكتبتلكم هوايه . 
كان عندي خطار .  ان شاء الله باجر اعوضكم
تصبحون ع خير ❤️