جنس آدم

البارت السادس عشر

البارت السادس عشر
#جنس_آدم💔
#بقلمي_شمس

هاي حوبة شاهيستا ادري لان هي الوحيده البريئه .. البقيه سلمن نفسهن برضاتهن واغلبهن كانن مو بنات .
بس شاهيستا بريئه وفوگ مااعتديت عليها .. مااكتفيت رحت وشوهت سمعتها يم ولد عمي واصدقائي  ..

خلص الاربعين مال والدي .. واني طول هذي الفترة مشفت وجه ريما ..
ورعد موتها كتل بعد الفاتحه ..
حتى القبر ابويه مخليناها تروح .. حرمناها من شوفت قبره لأن هي السبب بموته ..

ساعات اگول هذا عقابي وگع بيها ..
وساعه اضوج منها واكرها .. ع الي سوته ..

بدر النذل .. انهزم ولسا محد يعرف وينه ..
وبيوم اجاني احمد ..
گلي عندي حجي وياك ..
رامي .. احمد ماكو اي حجي بيني وبينك .. منا لمن تجيب اخوك ويعقد ع اختي ..
احمد .. اليوم اتصل بدر .. حيهاجر الخارج البلد ..
ويگول بعد ماارجع ولا اتزوج ..

رامي .. شنوووو. والحل هسا شلون .. احمد جاي تدوس ع اعصابي انت ..
گمت اعيط واحجي وحتى غلطت ع بدر واهله .
واحمد ساكت ..

تالي گالي .. اني اتزوجها ..

رامي .. اني معصب واحجي .. وسمعت احمد گال اني اتزوجها ..
انصدمت .. شنو .. انت شدتحجي ..
احمد .. ليش بيه شي ..
رامي .. لا بس انت عندك اثنين اولاد .. وانت تحب زوجتك ومافكرت لليوم تتزوج شنو الي خلاك هسا تتخذ هيج قرار ..
احمد .. زوجتي صارلها ثلاث سنوات ميته .. وابني وبنتي  تشردوا .. بين عماتهم ومرت اخويه محمد تعبت وملت وامي مريضه وكبرت ..
واني اريد ام الاولادي .. وانت اخوي ولازم استر شرفك

اذا تقبل الي الشرف اتزوجها .. ولاتعتبرها شفقه او لان اخوي غلط وياها..
بس لان هي اختك واعرفها صغيره وغلطت ومالها ذنب ..
شگلت هسا .. ( بقلمي شمس)
رامي  .. سكتت
احمد .. لك ترى اني مو كلش كبير بعدني صغير
رامي .. لا مو على هاي . بس لازم احجي وي عمامي ونتفق وارجعلك خبر ..
احمد .. اوك لعد اني رايح ونبقى ع اتصال ..

….. اني احمد اخو بدر النذل .. اكبر اخواني بس كلنا فرق سنه بينا لان امي ولدتنا واحد ورى اللاخ ..
تزوجت واني صغير حبيت وحده وياي بالجامعه وتزوجنا واحنا ندرس ..
جابت بنوته سميتها جنه .  جنة حبنا
بعدها بسرعه هم حملت بس حملها الثاني تعبها لان شكل الضغط وياها ..
فأجلت الكليه وكانت اخر سنه .. تالي بالولاده توفت ارتفع ضغطها فجاة وماتت ..
وتركتلي جنه ومصطفى صغير .. اولادي صغار ربتهم امي واني كنت منعزل عنهم وحزين ع نرجس ..
ماشبعت منها وراحت مني بسرعه ..
قررت مااتزوج بعدها .. اخواتي تزوجن .. واخويه الاصغر مني تزوج صارله سنه ولسا ماعنده اطفال ..
وبدر اصغر واحد من الولد . وتعرفون قصته ..

اول مره اشوف ريما .. اجيت ع رامي وهي فتحت الباب وصارت بوجهي راحت للمدرسه وتأفأف ..
عجبتني حيل من بعد ثلاث سنوات من وفاة زوجتي اول مره تعحبني وحده ..
بس كانت صغيره وتدرس سادس فگلت من تصير بالكليه اخطبها ..
واخليها تكمل وهم تصير ام الاولادي الي ماعرفوا حنان الام بحياتهم ..

احمد مره سمعت يدور ع خط الاخته .. گتله ع بدر عنده تكسي ..
وهو فرح لان اخويه واكيد حيأمن عليها ..
بس طلع حاميها حراميها ..

ضحك ع البنيه واستغلها .. وحرمني منها ..
حاولت شگد اخليه يصحح غلطه .. بس مايقبل يگول مااتزوج وحده سلمتني نفسها قبل الزواج ..
وهو اصلا حيهاجر وميرجع بعد ..
وصار ماكو گدامي غير اتزوجها اني واستر عليها ..

حتى اذا متكون الي زوجه بس المهم تكون ام الاولادي

………………………… 

رامي .. رحت ع عمامي وحجيت وياهم .
گالوا ابوك هسا طلع الاربعين مالته ليش متوازي ..
گلتلهم ابويه منطيه حجايه وموعد للمشيه .. وعساس يخبركم بس صار الي صار ..

عمي الكبير .. هاهي خلي يجيب زلم ويعقدون سيد ومحكمه وياخذها بسكته ماكو هوسه ..

رامي .. هو هيج عمي .. والبنيه اصلا رسبت بالسادس بعد شنو گعدتها ..
باجر يجن نسوان يتفقن وان شاء الله وراها الرجال تجي

………………………

رحت للبيت خبرت امي فرحت .. گالت رحمتك يربي
ومن عرفت احمد الي خطبها مو بدر ..
گالت .. همزين ولا ذاك النذل .. عسا يروح مايرجع بعد
اريد يطلع حوبتي بي ..
رامي .. يمه كافي لاتدعين .. تذكررت شاهيستا من تدعي عليه ..

صحت ريما .. اجت الغرفه امي ورعد اجه .. وهاي اول مره نحجي وياها من وفاة ابويه ..

رامي .. اسمعي لج باجر تجي نسوان يخطبنج . عدلي نفسج ولاتبينين شي .
وها ترى مو بدر يخطبج لاتفرحين .. الشفيه انهزم للخارج احمد اخوه تعرفيه . صديقي .. هو الي راح يخطبج ويستر عليج بس ميريد احد يعرف ..

ريما .. گالي احمد يخطبج .. ضجت مو لان اريد بدر بالعكس كرهته واني مااريده ..
بس لان ادري احمد يحب زوجته رامي مسولفلي عنه واكيد تزوجني شفقه .
وعنده اثنين اولاد ..واخاف يعايرني كل ساعه ..
اكيد راح اعيش بجحيم ..
ميخالف قابله بس اهلي يرضون عني وامي ترجع تحجي وياي ..

هم يتفقون ويحجون واني ساكته ..

احمد اول مخبرت امي راح اتزوج وشفت بنيه عجبتني ومااريدها تروح مني ..
فرحت كولش والاكثر من عرفت اخت رامي ..
لان هي تحب رامي ..
بس استغربت لان ابوها متوفي هستوه ..
بس قنعتها بأن ولد عمها يردوها ..
ورامي گلي استعجل لا يغيرون رأيهم ..
اقتنعت وگالت باجر اخذ اخواتك ومرت اخوك ونمشي ..
#بقلمي_شمس
يتبع…