مساء العافيه ..
صهباء غيرت حياتي
البارت 1
بقلمي روسكان
مرحبا ..خلي اعرفكم بنفسي ..اسمي رند عمري 19سنه بيضه حيل عيوني شهل يعني عسلي فاتح وطويله شويه تقريبا 165 سم ووزني 60كيلو مو كولش ضعيفه ولاسمينه ..عندي اخت وحده اسمهه رونق رقوشه وكان عندي اخوان 2 توأم منتظر وضرغام الله يرحمهم راحو بانفجار سيارة مفخخه ب 2006 بوكتهه جان عمري 9سنين من راحو.
اختي اكبر مني بسنتين يعني هي هسه 21سنه دخلت كليه قبلي بسنتين وهي مو مثلي اني هادئه وخجوله هي لا وكحه ولسان واجتماعيه وهي هسه مرحله ثالثه قانون واني مرحله اولى تربيه انكلش اني وياهه مو كولش قريبات علاقتنه كاخوات سطحيه وبارده وسرهه مو يمي ولاسري يمهه هي عدهه كومه صديقات لان مثل ماكلت اجتماعيه واني لا صديقاتي معدودات وحده ثنين تلاثه ..رانيا ودجله وسما اقرب وحده واكثر وحده ارتاحلهه سما ..
اني واختي سافرات بدون حجاب ..ماما وبابا عايشين الحمدلله بس من بعد وفاة منتظر وضرغام صحتهم تعبت ومثل اي عراقي شكّل وياهم السكر والضغط بس يمكن الي قواهم وجودي اني واختي وجنه بعدنه صغار وبنات ومنو النه لو صار بيهم شي يكولون البنيه من غير شي مكسورة جناح وصح سافرات بس اخلاقنه الحمدلله تحمد بيهه الناس الغريبه قبل القريبه .
ماما موظفه وبابا مهندس معماري وثنينهم لسه موظفين وبيتنه ملك والحمدلله حالتنه الماديه زينه .
منتظر وضرغام اكبر من عندي ومن اختي رقوش ب 6،8 سنوات وجان عمرهم 15سنه من استشهدوا وشكد حاولت امي تسوي طفل ماكدرت صارت النفسيه صفر وتعبت لان هي ابد مجان عدهه مشاكل بالحمل ومع ذلك مصار طفل .
الي يميزني صهباء ..اي صهباء ..تعرفون شنو صهباء يعني شعري احمر نحاسي من الله من اول مانولدت هيج وحواجبي نفس اللون وعيوني هم حمار ع صفار يعني لون العسل الفاتح ..عانيت هواي بالابتدائيه يضحكون ع شعري وع شكلي بس من صرت بالمتوسطه وبدت ملامح جسمي تبرز بدت النظرة عليه تتغير حلويت يعني وصار شعري علامتي الفارقه وصرت اتسمه ام شعر الاحمر وزادت ثقتي بنفسي وكملت ع نفس المنوال بالاعداديه وابد ماخنت ثقه اهلي بيه لاعندي سوالف حب ولاغراميات ولا راهقت ويه شباب وصلت الكليه ع نفس الخط المستقيم الراسمته لنفسي ..صح الجامعه حياة ثانيه ..حياة حلوة بس ظليت ملتزمه بالي مقتنعه بي وصادقت شله بنات نفس اخلاقي وذبتي سما ودجله ورانيا .
من اول اسبوع الي بالكليه ثبت عليه لقب ام الشعر الاحمر ..وصارت العين عليه وكثرت مصارحات الشباب اليه من كليتي ومرحلتي ومن غير كليات ومراحل ..مو غرور ولا مبالغه بس بعقل يعني يجيني يصارح كلامه مو منطقي يجي يكولي حبيتج زين انت شعرفت عني علمود تكول كلمه اكبر منك لذلك جان الجواب دائما الرفض بدون ندم وبدون تانيب ضمير محد يستاهل اخون الثقه .
بس من اول اسبوع دوام الي حسيت روحي مراقبه من طالب مرحله ثانيه كليه صيدله اسمه فهد وهو صدوك فهد اسمراني طويل ملامحه قاسيه شعر اسود ولحيه خفيفه محدده وهو صديق ولد بمرحلتنه اسمه حسام ودائما يجي ويظلون سوة يفترون بقسمنه ودائما احسه عينه مني ..بس ثكيل مو مثل بقيه الولد مااجه صارحني يعني .
بالامتحانات نهايه المرحله الاولى اجه فهد صارحني ..جان عاجبني ثكله وجنت مااعرف ليش انتظرة يجي يصارح مو حب ولاكلبي دگ له بس الثكل يجذب وهو الله شاهد غير النظرات الجريئه ماشفت منه شي .
بكل ادب وجديه صارحني ..واخييييرا ..وتمنيته يكول خطوبه تمنيته يطلب معلومات عن اهلي حته يجيب اهله ويخطبني لان بعد سنه نظرات بالعيون ومرابط بقسمي 24ساعه ومصادق ولد شعبتي اكيد هسه صارت عنده فكرة عن اخلاقي بس هو صدمني ..طلب رقم حته نتعرف !!!
استفزني طلبه ورفضته بعصبيه وباسلوب رزاله رزلته من باب ماعندك خوات تقبل يجي ولد يطلب رقم اختك .
ارزل بي وجسمي يرجف من فوك ليجوة ماعرف شصار بيه اكو مصطلح عراقي عدنه انو البنيه تضرب الولد بوري يعني من يصارحهه ترفضه ..صح اني رفضته بس احس اني الي انضربت بوري تصرفه فاق كل توقعاتي صدمني وخابت امالي بي عبالي هو يختلف الظاهر كولهم هيج الشباب كولهم نفس الطينه .
اني ارزل وهو واگف كبالي حاط ايديه بجيوب بنطرونه ومبتسم بطرف شفته عنده هاي الابتسامه المستفزة الي تخلي الواحد يخنگه يقتله خلاص وميرتاح من برودته وعيونه مثبته عليه ..اخير شي كالي خلصتي ست رند ؟
فتحت حلكي صفنت عليه ولاعبالك جنت ارزل بي ..
سكتت ماجاوبته ومن شافني ساكته عاد هو حجه ..
راح تصيرين مرتي يا..ام شعر الاحمر برضاتج غصبن ماعليج .. راح تصيرين ..واذكرج بكلامي ..
فتحت عيوني وبهتت من كلامه .
شنو هالثقه بالنفس ..كلامه خوفني ..شنو يقصد ..عافني وراح بكل هدوء واني احس براكيين تشتعل بداخلي مادري ليش ..
منو انطاه الحق يوعدني هيج وعد اني مو مالة احد ولا راح يجي يوم واصير اله مستحيل بعد الي سواه افكر بي واغير نظرتي عنه ..
صدوك اصحاب الشعر الاحمر عصبيين حيييل .
شنو رايكم بالبدايه ..؟؟ ماوصيكم ع التفاعل ..اكو بارت ثاني ان شاء الله .
أنت تقرأ
صهباء غيرت حياتي
Romanceشاب يحب فتاة حب من طرف واحد ويحاول معها بكل الطرق لكي يلفت انتباهها لكنها عنيده لاتستسلم لنداء قلبه فلا يستسلم ولايقبل برفضها له ..يستقتل حتى يحصل ع حبها حتى لو كان ذلك بطرق حقيرة وملتويه ..قصتي الجديده ..
