صهباء غيرت حياتي

البارت 3..وعد

صهباء غيرت حياتي
البارت 3
بقلمي روسكان
فهد .. سلام عليكم اعتقد صار وكت اعرفكم ع نفسي اسمي فهد عمري 23سنه صرت مرحله ثالثه صيدله بغداد من عائله محافظه وملتزمه دينيا عندي اخ واحد اسمه سند اكبر مني مرحله رابعه كليه قانون ..وخوات 2وحده مزوجه ابن عمي اسمهه رغد واكبر مني ومن سند مخلصه تربيه تاريخ ومتعينه مدرسه تاريخ وعدهه ولد 2 واخر العنكود زهراء طالبه سادس علمي دلوعه البيت والدتي ربة بيت ووالدي مقاول جبير وشخص عصامي بنى حاله لحاله يملك مجموعه بنايات ومجمعات سكنيه هو يبنيهه والناس يستاجروهه منه ..احنه اصلنه من العمارة بس بسبب شغل الوالد وكلياتنه اني وسند انتقلنه لبغداد بس ماتاثرنه بانفتاح بغداد كولشي بقه عدنه مثل ماهوة بناتنه محجبات وكولنه ملتزمين ومحافظين واصدقائي معدودين .
الي يميزني دونا عن اخواني سماري زهوري تصيحلي الاجلح اني اضحك بس والله اني مو كولش اسمر يعني لدرجه تستاهل انو تصيحلي اجلح بس لان اسمر من كل اخواني تكولي هيج ام لسان ..ناسيني شويتين زياده بالفرن ..
طويل ملامحي رجوليه صوت خشن نظرات حاده حواجب معقوده غليظه ..قليل الكلام ..يكولون عني مغرور وخسمي يابس مدري منين يطلعولي هالمصطلحات بس اني مو هيج بس عندي ناس معينين يعرفوني زين ويعرفون طبعي ووجهي الحقيقي وطيبه كلبي وارتاح وياهم وانطلق وسوالف وضحك اولهم اخويه سندوباقي اهلي بالبيت بس عصبي ويعرفوني من اعصب لازم ميصير احد كدامي او يراددني لان راح يشوف شي ميعجبه .
دراستي صعبه مثل متعرفون كضيت المرحله الاولى ادور مصادر و استنسخ محاضرات واترجم واخذ محاضرات مال سنين سابقه دخت وشفت الشغله متصرفلي من بديت افهم المواد وكل استاذ واسلوبه وطريقه تدريسه وطرحه للاسئله فهمت الوجبه شنو قررت ادرس محاضرة بمحاضرتهه وبمرور الوقت قويت نفسي بالانكلش والترجمه عاد من رتبت وضعي الدراسي واستقريت بعد لادورت مصادر ولا محاضرات قديمه والحمدلله تفوقت ونجحت ..صرت مرحله ثانيه واستمريت ع نفس المنوال ..
تعرفت بالصدفه ع ولد اسمه حسام من العمارة الولد جان قسم داخلي ولان ابن ولايتي الدم يحن حبيت اساعده لان جان كل شهر او كل 3اسابيع ياله ينزل لاهله وهو جان مرحله اولى تربيه انكلش ومن كمت اتردد ع كليته عجبتني بنيه يصيحولهه ام شعر الاحمر ..جانت صهبا ..عرفت بعدين اسمهه رند ..سبحان الخالقهه ..مو بس جمال ثكل واخلاق وعائله ..كولشي عرفت عنهه من حسام ..ظليت سنه اراقبهه انتبهتلي وظلينه نراقب بالعيون وابد ماتقربت الهه .
سمعتهه خوفتني ..بس هالمرة السمعه الي احجي عنهه شي ايجابي يعني الشي الي خوفني بيهه هي ابد ماتنطي مجال لولد واي احد يصارحهه ترفضه راسا بدون مقدمات ..هي هاي السمعه الي سبقتهه وخوفتني منهه لان مو فهد الي ترفضه بنيه لسه مانخلقت ..
ومابالغ من اكول صارت مشهورة بالجامعه باخلاقهه وثكلهه وصاروا الطلاب ضعيفي النفوس يتراهنون ع مصارحتهه وهي مستمرة بالرفض .
توقعت هي مرتبطه ارتباط بس كلام حجز لاحد من اقاربهه ابن عمهه مثلا او تحب شخص قريب اوغريل لكن بعدين وبطريقتي عرفت ايآ من هذا الكلام مو صحيح .
كمت اتقربلهه حتى بمراقبتي الهه ومرات اسمع احاديثهه ويه صديقاتهه وصارت تبادلني النظرات وصرت احسهه تحس بيه ..
مرة سمعت صديقتهه سالتهه ليش دترفضين اي واحد يتقدم يصارحج جاوبتهه واني شاعرف عنه واوافق بي ؟؟ ذيج ردت ..اي اطي مجال يعرفج ع نفسه بلكي تتوالمون وتتفقون ويصير نصيب ..ترة مخسرانه شي ..جاوبتهه رند ..بلي خسرانه ..بله ماتوالمنه ولا اتفقنه شسوي ..عادي اتركيه ردت عليهه رند بعصبيه عادي اتركه واروح ع الي بعده هم اشوفه يتوالم وياي لو لا ..شنو فرقي عن البنات الموزينات لعد ؟؟ صديقتهه سكتت ورند كملت ..حبي الي يريدني ذاك بيتنه ويروح يتقدملي واذا اني واهلي اقتنعنه بي هاهيه وفترة الخطوبه هي وكتي الي اتعرف بي ع شريك حياتي الي اختاريته وساعتهه اذا ماتفقنه اكدر انهي الموضوع بسهوله ولاسويت العيب ولاسويت الحرام ولانزلت راس اهلي بشغله غلط افتهمتي ياحلوة ؟؟
يايابه شلون عجبتني وشلون عجبني تفكيرهه واني اسمعهه تحجي هيج ..قفلت عليهه كلت هاي اليه ..هاي الي تصوني ..خلص بعد قررت وانتهى الموضوع .
صارت امتحانات نهايه السنه وزادت النظرات بيناتنه ولو نظرات العيون تحجي جان كتلهه الفضول عن دوافعي وسبب نظراتي لان سنه كامله اني ممتقرب بس اراقب ..هاي السالفه بحد ذاتهه تطحن طحن .
قررت اخر يوم الامتحانات اختبر رند اروح اصارحهه واستفزهه بالكلام واشوف رد فعلهه وفعلا صار هيج ..رحت صارحتهه واكلت رزاله معدله من الصهبا لان طلبت رقمهه اتعرف عليهه معجب وكذا ..وها معجب جرئ لان محد تجرأ يطلب رقمهه رغم ما اني من بدايه السنه عندي رقمهه وعندي كل برامج النت الي هي مشتركه بيهه .
ظليت اسمع الرزاله وكانها مقطع من اغنيه مفضله عندي للقيصر ومن كملت ابتسمت واطيتهه وعد انو هي راح تصير

تكمله بارت 3
صهباء غيرت حياتي
بقلمي روسكان
راح تصير زوجتي واني عد وعدي وكده وكولو فهد كال .
شفتهه صارت تفووور من كد العصبيه الصارت بيهه ..رزلتني صح بس استمتعت بردة فعلهه الي جنت اصلا متوقعهه .
ببرود وبهدوء عفتهه ومشيت وما انسه منظر خدودهه عبارة عن طماطايه حمرة منا ومنا شكلهه يضحك هاي من تعصب هيج تصير لعد من تخجل شيصير بيهه امّا شعرهه فهذا قضيه ثانيه .