صهباء غيرت حياتي
البارت 4
بقلمي روسكان
رند ..مرت اشهر العطله بهدوء بعدني اتراسل ويه مهند ..اي هيج اسمه مهند وبعدنه نتراسل ع الايمو لان مرات نكتب كلام يمكن نتحرج نگوله بس مسموح نكتبه ومندزه بس المهم المقابل قراه وصار عنده علم بهالمشاعر او الاشياء او التفاصيل الي حابين نشاركهه ونفضفضهه لبعض بدون عتب وبدون شرح وبدون اسباب .
العلاقه بيناتنه سهله سلسه بريئه عمرة ماتجاوز وياي بالكلام حتى بالغزل ..ليش انكر بديت احبه واميل اله واعتقد هو هم والي يتفوق بي عليه انو هو جرئ بالتعبير عن الي بداخله يعني اعرف عنه اكثر مما يعرف عني ومرتاحه لهذا الوضع .
اخر ايام العطله جنت اجهز نفسي ملابس ولوازم قرطاسيه لان بعد اسبوعين ونداوم انقطع عني مهند شكم يوم بالليل مكام يراسلني كلت يمكن مشغول او تعبان لان اعرف هو طالب صيدله ويشتغل بصيدليه العصر لان عدهم تدريب صيفي هالسنه .
فعذرته ..
جان الطابق الثاني مال بيتنه بي غرفتين غرفه الي وغرفه لرونق فمرة بساعه متاخرة من الليل ب 2 او بهيج حدود طلعت جوعانه من غرفتي سمعت صوت ضحكات اختي رونق ..
عقدت حواجبي صفنت مستغربه ..موطبعي اتسمع ع خصوصيات اختي بس الفضول خلاني اوكف ورة الباب واتسمع ..
سمعتهه تكول ..
يعني هاهيه قنعتهم ؟
......
والجمعه جايين ان شاء الله ؟
......
جان صوتهه بي فرح ..
اووف حبيبي ..امنيتي هاي .
......
هيج ربي ..وننجمع سوة بالحلال ؟ كول يارب ..
ضحكت ..عرفت اختي واكعه بالحِب هههههه قصدي عدهه علاقه ويه شخص ويمكن هالايام جايين يخطبوهه ..فرحتلهه ع الرغم هي ابد ماكايلتلي ولا سارتني انو هي عدهه علاقه باحد واني وضحت قبل فترة انو احنه متباعدات وطبعي عكس طبعهه الاجتماعي تماما.
رجعت لغرفتي فرحانتلهه ..سديت بابي ونمت ..
ماحجيت شي لامي ولاحسست رقوشه اني اني اعرف شي عن موضوع خطوبتهه .
خلصت تجهيز نفسي وتحضيرات الدوام .
جنت اراقب الاوضاع بالبيت اتوقع ماما جانت تدري اختي عدهه علاقه بولد وهو عن قريب يجي يخطبهه .
فد عصريه طلعن سويه للسوك جان يوم اربعاء وماقبلن اروح وياهن استنتجت ديشترون فستان لرونق علمود يوم الجمعه ماهتميت بس ظلت غصه بكلبي ليش ماكلولي وليش ماخذوني .
استغليت وقت طلعتهم وظليت احجي ويه مهند اخلص الوقت وياه ولاحظ اني متضايقه وسالني شبيج وسولفتله كولشي فضفضت وارتاحيت شويه وهو يهون عليه ..
هو الموضوع لسه سر مو صحيح ؟
يعني لانسوان اجوكم للبيت ولا امج بلغت ابوج بشي ؟
اي صحيح .
هاهيه لعد ..هاي اختج كايله لامج انو راح يجوهه ناس يخطبوهه وديتحضرون .
وليش مكلولي ..؟؟
لان الموضوع لساته سر ..يعني من يصير شي رسمي ويجوكم النسوان راح تعرفين اكيدوانتي اصلا كلتي انك مو كولش قريبه ع اختج فليش الاستغراب .
ماعرف بعد ضجت ..ماحبيت الشعور ..
حسيت روحي منبوذه .
لتفكرين هيج .
بعدين ضحك ..
ليش عود تضحك ؟
ههههههه كمت اغني ..يوم الالي واذبح طلي ..
هههه شنو تريد تتزوج ؟
لايابه دنتشاقه ..ويني وين الزواج بعدني طالب .
امممم زين .
قبل شكم يوم ماحاجيتني بالليل ..خير خو مجان بيك شي ؟
لامابيه بس شويه تعب بالصيدليه فاجي اتعشى وانام راسا .
اهاا يله اني اترخص دا اسمع صوت يمكن اجوو .
موجوده بالليل ؟
ع اكثر اي .
اوك لعد انتظرج .
اوك يله باي.
الله وياج .
صار يوم الجمعه العصر وصدوك اندكت الباب واجوي نسوان واختي رونق جانت متحضرة واني نزلت من غرفتي اشوف شكو وجانو محضرين ضيافه بالمطبخ شويه ودخلت عليهم اختي تسلم وتقدم الضيافه واني بس ظليت اراقب .
طلعت اختي من الاستقبال وجهه بشوش فرحان واني اعرفهه لبقه ولبلبان وتحبب الواحد بيهه باسلوبهه وطريقه كلامهه وسلاستهه تحسسه اليفه وتعرفك من زمان لذلك بسرعه تاخذ عليك .
جنت منتظرتهه بالمطبخ اول مادخلت كتلهه ..
هاا نكول مبروك ؟
شو هاي دمعت عيونهه وحضنتني بسرعه ..
ردة فعلهه ماتوقعتهه اول مرة احس هيج احساس ..احساس حلو..اختي احتاجت لحناني .
طبعا ارتبكت اول مره ماعرفت شسوي ومامتوقعه هيج ردة فعل منهه حتى ما رفعت اديه ابادلهه حضنهه اول لحظات لان ماعرف بهتت مثل الي تجمدت بعدين حسيت ع نفسي شلت اديه وحضنتهه وطبطبت ع ظهرهه ..
شبيج ولج ؟
ليش البجي ؟
بس ادعيلي بابا يوافق .
وليش ميوافق يعمري ؟
ابتعدت عني ومسحت دمعه طفرت من عينهه من رمشت ..
لان الولد اصله مو من بغداد ..محافظات ..بس همه ساكنين بغداد صارلهم شكم سنه ..وتعرفين بابا شلونه بهذا الموضوع .
الله يسهلج حبي ..ان شاء الله بابا يوافق .
هو منو اجه من اهله ؟
امه واخته الجبيرة وخالته .
وشلونهن ؟شمبينات ؟
حبابات يعني ..امه وخالته ..اخته الجبيرة مبينه حقنه شويه .
لعد الحمدلله مزوجه ..مو ؟
اي .
متأكده من هاي المعلومه ؟
ههههه ..اي .
يله خليني ارجع يمهم .
واني ميصير افوت اشوفهن ؟
ماعرف اشوف ماما .
لاعيني جذب اشاقه ..بس عندي فضول اشوف اخته الحقنه .
عود من يطلعون باوعي من شباك المطبخ .
هو هيج راح اسوي .
راح احضر لهم فواكه ..اوك ؟
مادري اذا طولوا بالكعده عود اني اجي اخذه .
يله اني حرجع ادخل يمهم .
باي .
راحن النسوان وشفت من شباك المطبخ اخت الولد الحقنه ..لابسه جبه والربطه ضابتهه ضب ع وجهه اني من يمي اختنكت شدعوة هلكد ضابته .
اجه بابا بالليل تعشينه سوة وماما اشرتلنه نصعد فوك تريد تفتح الموضوع وياه صح صعدنه بس ظلينه بالبيتونه نتسمع ع كلامهم ونشوف بابا شيكول ..
أنت تقرأ
صهباء غيرت حياتي
Romanceشاب يحب فتاة حب من طرف واحد ويحاول معها بكل الطرق لكي يلفت انتباهها لكنها عنيده لاتستسلم لنداء قلبه فلا يستسلم ولايقبل برفضها له ..يستقتل حتى يحصل ع حبها حتى لو كان ذلك بطرق حقيرة وملتويه ..قصتي الجديده ..
