يسعد صباحكم..
البارت 31
صهباء غيرت حياتي
بقلمي روسكان
اني وعمي جمعناهم برة كل الموجودين جانوا العائله فقط لاغير وحجينالهم التفاصيل بما انزلت ..
شفت الفرحه بعيون ام رند ورونق وسند سندي اخويه عضيدي مساندني بس امي تخربطت ارتفع ضغطهه فجأة من سمعت اني المتبرع ..
احتارينه بيهه وهمزين جنه بالمستشفى راسا حطولهه مغذي حته ينزلولهه الضغط طبيت اطمنت عليهه الحمدلله نزل ضغطهه ..
ابويه كالي بابا انت متاكد من قرارك هذا ؟
جاوبته اي ..
كالي ..عين العقل ..تكومون بالسلامه ثنينكم ..
مشكور بابا .
الحمدلله ارتاحيت ابويه رجال عقلاني وماطول وكف وياي وماعارضني معناتهه اني تصرفت صح ظلت الوالده ..
طبيت شفت امي ..عرفتهه عدهه حجي وياي ..
يمه لا تسوي الي ناوي عليه ..
شعدي غيرك وغير اخوك ..طلعت من الدنيا بيكم ..
يمه مامتت واذا تبرعت ماموت ..اكدر اعيش بكلى وحده ترة وبصحه وعافيه مو عليل يعني .
واذا مامطمئنه ولا مصدكه بكلامي اجيب الدكتور يحجي وياج ويفهمج .
يمه هذا خوفج عليه واني صاحي هسه مابيه شي اني بكلبي خوف اضعاف خوفج ع زوجتي يمه احبه وتعرفيني من زمان رايدهه لاتهنيت بيهه ولاشبعت من حنانهه وحضنهه واريد اطفالي منهه ..
خاف مقررة تعارضين اتبرعلهه بكليتي ترة اني بيج وبلياج ناوي اتبرع بس طمعان برضاج واريدج تبريلي الذمه ..
شأكولك بعد انت مقرر .
عفتهه وطلعت ماردت اتناقش وياهه ولا ردت اكثر كلام ويرجع يصعد ضغطهه بس الي ردته كلته .
رجعت لرنوده وجهه التعبان مشتاقله ..عيونهه الذبلانه مشتاقلهه والي مدمرني مذبلانه من تاثير بوستي او لمستي .. ذبلانه من التعب ..
كعدت يمهه لزمت ايدهه بستهه برقه فتحت عيونهه التعبانه ابتسمت ..
حبيبي اشتاقيتلج ..
هزت براسهه افتهمت هي همات مشتاقتلي ..
كعدت اسولفلهه ..
عندي خبر الج ..
باوعتلي باهتمام ..
كتلهه ..لكينه متبرع ..واليوم راح نسويلج العمليه ..
داهرتهه ..
راح نحطلج كلى جديده .
زادت ابتسامتهه ..
اريدج تصيرين سباعيه ..اريدج تطلعين منهه ..انتظرج ترجعيلي ..مشتاق لمرتي حبيبتي ..مدا اكدر انام بالليل لان انتي مو بحضني تعودت عليج ..
جنت احجي وابوس ايدهه كل شويه ودموعي تجري بهدوء بس مالي سيطرة عليهه توكع دمعه تنزل الثانيه ..
حركت ايدهه الثانيه بيهه قراص باصبعهه الابهام ومربوط بواير وواصل لجهاز مسحت دموعي وعيونهه تكولي لاتبجي ..
مسحت دموعي ووجهي ابتسم وكتلهه ..
تتذكرين من كمزتي عليه واني فاتح الكنتور ؟
ابتسمت وهزت براسهه اييي ..
جنت محضرلج مفاجئه ..
شهر عسل اسبوعين سفرة لتركيا ..اروح اوديج تشوفين جسور وكمال ..
زادت ابتسامتهه ..
كمال وجسور هذوله ابطال مسلسلات تركيه رنوده جانت متابعتهن وهي تحبهم ممثلين يعني وجنت اتعارك وياهه من تكولي حلوين لو تحبهم جنت اغار هسه احس روحي شكد تافه من جنت احاسبهه ع طفولتهه ومراهقتهه وهي بحضني وتحت جناحي ..
اي والله راح اخذج تشوفيهم واكوللهم مرتي المخبله تحبكم وتتعارك وياي علمودكم ..
يابختكم رنوده كلبي تحبكم .. من مسلسل حبتكم واني دوختني وراهه سنتين ياله قبلت تتزوجني ..
جنت احاول اضحكهه واخفف عنهه اعرف بيهه تتألم وتعبانه ..كلبي يريد يصرخ ميستحمل رقادهه بسرير وجسمهه موصول باجهزة ..
همستلي ..
احبك وأ...
نصت صوتهه ماكدرت تكمل لان الصونده بحلكهه مأذيتهه ..
اموت عليك رادت تكول ..
واني هم احبج ..يانور عيوني انتي ..
دسوي العمليه وثحصحيلي لافررج العالم كوله واخلي الناس كولهه تحجي #بسنة عسلج مو اسبوع ولا شهر سنه بحالهه لو اعرف اترك دراستي سنه وماتركج ..دير بالج تفكرين تعوفيني ..دير بالج .
اشرتلي بايدهه ع الحلقه .عرفتهه تسأل ع حلقه النبض مالتهه ..
من تطلعين من العمليه البسهه الج ..جايبهه وياي .ع طول شايلهه بجيبي .
سوتلي مكان بالسرير يمهه واني اجيت نمت يمهه حضنتهه ونمنه سوة ..
طول مارنوده بالمستشفى عيوني ماضاكت نوم مثل الاوادم ..اي انام الليل بس ساعه لو 2 والباقي يخلص تفكير وحسرات تجر حسرات وشلون وليش ياربي لاتحرمني من حبي .. ياربي اجبر بخاطري ماطالب منك شي قبل بس هالمرة طالبهه منك ..
بصحه وعافيه وجسمهه يتقبل كليتي وراسهه يشتم الهوة كولشي ماريد بعد .
يمكن نمت ساعه ساعه ونص ماحسيت بالوقت ذبيت نفسي تعبان بحضن حبيبتي ببيتي ..اي حضنهه بيتي الارتاح بي .
حسيت ع الممرضه فوك راسي اجتي تضرب رند علاج بالكانوله كمت ع حيلي وخرت عنهه وشافت شغلهه وطلعت .
رنوده لسه نايمه وتقصدت ما اكوللهه اني المتبرع ماريدهه تشيل همي ويظل بالهه عليه نطلع من العمليه وتعرف ماكو اشكال بس هسه لا ماريد تشيل غير هم نفسهه وتطلعلي سالمه ..
طلعت برة لكيتهم كاعدين بكافتريا المستشفى يشربون جاي كالي سند داخلين علينه الغرفه ولاكينه نايمين عافونه ع راحتنه وطلعوا ..
قلقي ع رند ماتركني بس شويه ارتاحيت لان المتبرع اتوفر واليوم العمليه والتسهيل من رب العالمين .
جنت ميت جوع تغديت .........
البارت 31 التكمله
صهباء غيرت حياتي
بقلمي روسكان
ساعات قليله تفصلني عن العمليه ..
ما انكر خايف مو مخايف ع نفسي اول مرة بحياتي اسوي عمليه بس خوفي الاكبر ع رند ..
شفت امي الظاهر مطلعيهه بس مراجعه للبيت ..
اجتي حضنتني وبجت ..
كالتلي ..
رند بنت اوادم وماشفت منهه غير كل الزين ..
جنت خايفه عليهه هسه صاروا عندي 2اخاف عليهم ..
تجمعت الدموع بعيوني مادري صاير حساس اني زياده عن اللزوم مدري هو الموقف صعب ..
كتلهه ..
يمه محتاج دعائج ..
يمه حبيبي نظر عيني تكومولي بالسلامه ان شاء الله .
ابريلي الذمه ..وارضي عني ..
مبري الذمه وراضيه عنك من گلب ورب ..حضنتهه مرتاح محتاج دعائهه دعاء الام من حلكهه الدافي لباب السمه .
مشه الوقت بطئ وجهزوا رند للعمليه وطلبت يخدروهه قبلي ماردتهه تشوفني وتعرف اني المتبرع قبل العمليه ماريد تتاثر نفسيتهه وتدخل عمليتهه منهارة وجهزوني وراهه ..
من جهزوهه نزعوهه حلقتهه وطونياهه دمعت عيوني من شفتهه .. يارب كون هاي مو اخر مرة ..كون تكتبلي فرصه ثانيه البسهه حلقتهه بيهه ارجعهه لاصبعهه ..
كتلهه ..صيري سباعيه حبيبتي ..
وبستهه بكصتهه وحطوهه بسديه متحركه وسبقتني ع غرفه العمليات .
وراهه جهزوني ونفس الشي اني هم نزعت حلقتي وسند واكف ع راسي طيته حلقتي وحلقه رند وحلقة النبض ..سند ..ياسندي هاي امانه ..
رد عليه سند ..
احفظهه الك بعيوني واكسرك تكسير اخو الجذب اذا مارجعتلي تاخذ امانتك .
ابتسمت اعرفه ديلطف الجوعليه يدري بيه خايف ومتوتر وقلق وبالي يم عمليه رند وادري بي ممرود مرد عليه والدموع كوه ساكنه بجفونه بس يرمش توكع .
توكلت ونمت ع السديه المتحركه باسني سند وامي وابويه وعمي ابو رند الي بجيه كطع كلبي مابطل يتشكر مني ومابطل يترحم لوالديه ودخلت غرفه العمليات ..
شفت رند ماخذ البنج بجسمه نايمه بهدوء ..
وكف طبيب التخدير فوك راسي ..
هايابطل ..؟ مستعد ؟
هزيت راسي ..اي ..
قصه حبك لزوجتك انتشرت بالمستشفى ..صرت مشهور ..
ضحكت وعرفته ديوخر التوتر مني ..
خلولي كانوله بايدي وضربني طبيب التخدير ابرة ..اتصور البنج هذا ..
كالي ..ابدي عد من 1 الى 10 ..
عديت ..1..2..3 ماكدرت بعد اكمل مشه البنج بجسمي غمضت عيوني وبعد ماحسيت .
كاتبته من البارحه بس نت ضعيف ماكدرت انشر.
أنت تقرأ
صهباء غيرت حياتي
Любовные романыشاب يحب فتاة حب من طرف واحد ويحاول معها بكل الطرق لكي يلفت انتباهها لكنها عنيده لاتستسلم لنداء قلبه فلا يستسلم ولايقبل برفضها له ..يستقتل حتى يحصل ع حبها حتى لو كان ذلك بطرق حقيرة وملتويه ..قصتي الجديده ..
