البارت 30
صهباء غيرت حياتي
بقلمي روسكان
من بعد ما اتصلت باهل رند وخبرتهم انو احنه بمستشفى ...رجعت دخلت للغرفه البيهه رند لكيتهه نايمه .. ظليت اتأمل وجهه التعبان وشعور الذنب ياكل بيه اكل ..
ظليت اتذكر لحظاتنه الحلوة ..ضحكاتهه ..شقاهه ..عنادهه فظاظتهه من جانت متحبني ..اني جنت بنعمه ..مجرد ماتفتح عيونهه الصبح وهي نايمه يمي وبحضني هاي بحد ذاتهه نعمه ..معقوله ربي تحرمني منهه ..لا ربي دخيلك ماعندي غيرك لاتعوفني لاراهقت ولا ضحكت ع بنات الناس هي بس رند الي ردتهه وسعيت باديه ورجليه علمود احصلهه هيج ربي ناوي تحرمني منهه ربي لاتكولهه ربي انت كرمتني بيهه من وفقتني اتزوجهه وتصير حلالي لاتاخذ هالنعمه مني تعرف حياتي متسوة شي بدونهه ..
لازم ايد رند ودموعي تجري بهدوء واحاجي ربي بصوت ناصي ..
اجتي السستر دخلت تريد تطيهه علاج بالكانوله طلعت لكيت ابويه واصل ..
اول ماشافني اجه عليه حضني ..نسيت الزعل ..نسيت كولشي ..حضنته ..
كالي تكوملك بالسلامه ان شاء الله .
ووخر عني مبين شايل عليه بس الموقف صعب مو مال حساب وعتاب وزعل هسه بس احتاجيت حضنه وحنانه ..
اجاني الانقاذ ..شفت سند اجاني من بعيد هو ورونق
شعور الذنب ميخليني احط عيني بعين رونق هاي وحيدتهه هنه هيج وحده تسمي الثانيه وحيدتي ..
اجه سند حضني واني نسيت اني رجال وانفجرت بجي بحضنه ..جنت محتاج حضن اسند روحي بي ..
كالي ع بختك وكل الله لعد شخليت للنسوان ..
اخذني ورحنه للطبيب الي ديشرف ع حالة رند ..
اطينه خبر للمستشفى انو محتااجين كلى و عممنه الخبر ع باقي المستشفيات حته الاهليه منهن بلكي حادث بلكي ميت سرسريا اعضاءه سليمه صدوك مصائبُ قوم عند قوم فوائدُ .
سألت الدكتور مو الاحسن انقل المريضه لمستشفى اهلي خاص كالي اكيد افضل هناك عنايه افضل وامكانيات افضل وماديا اني قادر ع هالشي فاتفقت ويه الدكتور بس ترتاح شويه انقلهه لاقرب مستشفى اهلي بس تتوفر سيارة اسعاف وهم ع حسابي اجيب سيارة اسعاف ان لزم الامر ..
بس طلعت من غرفه الدكتور اهل رند جانوا واصلين وداخلين لغرفه رند يشوفون بنتهم ..مالي عين احطهه بعيونهه شعور الذنب باهمالي لرند مافارگني طبيت سلمت ع عمي وخالتي يبجون وكل هذا الوكت ورند نايمه ..
اخذت عمي ع صفحه وطلعته برة الغرفه حجيتله كولشي كاله الطبيب وكالي ع بركه الله ننقلهه لمستشفى اهلي وطلبت منه ميبجون كدامهه ويوصي خالتي همين لان رند نفسيتهه زفت ومستسلمه تماما ..
ردتهم يقووهه مهما يكون همه الهم تاثير عليهه وع نفسيتهه اكثر مني خاصه ابوهه هي قريبه منه واريد يقسي عليهه بالكلام ويقويهه كافي انكسار ..
نويت انتظرلي يومين كحد اقصى انتظر متبرع اذا مالكينه اني اتبرع بس بنفس الوكت ماردت هاليومين يضيعن عليه لازم اشوف شنو الاجراءات الي اكدر اسويهه فحوصات او تحاليل حته ميضيع وكت بمجرد مايخلص اليومين راسا فحوصاتي كامله وان شاء الله اكدر اتبرع ..
رجعت للدكتور وحدي ..
دكتور شنو الشروط الي لازم تتوفر بالمتبرع ؟
ليش لكيتو متبرع ؟
اني اتبرع ..
انت تدخن بابا ؟
لا دكتور .
تشرب ؟
الحمدلله لا .
تذكرت فصيله دمنه نفسهه ..وكتله ..كال ممتاز ..بقت اشعه وتحاليل وفحوصات روتينيه علمود يتاكدون من سلامه كلياتي .
انت تقربلهه ؟
لا مو كرايب ..بس زوجهه ليش تفرق ؟
اي قرابه الدم كأن تكون ابن عمهه او ابن عمتهه فرص نجاح تقبل جسمهه للعضو تصير اكبر .
يعني حتلو اتبرعتلهه بكلى اكو مخاطر للعمليه ..؟
هي العمليه سهله وناجحه بالعراق بس تبقه ورة تقبل المريض للعضو المستلم ..ننتظر جسمهه وانسجتهه تتقبل العضو الجديد وتتطابق الانسجه .
اذا كولشي سار تمام ومثل منريد فتره النقاهه اسبوعين تكضيهين بالمستشفى لان العمليه بين متلتئم وحته لازم نساعدك تدرر بصوندات نوصلهه لجسمك منا لاسبوع بين ميتعود جسمك ع التعامل بكلى وحده بدون تاثير العضو المفقود .
طلعت سويت فحوصات كامله واشعه وزرع حته نعرف نسبه التطابق بين انسجه جسمي وانسجة جسمهه وبالعاده نتيجه الزرع تطلع خلال 10ايام بس اني مستعجل ع النتيجه والفلوس تلعب دورهه واتفقت يطلعولي النتيجه خلال يومين وشيأمرون اني حااضر .
غبتلي ساعتين عن رند كملت بيهن فحوصاتي والزرع وخابروني يسألوني عن مكاني لان دبروا سيارة اسعاف ورنوده كلبي صحت ولازم ننقلهه لاقرب مستشفى اهلي ..
لحد الان بس سند يعرف اني شناوي اسوي وواكف وياي ماعارضني .
رجعت الهم كالولي اكلك لكمه وخلي ناخذ رند لغير مستشفى لان اني من الريوك ومماكل شي بعد باوعت ساعه 6العصر ماحسيت بالوكت ولا جوع كضيت الساعات كولهه ركض بركض ..
جابلي سند عصير وبسكت بليت ريكي بيهن واتفقت ويه اصدقائي صيادله متخرجين ويشتغلون بمستشفى .....الاهلي مو اقرب مستشفى بس احسن مستشفى ببغداد ..
تعاونوا اطباء وممرضات يجهزون رند علمود ينقلوهه لسديه ثانيه وهاي السديه هي الي راح تنقلهه لسيارة الاسعاف ومناك للمستشفى الثاني
تكمله بارت 30
صهباء غيرت حياتي
بقلمي روسكان
اطيت سويج سيارتي لسند علمود يجيبهه ورايه للمستشفى وصعدت ويه رند بسيارة الاسعاف ..
اكثر من ربع ساعه الطريق وصلنه للمستشفى الاهلي اصدقائي ووياهم اطباء جانو منتظرينه بالطوارئ اول ماوصلنه نزلوهه واخذوهه مني دخلوهه لغرفه خاصه
وخلولهه صوندات بحلكهه وبجسمهه علمود تكدر تتدرر ع راحتهه .
منظرهه جان يبجي الصخر ماكدرت امنع دموعي بس جنت من افوت للغرفه ماابجي كدامهه بالعكس اضحك واحاول اضحكهه بس هي بعد حيلي متكدر لاتضحك ولاتحجي لان الصوندات بحلكهه مضايقاتهه تكتفي بابتسامه لو ايماءه بوجهه بمعنى اي او لا ..
وجهه جان اصفر تعبان الوكت جان يمر بطئ كولش ..
الانتظار صعب يومين مرن بطلعان الروح ولسه مالكينه متبرع ..
صار نقاش انو ابوهه يتبرعلهه بكلى لان هو وياهه يتشاركون نفس فصيله الدم اما رونق وامهم فصيله ثانيه فعلى الاكثر ابوهه بده يقرر يتبرع لبنته بكلى اني ماعارضت هاي هم فرصه ماريدهه تضيع ع رند او نفقد وقت يروح بالتحاليل والفحص والزرع واحنه بحاجه هذا الوقت وبنفس الوقت ماجنت متاكد من نتيجه الزرع مالتي وتطابق الانسجه .
باليوم الثالث رحت جبت نتيجه الزرع وطلعت نسبة التطابق كولش زينه تبشر بخير والطبيب كال اتوكل بالله وسووا العمليه .
رجعت ع المستشفى الاهلي واخذت تحاليلي وابو رند ورحنه للدكتور المشرف ع علاج رند .. وبالطريق سولفت لعمي ع الي ناوي اسويه تفاجأ الرجال وحضني وبچه ..
الوكت الضايع والتاخير ابد مو بصالحنه ونتيجه الزرع مال عمي لسه ماطالعه راح نشوف الطبيب واطيه تحاليلي يطلع عليهن ..
وصدوك رحنه للدكتور وسولفتله كولشي ونتيجه الزرع صارت بيده والتطابق يبشر بخير وردنه رايه الطبي منو احسن متبرع يناسب رند وبيهه مجال بعد تتحمل ننتظر بيهه ايام بين متطلع نتيجه الزرع مال عمي ..
كل هالتساؤلات جاوبنه عليهه الدكتور ..
كال الافضل ناخذ الكلى مني لان شاب والكلى مال عمي صح هو الاقرب بالدم لرند بس عمرة جبير يعني رغم الكلى تقوم بوظايفهه بشكل جيد بس تبقه متعوبه بحكم عمر عمي الجبير .
وهاهيه حددنه موعد العمليه اليوم بالليل ساعه 8:00.
رجعنه لغرفه رند كولهم هناك يمهه امي وابويه وسند ورونق وامهه وعمي جان وياي وكرايب رند اجوي يشوفوهه شويه وتحمدولهه بالسلامه وطلعوا .
دخلت الممرضه واطتهه لرند علاج ينومهه واحنه طلعنه برة اشرت لعمي يطلعون علمود نحجي وياهم ع التطورات الصارت اخير شي ..
الصورة تجسد حاله فهد الصبر والانتظار صعب من تشوف الي تحبه يتعذب وانت عاجز تسويله شي لسان حاله يكول تهون وتصير سوالف بس ماصارت ..
ميتعبني كثرة الكلام والسرد والوصف بالبارتات بكد ميتعبني الطريقه الي اجسد بيهه الحزن والمعاناة ..
للحكايه بقيه ..
أنت تقرأ
صهباء غيرت حياتي
Romantizmشاب يحب فتاة حب من طرف واحد ويحاول معها بكل الطرق لكي يلفت انتباهها لكنها عنيده لاتستسلم لنداء قلبه فلا يستسلم ولايقبل برفضها له ..يستقتل حتى يحصل ع حبها حتى لو كان ذلك بطرق حقيرة وملتويه ..قصتي الجديده ..
