صهباء غيرت حياتي

البارت 5..

صهباء غيرت حياتي
البارت 5
بقلمي روسكان
منى (ام رند )..اليوم عود اجن نسوان ديخطبون رقوشه .
صفن ابو رند ..نفخ دخان جكارته ورجع بكعدته ليورة مثل واحد ديستعد يستجوب احد .
علاء (ابو رند )..منين عرفهه ومنين اهله ؟
منى ..طالب وياهه بالكليه .
علاء ..هم قانون ؟
منى ..اي بنفس مرحلتهه .
علاء ..واهله ؟
منى ..اسكت اهله عائله معروفه ومرتاحين ماديا بس اصلهم مو منا .
علاء ..لعد منين ؟
من العمارة ..بس صارلهم 4سنوات ساكنين بغداد ابوهم نقل شغله هنا وكليات اولادهم ..يعني تبغددوا ..
ماكو شي اسمه تبغددوا ..لكل مكان عادات وتقاليد وماكو واحد يطلع عن عاداته حتلو غير مكان سكنه .
والله المرة امه من اهل الله وجهه سمح وملگه وخالته همين ومبين عليهن فطيرات وطيبات گلب وبنيتهم الجبيرة هم جايه وياهم بنيه ثكيله ومؤدبه حجابهه وجبتهه مبينين ناس اوادم وملتزمين ويخافون الله ..احنه شنريد لبناتنه غير الستر .
(موضوع مقارنه بين العائلتين صح عائله رونق فري باللبس والافكار لان سفور بس باحترام وضمن المعقول ومتربين ع الاخلاق الحلوة والالتزام الديني بينما عائله الشاب الي تقدم لخطبه رونق ملتزمين بالحجاب الاسلامي بالاضافه للالتزام الديني ..ام رند ما حكمت ع هاي العائله من ملابسهه بل من اسلوبهه ومن الي شافته منهم الاخلاق والنفس الطيبه وكل هذا تعزز بالحجاب يعني مثل ميكولون قلبا وقالبا ).
علاء ..ابوهم شنو شغله ؟
منى ..كالت المرة مقاول ..يشتري عقارات ويبني مجمعات سكنيه ويسكن ناس بيهه بيوت بالاقساط بنائهه ..سولفت هواي عن شغل زوجهه ..كالت همه خير من الله وبس يتخرج ابنهم يفتح مكتب محاماة وعنده اخ واحد اصغر منه وبنات 2وحده هاي المزوجه الي اجتي وياهم ووحده طالبه سادس بعدهي بنيه ..همه من بيت ....
علاء ..اي والله والنعم ..خوش ناس .
منى ..وكالت امه يسكنون مشتمل يم بيت اهله ..هي الحديقه مالتهم بانيهه مشتمل بنفس البيت ..وكالوا ردولنه الخبر وانت بكيفك ..
اني اسال ع الولد واهله وبعدين نشوف رأي رقوشه وبعدين نتوكل ..اذا اكو نصيب بيهه الخير .
فوگ بالبيتونه كمزت رونق من الفرحه وطخت بالماسحه جانت قريبه عليهه ووكعت وسوت صوت ..شالت عينهه امي ضحكت وخزرتنه طفرنه رأسآ كلمن لغرفتهه عرفت بينه جنه نتصنت .
علاء ..هاي شنو الصوت ؟
هاي يمكن باب السطح مفتوحه وبزونه طبت ..هسه اصعد اسدهه .
اني اصعد اسدهه وهم احجي ويه رقوش .
اي براحتك ..تريد اسويلك جاي ؟
اي والله ياريت راسي يوجعني .
سلامه راسك ..دقايق ويجهز .
صعد بابا فوك يحجي ويه رونق وماما راحت سوتله جاي .
الي عرفته بعدين من سولفتلي رقوش علساس بابا سائلهه عن رايهه بالولد ..بما انو هو طالب وياهه المفروض معاشرته 4سنين وتعرف اخلاقه فهي مجاوبته انه هو حباب واخو خيته وبين قوسين ماعدهه اي اعتراض عليه .
مر اسبوع ورجعنه خبر لاهل الولد احنه موافقين من بعد ما بابا وعمامي سالوا ع اخلاق الولد واهله واصله وفصله ورأسآ كالوا يومين وتجيكم مشيه الزلم ..بس قبلهه بابا طلب يجي الولد ويتعرف عليه شخصيا هاي بعد طلبات بابا الغريبه والمشروعه لان گلب والد ومن حقه يطمئن ع مستقبل بنته .
وصدوك قبل مشيه الزلم بيوم اجه الولد هو وابوه عصريه يمنه واستقبلهم بابا و2من عمامي الصغار طبعا اني عندي 7عمام من غير بابا وبابا اكبرهم كولهم واللقاء صار لاساعه ولا ساعتين الظاهر بابا عجبه الولد وجلبوا بيهم ع العشه وبابا حلف يمين ميطلعون من بيتنه الا وهمه متعشين وهمه اهل دواوين وولد عشاير ويعرفون الاصول فما كسروا كلام بابا وبقوا واحنه مامتحضرين ونركض منا ونجي منا تلاثتنه انخبصنه فد مرة رغم ما عمي الصغير جاب اكل من برة بس ماما هم طبخت تمن ومرك وعمو جاب كباب ودجاج شوي وبقت النواعم اني ورقوش بقينه نحضر بيهن مقبلات وسلطات وخضروات وفواكه ولبن يعني ابدعنه بفنون التقديم وترسنه السفرة الحمدلله وتعشوا ومن بعدهه استلمنه المواعين صارت عزيمه من عزيمه ولا كانه عشه ل 5نفرات بس .. هلكنه من التعب بيومهه لخاطر عيون رقوشه هو احنه شكم رقوشه عدنه .
الي عرفته الولد عاجب بابا فعلا لان لبق اجتماعي ومتكلم ودهري ويضحك يعني بسرعه يفوت بالمود مثل طبع رقوش تماما اكول ليش التموا ع بعض .
ومن عرف ابو الولد انه بابا مهندس معماري يعني منجم ذهب لان شغله بالبناء وهذا الي يحتاجه بالضبط فأتفقوا انو راح يصير بينهم عقد عمل رسمي خلال هالايام الجايه ..
توقعاتكم ؟؟منو هذا الي خطب رقووش ؟؟
تصبحون ع خير .