صهباء غيرت حياتي

البارت 14

البارت 14
صهباء غيرت حياتي
بقلمي روسكان
ورة ايام خلصت عطلت نص السنه وبدة الدوام وبدت المحاضرات ..
رجعت اراقبهه لرند من بعيد لبعيد وهي تباوعلي وتصد عني ..
هلو رند ..
شفتهه گامت تتأفأف ..
هلو فهد .
اعصابج ترة بس جاي اسلم عليج .
وعليكم السلام ..
كلتهه من ورة خشمي ..
شلونج ؟
تمام .
واني هم تمام .
اوك .
بس جاي ابلغج ..اني جاي اخطبج .
كامت ع حيلهه بغضب ..
مافهمت ؟؟
مو لغينه هالموضوع ؟؟
انتي لغيتيه ..اني بس اجلته لحد مايخلص زواج سند والحمدلله سند تزوج .
ان شاء الله الخميس احنه يمكم امي والوالد .
فهد لا.
يعني شنو ؟
صح اجلنه الموضوع لبعد زواج سند بس اني مااقبا ولامفكرو بموضوع الزواج اصلا .
فليش تجيل الوالد وتتفشلون برفضي .
عرفتهه دتراوغني ودتريد تكسب وقت يمكن لسه عدهه امل يرجعلهه مهند يمكن رادت وقت اكثر حته توصل لمهند وتخليه يخطبهه قبلي المهم عرفت لعبتهه .
تقربت منهه ونصيت صوتي وكتلهه ..
اولا لو ابقه وراج يمكن ابقه انتظر طول عمري لان كلما افتح الموضوع تطلعيلي بعذر جديد .
ثانيا احسن شي اسويه اخلي السالفه كدام عمي ..ابوج ..وكتلج الخميس اني والوالد جايين نتقدملج .
اما ثالثا والاهم فانتي مراح ترفضين .
باوعتلي بغضب ..
انت ..انت شنو هالثقه الزايده العندك !!
رفعت راسي وباوعتلهه بطرف عيني بنظرة كولهه كبرياء ..
اتصور حته الوالد راح يجبرج تقبلين بيه ..لان ..تعرفين صرنه اهل مو بس نسابه هاي من غير شغلهم سوا وفلوس ومصالح وانتي احسبيهه بعد من يمج ترهم انرفض لو مترهم ؟
شفت عيونهه صارت حمرة ..دمعتهه تتراقص ويه حركه بؤبؤ عينهه بس ترمش تنزل الدمعه .
ماردت ابجيهه ..حجت بصعوبه ..
وانت ششنو يعجبك هيج ؟..انجبر عليك ؟
صفنت بوجهه ..صفنت ع عيونهه ..درت وجهي ..ماريد اشوف عيونهه ماريد اضعف ..كتلهه ..
ميهم ..المهم تصيرين زوجتي ..ومن بعدهه اني اعرف شغلي وياج .
ماعرف شنو الي خلاني هيج احجي وياهه قساوة ع كرامه ع انانيه بس اريدهه تصير اليه بس ا ريدهه تصير زوجتي باي ثمن وباي طريقه .
ماتحملت مني هالكلام عافتني وكامت واني عرفتهه راحت تنعزل بمكان وتطك من البجي ..شكد كرهت نفسي ..شكد حقدت ع ضعفي كدامهه شكد لجمني كلبي عليهه ..
مشيت وراهه وبالي يمهه صديقاتهه مو يمهه ماعرف وينهن ممداومات مدري طالعات ..ظلت بحدود النص ساعه بالمصلى مال البنات وظليت واكف انتظرهه تطلع ..
طلعت ومشيت وراهه ..
ساعه 12مو وكت طلعه الخط مالتهه ..تريد تاجر سيارة وترجع للبيت مثل ماتوقعت تريد تشرد مني والوجه احممرر دم من البجي ..
صعدت سيارتي وكفت كدامهه فتحت جامه السيارة وكتلهه ..
اصعدي اوصلج .
شالت راسهه شافتني ..
ماريد ..روح ..
اصعدي دا اكولج ..
رايحه لخطي معليك بيه .
نزلت بعصبيه وجريتهه من عكس ايدهه وكوة لازم اعصابي وصاك سنوني ..
ساعه 12ياخط هذا اليطلع هسه..لو تريدين تبقين انتي والسايق كاعده بالسيارة منا لبعد ساعتين ونص ..
صعدتهه غصب عنهه وسديت الباب ..
طول الطريق ساكتين ..احترمت رغبتهه متريد تحجي وياي معصبه مني لدرجه متباوع بوجهي احترمت كل هذا ووصلتهه لبيت اهلهه .
قبل لاتنزل لزمت ايدهه ..
رند ..وافقي ..لاتعبيني ..
جرت ايدهه مني بقوة ونتر باوعتلي بعيون تجدح غضب حمرا ..خزرتني ..ياويلي من خزرة عيون الشهل .
باوعتلهه بتوسل ..
وافقي ..
باوعتلي تتحداني ..
اكرهك .
فتحت الباب ونزلت ..راحت دخلت للبيت ..
جاري الكتابه بالبارت 15..