مساء الخير ..اعتذر مانشرت البارحه بارت ثاني مثل ماوعدتكم لان صحتي مو تمام .
البارت 10
صهباء غيرت حياتي
بقلمي روسكان
استمرت الايام دراسه وتعب ومحاضرات وصحتي تحسنت كملت الابر وبعدني متحاميه وملتزمه بالاكل ..بس حيل متضايقه من الروحه والجيه ويه سند لان فهد كام يستغل الفرصه ويجي ويانه مرة يكول سيارته عطلانه ومرة يكول صديقي اخذ سيارتي حته بطلت اسال بالاحرى رقوش جانت تساله واني ماجنت اصدك باعذارة ابد .
هاي اني شلون جنت اشوفه ثكيل طلع زاحف وبخف الريشه ذاب روحه فد مرة وبعدهي ذيج الابتسامه المستفزة متفارك ثغرة .
اخير شي سويت عركه بالبيت ويه رقوش كدام بابا وكتله بابا دا اتضايق لان همه يخلصون محاضرات قبلي ويخبصوني علمود اطلع من وقت وياهم وانخبص لا اشوف ولااسمع ومرات حته اضرب محاضرتي الثالثه فتقبل عذري بابا ومن ثاني يوم عفتهم وشكلت خط ويه صديقاتي سيارة صغيرة واحنه 4بنات همه مخطوبين اني شعندي وياهم .
ثاني يوم بين المحاضرات شفت فهد كالعاده مرابط بكليتي بس هالمرة شفته ضايج وكلما تصير عينه بعيني يخزرني ماهتميت اهم شي خلصت منه ..اهم شي راحه بالي .
رفعت راسي وشلت خشمي وابتسم بثقه ردت بس اغثه وانتقم ع كل مرة صعد وياي بالسيارة وكتم ع نفسي .
باختصار جان يوم مفرح .
مرت الايام وصار سند بين اسبوع واسبوع يجي يمنه جمعه او سبت عصريه ويبقه ع العشه ومرات الصبح يجي ويبقه ع الغده وخوب رقوش لو عليهه تخليه يبات يمنه .. مايضايقني الموضوع الى ان بيوم سمعت من ماما انو بابا عاف الشركه الي يشتغل بيهه وكام يشتغل ويه ابو سند وثقوا عقد رسمي قانوني بيناتهم بس هالعقد دائمي ..بابا بالنسبه لابو سند منجم ذهب خبرة وعقل تجاري وتخطيط وتنفيذ خرائط دور سكنيه وشقق وعمارات ومولات سمي الي يعجبك وبابا يسويله احلا ترتيب واحلا خريطه وابو سند يوفر متطلبات البناء وبابا يشرف ع البناء .
خلال فترة قليله من شغل بابا ويه ابو سند زادت الارباح وزاد راتب بابا ودخل شريك ويه ابو سند بنسبه قليله وكثرت العزايم بين اهلي وبيت ابو سند ..مرات همه يعمزمونه ومرات احنه نعزمهم واكثر المرات اني ماروح اتحجج بالدراسه ولمن يعزمون اهلي اخلي بابا يوصلني لبيت سما ادرس وياهه يذبني بطريقهم ومن يرجعون يرجعوني وياهم .
حسيت الكل فرحان بالتغييرات هاي لان بابا طور شغله وصارتله نسبه بشركه عمو ابو سند وهي شركه مقاولات معروفه وماما فرحانه لفرح بابا ورقوش اكيد تفرح لان كولشي ديمشي بصالحهه وهي 24ساعه ويه سندانه الزرع مالتهه .
للامانه همه الناس خوش عائله واخلاق بس اني مارتاح لفهد ..صرت ماطيقه .
سبحان مغير الاحوال من جنت مرحله اولى جنت افرح لو يمر طاريه مو لان احبه ماتوقع وصلت لمرحله الحب وياه بس جانت عاحبتني بي هواي اشياء بس طلعت مخدوعه بس ..طلع شخص انتهازي ..استصغرته من ورة نظراته الي ابد مو بريئه وتصرفاته الواضحه كدامي ..
ابتعدت وما راويته وجهي وتحججت بالدراسه .
علاقتي ويه مهند مستمرة وع احسن مايكون .
مرة من المرات طلعت لبيت سما مستعجله وجانوا بيت ابو سند معزومين يمنه بس بعدهم مجايين فاني طلعت بسرعه ونسيت مبايلي بالبيت .
من وصلت بيت سما تذكرته ..شويه امنت بس بعدين رجعت انهبطت لان تذكرت اني نزلته من غرفتي وعايفته بالهول يشحن اتصلت من تلفون سما ع رقوش ماردت بعدين اتصلت ع رقمي طلعلي ولد كال ..
الوو..
رأسا سديته عبالي غلطانه بالرقم .
رجعت دكيت الرقم بيدي كتبته رقم رقم وهم طلعلي نفس الصوت وكال ..
الووو ..شنو مبعجبكم تسمعون صوتي ..
تشجعت وكلت ..
انت منو ؟
انتي الي منو ..انتي داكه عليه ..
هذا رقمي وداكه عليه.
رند ؟
بلحظتهه وكع كلبي بين رجليه وصعد رجع لمكانه تعرفون هذا الشعور ..اني عرفت الصوت ..هذا صوت فهد ..يامصيبتي ..مبايلي وكع بيد فهد كولشي مماسحه من مراسلات مهند ..ياويلي ..بعصبيه كتله ..
شعده جهازي يمك ؟
جنت يمه من دك ..
طيني رونق .
ع كيفج عيني ..اعصابج .
زفرت بقوة حته طلع صوت زفيري بالتلفون ..سمعته صاحلي رونق اجتني ركض ..
ها رنوده حبي خيرج ؟
ياخير هذا ..ليش جهازي بيد فهد ..
سكتت رونق ..
تاخذين مبايلي من فهد وتدفني ..الذبان الازرك ميعرف مكانه ..سمعتي ؟
ضحكت كالتلي ..
صار تدللين ..بعد اوامر ثانيه ست رند ؟
اي مبايلج خليه يمج صارلي كومه اتصل عليج ليش متجاوبين .
غير اجوي سند واهله ومشغولين وياهم وجهازي فوك بغرفتي مادري بي داك .
ميهم هسه مثل ماوصيتج تدفنين جهازي وتبقين جهازج يمج حته من يطلعون تطيني خبر اتصل ع بابا يرجعني .
جنت عصبيه حيل ..
ضحكت عليه رونق .
شبيج انتي خبله ؟منو جابرج ع الروحه لبيت سما ليش هيج دتسوين. ؟
معليج بيه اسوي الي يريحني .
اوك براحتج .
باي.
باي.
مرت الايام اني بخطي ورونق ويه سند تروح وتجي والي اسمعه من رونق يأكد شكوكي من عفتهم وشكلت خط ويه صديقاتي بعد ميتحجج فهد ويصعد وياهم عادي يجي ويروح بسيارته وكل يوم اشوفه بكليتي مرات احس نظراته بيهه قسوة ووعيد ومرات نظرات حنيه ومرارة و....
أنت تقرأ
صهباء غيرت حياتي
Romanceشاب يحب فتاة حب من طرف واحد ويحاول معها بكل الطرق لكي يلفت انتباهها لكنها عنيده لاتستسلم لنداء قلبه فلا يستسلم ولايقبل برفضها له ..يستقتل حتى يحصل ع حبها حتى لو كان ذلك بطرق حقيرة وملتويه ..قصتي الجديده ..
