صهباء غيرت حياتي
البارت 8
بقلمي روسكان
حسيت واني بالمستشفى ..فتحت عيوني باوعت للسكف ..مغذي بيدي واحس راسي ثكيل نظري مغوش ..وجهاز التنفس الاصطناعي موصول ع خشمي وحلكي ..امي نايمه ع ايدي البيهه الكانوله راسهه ع الجربايه حاضنه ايدي وجسمهه ع الكرسي .
رفعت عيني للشباك مال الغرفه اكو كراسي برة كبال باب الغرفه بابا كاعد ع واحد من الكراسي ومرچي راسه ليوره وكانه نايم ورقوش بصفه ومخليه راسهه ع جتف بابا ..
همست بالم وتعب ..
ماما ..
احس مبنجه ..حته صوتي بي خدر وبلعومي يشحرج وكأنه يابس ..
رديت صحت بصوت اعلى ..
مااما ..
ياحبيبتي صحيتي ..الحمدلله ع سلامتك حبيبه ..
كعدت ماما ..ابتسمت بتعب ..كتلهه ..
الله يسلمج ماما .
ماما مي اريد عطشاانه .
اي صار .
شربتني مي ..شربت هواي صدوك عطشانه ..واليبوس الي ببلعومي والشحرجه شويه راحت .
شلون صرتي يوم ؟شتحسين ؟
زينه ..بس شويه الم ..شصار ؟
ليش جبتوني لهنا .
غير وكعتي علينه سوده عليه .
ماتذكر شي ..بس حسيت بالم فظيع كطع احشائي ..خواصري موتتني .
من الالم فقدت وبعد ماحسيت ..
اي حبيبتي ..ليش كل هالوكت تتوجعين ومتحجين .
منو كال ؟
اسكتي حبيبتي الطبيب كال شلون ماحسيتو عليهه واني اكول وجهج اصفر كركم ليش ..والله عبالس تعب وركضه مهر اختج .
لاهاي سوالف رقوش هي سولفتلكم ..اني بس الهه كلت .
يعني جان عندج الم.
اكثر من اسبوع صارلي ..
سوده بوجهي .
كافي ماما عدت سلامات ..ماردت اخرب فرحه رقوش فما حجيت شي .
اي دكولي احجي ناخذج لطبيب ولاهاي الوكعه .
اسفه ماما اكيد انهبطتي من ورايه .
لتحجين هيج ..اهم شي تكومين بالسلامه .
الطبيب شگال ؟
كال التهاب مجاري بوليه بس حاد حللولج ..4صلايب حته دم كمتي تذبين .
لاماجنت اذب دم .
اي هاي اخر شي من وكعتي طلع بتحليلج دم.
وبعد ؟ ..ضغطي ترة دائما ينزل .
اي هو صفر ضغطج ووكعتي ..لوما لحكنه عليج جان دخلتي غيبوبه يمه اسم الله سوده بوجهي ماحسيت عليج .
كملت ماما شكال الطبيب ..
وعندج ضمور بالكله ..يعني هسه جسمج يشتغل بكله وحده ولازم تبتعدين عن الدهون والمشروبات الغازيه ..منا وهيج اكلج كوله لو سلك لو شوي وبدون ملح .
شنو هالضيم هذا ..بس اني قاريه يكدر الانسان يعيش بكله وحده عادي يعني وصحته زينه .
اي حبيبتي عادي بس لازم يتحامه بالاكل .
ان شاء الله .
شوكت يخرجوني ماما ..اريد ارجع للبيت ممرتاحه هنا .
ننتظر للصبح كتبولج ع دخوليه للمستشفى ليله وحده منا لمن يستقر ضغطج وان شاء الله الصبح يجي الطبيب يشوفج علمود نطلعج ..خلي اروح اكعد ابوج ..ظل باله يمج ونام خطيه من التعب .
لا يوم عوفيه نايم خطيه مبين التعب عليه ماكو داعي تكعديه اني هم راح ارجع انام ..وانتي هم نامي حبيبتي اكيد تعبانه .
صدوك رجعت نمت ..وكل شويه احس يخلولي ابرة شكل بالكانوله لو يقيسون ضغطي ونبضي واخير شي الفجر وخروا جهاز التنفس الاصطناعي عن خشمي وكملت نومتي براحه وجريتهه ل 8الصبح .
اول ماصحيت لكيت بابا وماما ورقوش ع راسي ..
ها بابا الحمدلله ع سلامتج .
الله يسلمك بابا .
ابتسمت بتعب ..
رقوش باوعتلهه مدمعه عيونهه شكد عاطفيه هالبنيه ولا عرفتهه ام دميعه .
شبيج ولج تريدين تبجين ؟
اجتي كبل حضنتني ع كيف ..كتلهه ..
لاتخافين ماموت ..ادري بيج شايله هم خاف اموت ويأجلون زواجج من سندانه الزرع .
كولهم ضحكوا حته هي من بين دموعهه ضحكت وحضنتني اكثر .
تجاكرت وياهه ردتهه تبطل بجي .
ولج شنو هالريحه شنو ماسابحه ؟اووع .
وخرت عني بسرعه ..
اياحقيرة متستحين ..
بابا وماما طكوا ضحك ..وهي ظلت تشم بروحهه واني الصدوك مشميت بيهه ريحه مو طيبه بس ردتهه توخر عني خنكتني وخفت تأذي ايدي الي بيهه كانوله .
والنبي جذابه ..
ضحكت كتلهه ..
اذا انتي لزكتي شسويلج .
اجه الطبيب فحصني وجيك ضغطي وكتبلي ع خروج وادويه ودورة ابر ومتنشال الكانوله من ايدي الا علمود يحطون كانوله ثانيه بايدي اللخ لان ابري هواي وقويات وضروري كولهن اكملهن وهذا موضوع مابي ضحك ولانقاش .
المهم طلعت من المستشفى رجعنه للبيت .
سألت اختي سندانه الزرع خوما جان موجود من وكعت خوفا من الفشله طبعا كالت لا جان طالع راجع لبيتهم ..الحمدلله محد شاف .
دخلوني غرفتي ..اووفييش ياريحه هلي ..هذا مكاني الارتاح بي ..
ساعدتني رقوش اسبح حسيت روحي وصخه من المستشفى وريحه الديتول ارتاحيت شويه من سبحت ونمت لحد وكت الغدا ..
جان المفروض يبلش دوامي هذا الاسبوع بس اهلي مقبلوا اداوم لان صحتي لسه مو تمام رغم ماجنت احس اني دا اتحسن والالم شويه شويه ديخف عديت هذا الاسبوع كوله كاعده بالبيت وحدي لان ماما وبابا اعتيادي دوام ورونق همين بلش دوامهه وهالسنه مرحله اخيرة وياعيني عليهه جاكه الحلقه وحاطه سندانتهه وتفتر بي بالجامعه عبالك تكول للعواذل شوفوني انخطبت لحبيبي ..
ظليت دائما اقلد عليهه واضحك بكل مناسبه وكلما تجي يمي بالغرفه ليما اطفرهه من يمي .
أنت تقرأ
صهباء غيرت حياتي
Romanceشاب يحب فتاة حب من طرف واحد ويحاول معها بكل الطرق لكي يلفت انتباهها لكنها عنيده لاتستسلم لنداء قلبه فلا يستسلم ولايقبل برفضها له ..يستقتل حتى يحصل ع حبها حتى لو كان ذلك بطرق حقيرة وملتويه ..قصتي الجديده ..
