صهباء غيرت حياتي

البارت 22

البارت 22
صهباء غيرت حياتي
بقلمي روسكان
ثاني يوم الصبح ماما رادت تكعدني كتلهه ماداوم ماعندي شي مهم عافتني وراحت داومت واني كملت نومتي ..
يمكن ظليت نايمه للساعه 10 الصبح ..صحيت ع صوت بيتنه تكسرت الباب من الدك ..وتلفوني مابطل رن ..ياستار ..نهضت باوعت الساعه ب11..
حيييل شكد نمت ..
رجع دك تلفوني ..فهد .
بصوت ناعس كلت ..
الوو
انتي وين ؟
بعدني بين كاعدة وبين نايمه ماميزت الصوت بس النبرة عرفتهه هذا فهد .
جاوبته ..
بفراشي ..
حسيته سكت ..صفن .
غلست وعدلت كلامي ..
بالبيت قصدي ..ليش ؟
صارلي ساعه ادوك بالباب فتحيلي ..
ياا هاي انت ..
اي اني ..دكومي فتحيلي .
اي هسه ..
كمت نزلت بكفشتي ..بتراكسود النوم بدون وعي فتحتله الباب ..
اول مانفتح الباب ..
فهد واكف لابس النظارات كالعاده كاتلته الشمس من الوكفه تحتهه ..ساند ايده ع الباب الثاني الثابت متخوصر اول ماشافني رفع تك حاجب ونزل النظارات شويه ع خشمه بس مجرد شافني نظرة مجرده بعيونه مو بالنظارات ..
باوعتله مستغربه ..كتله ..
هاي شكو من الصبح ؟
ياصبح هذا ؟
اشر ع ساعته وكالي ..
ساعه ب 11 ياصبح هذا ..صح النوم عيني ..
ماحسيت بالوكت ..
دفوتي فضحتينه كفشتج وانتي ..
فات واني طبيت وهو سد الباب وراي .
وتراكسود الارانب مالتج .
باوعت لتراكسودي ..اي صدوك بس ارانب .
طببته للاستقبال .
هسه اجي .
وين رايحه ؟
اغسل وجهي .
اجه وراي ..الصحيات قريبه ع المطبخ هو واكف بالباب الداخلي مال مطبخ الباب الي ع الهول ..
غسلت وكملت ..باوعت لوجهي عيوني مورمه من السهر ساعه 4 الفجر ياله كدرت انام ..شعري شلته كعكه بلامبالاة ونزلت خصل من شعري من الجوانب ومن كذلتي ..هيج يعني صار شي مرتب وبدون مشط ..التفتتله ..اعرفه جان يراقبني ..جنت استرق نظرات من مرايه المغسله عليه واشوفه يباوع ناحيتي ..
انت مو المفروض عندك دوام ..؟؟
اي ..اخذت محاضرة وحدة وضربت الباقي .

ليش ؟
بدون سبب مالي واهس ادخل محاضرات ..
هاا ..متريك ؟
واكف مكتف ايديه ومرتجي ع الباب ويحاجيني ..اعرف بعيونه كلام غير الي يكوله ..
فتت من يمه واني احاول اتهرب من كلام عيونه المتروسه عتب اليه بس اني زعلانه منه ع الي سواه بيه البارحه والي اعرفه هو هم زعلان مني ليش اجه هسه .
طبعه غريب ابد ميزعل ولايشيل رغم عصبي ناار بس صبور ويحاول يحتويني شما اسوي احس روحي طفله وهو ابويه فمجبور يغفرلي زلاتي واغلاطي مجبور يتحملني ويعلمني ..
لا والله ممتريك .
لعد اسويلك وياي .
فتت للمطبخ هو لحكني وكعد ع القنفه الخشب حاطيهه بالمطبخ .
لامشكور ماريد اتعبج .
مو تعب ولاشي اني هم ممتريكه .
لعد اريد جاي وياج .
اي تدلل .
هو كاعد ع القنفه واني اتحرك بالمطبخ اكمل باقي تحضيرات الريوك ..
لعد شعجب ماخذتج النومه ..شنو سهرانه ؟
لااا ..راسي جان ياذيني واخذت حبايه والظاهر دواهه منوم .
هاا .
يمكن جان يراقبني من اغسل واشتغل يشوفني لابسه الحلقه لو لا ..يمكن عباله البارحه اني متعمده مالبيت الحلقه .
شعجب اجيت ؟
سكت مجاوبني ..
بابا يدري بجيتك ؟
لا ..مراح اتاخر لتخافين .
تعاي اكعدي يمي .
صفنت عليه ..ردت احزر من نظرات عيونه وتعابير وجهه شبيه ..تقربت كعدت ع القنفه قريبه يمه .
نصه صوته ..ورفع راسه باوعلي ..
زعلانه مني ؟
دنكت ..بعدين رفعت راسي باوعتله ..
شايله عليك بس مزعلانه منك .
باوعلي بانتباه ..
ليش شايله عليه ؟
اسلوبك ..
تغرغرت الدمعه بعيني ..اريد احجي ماريد ابجي ..
هو تنهد كالي ..
شبي اسلوبي ؟
صح عندي سوابق وانت لزمتني لزمة ايد .
لزم ايدي قوي ..
لتكولين عندي سوابق ..
قاطعته ..
خليني اكمل ..حياتي صارت وياك ..لازم الگه طريقه اتعايش بيها وياك لان هذا السبب الديخليني اشيل عليك وماعرف شلون اتعامل وياك وانت صح هسه من كلت عندي عندي سوابق انت ماتقبلت مني هالكلمه بس انت تعاملني ع هالاساس ..يمكن انت ماحاس ع نفسك بس اني حاسه وكل شغله اسويهه وكل حجايه اكولهه بدون قصد انت تحسبني اتعمد اسوي فلان شغله او احجي علان شغله .
مهند صار ماضي ..طويته قبل لا انت تتقدملي ..وياك بديت صفحه جديده لابالي يم احد ولاتفكيري يم احد ..إفهم ..اسلوبك ديتعبني ..طول الوكت اني بموضع اتهام ..طول الوكت لازم ابقه ادافع عن نفسي كدامك واذا اسكت تثبت التهمه عليه وانت عصبي ومتتفاهم ..تخوفني فاسكت .
اخذت نفس من بعد ماحجيت هوااي حجيت كل الي بكلبي صفيت وفرمتت وارتاحيت من الحمل الي جان مضوجني ..
ظل يباوع عليه واني احجي ..صدوك ارتاحيت لان طلعت كل الي بداخلي ..
صفن شويه بعدين لف ايده ع ظهري من ورة وخلاهه ع جتفي يعني حضني بطريقته وقربني منه وباس راسي ..
كل هذا اني مسويه بيج ؟
ظليت ساكته هو يسأل ويجاوب نفسه ..
والله مجان قصدي هيج اعاملج ..اعتذر حبيبي .
كلامه بلسم لگلبي وحضنه راحه ودفو ..حسيت هو هذا مكاني الصحيح ..
سكنت بحضنه وسكتت هدأت وهدأت روحي  ..ماعرف شديصير بيه ..احساس حلو ....

تكمله بارت 22
صهباء غيرت حياتي
بقلمي روسكان
اسمع دكات كلبه قويه ومنتظمه حسيته هو هم هدأ قربني اكثر وحضني من خصري اكثر وبعد راسي عن صدره بايده الي حاطهه ورة رگبتي .
شنو هالعيون الحلوة ؟
ابتسمت وعيوني بعيونه ..ينصي عيونه ع شفتي ويصعد نظراته ع عيوني ..
والله جنتي حلم بالنسبه الي ..
شگد تمنيتج .
ظليت بس اسمعه بدون رد ..
انفاسنه وحده اتنفس انفاسه ويتنفس انفاسي دافيه وهادئه ..هدوء ودفو يدمر ..حسيت كلبه يسولف وياي مو لسانه وظليت اسمعه بكلبي مو باذني ..اريد احبه ..
والحمدلله صرتي الي ..
تلمس شعري وفتح قراصتي ..لزمت ايده مانعت .
لا ..فهد مامشطه ..
عوفيني لتمنعيني .
هد شعري وظل يمسد عليه ويدخل اصابيعه يمشيهن بين خصلات شعري واني مرتاحه لهل شعور ..سكون وراحه ..شي بيه ديتغير مدا اعرف شنو ..كلبي مديبطل ضرب بقوة عبالك مدفع .
ضم راسي بصدرة حضني حضنه سريعه باسه وشمه ودفعني بعيد عنه ع كيف وگالي ..
وخري ..اذا بقيتي بحضني فترة اطول اتهور .
ابتسمت ووخرت بعدني خدرانه من تاثير حضنته وعبالك نعسانه عيوني ذبلانه موتني تاثيرة عليه .
فهد ؟
عيونه ..
بااااجر ان شاء الله تعرفون شتريد رند من فهد ..تصبحون ع ماتتمنون .