البارت 27
صهباء غيرت حياتي
بقلمي روسكان
بعد العشه رجعنه لمكانه نسولف ونتذكر اشياء صارت واحنه بعاد واحد عن الثاني مرة نتعاتب ومرة نضحك ومرة اعرف اشياء لاول مرة يمكن جنت فاهمتهه غلط ظليت اقارن بيني وبين نفسي عن اشياء اول مرة اسمعهه من فهد اكو تشابه باسلوب الكلام والقصص بين فهد وبين مهند ..تعوذت من الشيطان شلون اتذكر مهند واني بحضن زوجي حته اني اعتبرت تفكيري بمهند خيانه بس الشبه خلاني بحيرة .
اليوم كوله جان متعب اخير شي استسلمت للنوم والراحه الاكبر انو نايمه بحضن فهد ..
حسيت الفجر ع صوت خرخشه بالغرفه ..
تلمست الفرش فهد ماكو ..
فتحت ضوة التيب لامب خفت عبالي حرامي شفت فهد كاعد يفتر بالغرفه ..
هاي شكو فهد ؟
ماكو شي حبيبي رجعي نامي ..
ع شنو دتدور ؟
ماكو شي نامي .
يجوز اكدر اساعدك ..مضيع شي ؟
قماش ابيض ..اكيد موجود بغراضج ...وين حاطته صارلي ساعه ادور عليه .
صفنت ..سكتت ..
ها شو صفنتي ..رند ؟
اي ..ماما طتني قماش ابيض ..
تندلين وين حاطته ؟
اي ..بجنطتي ..
كمت فتحت الجنطه وطيتهياه ..
رجعت كعدت ع الجربايه قلقه وممرتاحه ..شعور مزعج مدا افتهم شي شراح يسوي ..
اخذ شفرة صغيرة وجرح ايده ..شهكت وكمت ركضتله ..
فهد هاي شسويت بنفسك ؟
ماكو شي حبيبي ..بعدين افهمج .
مسح الدم بقطعه القماش البيضه وصفطهه وطانياهه وكالي ..
هاي تحطيهه بجنطتج تحافظين عليهه ومن اطلبهه منج تطينياهه .
هي هاي شنو فهد ..وليش هيج جرحت نفسك؟
اخذت القطعه البيضه الي تلطخت بدم فهد صفطتهه وخليتهه بجيب داخلي بجنطتي هو ضمد جرحه وخلاله كلينسه ورجع كعد ع الجربايه ..
اجيت كعدت يمه ..
حبيبي ليش هيج سويت ؟
اخذ ايدي ..وباسهه وباوع بوجهي بعيوني ..
وكالي ..
اسمعي يابنت الناس ..صح اهلي عايشين ببغداد من سنين بس عدهم عادات ماتركوهه ..
من تتزوج البنيه لازم يشوفون نيشانهه ..تعرفين شنو النيشان ؟
هزيت راسي ..لا
هاي القطعه البيضه الي لطختهه بالدم هذا نيشانج ..معناهه اخذتج وهذا دليل الشرف ..
اوضح بعد لو فتهمتي ؟
افتهمت ..بس ..
بس شنو ..؟
يعني اهلك يريدون يشوفون هذا النيشان ؟
هاي تقاليدهم ..صح اني ممقتنع بيهه بس هذوله اهلي ومجبور احترمهم .
باسني براسي ..
الي بيني وبينج اكبر من هالشي .. اكبر من تقاليدهم .. ممستعجل وماريد اجبرج ع شي وماطيتج الوعد مجبور بالعكس اطيته عن قناعه ولان احبج ..
ابتسمت ..
الله يخليك اليه .
ويخليج اليه ياعمري انتي .
يله تعالي نرجع ننام ..اني بعدني نعسان ترة وماشبعت من حضنج .
ضحكت ..
فهد والله تعبانه ..
هو اني شكايل ..هو بس حضن .
نام ع الجربايه وجرني لحضنه استقريت بنومتي وراسي ع صدره ورجعنه نمنه .
الساعه ب 10 الصبح فزينه ع صوت دكه الباب موظف الخدمه جابلنه الريوك وديذكرنه انو لازم نفرغ السويت بعد ساعه لان حجزنه يخلص الساعه 11
كمت غسلت ورتبت الريوك ..تريكنه سوة وكمنه بدلنه ورحنه لبيت اهل فهد ..
وصلنه للبيت واشتغلت الهلاهل لان عمامه وعماته وابناء عمومته بعدهم ماراحو وذبحوا ذبيحه جوة رجليه تجراة دم وحنوا طرف حذائي بالدم ودخلنه للبيت يبوسون بيه وبفهد الي شارگ حلكه من الاذن هاي للاذن ذيج ويباركولنه وشكد همه كووومه الله يحفظهم شبعت مبروك وانزرفت اذني من الهلاهل خاصه عمات فهد وهو عنده 6عمات الله يحفظهن واخير شي صعدنه فووك لشقتنه ..
نهايه الدرج شالني فهد ودخلني شقتنه وكالعاده اني تعلقت بركبته لان تفاجات من تصرفه ومن ردة فعله ودخلني لشقتنه ..
ها هالمرة هم هاي حجه وشلتني ؟
لاء صرت اكدر اشيلج باي وكت يعجبني حبيبتي .لزمت خدوده وكرصتهن ..
دخلنه للشقه ..
نورتي بيتج عمري ..
ابتسمت ..
بنوورك ..
ظليت افتر بشقتي ..مكاني الي راح اسكن بي اني وفهد ..
حبيبي هذا ذوقك ؟
اي ..ماعجبج ؟
اصلا يخبل ..
حضني من ورة وباسني من ركبتي وكالعاده اكش من لحيته تجكجكني ..
شبيج ؟
لحيتك ..تجكجك .
ازينهه يعني بالموس واخلص منهه ؟
لاااااء عوفهه حلو ستايلك بس هي تجكجك.
بعد مابوسج لعد ..
التفتت عليه بسرعه ..
اموتك ..
ضحك بقوة وشالني ..
لج اموت ع ربج ..
والله انتي كمتي تحبيني بس مادري ليش متريدين تكوليهه ..هواي عليه ؟
لا مو هواي ..بس كولشي بوكته حلوو.
وشوكت وكتهه عيني ؟
من انت نايم هههههه اشاورك واكولهه الك .
ههههههه شنو تستحين ؟
هيج شي .
يله بدلي شي حلو وخلي ننزل عيب من اهلي وكرايبي باقين علمودنه ..
ماشي حبيبي .
حياتي رنود اتصلي ع امج خطيه اكيد هسه كلبهه مثل النار عليج ..
وشاكوللهه اذا سالتني ؟
كوليلهه كولشي تمام .
ماشي .
بدلنه واتصلت ع ماما وكتلهه مثل ماكلي فهد وباركتلي واني عندي احساس بالذنب لان جذبت عليهه وكالتلي راح تجي تشوفني العصر هي وبابا وبعدين نزلنه جوة اني وفهد ..
بنزلتي لكيت رونق جايه هي وسند همه شقتهم طابق ارضي بصف بيت عيالي ركضت عليهه تباوسنه وحضن وباركتلي ..
كوة جرني منهه فهد وحضني من جتفي وقربني عليه وهمسلي ..
تكمله البارت 27
صهباء غيرت حياتي
بقلمي روسكان
ترة اني اغاااار .
التفتت عليه هذا صدوك يحجي هاي اختي وحيدتي ..
رفعتله حاجب ماعاجبني ..كلي ..
والله هذا العندي ..
سند يضحك يعرف سوالف اخوه وهم باركلي ..
جرتني رونق غصبن ماع فهد ..
تعاي تعاي معليج بيهم
اخذتني من حضن فهد تدردم ع فهد واني اضحك واباوع ع تعابير وجه فهد وسند خربان ضحك هم من ورة تعابير وجه اخوه .
تعاي يله سولفيلي بين ميصير الغده .
سند ..لعد شعبالك خوات واتفقن علينه .
اسكت انت ..هو اني شمحصل من مرتي .
كعدنه نسولف اني ورقوش بين ماصار الغده ..وكتلهه اهلي راح يجون العصر .
تغدينه كولنه سوة وورة الغده صعد فهد يرتاح اني ماصعدت ظليت اسولف ويه عمات فهد شكد حبوبات وسوالفهن تخرب ضحك ..
للعصر اجوي اهلي باركولي ..
ظلوا شويه وراحوا .
بالليل ورة ماصعدنه لشقتنه وجنه متعشين ومخلصين والبيت فارغ بس زهوري وخالتي ام سند وعمي لان الكرايب ورة الغده كولهم ترخصوا وراحوا ..
صاحوا فهد نزل يمهم شويه وصعدلي كالي طيني النيشان وطلعته واطيتهياه ونزله الهم سمعت امه هلهلت وصعدلي مبتسم .
اني صراحه هذا الموضوع مضوجني لان اعتبرة خصوصيه بين الرجال وزوجته وماكو داعي لهل عادات القديمه هاي ويكفي حجايه ابنهم مو الا نيشان ..شفتهه شغله صعبه ومحرجه بس ماطول فهد رأيه من رأيي وممهتم كولش للموضوع ومثل ماكال هوه سوة هالشي احتراما لاهله وتقاليدهم فما بينت لفهد انو اني ضايجه من الموضوع وتركته بعدت تفكيري عنه والتهيت بفهد ..سوالف وشقه وضحك وغزل وبوسات واحضان دافيه ..
أنت تقرأ
صهباء غيرت حياتي
Romanceشاب يحب فتاة حب من طرف واحد ويحاول معها بكل الطرق لكي يلفت انتباهها لكنها عنيده لاتستسلم لنداء قلبه فلا يستسلم ولايقبل برفضها له ..يستقتل حتى يحصل ع حبها حتى لو كان ذلك بطرق حقيرة وملتويه ..قصتي الجديده ..
