البارت 19
صهباء غيرت حياتي
بقلمي روسكان
ثاني يوم سبت مشه اليوم عادي كوه صبرت ع نفسي مااتصل بيهه توقعتهه من تشوف اتصالاتي هي تتصل ع اساس انو هي جانت نايمه البارحه بس ماصار الظاهر طريقي طويل وياهه وراح تتعبني .
لليل اتصلت بيهه ..ردت ..
هلو رند ..
هلو فهد ..
شلونج ؟
زينه .
سكتنه ..
مرة وحده بحياتج اغلطي وسأليني شلونك ..
شلونك ؟
بخير ..اتصلت بيج البارحه مرديتي .
تعبانه جنت ونمت .
اها ..واليوم شفتي المكالمات بس ما اتصلتي .
شغل ودراسه متراكمه ضيعت هواي وقت .
اذا مشغوله بالدراسه ماشي ..
رند ؟
نعم ..
من باجر بعد ماكو داعي للخط ويه البنات .
ليش ؟
بلغت عمي ..تروحين وتجين وياي .
اي .
ساكته هادئه سكوتهه محيرني .
فهد تعبانه واريد انام .
بيش الساعه امر عليج باجر .
ب 7:30.
ماشي روحي ارتاحي .
تصبح ع خير .
وانتي بخير .
سديت الخط منهه ..غمضت عيوني بقوة ..تعبان منهه ..لو ادخن لي جكارة هسه يمكن جان ارتاحيت بس الجكارة تعرف شبيه ..
ثاني يوم احد دوام ..كعدت الصبح سبحت بدلت تعطرت باوعت لنفسي بالمرايه ..اجلح واخبل ..ابتسمت متفائل ..الساعه والنظارات لبستهن ما استغني عنهن .
اخذت سيارتي وطلعت لبيت ابو رند ..اخذ خطيبتي ..الله شكد حلوة هاي الكلمه ..طول الطريق اباوع ع الحلقه الي بيدي ..وكأني مامصدك خطبتهه وصارت رند الي ..
وصلت لبيتهم ..دكيت عليها رفضته وطلعت ..نزلت مبتسم ..احلا صباح هو الصباح الي يبدي بنظرة بوجه حبيبك بس حبيبي لو يفك ويبحبحهه شويه جان اني بخير ..
صباحو ورد جوري ..
كالعاده گالبه الخلقه لابسه الوجه بالمكلوبي وتحجي من ورة خشمهه اي ندري حلوة بس مو هيجي خفي علينه شويه ..ردت عليه ..
صباح الخير ..
فتحتلهه باب السيارة وصعدت بالصدر يمي ..سديت الباب وصعدت ..التفتتلهه ..
شلونج اليوم ؟
بخير ..انت شلونك ؟؟
عال العال .
جان مبين عليه فرحان ومنطلق والدنيا ماسايعتني ..عيوني وفرحتي فاضحاتني .
دا التفت ع الطريق علمود اسوق السيارة انتبهت ايدهه مابيهه حلقه رأسا دست بريك قوي ..شفتهه فزت ..
رند وين حلقتج ؟
باوعت للايدهه ..هااا ..
شنو هاا وينهه ؟
بجنطتي .
شعدهه بجنطتج ..ليش ملابستهه ؟
مو ..من غسلت نزعتهه خليتهه ع المغسله لان الصابون يطب برسم النبض المنقوش عليهه ..فنزعتهه ..ونسيت ارجع البسهه .
بكد ماجنت فرحان بتصرف واحد منهه عصبتني بنت اللذين ..زفرت بقوة ..
طلعيهه ولبسيهه ..
اي هسه .
طلعتهه من جنطتهه ولبستهه ..
رند الحلقه بعد متنزع من اصبعج .
اي ..
واني راح اشتريلج حلقه ثانيه صب حته ميطب بيهه صابون من تغسلين ..
التفتتلي ..
ليش هاي حلوة .
ظليت صافن بوجهه اول مرة تعارضني ع شي ..
نصيت صوتي وحاولت قدر الامكان اضم ابتسامتي ..
عاجبتج ؟
اي حلوة لاتبدلهه .
ابتسمت رغم عني ..
اشتريلج غيرهه مابدلهه ..
ماكو داعي ..بس هوة لان ممتعوده عليهه نزعتهه ع المغسله وماما لحكتني بيهه .
ماشي .
يله خلي نروح خاف نتأخر ..
بديت اسوق بطريق الجامعه ..
فتحت راديو السيارة ..فتحت ال mp3 كولهه اغاني القيصر ماحب اسمع لغيرة ومايحلالي صوت غيرة اول اغنيه ..اكرهها ..
ابتسمت ..
اكرهها واشتهي وصلها ..وانني احب كرهي لها .
احب هذا اللؤم في عينها ..وزورها ان زورت قولها .
مبتسم وادندن ويه كلمات الاغنيه ..
جنت كل شويه التفتلهه ..مرات تباوعلي وترجع تنتبه ع جامة السيارة ومرات اشوفهه ساكته متباوعلي يمكن مندمجه ويه الاغنيه او يمكن تفكر بمهند اللهم انعلك ياشيطاني وين جان عقلي من سويت هيج ..ضايقني الشك ..صح مهند شخص اني خلقت وجوده بس بنفس الوقت صار منافس اليه ..صار يشغل تفكيرهه يمكن ..والشك قوة تدفعني اسوي اسوأ التصرفات واتفوه باسوأ الكلمات واقساها بداعي الشك والغيرة ..هيج جان الصراع بداخلي ..صدوگ غلطه الشاطر بألف .
التفتتلي والاغنيه لسه شغاله ..شفتهه حركت شفايفهه عرفت حجت فد شي نصيت الراديو .
شنو ..ماسمعت ..
انت مو تكول تحبني ؟
شو هاي اول مرة اصعد وياك بالسيارة واحنه مخطوبين ومستلمني اكرهها واكرهها ..وانت مسلطن وتغني وياه وتوزع ابتسامات .
رفعت حاجبي ع عبارتهه الاخيرة ..اوزع ابتسامات ..خطيبتي ام شعر الاحمر طلعت ام لسان ..بس من كالت مخطوبين امممم حبيت ..حلو الاحساس ..حته بالكلمه نفسهه من تطلع من حلكهه الها طعم واحساس غيرررر.
شنو مسامعه الاغنيه للنهايه ؟
سامعتهه بس مامركزه بالكلمات ..مو ذوقي ..
اسمعي وتعرفين ليش " اوزع ابتسامات " وادندن ..
وصل لاخر جمله بالاغنيه ..اشرتلهه تنتبه ع الكلمات ..
يحبها حقدي ويا طالما ..وددتُ إذ طوقتها قبلها ..
ها ؟
اي حلوة .
اي يعني بمامعناه من كثر مايكرهه حبهه ..حته حقده يحبهه .
كملت كلامي بثقه ..
بالمناسبه ..هاي الاغنيه عليج مو عليه .
التفتتلي بسرعه واني درت وجهي انتبهت ع طريقي وسياقتي وماحجيت بعد وياهه ..خليهه تحلل وتفصل وتحير بكيفهه ..خلي تضوك شويه من حيرة كلبي بيهه .
مثل حيرة گلبي ياريتك تحير ..
وصلنه للجامعه نزلنه سوة وصلتهه لكليتهه واتفقنه تخلص محاضرات وتنتظرني بالسنتر واني امر عليهه نطلع سوة .
أنت تقرأ
صهباء غيرت حياتي
Roman d'amourشاب يحب فتاة حب من طرف واحد ويحاول معها بكل الطرق لكي يلفت انتباهها لكنها عنيده لاتستسلم لنداء قلبه فلا يستسلم ولايقبل برفضها له ..يستقتل حتى يحصل ع حبها حتى لو كان ذلك بطرق حقيرة وملتويه ..قصتي الجديده ..
