بقلمي ... #الاميره الموسويه 👑
بعد ما شمس انتبهت انو اكو واحد مراقبها و ديأشرلها ... هي بسرعه دنكت راسها وبعد موكفت ابد ..
لان خافت احد يشوفه يأشرلها ع بالهم تعرفه لو تصعد زوجة اخوها هند وتشوفه وتسويلها مشكله .. ومن الخوف والصدمه نست حتى الجو الثلج والمي البارد
غسلت الفراشات بسرعه ومرفعت راسها نهائيا
ولا شافته بعد ....
كملتهم ودخلت الغرفتها وسدت الباب عليها
بعدين نزلت كالعاده سوت الغده ونظفت البيت والمطبخ
وكالت لاخوها مهند لما اجه انو هي متكدر تشر الفراشات لانو ثكال
صعد مهند شرهم ونزل .. طبعا ارشد بقى ينتظرها ترجع للسطح لانو هي من شافته انهزمت اعتقد نزلت!!
هو ع باله هي من هذولي البنات الي يعرفهم بأشاره منه يكتلن نفسهن عليه....!
لذلك من أشرلها كل ظنه انو هي حتستجيب للموضوع وتبادله الاشاره وبعدين يضحك عليها ويسوي وياها علاقه!!!
بس للاسف هو تفكيره كان قذر تجاه البنات بسبب الي عرفهن.....!!
..............
شمس ..
من شفت هذا الولد يأشرلي
حسيت كلبي حيوكف من الرعبه والخوف ، اني معايزه مصايب وبلاوي
واذا صعدت هند وشافته لو بشنو احلف متصدكني
وهي اصلا تريدلها حجه عليه حتى تخلص مني..
المهم بعد الي صار ابد ما عتبت باب السطح ولا طلعت
حتى الغرفه الفوك مصعدتلها .. حجيت ويا اخويه مهند وكلتله انو الغرفه الفوك بارده حيل ومااكدر ابقى وحدي بيها اخاف بالليل .. طلبت منه ابقى بغرفة ماما وبابا القديمه و حلفتله انو ابد مااطلع ولا ازعجهم لا هو ولا هند ، حسيته كلبه انكسر عليه و وافق انو انزل جوه
طبعا هند كولش انزعجت ، وبقت تصيح وتلغي وتغلط عليه لانو نزلت جوه حسيتها حيل ضاااااجت لما نزلت جوه ع بالك حكعد على كلبها ولا تكول هذا بيت اهلي واني أحق بي منها 💔
المهم اني سكتت ، وبصراحة ابدا متوقعت انو مهند حيوافق بسهوله انزل جوه لان يعرف مرته متقبل وهو مستحيل يخالفها او حتى يزعلها!!
شنو السبب وافق مااعرف .. بعدين عرفت السبب بس بعد فوات الاوان مع الاسف
مرت ايام واني ابد ما صعدت السطح بعد حتى اذا هند تريد شي من فوك وتطلب مني اصعد كنت دائما اتحجج بشي ومااصعد
اصلا اني كل مااتذكر هذا الي شفته يأشر الدم يوكف بجسمي من الخوف مااعرف شنو السبب؟!!
اني حتى مشفته زين لان هو بعيد عني كولش ملامحه ابدا مواضحه .. بس اتذكر هو بوقتها مكان لابس عسكري!!!
المهم .. خلال الفتره الي نزلت بيها جوه بديت الاحظ اشياء غريبه تصير...!!
هند زوجة اخويه 24 ساعه تحجي بالموبايل!!
ولما يطلع مهند تشمر ابنها (عبدالله) عليه وتطلع وتتأخر يلا تجي!!
هي ابد مجانت تقبل اصلا الزم ابنها هسه صارت متشيله الا نادرا ومتهتمله الطفل ميت من الجوع متدير بال ابد!!
أنت تقرأ
انتقام الحب
Romanceبقلمي الاميره الموسويه.. قصة فتاة يتيمه ظلمتها الدنيا واقرب من تحب فتقرر ان تنتقم ولكن عن طريق الحب ?
