انتقام الحب

12

#بقلمي ..

#الاميره الموسويه👑

*طبعا اني قررت اوقف القصه بس هذا البارت لخاطر الي علقوا وطلبوا اكملها لخاطرهم حكملها.

..............

اتخربطت شمس وكانت حتوكع للكاع ... بس ارشد بسرعه لزمها قبل لتوكع!!

اميره خافت البنيه صارلها شي .. وصاحت لنوال تجيب مي ع السريع..
ارشد شالها وخلاها ع التخم وراسها بحظنه!!!!

اشويه واجتي نوال بيدها المي .. اخذته اميره وغسلت لشمس ، بس ماكوو اي ردة فعل منهااا.!!

ارشد فقد اعصابه ع باله صارلها شي .. بس نوال كالتلهم انو هذي مو اول مره تتخربط ، قبل كم يوم هم اتخربطت

اميره كالت لارشد لازم ناخذها للمستشفى انشوفها اشبيها ، اخاف البنيه بيها شيييي من ورا عمايلك السوده.

شالها ارشد وطلعت اميره ويا .. خلوها بالسياره وراحو بوجهم للمستشفى........!

دخلوها لطوارئ وطبعا ارشد طلع هويته حتى بسرعه يفحصوها ويسهلون كولشي (تعرفون العراق عباره عن واسطات ومعارف 😑)

المهم .. سوولها فحوصات وتحاليل، كال الدكتور بعد ساعه تطلع النتائج.. بقوا ينتظرون وشمس نايمه ، فاقده الوعي!!!!

اميره بقت تحجي ع ارشد وتلوم بي ، كالتله هذا كلها بسببك ، والبنيه اذا صار بيها شي متلوم الانفسك.. حتى ابوك اخلي يتبره منك.

ارشد اصلا باله مو يم امه ، كل تفكيره كان بشمس اخاف بيها شي؟!!
وقرر بس تصير زينه الي تريده يسوي حتى اذا رادت تتطلك يطلكها ، بس المهم ترتاح وكولشي ما بيها....!

مرت الساعه وصاحو بأسم شمس جواد .. فز ارشد من مكانه وبسرعه راح جاب التحليل .. كالتله الدكتوره....................!! مبروك المدام حامل

بس صاير عدها هبوط بالضغط و ارهاق كولش كبير لازم تديرون بالكم عليها و هذي الفتره ترتاح ، هسه خلينالها سيروم بس يخلص تكدرون اتطلعوها.

ارشد .. فقد الاحساس بكولشي من سمع الي كالته الدكتوره!!!!!!!

معقوله شمس حامل؟؟؟؟

معقوله حيصير أب؟!!

حس بسعاده غريبه وشعور اول مره يمر بي ... قيل فالاب ..
(هو ذلك الذي تطلب منه نجمه فيعود لك حاملاً السماء)

بس الي فرحه اكثر ... انو مراح يطلك شمس ، والعذر انو هي حامل بأبنه!!!

والى ان يجي الطفل للدنيا راح يسوي المستحيل حتى يخليها تحبه....!

بس الشي الوحيد الي كان شاغل تفكيره هو اشون يقنع امه متخلي يطلك شمس .. لانو هي وعدت شمس ايطلكها ومتجبرها على شي ومااعتقد خبر حملها حيخليها تتراجع عن الي كالته؟!
وهو ميريد يكسر كلام امه ، ولا يزعلها منه .. وبنفس الوقت مستحيل يطلك شمس بعد ما طلعت حامل!!!!!!!