#مابعد_الخطيئة
الجزء الاول
Nada hs
اني منتهى... عمري 20 سنه... طالبه بكليه القانون.. مرحلة ثانيه..
شكلي عادي.. بس اكثر شي اميزني هو جسمي.. مرتب ومخصر..
فكانن البنات الويايه دوم يسألني شنو تسوين وهيج جسمج.. صراحه ماكنت اسوي شي.. غير اكل قليل.. ومو رجيم.. لالا اني مو هلكد احب اكل.. خاصه من صرت بالجامعه.. اتريك هناك او اكل لفه وبعد مااتغده.. وبالعشا اهلي محد يسوي فأني لو اكل فاكهه لو اصلا مااكل..
نرجع لعائلتي.. احنه 4 بنات.. اني الصغيره.. ماعدنه اب.. بابا اتوفى من كنت ثالث متوسط.. حيل تأثرت بوفاته.. صارت الدنيا عليه ظلمه ..
الى ان رجعت للحياة شويه شويه.. اتعودنا..
خواتي..نورس الكبيره..30 سنة.. متزوجة ابن عم بابا وعدهه بس داليا ومتريد تخلف بعد لان هي موظفه همين..
شذى الوسط 26 متزوجة من ابن خالي وعدهه رونق ورعد
هدى الوسط 24 سنه.. ممتزوجة وموظفه بالمصرف..
واني..
كان روتيني نفس كل يوم.. ماكو يوم يختلف عن الي قبله..
عايشين ابيتنا اني وامي واختي هدى.. امي تستلم راتب تقاعد مال بابا.. لان كان عسكري قبل.. وهدى همين ممقصره ويانه.. من ناحيه الماده كنت مدللة هدى سبورتيه كلش.. ذا شفت شي وكلت حلو .. ثاني يوم الكي موجود كدامي..
امي شمعة البيت.. كبيره بالعمر.. وهي صديقه مو ام.. ابد ماتقسي علينه.. تكول اني اريد اخليكم براحتكم بس بحدود واريد تحجولي كل شي..
وفعلا .. هدى كانت ع علاقه بواحد.. وامي تعرف وتسألهه يوميه .. ودوم توصيهه ادير بالهه.. والولد حجه ويه مامه وطلب هدى منهه.. بس امي كالت اني ماانطي حجايه مني روحو لعمامهن.. بس هي الك ..
واني .. حديقه هههه.. دخلت الكليه.. شفته عالم ثاني .. يختلف عن الاعداديه.. اول سنه كانت كلش صعبه بالنسبه اليه..
ماعندي صديقات من كليتي.. صديقاتي من السادس صارن غير كليات..
وتواصلي بيهن كلش قل..
كنت قليل ادرس.. ادرس ع كد النجاح.. فكل يومي فراغ.. اقضي ع اللاب لو تلفزيون لو ارسم.. عندي هوايه الرسم كلش احبهه.. بس مو وجوه ..
لا ارسم شخصيات كارتونيه وارسم زخارف وهيج اشياء..
هدى مرات تاخذنه نطلع نفتر لو نتسوك.. ومرات من تستلم راتب نتعشى برا.. طبعا هدى عدهه سياره.. صغيره ع كد الحال ولسهه مطلوبه عليهه ..من اشترتهه بيت عمي.. يعني زوج نورس واخوانه عارضو وصار حجي هوايه.. شنو تسوق وشنو تصعد سياره وحدهه بشوارع .. ووو هواي حجي
بس امي عرفت تسكت الكل.. كالت يله.. الخير بيكم خل يتزوجهه ويكعد يمي.. من حجت هيج كلهه سكتت.. هم كانو كلهم متزوجين.. وكبار حيل..
امي من حجت هيج تعرف لا هي تقبل تنطيها الهم ولا هم يقبلون همين..
بس سكتو.. اشترتهه هدى وصار الهه سنتين ونص تسوق.. من صرت جامعه هي توصلني الصبح.. وبالطلعه همين انتظرهه.. صح تتأخر عليه بس عادي.. ابقه اكعد بالنادي لحد ماتجي.. ومرات ادخل ويه المسائي .. مو لان احب المحاضرات.. بس اطك روحي..
بديت مرحلة ثانيه.. شويه استقريت وتعودت ع الوضع.. الطلاب الي ويايه اخذت عليهم.. وصارن عندي صديقات.. اخذت ارقامهن ونتواصل اذا اكو امتحان او نتفق ع شي.. ماكان اكو فايبر وواتس مثل هسه منتشر..
داومت بدايه السنه.. مالي خلك الدراسه ولعبانه نفسي.. اتمنى العطله اكثر..حته اكو محاضرات اضربهه وماادري شنو المواد ولاادري شكد..
شوي شوي تعودت.. دخلت جو الدراسه.. وعفت وضع العطله وعدلت جدول نومتي.. بعد ماكان كله سهر..
وصار يومي... اكعد الصبح.. اتريك ومرات اطلع هيج.. لان مالحك.. كل مايدك المنبه ارجع اطفي وانام شويه لحد ماتسحلني هدى سحل..
بالسياره ابقى اعدل بنفسي واخلي شوي ميك اب..
طبعا هدى هي العلمتني شلون اتصرف وشنو اخلي وشلون اكعد..
كنت رافضه بالبدايه احف حاجبي ووجهي بس هدى شجعتني.. وتعودت بعد
حتى المكياج كانت هي تجيبلي الي والها.. شراكه يعني..
وصلت ع الكليه طالعه روحي.. مااحب الطلاب وهوستهم الصبح..
واني اعترف عندي نوع من التكبر والآنفه.. يمكن لهيج بصعوبه تعودت ع وضع الجامعه..
خليت جنطتي وكتبي ع ستيج.. كعدت .. طلعت مرايه.. شفت نفسي زين.. نوب طلعت فوني.. اكلب هيج ع لاشيء.. صار وقت المحاضره.. اصلا مااعرف شعدنه ياماده.. بس هيج كاعده علمود الحضور..
دخلو طلاب وجبات وهوايه يجون متأخرين..من الازدحام..
دخل واحد.. اول مره ماعبالي هو الاستاذ.. لان بعده موكلش كبير.. يعني يطلع بدايه الثلاثينات.. من دخل وكفنا كلنه..
كعد هو.. كعدنا.. سلم ..بده يعرف عن نفسه..
اول شي ارحب بيكم.. طلابنه الاعزاء.. اني استاذ علي.. اخذكم مادة الالتزامات.. اتمنى يكون عدكم احترام للوقت.. احترام للمحاضره.. وتحضير اطالبكم بي.. مادة الالتزامات مادة تحتاج تحضير وفهم و تواصل اني هنا موجود مراح اقصر وياكم بالشرح.. بس اتمنى ميضيع سدى..
بقه يحجي عن الماده.. مركزت ويا بعد.. التهيت مدنكه واكلب بالفون..
كنت كاعده بالاخير بس هو مااعرف شلون شافني.. فزيت ع صوته كال
الي بالاخير! اذا تحبين تفضلي اطلعي.. هزيت راسي بلا..
الفشله الحسيت بيهه خلت خدودي تصخن.. نوب الطلاب كلهه التفتت عليه
بقيت شايله راسي واباوعله.. صح ممركزه شيحجي واني اصلا منعسه
بس ردت مااخلي ينتبه اني ممركزه او مدنكه..
طكت روحي .. الوقت يمشي بطيء وهذا بس يلغي من اول مادخل.. اخذ ساعه كامله يله طلع...
بعد ماطلع كبل كمزت من القاعه... رحت للحمامات غسلت وعدلت الحمرة الي خليتهه مدري شلون مجان بالسياره..
رجعت افتر بالممرات.. لكيت شهد .. بنيه من مرحلتنا.. سلمت عليه وبينه نسولف ونفتر.. قاعتي دخلت محاضرات.. بس اني بقيت ..مااهتميت..
اصلا طكت روحي من الالتزامات من الصبح..
بقيت ويه شهد.. رحنه اكلنه لكمة.. من دخلنا بالممر صار بوجهي استاذ علي
كال:مو عدكم محاضره ليش ماادخلون؟!
مالحكنه نرد علي.. كبل دخل غرفه الاساتذه.. كبر هذا شبي؟ هسه وانت شعليك .. بقينه ندردم علي اني وشهد..
ثالث محاضره حضرت.. الاستاذه تشرح واني ولايمهه.. مدنكه ارسم بالكتاب.. وطبعا اغلب الطلاب هيج يعني مو بس اني..
كملت المحاضرات .. بقيت افتر بالسنتر .. الطلاب كلهه طلعت بس اني.. اجو طلاب المسائي وهدى بعدهه مجايه.. هي قبل لاتجي تخابر..
بقيت انتظرهه .. دخلت النادي عين ع الطلاب وعين ع الساعه.. واخيرا دكت.. صارت 3 ونص.. طلعت الهه..
هدى:ها.. يله..
-شلونج..
هدى:زينه.. وانتي شلونه يومج؟
-زين ماشي حاله..
هدى:شوف الغبي! هذا شبي!
كانت مركزه ع الطريق وطلع واحد بوجهه.. من شافهه بنيه بقه يهز بأيده..
لو واكف كان نزلت اله هدى هههه.. ماعدهه مانع والله اطيح حظه بالشارع..
بس بقت تغلط علي لحد ماوصلنه البيت.. لكينه مامه مسويه غده.. اني كالعاده مااشتهي.. رحت بدلت وغسلت ونمت..
كعدت لكيتهه صايره 8 بليل.. امي وهدى بالصاله..
هدى لازمه التلفون وتتبسم.. عرفتهه تراسل بخالد.. حبيبهه يعني..
امي تتفرج ع التفزيون.. كعدت يمهن .. بس ساكتين ..
بالليل رحت للغرفه.. طلعت كتابي كلت خل اشوف شنو يحجي هذا الكتاب
انسطر راسي.. سديته ورحت سبحت.. طبعا اني من اسبح اخذ الوقت كله واذا كعدت امشط بالساعه يله بين تنشيف وتمشيط وسشوار.. معتنيه بشعري حيل.. صح مو طويل كلش بس من اشوف خواتي شلون معتنيات بنفسهن اني همين احب اسوي نفس الشي.. كعدت بالصاله يم امي امشط وهي تباوعلي وتبتسم..
ضحكت وكلتلها:ها؟
-سلامتج..
بعيونهه كلام بس ماكالته.. احسها ممصدكه اني كبرت .. هههه هيج حسيت
كملت تمشيط واخيرا.. امي راحت تنام.. غرفتهه وحدها.. بس مرات تروح يمهه هدى ومرات اني.. يعني حسب اتصالات هدى وخالد .. اذا يردون يخابرون اني اروح يم امي وهي تبقى بغرفتنه تخابر واذا ماكو نبقى اثنينه سويه ومرات اثنينا نروح انام يم امي..
نمت بالغرفه اني وهدى ذاك اليوم.. بس هي بقت سهرانه ع الفون.. اني تعبانه كبل نمت بس كل ماافز الكيها لازمه التلفون..
دك المنبه الصبح.. كوه فتحت عيني.. سحلت نفسي سحل من الفراش..
الغرفه هوسه.. وهدوء يخلي الواحد يشتهي النوم غصبا علي.. بس كمت بيه مابيه رحت غسلت وجهي.. كعدت بالصاله اخذتلي صفنه..
هدى مبدله ودتخلي مكياج:هاا.. شبيج معبسه من الصبح! يله كملي بسرعه تره مااخذج!
-اي هسه..
كمت لبست وشربت كوب جاي .. فرشت اسناني.. خليت مكياج خفيف .. كملنه وطلعنه سوه.. هدى الي يشوفهه شكد نشطه يحب الصبح وكعده الصبح ويحب الدوام.. مشغله اغاني من الصبح ووتتبسم وكلها حيويه..
اني بس معبسه..
وصلت ع الجامعه..
هدى:يله توكلي..
نزلت.. صاحت ورايه.. ديري بالج ع نفسج..
هزيت راسي ابتسمت الها ..وراحت..
مشيت ع كيفي.. ممهتمه للوقت صار وقت المحاضره ماصار..
وطبعا اني مشيتي بحد ذاتهه بطيئه كلش.. نوب اني منا متعاجزه..
ع ماوصلت الكلية صارت تسعه اله ربع.. باوعت ع قاعتي من الباب..
كان استاذ علي عليهم ويشرح.. اني مهتميت كبل دكيت الباب ودخلت..
داروح لستجي صاح:هاي شنو ست؟ وين كاعدين؟
التفتت علي تلعثمت معرفت شحجي..
علي:تفضلي اطلعي.. وقت المحاضره راح ينتهي..
-بس استاذ عادي كل المحاضرات ندخل!
علي:بس يمي لا.. وتفضلي برا لتقاطعين المحاضره وتشتتين الطلاب..
باوعتله بحقد وطلعت..
اووف اول محاضره وانطردت.. بس هو شايف نفسه.. كلهه ادخل المتأخر بس هو مطبق النظام براسي..
بقيت كاعده بالنادي.. طلبت حليب وكاكو.. اشرب ع كيف كيفي..
باوعت للساعه صار وقت محاضره لخ.. مااريد تكثر الغيابات..
دخلت القاعه.. وره دقايق دخل الاستاذ.. همين بده يعرف بنفسه..
اني استاذ منير.. اخذكم السنه ان شاء الله مادة الماليه العامه..
بعدين بلش يشرح.. عبالك ممصدك دخل علينه حته يشرح.. اني بس مدنكه واتبع بالاسطر ويا.. ذبيت حسره.. شراح يخلصهه للسنه والله طكت روحي من اولها..
همين مثل استاذ علي.. اخذ ساعه كامله.. يله طلع.. ملحكنه ناخذ نفس اجت الاستاذه ام النظم.. طلبنهه منهه تنطينه استراحه.. كالت يله مراح نشرح من اولها.. فد عشر دقايق انطيكم.. بقت هي كاعده بمكانهه وتكتب بأوراق عدهه
واحنه صارت القاعه عباره عن صوت دويه من السوالف..
كلهه تحجي بس اني ساكته.. ماعندي احد احجي ويا..
بصفي بنيه مو هلكد علاقتي بيهه.. ومنا ولد همين .. فمااكو موضوع نسولف بي.. خلصت العشر دقايق وبقت تشرح وتشرح واحنه ولا واحد مركز وياهه.. وحته صوت السوالف اعلى من صوتهه..
سبحان الله الي يشوفهم بمحاضره استاذ منير وعلي مايشوفهم هسه..
حته من اخذ وقت الريست محد حجه..
انزعجت منهم.. محد محترمهه.. فهنا اني صرت شاطره وركزت ع شرحهه صدك حلو ..
كملت وطلعت.. صار ريست.. ساعه كامله ل12 ونص يله عدنه محاضره لخ..
صرنا 4 بنات.. افترينه بشوارع الجامعه.. اكلنا ورجعنه.. وهمين صار وقت محاضره ودخلنا.. اليوم صرت حبابه ومضربت ولا محاضره من بعد طردة استاذ علي.. كملت وبقيت انتظر هدى..
وصلنا للبيت دنيا عصر.. حته نعست بالسياره .. كبل رحت بدلت ونمت
كعدت لكيتها 9 بليل.. وكان عندي كوز عود كلت اقره.. بس بعد من كعدت هيج متأخره وخلگي ضيگ فد مره كان عفت القرايه..
كعدت اتفرج ع التلفزيون ويه ماما.. سوت جاي.. ولفات جبن وتعشينه بي
يعني عشا متنكر بريوك هههه
بقيت سهرانه.. شينومني بعد هل نوم كله.. صرت شاطره.. كعدت ادرس شويه.. حفظت كم كلمه عود اجاوب بيهن..
صارت ب1 طفيت وغصبت نفسي ع النوم.. رحت لكيت هدى نايمه..
غطيتهه مكشفه.. ونمت..
ثاني يوم هم نفس الروتين.. هدى وصلتني.. رحت كبل للجدول.. اشوف شعدنه ماعدنه.. اعرف انه عدنه كوز والباقي ماادري شنو..
من شفت ماده التزامات وتذكرت شلون طردني البارحه كرهته وحقدت علي
بس همزين مو اول محاضره .. يجينا الثالثه..
دخلت المحاضرات كلهه... مصارلي واهس اضرب اليوم..
من دخل علي كبل خفت.. اني ماكنت اخاف من احد بصراحه..
بس من دخل واتذكرت عصبيتهه عليه وحجيه خفت لاارجع انحط بنفس الموقف.. فسويت نفسي مركزه ويا .. يشرح وكل شوي يسأل .. ومرات يطلب جواب من الطلاب الي ممنتبهين..
ماادري شلون دنكت وخملت من المحاضره.. اسمع صاح انتي.. اي اي انتي شسمهه؟!
باوعت كلهه الطلاب تباوعلي..
-اني؟
علي:اي..شسمج؟
-منتهى..
علي:منتهى.. شنو جوابج؟
-ها؟
بقيت افر بعيوني.. ماادري ع شنو يحجي.. باوعت ع السبوره اكو كلام بس مالحكت حته اقره.. كبل كال اقري زين منتهى وعوفج من الصفنات!
رجع سأل بنيه همين.. جاوبت نص جواب..ورجع سأل طالب همين
بذاك اليوم تمنيت اكوم اخنكه.. هاي ثاني مره يفشلني.. تف..
ع اعصابي كعدت.. كمل وطلع..الطول طول نخله و عقل عقل صخله.. حتى من يريد يفوت يدنك شويه خاف يطخ بالباب.. صخونه .. مالكه بس اني بالقاعه يكومني.. احجي علي بداخلي وميته قهر اغلب الي يسألهم جاوبو بس اني.. تف عليه وعلي..
حته ماصارلي مزاج ادخل محاضره الخ... ضربتهه.. كعدت بالنادي اكلت
واجن بنات من مرحلتنه كعدن يمي وبقينه نسولف..
كلهه تشكي من علي واسلوبه شلون يفاجئ الواحد ..
ساره:لج والله بس بدرسه كمت احضر..
شهد:والله مرتين فشلني كدام الطلاب.. فصرت اقره غصبا عليه..
ساره:موطبيعي والله.. تره ميصير هيج شنو قابل احنه اعداديه!
شهد:العام كومه راسبين عنده.. يحاسب ع كل شي..
شهد:اوي شكد شايف نفسه.. هسه كالوهه شاب وبحيلك وحلو .. بس هم ع كيفك .. كبر..
-اوي.. شيريد يسوي.. والله اذا كلش كلش نشتكي يم العميد..
شهد:ههههههه حبيبتي هو اقارب العميد واثنينهم نفس الاسلوب!
-ياا.. عزه صدك مليوصه!
ساره:نقره والله كريم.. خو هذا منير بعد اضبط منه بالدرجات.. بس شنو زين ميحاسب ع تحضير وع تأخير..
-يااختي عقله كبير قابل مثل هذا علي.. يله بنات اني اروح للحمام..
رحت للحمام عدلت نفسي.. وطلعت.. بقيت انتظر هدى.. اجتني من وقت والفرحه تارسهه وجهه.. عرفت اكو شي قبل لا تحجي..
هدى:منوشه.. اليوم خالد يروح لعمو..
-يا حياتي.. الف مبروك ربي يتمم ع خير..
كانت تسوق وخبوصه..:كوليلي شحضر.. شسوي؟ نطلع للسوك؟
-ها؟ والله مااعرف بس انتظري خل يرجعلج خبر من عمو ..
هدى:اي هم صح..
علت الصوت.. علمودك انت وبس لأسهر واتأنق والبس.. ههههه تغني وتسوق والفرحه تارسهه عيونهه.. اني همين ع واهسهه كلش فرحت.. وضجت بنفس الوقت لا يجي اليوم الي تعوفنه بي هدى..
بس المهم ترتاح هي.. هذا كافي..
وصلنه للبيت .. هي كبل راحت ادور ع امي لكتهه بالغرفه نايمه.. حضنتهه وهي نايمه..
امي:ها ولج شكو.. شبيج؟
هدى:ع كيفج ماما بس لاتخترعين فدوه..
-هههههه مامه ماكو شي.. بس خالد اليوم يروح لعمو..
امي:اووف.. وكعتي كلبي.. اخذت نفس وكالت.. ولج هدى تعوفينا؟!
-ماما بعد هسه خل ننخطب اول.. وبعدين نفكر.. يجوز نجي يمج ههههه
امي:يله روحي تغدي.. والعصر نحجي..
كمزت مثل الطير..
امي:هههه راح تتخبل هاي البنيه..
-عوفيهه فرحانه هههه..
امي:الله يديمها ويوم الالج..
يتبع...
يسعد مساكم متابعيني فردا فردا.. رجعت وياكم بقصه جديدة رغم الوقت القصير والظروف الاني بيهه.. ان شاء الله تعجبكم وتنال رضاكم..
