#مابعد_الخطيئة
الجزء الثالث
Nada hs
واتبادadaena7
رجعت للبيت.. احس براحه من اعتذرت وقبل اعتذاري.. بس ماوصلت سلامه لهدى حتى لاتعصب عليه من تعرف اني رحتله..
بدت العطله الربيعيه.. اكثر الوقت خلصنا ويه هدى وتحضيرهه للزواج..
يوميه العصاري نطلع نتسوك.. مخلت شي مجابته..
مبقه ع زواجهه بس اسبوع.. اخذت اجازه هي.. ويوميه اسويلها اعتناء ..من اظافر وترطيب جسم وسنفره ويوو.. يوميه شغله نسوي..
اني همين ع واهس عبالي نفسي عروس هههه...
نورس وشذى يترددن علينا همين..
جهزنه كل اغراضهه والجنط..
وبيوم الحنه.. رحت اني وياهه للصالون وشذى همين.. صارت لعابه تجنن..
اني هم خليت بالصالون خفيف.. وعزمنه كل صديقاتنه..
حتى اني عزمت شهد وساره وغيداء ووسن
صارت حنتها تجنن.. بس من خلصت الحنه بالليل.. بجيت عليها بجي كومه.. ومخليتها تشوفني.. شلون راح تفاركني.. كانت هي اقرب وحده اليه بخواتي..
ثاني يوم .. هي فرحانه ومخبوصه.. وخالد كل شوي يتصل .. وهي بس تضحك هههه.. مندري شنو يكوللها ويخليها تنسى احنه موجودين يمهه..
اخذناهه للصالون.. زوج نورس هو الي اخذنه..
كلنا خلينه مكياج بالصالون .. طلعنا نخبش ههه..
الزفه صارت من الصالون بعد مارجعنه للبيت.. لان صارت دنيا ليل واحنه ممكملين...
رحنا لبيت اهل خالد.. مو بيت قصر يبوو... كله حديث والاثاث فد شي.. هم عائله طاكه.. واصلا خالد شاف هدى من اجه للمصرف هو ابو حته يودع فلوس.. امي كلش فرحت من شافت اهله وبيتهم وناس مثقفين..
عزلنه ملابسهه واشياءهه بغرفتهه.. بقينه كاعدين يمهه وجابو العشا خيرات الله.. تعشينا وطلعنا منهه.. وصار وقت زفه خالد عليهه..
دخلو وبعد ماشفناهم.. امي كالت يله نرجع.. عيب نبقه يمهم..
اصرو ولدهم اله يوصلونا وماقبلو نروح ويه ازواج خواتي.. كالو بعد صرتو منا وبينا ومثل ماهم يقومون بواجبكم احنه نزيد عليهم..
طلعنا من البيت.. ودعتنا ام خالد.. وبوست امي وتشكرت منهه..
لكينه اخو خالد منتظرنا.. وليد.. الاصغر من خالد.. خالد قبله عصام..متزوج وكاعد وياهم همين..
وليد يطلع هيج عمره بال26 او اكثر..
فتحو الباب لامي وصعدت.. واني همين.. عاملونه مثل الملوك.. والله راقين وذواقين..
وليد كل ماالتفت تجي عيني بعينه بالمرايه ويبتسم الي.. استحيت منه.. دنكت ومشلت راسي بعد.. عاد هو شسوه.. شغل اغنيه لأكعدلج ع الدرب گعود حلوه يم عيون السود.. شلت راسي هم اجت عيني بعينه وابتسم..
من صارت الاعنيه بيهه جوبي وهزه انتبهت علي مخلي ايده فخذه وويضرب خفيف ويه الدكه..
امي باوعتلي وضحكت.. احسهه افتهمت شنو يقصد.. بس اني ابد ماحبيت هذا تصرفه..
وصلنه للبيت.. نزل فتح الباب لامي... امي شويه ثكيله بمشتيها.. فتتأخر
نزلت اني .. شفته يباوعلي من فوك لجوه.. فتت من يمه همس ااااااخ.. ااخ
غلست منه.. فتحت الباب لامي ودخلت.. سلمت ع وليد وتشكرته..
وهو بس لاطش وميتحرك.. يمكن عباله نعزمه وندخله للبيت..
ردت اسد الباب وهو بعده واكف.. كلت:تصبح ع خير..
وليد:وانتي من اهل الخير .. نصه صوته وكال.. فدوه لهل عيون..الي يمسي بيهن شيريد بعد..
سويت نفسي مااسمع.. سديت الباب ..هههههه دخلت اضحك علي.. هذا كل عقله يبوو.. والله بطران اني وين وهو وين..
البيت فارغ بدون هدى.. وحشه كلش.. نوب خواتي مااجن يمنا.. كالن باجر عود يله يمرن النا.. امي نامت.. بقيت اني وحدي.. شغلت مواويل وبقيت ابجي ع هدى.. فراشهه فارغ.. قبل ايام كانت يمي وتخابر وصوتهه وضحكتهه يردن الروح..
نوب لااراديا اتذكرت استاذ علي وزدت بجي.. هاي اني شبيه.. يمكن تخبلت .. واله يمكن هاي مشاعر تالي الليل هيج تصير..
غسلت وجهي وفرشت اسناني ورحت عود انام بس مكدرت.. شكد كنت تعبانه بين الصالون والهوسه والزفه .. بس منعست لان وحدي وهواي افكار تجمعت براسي..
لوجه الصبح يله كدرت انام.. كعدت ع صوت الاطفال.. اطفال خواتي...
راسي يوجعني كوه اشيل راسي يريد ينفجر.. عيوني مورمه..
كل الي يشوفني يكول شبيج..
وره ساعه خواتي كالن نروح لهدى.. وناخذ الهم هدايا.. امي همين اصرت تروح.. بس اني مكدرت اطلع بوجهي هذا وعيوني المنفخه..
صح كنت مشتاقه لهدى بس مارحت.. بقيت وحدي بالبيت..
رجعت نمت.. احسن حل انام حتى لااتذكر هدى واشوف مكانهه الفارغ..
كعدت الظهر.. امي جايه وخواتي رايحات لبيوتهن..
اني كعدت زهكانه.. اكلت لكمه.. وسبحت.. نوب بديت اقره.. مبقه شي ع الكورس الثاني.. كل مااريد اقره اتذكر علي.. ميروح من بالي ابد..
وماحقدت علي وع تصرفاته.. راح احساس الحقد.. صرت احس اني المقصره وصوج مني.. وهو فعلا صوجي.. واله هو ميحاسب بس الخاملين مثلي.. قريت هوايه.. راجعت كل الماده الي شارحهه قبل..
يومين اني كرست كل وقتي للدراسه.. احضر كوب النسكافيه واخلي اللاب مشتغل ع موسيقى هادئه واقره..
وره يومين.. اجتنه هدى.. ماصدكت عيوني من شفتهه واكفه بالغرفه كبالي..
حضنتهه وبجيت.. صدك افتقدتهه.. بقو هي وخالد تغدو يمنه.. خلت فلوس اليه.. وخالد منطي لامي همين هديه مبلغ مرتب..
اخذت سيارتهه وراحت..وكالت لاتشيلين هم اني اجيج يوميه واوصلج بالدوام.. همزين حته اشوفهه يوميه..
وبده الدوام.. اول اسبوع صدك تبهذلت بدون هدى.. لان هي بعدهه مجازه.. ومتكدر تجي وزوجهه موجود..
اول يوم داومت.. لااراديا عيوني ادور ع استاذ علي..
ماهده بالي ولااستقريت اله لمن شفت درجتي يمه.. ناجحه ع الحافه..
وكل المواد ناجحه بيهن.. ماصدكت نفسي.. معقوله .. اني ممجاوبه.. بس مردت احجي كدام الطلاب ويكولون واسطه لو شي.. سكتت وضميت فرحتي بداخلي..
بدت المحاضرات .. ومعبالك جايين من عطله.. لا كبل محاضرات ع حسي الاصول والوقت بالتمام.. وطبعا علي ماقصر بالشرح.. بمحاضره وحده خلص نص الماده يمكن..
بس من كان يشرح.. ماحرجني ابد.. وسأل هوايه طلاب .. بس اني لا.. راح احساس الحقد كلش من شفته هيج..
ومرت ايام.. رجعت هدى للدوام.. صارت هي توصلني.. بس بالرجعه متكدر.. كالت اسويلج خط ومصاريفه عليه..
ويوميه من تجيني تدخل تسلم ع مامه وتبوسهه ونروح.. وهمين تسألني ع استاذ علي.. اذا بعده شاد ويايه.. سولفت الهه شلون تغير وصار ميفشلني..
هي عبالهه لان اجت هي وحجت ويا.. متدري لان اعتذرت منه..
ومرت الايام.. سوتلي هدى خط.. ومرات حته بالجيه هو يجيني..
اداوم وشويه مستواي احسن.. اقره.. وانجح بالكوزات..
خاصه بماده استاذ علي.. كطعت نفسي بالقرايه..
ويوم ع يوم اني صرت اندمج بمحاضرته.. اركز بشرحه وبشكله همين..
شفته شكد هو شخصيه وحلو.. طوله كلش مرتب ويه جسمه.. واني كنت عقلي يطير منه.. وجهه شوي عريض.. حواجبه مخنزره من وحدهن..
خشمه شوي بي طول.. بس كلش كاعد ويه وجهه.. عيونه نظرتهم كلش حاده.. مخلي سكسوكه من الحنج بس..ركبته طويله والقميص والربطه كلش كاعدات ويا.. خو الستره فد شي ويا.. كل هذا اركز بي من هو يشرح ويكوم يكتب ع الصبوره.. ركزت بي كلش.. بحيث اذا مدنكه بالكتاب عبالك اشوفه هو كبالي.. ملامحه ابد ماتنمل..
ومرت الايام.. صرت مااكدر اكمل يومي اذا احضر محاضرته كلها واركز بعيونه وشفايفه من يحجي.. اروح بعالم ثاني ويا..
ارجع للبيت بس افكر بي.. شكد احاول امنع نفسي بس مااكدر.. صوته الخشن وملامحه وكل شي بي ماينسي..
ايام واني بصراع.. عوفي التفكير.. ولا تعوفين.. حبي ولا تحبين..
كنت اوهم نفسي.. اكول هذا مو حب.. اني معجبه بشخصيته وشكله وبس..
كنت اضحك ع نفسي.. صرت الكليه بنظري عباره عن علي..
اذا يوم ماعدنه هو.. ابقى افتر حته اشوفه وارتاح..
وبمره من المرات.. كنت دوم اني اتحجج وامشي ويه وحده من البنات بالممرات حته المحه.. وبذاك اليوم.. اجت وحده.. ناعمه.. وكلش عاديه..
لابسه جبه.. وبيدهه جنطه.. دخلت ع غرفه استاذ علي.. تأخرت يله طلعت.. من طلعت وكف وياهه هوايه.. وبس يضحك.. ويمكن اول مره اشوفه هيج يضحك.. وخاصه هو ابد ابد ميضحك ويه البنات والطالبات والموظفات.. ويه النسوان ابد ميتعامل بس بجديه..
كتلني الفضول اعرف منو هاي..
-شهد؟ اكلج هاي منو صارلهه ساعه ويه استاذ علي؟
شهد:ياا لج هاي مرته! متعرفيهه؟
هي كالت هيج واني نار شبت بضلوعي.. صدك يعني متزوج مو اشاعه.. بقيت اباوعلهه وبگلبي حسره.. نيالج انتي مرته..
كرهتهه كره ماصاير.. اباوعلهه شلون تضحك وواكفه ويا.. تصير نص من جسمه.. كصيره كلش وناعمه.. وهو .. هو رايح وضايع بين عيونها..
كنت اباوع واكول شنو شاف بيهه وحباهه..
احتركت حرك ذاك اليوم.. كان كل ظني انه اشاعه ممتزوج.. بس اليوم قطعت الشك باليقين.. ظليت وراهم لحد ماطلعو من الكليه.. اخذهه وراحو
لوما الناس اله شويه نزلت دموعي..
طلعت عيني من الدنيا كلش.. اعرف مو حقي بس هيج ادمرت من شفتهم سوه.. عفت الدوام وخابرت الخط.. طلعت من وقت..
بس وصلت للبيت عوزي بس وحده تنعى وتكمل.. شبعت بجي..
نوب الي ممقتنعه بي.. هو شكل مرته! هو يستاهل وحده احلى منهه.. شلون هاي مرته شلون..
بجيت هوايه.. تعوذت وكمت غسلت وجهي.. امي تسألني شبيج.. اكلها تعبانه من الدوام.. بس الي تعبان هو گلبي الي ماعرف يختار..
ومرت الايام.. يوم ع يوم ينتهي تفكيري بالعالم كله ويصير بس علي..
شكد حاولت اطلعه من بالي ماكو.. كنت اكول نزوه، مراهقه، اعجاب .. بس مانفع.. مااكدر امنع نفسي..
صرت اتقصد اسأل واحجي حته يسمع صوتي..
احضر سؤالي بالبيت.. حته اسأل .. وصدك اكثر من مره اسويهه..
يجاوبني بس اني ممركزه شنو يكول.. اركز بعيونه.. لو شفايفه.. واصير بعالم ثاني مابس بس اني وهو..
من يوكف .. يخلي ادي ع خصره ويباوع ع الكتاب اتمنى هيج بقدرة قادر اكون بين ادي.. اخلي راسي ع صدره واشتم عطره..
مبقه شي ونكعد.. نكعد حتى ندرس للامتحان النهائي.. شلت هم بالعطله شلون اشوفه.. وشلون اصبر 3 اشهر..ويجوز سنه الجايه مايدرسنا..
اخخخ ياكلبي كون اشلعك واذبك..
كعدنه بالعطله قبل الامتحان.. نص دراسه ونص الثاني علي..
شنو سوه واخذ عقلي وكلبي ماادري.. كل حركاته حافظتهه.. عيونه.. طبكه حواجبه.. خزرته.. من يحجي .. من يباوع ع شي معاجبه.. اخخ. والف اخخ شورطت نفسي ..
وصارت الامتحانات.. انتظر بفارغ الصبر اشوفه.. رحت للكليه..
داريد ادخل .. شفته نزل من سيارته.. لابس النظاره الشمسيه وعبالك مفصليهه علي تفصال.. لازم اوراق بيده.. قفل السياره وعدل بنطرونه صعده.. ودخل.. اني امشي ع كيف .. بس من شفته سبقني لا شديت همتي ومشيت بسرعه.. دخلت.. شافني.. ابتسمت اله.. وهو مثل التمثال..
ماابتسم ولا شويه.. خرب.. ليش هيج..
بقيت اكل بنفسي اكل.. ليش سوه نفسه مايعرفني.. ليش ماابتسم الي..
الناس تقره كبل الامتحان.. بس اني مخليه الكتاب وبالي يمه..
اول امتحان الماده الي ياخذنه بيهه.. احكام التزام..
دخلت الامتحان ..جاوبت نوعا ما.. احسن من الكورس الاول..
واسئلته كانت زينه همين..
بقيت كاعده شويه بين مايجي الخط.. حاره وروحي طالعه ومنا استاذ علي ماشفته بعد.. ومااشوف بس وليد.. اخو خالد زوج هدى .. واكف بالسنتر ويه واحد .. لابس نظاره بس شنو راسه عليه ويتبسم..
طلعت من الكليه.. هذا هم بطران..
شعنده جاي والله فارغ.. اني مثله انام هسه.. اجاني الخط ورحت للبيت..
احس اكو صدمه بگلبي. لان كنت متأمله من اشوف علي راح يبتسم الي لو يحاجيني.. بس هو تصرف عبالك مشافني..
تحملت ع اعصابي .. لحد بالليل مكدرت اتحمل .. عيني بعد متتحمل.. لازم ابجي واريح كلبي..
كعدت الصبح مسطوره..راسي يوجعني وكل جسمي موبس راسي..
تمنيت هدى يمي.. بس لالا.. مااحجي الها هيج شي.. خاصه اذا تعرف بي متزوج .. خل اعوف همي بكلبي واسكت.. اصلا منو راح يفهم علتي..
شي صار غصب عني.. شي مثل المرض.. دخل جسمي ومااكدر اطلعه..
وصدك اني تمرضت بشي اسمه علي..
كعدت اقره.. لازم انجح.. مااريد دور ثاني.. اريد اخلي العطله فتره نقاهه حتى اعرف شريد وشسوي..
وصدك جريت الامتحانات كلهن زينه.. بس الاخير.. صخمت ولطمت بي..
وليش؟ لان استاذ علي هو الي وكف علينا.. كنت قاريه بس تيهت الاول والتالي.. عيونه ضيعتني وضيعت كلشي بيه..
طول ماهو يفتر اني عيني تروح وترجع ويا.. اكثر من مره خزرني.. بس مكدر يحجي لان ويا مراقب ثاني..
بقيت اخر وحده.. من راد يخلص الوقت كتبت.. حليت شلون ماكان..
من سلمت الورقه اله.. باوعت علي حيل.. بس هو يتصرف كأنه ميعرفني ولادرسني ولاشي..
بس اني تجرأت.. وكلت اليوم اخر يوم ويجوز بعد مااكدر اشوفه..
كلت:شلونك استاذ..
وهو مدنك كال:الحمد لله.. وانتي؟
-الحمد لله..
علي:جاوبتي؟
-لا مو هلكد..
علي:شعجب اسئلتكم سهله!
سكتت.. اصلا شكول.. عيونك هي الضيعتني.. يحجي وياي بس ميباوع بوجهي.. مدنك يكتب ..
بقيت صافنه ورا ماسلمت.. بعدين رفع راسه وكال:ها؟ عندج شي بعد؟
من باوع بعيوني كل الحجي طار.. عبالك مثل طفل ديريد يتعلم كلام..
هزيت راسي بلا وابتسمت وطلعت..
من دامشي بالممر.. شفت زوجته.. اخخخ اكلتهه بعيوني.. فصلتهه من فوك لجوه.. شكد اكرهج.. اكرهج من فوك لجوه.. ليش انتي اله..
هي شافتني شكد باوعت الهه.. بس سوت نفسهه ممهتمه.. بعد طلعت ومشفتهه.. لان كنت امشي واباوعلها.. وهي همين.. كل وحده بأتجاه...
كعدت شويه بالاستراحه.. اتصل عليه الخط .. ودعت صديقاتي وطلعت..
احس روحي تريد تطلع..
وصلت للبيت .. سبحت ونمت.. مالي خلك اي شي.. اتمنى ارجع مثل مااني قبل.. اكرهه وحاقده عليه.. شجابك لگلبي.. شورطني بيك.. نوب متزوج.. وعنده بنيه.. اخخ تمنيت اصرخ بكل صوتي واطلع كل وجع بيه..
ومرت ايام.. عطله ع اساس وراحه.. ياراحه واني بنص نار..
اتخيل علي 24 ساعه.. ومااتخيله وحده.. لا اكيد مرته ويا.. اكيد هسه ديحضنها.. اكيد ديبوسهه.. اكيد هيج وقت هي دتنام ع ذراعه.. اوف اوف
لحد مااشبع بجي..
خواتي كل جمعه يجن يمنا.. محد حس بيه.. بس هدى.. اكثر من مرة تسألني شبيج.. اتحجج ومااجاوبهه..ومتصير فرصه انو انطيهه مجال تضغط عليه دائما لو اكلها اريد اسبح لو انظف لو امي تدخل علينا..
ومرت ايام.. همي بگلبي.. محد يعرف.. اجتنه هدى .. وكالت هي وزوجهه راح يسافرون .. يعني شهر عسل متأخر.. خلت النا مصروف.. وبقت سيارتهه بالكراج مالتنه.. وثاني يوم راحت لعيالهه.. ومناك سافرو..
هي رادت تاخذنا اني وامي وياهه.. بس امي رفضت.. كالت عيب شيكولون علينا ممصدكين.. فمقبلت وكالت غير مره .. بعدهم عرسان..
اني صدك تمنيت اروح وياهم.. ردت اغير جو.. بلكت فكري ونفسيتي تتغير.. بس ماصارت.. العطله كلهه كضيناهه بالبيت..
بس رحنه يومين لبيت خالتي.. اني وامي..
وباقي العطله اني مدمره دمار.. بالنهار مابيه شي وبالليل... انتهي.. اشهك بچي.. ليش هذا الاختبار وشنو تاليه.. يمكن بس الوقت الي انام بي ماافكر بعلي.. وحتى بالحلم همين ماعافني.. دوم اشوف نفسي بالكليه واشوفه يخطف مني واني ابجي .. هي كلهه كانت مجرد احلام .. بس شكدها بكلبي.. ابقى طول اليوم اتذكر الحلم الي شفته بي...
يتبع...
