مابعد الخطيئة

الثاني

#مابعد_الخطيئة

Nada hs
واتباد adaena7
الجزء الثاني

رحت اني نمت.. بعد ماعرفت شصار.. كعدت ع صوت هدى..
هدى:لج اكعدي.. منوشه.. اكعدي ولج!
فزيت مرعوبه:شكو.. شصار؟
هدى:عمو وافق.. عمو قبل.. الجمعه خالد يجيب اهله ويجي.. طبكت اديها وحده ع الثانيه وكمزت.. يالله لج منوش ممصدكه والله..
خل اخابر نورس وشذى..
راحت مخبوصه اتصلت بخواتي.. وكلنا فرحنه الها.. خو امي صلت صلاة شكر.. كالت كنت خايفه لا يبطل وكنت اخاف احجي لهدى ..
هدى:مامه خل نطلع للسوك..
امي:لا تستعجلين.. انتظري الخميس وروحي..
-اي عفيه الخميس افضل والله..
هدى:خاف مالحك!
امي:لالا تلحكين احنه يمج وخواتج هم يجن وياج..
هدى:هههههه .. يارب ممصدكه..
امي:الله يهنيكم يمه..
رحت سبحت.. كعدت ادرس شويه.. هدى مخبوصه هههه.. لو تخابر لو تروح يم ماما تخطط شتلبس وشنو تسوي..
صارت ليل.. اجت هدى..
هدى:يله كومي بدلي..
-وين؟
هدى:نتعشى برا.. لج حته جعت من كد ماافتريت وحجيت هههه
-كلتي لماما؟
هدى:اي دتتحضر.. يله استعجلي..
-خرب ليش مكلتولي من وقت..
هدى:ديله يله استعجلي!
كمت ع السريع بدلت.. وطلعنا.. امي كعدت بصف هدى واني ليوره
طول الطريق ونسه وضحك وسوالف.. تعشينا ورجعنا ..
وكلمن راح ع فراشه بعدهه.. امي نامت وهدى تحجي ويه خالد واني شغلت اللاب وكعدت اسمع اغاني..لحد مانعست ونمت..
كعدت الصبح.. اووف هم دوام.. شوكت اخلص..
بدلت من لاجاره.. هدى بقمة الواهس.. واني هيج وجهي😑
رحت لدوامي.. شفت الجدول ركض.. همزين ماعدنه التزامات.. يعني علي ماكو راح نرتاح منه اربعاء وخميس.. بس احد واثنين وثلاثاء يجينا..
كملت يومي.. اجتني هدى ورجعنه.. نفس الروتين ماكو شي جديد..
للعصر اجتنا نورس.. التمينا كلنا سوه..
واجه زوجهه النوب تعشه ويانه.. كانت احلى لمه.. والحجي كله يم هدى.. فوك ال10 يله راحو نورس وزوجهه وبتهه..
نمت من وقت.. تعبانه والعصر مانمت زين..
همين رحت لداومي.. وانطينا خبر لمامه نتأخر لان فد مره من الدوام ونطلع نشتري فستان وشغلات لهدى..
الخميس نخلص من وقت محاضرات.. وهدى همين تخلص من وقت..
رحنه اشترينه اني وياهه.. احتارت شتاخذ.. هي ذواقه بس من فرحتهه نست حته شلون تختار.. ساعدتهه واخذت فستان قصير لونه ماروني داكن..
ورحنه ع مكياجات وعطور.. اخذنه شغلات بسيطه لان بعد ورا الخطبه هم تشتري.. رجعنه الدنيا مظلمه والجو بده يبرد..
شوفنه الشغلات لامي.. وراحت لبسته وطلعت النا.. طلعت عبالك جسم لعابه بي.. هي بيضه .. اكثر وحده بيضه بينه.. وجسمها نازك.. تشبه جسمي..
مخصره تخصر ..وشوي ورك خفيف وخلفيه..
بقت لابسته وتضحك.. لحد مااتصل عليهه خالد راحت ركض للغرفه بعد مشفناهه ... دخلت حمام اني.. وبقيت اتفرج تلفزيون وامشط..
سهرت سهرة طويله ل3 الصبح.. كعدت لكيتها بال12 الظهر..
هدى تتجهز حتى تروح صالون.. وامي مسويه الغده ومنظفه البيت ومرتبته
ع السريع اكلت لكمه وبدلت حتى اروح ويه هدى..
كملنا واجه خالد اخذنه للصالون.. طول الطريق هم يتغازلون اني من نفسي استحيت.. حسيت نفسي مخنوكه بنصهم.. وين انطي وجهي وين وين..
صفنت ع الشوارع وع المحلات واشغل فكري حته لااسمعهم ...
كملنا.. بعد ساعات من المعاناة ويه هدى وذوقهه الي كل شوي يتغير..
اخر شي سوت مكياج سموكي وتسريحه كلش بسيطه..
كملنه وخابرتنا شذى.. كالت راح تجي هي وزوجهه نرجع وياهم.. وهيج كنا متفقين.. رجعنه للبيت.. اني دخلت رتبت نفسي ولبست فستان طويل ردن..
وشمرت الحجاب شمر..
خالتي وحده عدنه.. اجت هي وبناتهه اثنين.. واخت زوج شذى همين.. و اخت زوج نورس.. المهم صار خوش عدد.. وكلهه شابات وفرحانين بواهس
للعصر اجه خالد.. هو وامه وابو واخوانه اثنين واخته وحده..
ازواج خواتي هم الكعدو يم الزلم.. وماقصرو وكفو وكفه خطيه..صار الحجي المعتاد بكل خطبه.. اهل العروس يمدحون ابنهم واحنه نمدح بتنا هههه.. بعدها..
عقدولهم .. ودخل عليها وهي من فرحتهه دموعهه نزلت.. نريد نسكتها ماكو اخر شي خالد حضنها ومسح دموعهه... نوب من حضنها كلها بقت تباوع الهم وتضحك.. هدت.. اجت ام خالد كعدت يم ابنها.. تنطي الذهب وهو يلبسهه.. هي تضحك وبنفس الوقت كوه لازمه نفسهه ماتبجي..
باوعت لامي لكيتهه تبجي..وتضم دموعهه..
شغلو اغاني.. وبدت مرحله الهز هههه.. كلهه كامت تهز.. بس نورس الثكيله مالتنه ماركصت.. اما البقيه لا كلها تردح. حته العرسان ركصناهم
كان يوم كلش حلو..
راحو الخطابه.. وهدى طايره من الفرح تمشي وعينهه ع ايدهه والحلقه..
نورس وشذى بقن يمنه.. لان جمعه وماعدهن شي..
سهرنه وتونسنا.. ثاني يوم الصبح .. ماما جايبه كيمر وصمون حار ومسويه بيض وحتى بتيته مكليه... عبالك غده مو ريوك..
التمينا كلنا اكلنا.. نورس راحت قبل الغدا.. وشذى لا بقت للعصر يله راحت
رجع البيت هدوء..
كعدت ادرس.. مو لان اريد درجة.. بس حتى لا اتفشل مره لخ..
كملت وسبحت وحضرت ملابسي مال دوام..ونمت من وقت..
الصبح رحنا للدوام..
وصلت للكليه.. اول محاضره عدنه التزامات.. يبوو.. الاستاذ لازم الجنطه مالته ورايح للقاعه.. عاد اني دستلها.. لحكت قبل لا يدخل بثواني.. خطفت من يمه وهو يمشي.. اووه.. اخذت نفس ورحت لمكاني..
دخل وبده بالمحاضره.. سأل هوايه.. وكل سؤال اعرفه كنت ارفع ايدي بس ميكومني.. دنكت راسي وكلت كبر شكد خبيث.. رفعت راسي لكيته يباوع عليه.. يمكن سمع.. لان مو نظره عبالك ليزر.. صوبهه ع عيني..
متت بدمي.. بقيت مدنكه .. لحد ماطلع يله شلت راسي..
بنيه بصفي كالت ولج صوتج شعلوه! يمكن سمعج..
نوب اجت وحده لخ تسأل تكول منو الي غلطت من الاخير!
يبووو .. ماانتبهت لهدرجة الصوت عالي.. خرب خرب..
شنو هل حظ.. رحت للحمامات.. عدلت نفسي وطلعت.. داريد اروح للقاعه صار كبالي استاذ علي.. باوعلي بأستهزاء .. دنكت ومشيت..
يبوو هسه شيكول عني خرب.. اوي يطبه طوب شيكول خل يكول هو فشلني اكثر من مره واني بحياتي محد مفشلني هيج..
كملت يومي تمام.. مضربت محاضرات.. انتظرت هدى ورجعنه للبيت..
نفس الروتين.. يوم ويومين وتلاثه..
احس استاذ علي حقد عليه..اذا يخلي القاعه كلهه تشارك بس اني ميكومني..
اني همين لبست الوضع.. المهم عندي دااحضر ع الوقت واقره شوي شوي
هدى بدت تجهز لزواجهه.. وره راس السنه.. واحتمال بشهر الثاني ويه عيد الحب.. واني صار وقت امتحاناتي.. كلش اكره هل فتره..
لان اني مااقره يومي فتتراكم الماده ومااعرف شلون ابدي وشلون اقره..
بلشت الامتحانات.. اول يوم كان التزامات.. اخخخ من صعوبه الاسئله تمنيت اشككها واشمرهه بوجهه.. وياريت لو هو الي يراقب علينه..
كان حاجيته ع صعوبتهه.. جاوبت ع الاعرفه والحظ..وشوي حصلت مساعده من طالب بصفي..
وامتحنت تلث امتحانات.. كل امتحان مراقب شكل.. وبالامتحان الرابع..
دختل للقاعه شفت علي.. روحي انقبضت من شفته.. ممتفائله بوجوده ابد
كان كلش متشدد.. وزع الاسئله وكال اي واحد يحجي ينطرد ..
عاد صدك بيومه محد حجه.. كان ماشبك ادي ورا ضهره ويفتر ع روسنا
اني منا محتاجه نقل.. وهو يفتر شلون يربي شلون.. خليته يدير وجهه وهمست للكدامي.. بنيه شاطره.. سألتهه .. ملحكت تجاوبني شافنه سليمه!
غلست ورجعت كعدت عدل.. انتظرت فرصه..
ماادري منو صاحهه بالباب.. اني كبل دنيت راسي يم البنيه وهمست الها
وهمين ملحكت تردلي.. رجع علي..
اخر شي ايست.. بديت أألف من كيفي..
كنت دااكتب مااشوف بس ايد وصارت ع ستيجي.. دكدك بأصعبه.. شلت راسي هذا استاذ علي. منصي شوي .. وعينه ع الطلاب مو يمي..
همس:عينج بورقتج هاي اخر مره!
باوعت بوجهه.. شكد تنكط حقاره دخيل ربك! باوع بوجهي ورفع حواجبه مثل الي يكول افتهمتي؟! هزيت راسي بحقد اي..
گلبي صار يغلي من القهر.. جاوبت شلون ماكان وسلمت الورقه..
من دياخذهه مني ركزت حيل بوجهه بنظره جامده كلش..
بس شنو هو ولا باوعلي .. اخذ الورقه وطلعت..
شهل الحظ.. شجابك اله اليوم توكف علينه.. نوب ماده سهله واني ماقريت كلت تجي الاسئله سهله واحل واذا احتاجيت اخذ من اليمي..
طلعت كلش ضايجة.. اصلا مأيسه من النجاح..
كبل خابرت هدى واجتني.. وصلتني للبيت ورجعت لدوامهه..
حته امي من شافتني بقت تسألني شبيج .. كلت موزينه بالامتحان..
امي:لا مامه لتخافين.. ان شاء الله ناجحه..
جاوبتهه بيأس:ان شاء الله..
دخلت الغرفه .. بدلت شمرت ملابسي بكل مكان مالي خلك.. لفيت راسي ونمت.. كعدت للعصر.. روحي طالعه.. مابيه حيل اكوم من الفراش.. اخذتلي صفنات طويله..
تذكرت الامتحان.. وتذكرت علي والمواقف الي سواهه وياي.. انفجرت ابجي.. مادري شنو صارلي.. بالعاده اني مااهتم لدرجة او شي.. وحتى اذا منجحت اكو دور ثاني.. بس حسيت نفسي مخنوكه..
كنت نايمه صفح وبس صوت الشفط والبجي يطلع بالغرفه..
الباب انفتح   ...هدى:منوش.. اكعدي كافي نوم..
سويت نفسي نايمه.. مردت احجي واني صوتي مخنوك من البجي..
احسهه تقربت مني.. صارت كبالي..
هدى:ياا. منتهى؟ لج تبجين؟ شكو ؟؟
بعد متحملت اسكت اكثر.. انفجرت ابجي واحجيلها..
سولفت الها عن الامتحان وشكيت من علي.. من اول موقف سوا ويايه لحد اليوم.، عاد هدى تخبلت..
هدى:وشنو هيج يتصرف وياج! ليش سكتي اله؟!
-مااكدر يعني شسوي! العميد كرايبه!
هدى:واذا كرايبه! غير اروح واهجم العمادة ع راسهم! باجر اني اجي وياج
-لالا.. اخاف يشد ويايه اكثر..
هدى:لعد تسكتين لحد مايستغلج ويكول انج وحيده ماوراج احد! باجر نجي اني وخالد..
-أ..
هدى:اش.. خل اروح اعلمه حدوده.. شنو يفشلج! وين كاعدين بروضه! كبر هذا مثل استاذ حسين قبل عدنه هيج.. ولوما اني خليتله حد كان رسبنا كلنا! ذاك اليوم اجه للمصرف شحاله وهو يتوسل امشي معاملته بسرعه! كبر لفهم
كومي غسلي وجهج.. تنزل دمعتج بسببه غير امحي!
ابتسمت بوجهه.. كمت غسلت... كعدت يم امي.. بس ماحجينه الها..
مانريد ندوخهه بمشاكلنه..
ثاني يوم ماعندي امتحان.. الي بعده عندي.. رحنه وكالت هدى من اجي اخذج اني ادخل للكليه واتفاهم وياهم..
امتحنت وطلعت.. بقيت انتظر هدى.. خابرتني كالت جايه.. فرحت حسيت عندي سند.. من اجت ونمشي سوا الكل يباوع عليهه هههه.. عبالك مخلوق جايهم من الفضاء.. كانت تمشي بسرعه واني وراهه.. دورنه ع غرفه استاذ علي.. دكينه الباب ودخلت قبلي..
سلمت علي.. اسمع صوته رد عليهه واني لسه مشايفته..
دخلنا.. سلمت ودنكت..
كعدت هدى وان ي بصفهه..
علي:تفضلو؟ امر خدمه؟
هدى:اني هدى جليل.. اختي منتهى طالبه يمك استاذ:.
علي:هاا اي منتهى! يااهلا وسهلا..
هدى:استاذ الصراحه اني جايه اعاتبك..
عوج حواجبه وكال:شنو؟
هدى:اي.. اختي منتهى.. كم مرة حضرتك تفشلها كدام الطلاب.. وهي من نوع خجوله وتستحي.. تصدك استاذ البارحة هي ليل كله تبجي! زين هي يتيمه واني اموت ولااشوف دمعتهه.. تتخيل شكد اختي تهمني؟ ولوما تهمني مااجيت ع هيج موضوع.. بس يااستاذ.. الي اطلبه منك.. تغض النظر عنهه ولا تفشلها ع اقل شي..
ضحك بأستهزاء ودنك راسه:زين حجتلج ليش اني البارحه فشلتها؟؟؟
بقت هدى ساكته.. رد عليها: اختج كانت تغش.. يعني معقوله اني اسمح بهل شي؟ اذا اسمح معناهه نلغي الامتحانات اصلا وانجح الكل!
هدى:اعرف استاذ.. بس مو اول مرة هيج تصرف وياهه.. يعني ميصير كل مرة هيج تسوي بيهه قابل بس هي عندك طالبه!
علي:سهله.. انقليها لغير جامعه؟!
هدى:استاذ شنو تحجي؟ ترا ميصير هيج؟ اكدر اروح للعماده هسه واكولهم بهذا كلامك!
علي:تفضلي روحي الهم.. وياريت.. حتى همين اكشف عن الغش مالتهه الي سكتت منه وترسب سنه..
هدى توترت وذبت نفس طويل.. مادري شلون تحملت كلامه.. واني مدنكه وميته خوف.. هسه اني شورطني وحجيت لهدى وخليتها تجي..
هدى:هذا اخر كلام الك استاذ؟
هو دنك وسوه نفسه مشغول يكتب..:اي.. للأسف اجيتي للشخص الخطأ..
هذا اسلوبي وطلابي محد اشتكى بس اختج اذا هيج حساسه بلا جيتهه للجامعه ..
هدى كامت:يله كومي.. صوجي اني تعبت نفسي وي هيج نماذج!
طلعنا من غرفته.. خرب .. صدك هذا الي صار لو كذب.. كوه امشي من الخوف.. هدى اقوى مني.. عاطت بيه لتصيرين جبانه! شيكدر يسوي؟!
رجعنه للبيت هدى طول الطريق ماسكتت بقت تحجي علي..
وصدك كلامه كان كلش مستفز.. يعني اعرف هو موضوع تافه بس صار شكده.. ياريت ساكته ومحاجيه احسن الي..
مادري شلون خلص اليوم.. بس افكر .. شراح يتفنن بدرجتي واني منا شلون مجاوبه.. بليلتها شبعت بجي..
ومرت الايام.. وبالامتحانات بعد ماوكف علينا.. بس كل مااشوفه بالممرات اموت من الخوف واتذكر درجاتي يمه.. يبوو شورطت نفسي..
اخر يوم من الامتحانات.. كملنه من وقت وفرحانين..
كعدنه بالنادي اني وشهد وساره وبعد غيداء ووسن..
حجينه بالامتحانات بصوره عامه.. بس كان اكثر المشتكى من ماده الالتزامات .. اني بطبعي كتومه ومااحجي لأي وحده.. اذا عندي شي احجي لخواتي وبس.. بس بذاك اليوم من كد ماكنت خايفه لايرسبني سولفت الهن عن هدى وجيتهه لاستاذ علي.. تخبلن.. كالن راح يرسبج لعد..
نوب بدال ما يصبرني خوفني بالزايد..
شهد:خرب.. لج شسويتي انتي! توازيتي! احنه بمدرسه حته تجيبين اختج!
-شسوي هي اصرت!
ساره:اني برأيي وع حجي اختج ويا .. روحي اعتذري منه وكوليله اختي ماتقصد ومن هل حجي عبريهه..
وسن:والله اني هم اشوف هيج افضل ع الاقل تتحسن صورتج يمه..
-ها؟ بس هدى اذا تعرف تتخبل والله!
غيداء:لاتكولين الها! اختج تسرعت حيل.. بس انتي مدام اليوم اخر يوم وقبل لا تطلع النتيجة روحي وصلحي الصار..
شهد:اي عفيه ترا مو اله تحجيلها كل شي!
-ها؟ ولجن اخاف!
ساره:انتي تخافين؟ لالا هاي مو منتهى الي نعرفهه!
-زين منو تجي ويايه؟
شهد:نروح وياج بس ماندخل.. انتي فهمي بهدوء واعتذري وكولي بعد متتكرر..
غيداء:يله كومي.. خل نوصلج..
كمنا حتى اروح اعتذر.. اول مره هيج اخاف.. الوزراي ماخفت منه هيج..
وصلنه غرفته.. كالو مموجود باللجنة الامتحانيه انتظرو..
نزلنه جوه.. وره نص ساعه رجعت.. وبقن ويايه بس شهد وغيداء..
البقيه طلعن للبيت..
دكيت باب غرفته.. صاح ادخل!
دخلت.. بلعت ريك..
-سلام عليكم..
جاوبني وهو مدنك يكتب:وعليكم السلام تفضلي..
تقدمت.. صرت كباله..
رفع راسه.. باوعلي بنظره جامده:منتهى.. خير؟
دنكت:استاذ.. اني جايه اعتذر منك.. ع الي صار ذاك اليوم.
علي:تعتذرين من جيه اختج؟
-اي استاذ.. ان شاء الله ماتتكرر.. وراح اركز وادرس واحضر يومي ومااتأخر ابد..
علي:ومن تسوين هذا كله اني شنو راح يدخل جيبي؟ ترا من احجي ومن اشدد وياكم لمصلحتكم بس انتو بعدكم صغار وعبالكم الدنيا بس لعب وونسه!
-استاذ اني اسفه.. بعد ماتتكرر..
علي:ماشي.. مصار شي..تكدرين ترحين..
باوعت بوجهه..:شكرا استاذ..
درت وجهي اريد اروح.. كال اوكفي .. درت وجهي عليه..
علي:شلونج بالامتحان..
-موهلكد.. استاذ الاسئله صعبه..
علي:ماجبت شي من جيبي.. لو مركزه ويانه كان عرفتي شنو الجواب..
دنكت..
علي:اتفضلي.. ووصلي سلامي لأختج..
-يوصل.. شكرا استاذ..
طلعت.. احس نفسي انكطع من كنت جوه.. يبوو واخيرا خلصت من الهم..
شهد وغيداء منتظرات.. سولفتلهن.. فرحن ويايه.. بعدين خابرت هدى كالت اطلعي اجيتج..

يتبع...

اسفه ع التأخير ماعندي نت ...