#مابعد_الخطيئة
التاسع عشر
Nada hs
adaena7 واتباد
طلعت كبل للكراج.. مختنكة.. يمه اخذيني يمج كافي هل عذاب..
طلع ورايه.. صاح ادخلي لاتتخبلين برا..
سويت نفسي مااسمعه.. لحد ماعاط بيه حيل يله دخلت..
من دخلت هو بدل وطلع..
ومرت ايام.. اطرش بالزفه اني.. كوه صابره وساكته.. وللصبر حدود..
مااكدر اسكت اكثر بعد.. لازم اشوف هاي التافهه الي خاطبهه..
اشرب من دمهه اكطعها املخها وميرتاح كلبي..
فوك هذا صحيت ع نفسي.. صحيت ع اخطائي .. ع سواياتي ويه علي وشعور بان.. الساعات الي اخذته بيهه من عائلتة..
لازم احجي ويه بان.. اريد اشوفهه واحجي وياهه.. اتصلت بيهه.. واصريت عليهه تجيني للبيت .. لان مااكدر اني اروح الها اخاف ع صوفي مااطلع بي..
اجت.. شكد كنت اشوفهه موحلوة وممرتبه وتلعب النفس.. بس هسه لا صرت اشوفهه انيقه وحلوه ومرتبه.. كافي الهدوء الي شايلته..
عكسي اني.. مخبلة ومتهوره.. واذا ردت شي مااعرف شسوي حتى اوصله..
قدمت الها عصير ومي.. جاية وحدهه بدون اطفالهه..
مخليه رجل ع رجل وطابكه اديها فوك رجليها:لهسه ماعرفت سبب جيتي الج؟ صاير شي؟
صفنت بيهه.. شكد ظالمة اني.. شكد تافهه وحقيرة.. صار بيه مثل ماصار بيهه يله حسيت..
-اريد تسامحيني..
ضحكت مستغربه:ع شنو؟
دنكت:ع كل شي..
بان:الله يسامح مو اني الي اسامح!
-تدرين بعلي خاطب؟
ضحكت حيل وخلت ايدهه ع حلكهه..مثل ضحكتها بذاك اليوم الي اجتني بي للدائرة...
استغربت من ضحكهه..
بان:خاطب؟ من شوكت؟ ههههههه
-ليش تضحكين؟ كنتي تعرفين مو؟
بان:عيني الافندي متزوج حبيبتي!
-لاتكذبين؟!
بان:مو عيب عليج؟ مكذبة عليج اني قبل؟ ذاك هو وروحي شوفي وتأكدي بنفسج!
-منين عرفتي؟ شوكت تزوج!
بان:اووو اول ماوكع مصطفى! منو ضحك عليج وكلج خاطب؟
-اشواق كالت!
بان:والله يااشواق! اكبر منافقه هاي! هي الي راحت خطبت وعرست لاخوها! مثل ماقبل سوتهه بيه!
اريد افهم اني بحلم لو علم! شديصير! منو الصح ومنو الخطأ!
-ليش سكتي؟ ليش ماكلتيلي؟ وليش قبلتي يتزوجهه!
بان:مثل ما قبلت بيج تجين ع راسي قبلت! اصلا مو مهم عسما يتزوج عشره!
-بس..
بان:لا بس ولاشي.. حالج حالهه.. مثل ماانصدمت اني بيكم من سافرتو وتزوجتو انصدمي هسه ..
صبت دموعي.. لزمتهه من ايدهه فاقده مادري بنفسي:بس اني حبيته؟
-واني هم احبه .. اجيتي انتي خربتي كل شي!
دنكت وكمت اشهك وابجي.. كالت:لا تبجين.. هذا الصدك! انتي هيج سويتي بيه.. شكم مرة اشوفج قبل من اجي للكليه.. تبقين تخزرين وتاكليني اكل بعيونج! معرفت شنو السر بيج.. مااكو احد يباوع لاحد اذا مابينهم شي!
حاولت اعرف من علي.. ماوصلت لجواب..
سكتت.. ومرت ايام وليالي.. علي يوم عن يوم يتغير عليه.. صار ماله خلكي وبس يصيح.. قبلج تدرين شلون كنا؟ مثل العرسان.. مانصيح بوجه بعض ومانعرف المشاكل شنو.. كل همنا الشغل والدوام وملاك.. اجيتي انتي..
-كافي الله يخيلج!
بان:لا اسمعي.. لا تشردين من الحقيقه .. سنين واني بكلبي هل حجي..
دنكت ودموعي تصب.. وهي مستمره تحجي..
اجيتي انتي.. خليتي علي مايعرفنا .. اقل شي يعيط بوجهي.. ملاك صارت تخاف منه.. اهله هوايه سمعو بعرايكنه وماادخلو.. بس عمي الله يرحمه.. وكف ويايه وياما وكف بوجه علي.. كل هذا وماادري بي عنده علاقه وياج..
كشفته بالصدفه.. من شفت التلفون والمراسلات.. رقمج كان يمي.. بس طولة البال العندي منعتني اسوي شي.. والصدك خفت من علي.. لان صار نار وشرار علينا.. ليالي واني احترك حرك.. دتحسين بيه هسه مو؟
هزيت راسي ..
الجربايه فرغت من علي.. لو يبقى جوه لو يطلع بالسياره يخابرج.. انام واكعد وهو بعده مجاي.. حجيت لاهلي.. كالو تحملي .. لخاطر ملاك..
وتحملت وسكتت.. لحد مااطورتو.. صار يجي مزورك ومتروس اثار.. ماصدكت انتي الي تسويهه! كلت يجوز يروح يم بنات ليل لو كاوليات!
بس كشفته.. من دزيت جماعه يراقبو.. حجولي كل شي.. طبته وطلعته لبيتكم.. اهلج خواتج وامج ووين يشتغلن وشيسون..
بقيت صافنه بوجهه.. عيوني متروسه دموع.. بودي اسد اذاني واعيط مااريد اسمع اكثر..مااريد اواجه نفسي..
صرت مااسكت.. اعاتبه واحجي .. بكل برود يعوفني ويطلع.. ميجاوبني ولا يعتبرني موجودة.. عفته ورحت فترة لاهلي.. عبالي راح يبطل ويحس ع نفسه.. مابطل ولا حس.. رجعت مكسورة خاطر.. ووكفت الدنيا بعيني..
حتى دوامي هملته وكعدت فترة بالبيت..حجيت لعمي كل شي..
بعد مااكدر اتحمل كل هذا وحدي واصبر.. لان خلص حتى الصبر مل مني..
تعاركو وصارت مشاكل كومة.. ومبطل..
لحد مااجيتج.. وحجيت وياج.. وكابلتيني بعين وكحة.. ماخفتي ولا اهتميتي.. هنتيني اكثر.. وطلع الزود الج.. من شفتج هيج.. رحت كبل لاختج.. واني كلت لا اخليهه بيني وبينهه .. بس من شفتج هيج لا كلت اروح وشيصير يصير.. حجيت لاختج كل شي.. ووعدتني هي تصرف..
وصدكت .. ومرت ايام علي ضايج وبس كاعد جوه.. اراقبه من بعيد لبعيد.. عرفت علاقتكم انكطعت.. بديت اتنفس من صدك.. وحسيت بي أمل يرجعلي.. مخليت شي ماسويته.. شعلت العشرة شمع.. بس كان يخطأ بأسمي ويكلي منتهى.. وهوايه مرات ينسى نفسه وهو شارد بعيد عنا..
صار يتحجج بالدكتوراه مالته.. واكثر من مرة يسافر ويعوفنه ايام وليالي..
تحملت وكلت يجي يوم ويرجع الي.. صبرت روحي ع هل اساس.. كمل الدكتوراه واستلم منصب المعاون وفرحتله ونسيت كل الايام السود المرينه بيهه.. بس هو مافرح من كل كلبه.. اشوفه يضحك بس احسهه مو من صدك.. اوهم بنفسي واكول يجوز من الشغل ويجوز من التعب.. ويحوز ويجوز .. طلعت متوهمه.. انتي كنتي الشاغله عقله..
اجت ايام.. بس يضحك وفرحان.. اني كيفت كلت اي نسه.. اثاري رجع شافج.. وماكنت ادري.. ومرت ايام.. حسيته رجع الج.. وكنت مخططه اذا فعلا رجعلج اكلب الدنيا ومابيهه لان بعد مابيه اسكت اكثر..
ظليت ورا ادور واسأل.. محصلت شي.. واجاني بيوم بالليل.. كلي باجر مسافر لبنان.. عدنه بحث ومصادره هناك موجودة ومنلقشة زميلهم هناك.. ماصدكت وكلبي ماارتاح.. بقيت ليلي كله ابجي واحس راح يصيرله شي.. منعته وماامتنع..
راح وايام انتو متزوجين واني ماادري.. لحد ما اجه مهيمن فاتحني بالموضوع.. يعني شنو اوصفلج من سمعت؟! نوب انتي؟ بحياتي ماتخيلت يقبل يتزوجج.. يعني لو كايليلي غير وحدة يجوز كان اقتنعت..
بس صارت.. واجيتو واهله بكل عين وكحة نسوني ونسو العشره واجو يباركولكم.. بالحذب مااحد كلي شي ولا فكر يعتذر..
خليتهم هم وربهم.. بس اني التحطمت.. فكرت اجيج واحجي واصرخ بوجهج. بس شنو راح يفيد؟ هو تزوجج وخلص!
احس روحي انشلعت مني واني اسمع.. راسي راد يطك.. شكد ظلمت وشكد انظلمت.. وياريت لشخص يستاهل..
بان:شفتي الي مريت بي بسببكم؟ وهسه تكليلي ليش ماامنعه وليش قبلت؟ لان لو اكدر كان منعته منج.. بس ماكدرت.. وانطيته ظهري وعشت لخاطر اطفالي.. علي واحد ناكر العشره وخوان.. كان بعيني ماكو منه ابد.. وهو فعلا هيج كان.. مايهتم لاكبر وحدة بس مااعرف شنو الي صارله وياج.. من بعد صدمتي بي خل ياخذ راحته بعد لا اني اهتم ولا هو عنده كلب ينكسر علينا.. شيريد يسوي يسوي..
دنكت راسي.. الي صارله انو اني جبته كوه.. واني الصوج مني كله..
-اني اسفه.. الله يخليج سامحيني..
بان:الله يغفرلج..
-اني كنت معميه بي.. معرفت شسويت..
بان:بس الله انطه عقل مو؟
سكتت .. امسح دموع ومتخلص..
-هسه شسوي؟
بان:لتسوين شي.. اكعدي واسكتي...
-يعني صدك هسه هو اتزوج واسكت اله؟
بان:ههه لعد شتسوين مثلا؟
-اموتها!
بان:براحتج..لا دخليني بيكم..!عوفوني عايشه اني واطفالي..
شبعت بجي وقهر.. منا قهر الي سمعته منها.. ومنا قهر علي المتزوج عليه.. زين ليش.. مو ع اساس يحبني.. مو كالت بان انه كان يسميهه باسمي..
بس مااسكت.. لو بنت منو تكون الي اخذهه اله اروح الهه والعب بيهه جولة.. طلعت بان.. كبل اخذت التلفون وخابرت نورس.. اعيط واحجي..
كوه فهمتني وره شويه اجن خواتي كلهن.. اشوف القهر بعيونهن ع حالي..
نورس ظلت بس تلوم بيه.. هدى وشذى يسكتن بيهه ومتسكت..صوجج ركضتي ورا ومن الاول حاسه بي مو راحة وانت معميه بي! شوكت تصحين شوكت!!!
استاهل.. عفت الدنيا ومابيهه ورحت اله.. وتالي خوش ردهه اليه..
هه وليد.. اتزوج.. وماخله دوله ماراح الها هو وزوجته.. بيتهم قصر.. مامانع زوجته من اي شي.. كل الي تريده يجيهه.. مدللها دلال وشايليهه ع كفوف الراحة..
واني.. السفر ماشفته بس بالموزينات.. للعلاج والعمليه وبالعرس صار سم عليه.. انحرمت من الوظيفه مالتي.. وصارت حياتي اسفل السافلين..
وتالي اتزوج عليه.. اخخ اخخ.. الموت اهون الي..
مرت ايام.. كطع رجله فد مرة من يمنا.. اتصل يجاوبني اقل من دقيقه ويكطعه.. لحد مااجه بيوم.. فلشت كل شي اجه كبالي.. مخليت حجايه ماحجيتهه عليه... شىسوه.. اجه ضربني وهاني.. كطعني تكطع وشمرني بالغرفه وراح..
دعيت علي.. وطلع من خشمي.. ع كد حبي اله كرهته.. وحقدت عليه..
اتمنى يصير بي وبذيج الاخذهه شي..
ماوكفت لهنا.. خابرت اشواق وطيحت حظهه.. حتى فشار فشرت عليهه.. المنافقه.. وحتى مهيمن.. خابرته ورزلته.. كنت مااعرف شسوي..
ووصلت عندي اروح لمرته الجديدة.. دبرت عنوانهه.. جبته من بان..
وبان الها الصافي ماكالت لا.. كبل انطتنيا..
خابرت نورس تجي يم مصطفى.. كوه طلعت من نورس ماقبلت تخليني اروح.. بس بالاخير رحت.. مخليهه بمشتمل قريب من بيت بان..
هه يريد يقويهن عليه يمكن.. دكيت الباب فلشته تفلش.. طلعت..
اول شي صفنت بوجهه.. اريد اشوف هاي الاخذها شلونهه..
اباوعلهه مصدوومه.. العيون خضر والشعر مي.. وجهه دائري عريض والخشم قلم.. لابسه دشداشه ربع ردن ومطلعه زنودها ابيض من الحليب..
بلعت ريك.. منخيلتها هيج حلوه.. كلت الها انتي صابرين؟
كالت اي تفضلي؟ صوتهه عبالك تنوص مو تحجي..
حركت كلبي.. واني منا القهر يقره الف.. دفعتهه جوه ودخلت وسديت الباب.. لزمتهه من شعرهه.. كل كفخه اطلعهه بيهه حتى ايدي كامت تون.. هي من اول ضربه ماعت ومكدرت تقاوم واني منا عوزي شويه واتحول وحش.. لزمت وجهه وسويته خارطه من التخرمش.. زنودها زوركتهن من العض والضرب.. كامت تعيط حيل.. واحنه بالطرمه.. عفتهه وتفلت عليهه ردت اطلع صارت بطريقي الماسحة.. رجعت الها ودك دك ع بطنهه وع رجليهه... شفت دم طلع من نص شعرهه.. خليت وطلعت بسرعه نفسي مكطوع والهث.. اخذت تكسي ورجعت للبيت..
شافتني نورس.. حجيت الهه الصار.. تخبلت وماقبلت عليه وكالت بالله صار بيهه شي بالله ماتت ووو.. بس اخر همي يقبلون واله مايقبلون لان ضربتهه.. اصلا لو بيدي كان طلعت روحهه مو بس هيج.. رحت افتريت ابيتي.. طلعت شغل من جوة الكاع.. اتشغلت بحركة وقهر.. رحت للكنتور شفت ملابسه.. تمنيت احركه هو وياهن..
طلعتهن لميتهن داريد اذبهن.. لزمتني نورس وتعاركت ويايه عركة قوية..
اخذتهن مني ورجعتهن.. طردتهه ومقبلت تروح..
كالت انتي مخبله مدتعرفين شتسوين هسه ومااكدر اعوفج.
للعصر اجه علي.. دخل متخبل وعيونه بكصته.. لوما نورس موجودة كان اكلت كتل بس الله العالم بي.. صرت ورا نورس..
هو يحجي واني ارد.. نورس تتوسلني اسكت ومااسكت.. خلص ضيم السنين ذيج كلهه طلع.. كافي السويته اله لحد هل لحظة!
علي:ولج حيوانه شلون ترحين شلوووووون؟
-ياساقط يانذل! ولك ابو النسوان! احركك انت وياهه والله!
نورس كدامي تتوسل بي:عوفهه الله يخليك ماتدري بنفسهه شتحجي.. عوفهه اني موجودة يمهه واهديهه..
عاط بنورس:شتهديهه! اختج بلا اخلاق ولاتربيه! اليوم اسكطها.. وخري..
-ا تعال سكطني.. خايفه منك اني! كلك خلك واحد مستخف ومستهتر! ولك ساقط ! بيك خير ماتزوج مطلكه! مراهق الافندي! لك عساك بمصيبة! عساك ببلوة ماتطلع منها! الله ياخذك! اخذت كل شي حلو مني!
علي:راح اجي اشك حلكج..
نورس:فدوة روح.. لخاطر مصطفى روح.. عوفهه والله متعرف شتحجي!
عطت بيهه:لا اعرف شحجي.. اعرف هذا واحد كلب ابن كلب!
عاط بيه:اشششششش
الدويه مال صوته وصلت للطابق الثاني.. سكتت وانتبهت اني سبيت ابو وهو متوفي..
علي:انتي..
قبل لايكمل نورس مدت ايدهه وخلتهه ع حلكه..:ياوعت اله بتوسل:لخاطر مصطفى!
شمر ايد نورس وطلع.. ركع الباب ركعه.
نورس:تف عليج وع يوم الاسود! ولج انتي شنو؟ الله ياخذ عمري ويريحني منج! ولج خليتني الزم رجال غريب الله لايرضى عليج!
راحت غسلت وتوضت.. وبقت تستغفر.. كله لان منعته خاف يطلكني..
دخلت الغرفه.. مابيه لا ابجي ولا احجي بعد.. حيلي راح..
شمرت نفسي ع الفراش ونمت... عساني لا كعدت..
كعدت بالليل.. لكيت اطفال نورس جايين وراهه...
مسويه اكل ومنيمه مصطفى ومرتبه البيت..
كعدت ع صفحة.. احس نفسي زايده بهل كون.. التفتت لكيت نورس جايبه مصطفى.. من شفته تراجعت.. لا اني مو زايده.. اني عايشه لخاطر عيونه..
حضنته.. احس كلبي انثلم من حضنته.. اباوع بوجهه وبداخلي اشكيله...
ايام واني ممصدكه الصار.. وحاقده ع علي كلش وكارهته..
نورس تروح تجي هدى.. تروح تجي شذى..
يخافون مني يعرفون مخبله .. خاف اسوي بنفسي شي.
ماانسى الجرح العافه بيه.. كل مااصفن واذكر بان والحجته واذكر مرت علي الثالثه.. حتى اختنك.. كلبي يصير يرجف..
هو بعد ابد مااجه من يوم الي تعاركنه وسبيته...
هدى اقترحت ارجع للدوام.. منها التهي ومنها اعتمد ع حالي..
مقبلت .. علمود مصطفى لان اخاف علي ومااكدر اتركه بأي مكان..
فكالت شذى تبقي يمهه.. مااقتنعت. شذى هم اطفالهه وكحين واخاف عليه يمهم... بقيت ايام افكر..قبلت.. شغلة عناد بس..
عناد بعلي واهله واخته ام فليس.. خواتي توسطن وحجن ويه علي.. علمود ارجع للوظيفه.. كلهم يطبهه مرض وين ماتولي تولي..
تعودت ع المغثه منه.. خواتي هن التحركن وسون كلشي..
رجعت اداوم بكليه اهليه.. محاضره.. مصطفى اوديه يم شذى الصبح واروح.. وماارتاح اظل بين محاضره والخ اخابر واسأل عليه..
ايام وعلي مايدري بينا وين ماوين.. يجون اخوانه مرات يشوفون مصطفى وياخذو وياهم ساعات ويرجعو.. اعرف بي كان هو الي يدزهم حتى ماينجبر ويجي يشوف مصطفى..
اباوع ع نفسي.. صرت جلد وعظم.. وجهي مترهل.. عيوني باهته ماتعرف شنو كحل وشنو مكياج.. سنين من عمري راحت.. كضيتهه هم وقهر..
صارلي عبره.. مااحب بشر.. احب ابني ونفسي وبس.. ماحصلت منه بس الوجع.. رجعت شوي شوي اهتم بنفسي.. وهل الاهتمام يريد فلوس..
وعلي ماصدك رجعت اشتغل تخلى منا وفلس احمر ماشفنا منه..
اضطريت ازيد الساعات.. لان ع ساعات الي ادرس بيهه ينطوني..
اخذت مسائي همين.. وايام الاوف قدمت بيهه ع غير جامعه وقبلوني..
صار الاسبوع كله دوام ماكو استراحه.. منهه انسه جرحي واطيبه ومنهه احصل فلوس الي ولابني..
الجمعه والسبت اهلك هلاك.. شغل مال اسبوع يتراكم عليه.. وهو فد اني وصوفي.. عايشه مثل الارمله هه.. مهزله وصارت بيه.. حلم وانضحك عليه بي.. مشيت بدرب مافكرت وين تاليه.. مافكرت الي خان مرته ويايه راح يجي يوم ويخوني.. مشيتها كله احبه احبه احبه...
وماحصلت بس التعب والضيم منه...
ياريته مارجع بحياتي.. يمكن كان تعودت.. ونسيت وتزرجت واستقريت..
بس شبيدي بعد.. هه صدكت الاحبج وصدكت الشوق واللهفه..
وطلع اكبر نسونجي.. كنت افكر قبل يجي يوم ويعوف بان ويصير بس اليه.. تالي جاب الثالثه عليه هه...
يتبع..
يسعد مساكم ..
وصلنا لبداية النهاية..
ورجاءا كافي لُئم وتجريح ..
احبكم😍😘
