#مابعد_الخطيئة
الجزء الثاني عشر
Nada hs
adaena7 واتباد
جابو تابوتها.. ياريتني اني النايمه بي ولا انتي.. شي انثلم مني وراح.. مااكدر ارجعه لو انطي عمري كله.. هاي امي الراحت.. هاي الكسره الي ماانكسرتها من قبل.. اخذو نعشها.. طلعت اعيط وراهم لا تاخذوها.. كلها تدفع بيه يردوني ادخل.. مكدرولي.. دفعتهم.. طلعت الباب .. ماادري منو من الزلم لف عبايه عليه ودخلني سحل..
ماانسى ذاك اليوم.. نص عمري راح بي.. اباوع ع البيت.. شلون ينكعد بي من دونج..
خواتي متكاتفات بحزنهن.. بس اني وحدي.. وياريت اني مثل البقيه.. ياريت امي ماتت راضيه عني..
مرت ايام وخلصت الفاتحه.. البيت وحشه ومر ماينجرع بدونهه.. بس اسم كعدتها وشوفتها بنص البيت ترد الروح.. هي شمعه وانطفت..
خواتي بقن يمي.. بس ميحاجني ولا يكوللي ع شي..
تعودت عليهن هيج.. صرت احب اختلي بروحي.. بين ملابس امي .. ع فراشهه.. بمكانات كعدتها... صرت اتخيلها بكل مكان.. بالليل كلها تنام.. اتخيلها هي بصفي.. احضن بس ماكو جسم..
الف غصه والف عله.. مو سنين مريت بيها.. واشد سنه هاي الراحت امي بيهه.. انقضى ع حياتي رسمي..
بعد ايام.. خواتي كعدن سوه.. صاحن عليه.. خالتي همين بقت يمنا..
نورس:تعاي اكعدي..
كعدت.. مدنكه ومكسور ظهري مااكدر اباوع بوجوهن..
نورس:شوفي.. احاجيج وكدام خالتي.. راح نبيع البيت.. وانتي اختاري يم منو من عدنا تجين..
-ليش تبيعي..
نورس:تعرفين كلش زين ليش.. مااريد احجي اكثر..
تقصد ع علي وتخاف اذا بقيت بنفس البيت وامي راحت..
شذى:يله قرري..
باوعت لهدى.. اكثر وحده هي رحمتني ومااضربتني.. بس المشكلة هي ماعدها بيت.. عايشه ويه عيالها..
هدى:لا تباوعين! اذا تجين يمي اأجر واعزل وحدنا!
هزيت راسي بأي وسكتت..
نورس:خوش.. هسه يم هدى تبقين..
هدى:اي بس انتظرو فترة.. بين ماانتقل ..
شذى:اكلج انتو مو عدكم قطعه؟
هدى:اي.. بس مانلحك نبني.. ومنتهى وين تكعد؟
نورس:خليها يمي.. ولا تتوازين ع كيفج ابني..
باوعت ع نورس.. خفت منها..
نورس:لا تباوعين هيج.. تبقين يمي.. الج غرفه وتكعدين محد يمج ولا يقربلج!
خالتي:خالة.. اكعدي يم القريب ولا الغريب.. عيب تكعدين يم خالد .. زلمة غريب علينا.. عاد ذول منا وبينا..
-بكيفكم.. وين تكولون اروح..
نورس:هاي هي.. تجي يمي..
كمت من يمهن.. دخلت غرفة امي وانفجرت.. بعد مااتحمل..
هيج يايمه صفيت .. حايرين وين يخلوني.. غريبه من بعد عينج يايمه..
ومرت ايام.. جهزت اغراضي اروح ويه نورس.. واصلا ماعندي اشياء هوايه... اجه زوجهه الصبح..
لبست وكملت.. افتريت بالبيت.. هاي الغرفه الخلصت نص اخطائي بيهه..
هاي غرفه امي.. الكانت صمام الامان بالبيت.. صارت وحشه وماتنطب بدونهه.. هاي الصاله.. ياما التمينا اني وخواتي.. ياما كنت مدللة ومن حضن لحضن بينهن .. ياما كعدت امي ع هذا التخم .. عبالك دااشوفها كدامي..
هذا الاستقبال.. مابي ريحة امي.. مابي امي تدخل وتنظفه وتبقى ادور اقل شغله بي حتى تنظفها..
صاحت نورس يله.. مسحت دموعي واخذت جنطتي..
وصلت ع الكراج.. التفتت .. هاي اخر لحظه بهذ المكان.. روحي بقت بذاك المكان.. صح هو وحشه بدون امي.. بس كل عمري خلصته بي..
الطريق كله خلصته بجي.. وصلنا ع بيت نورس.. من زمان كلش مفايته بيتها.. زوجه يضحك ويشاقي بس حتى اضحك شويه.. واني ولا يمه..
دخلت عبالك مو بيت اختي.. بيت ناس غربه..
وصلتني ع غرفه فوك.. بيهه جربايه وكنتور قديمات.. ميز وكرسي..
خليت اغراضي بيهه.. كعدت ماله وروحي طالعه.. امي راحت ودنيا صارت ظلمه بدونها.. علي مااعرف منه خبر ..
ومرت ايام اني ابيت نورس.. كل وقتي فوك.. وماانزل اله وقت الاكل لو من يطلع زوجهه ومرات من يطلعون لدواماتهم اني اطبخ.. وتبقى داليا يمي اذا دوامها ظهري كانت صف اول ابتدائي.. تعودت ع دلوش.. قبل ماكنت هل كد اهتم بأطفال خواتي.. دخلت بشهرها.. وسوت اجازة امومه..
من جابت يله طلعت من البيت ورحت وياهه للمستشفى..
طولت ولادتها.. طول الليل منتظرين وماكو.. كوه جابت.. ومن طلعناهه كلش تعبانه من الولاده. جابت بنوته لخ.. سمتها دينا.. خواتي اجنها.. ومن التمن محد بيهن معبرتني.. بس هدى عينها عليه.. يمكن تريد تحاجيني ومتكدر.. ويمكن تريد تعرف حالي بدون مااحجي وياهه اصلا..
صار شغل البيت مال نورس كله عليه.. داريتهه حيل.. حتى ترضى عني وحتى ماتعاملني هيج..
بس كله مو بعينها.. اقل شي يطلع مني تعيرني بعلي..
مرات احسها تخاف ع زوجهه مني.. وصدك شفتهه مره بدون قصد..
كنت راجعه لغرفتي فوك.. لكيتها منثره اغراضي وادور..
من سألتها شكو.. كالتها بوجهي.. لا اطلعين كدام فراس بعد..
خلت وطلعت .. مفتهمت شكو وشنو الصاير.. غلست ..
كل ليله اختلي بيها وحدي.. ومن يصير البيت هدوء.. اكعد ابجي ع الضاعو مني.. امي.. علي.. روحي الضيعتها وياهم..
ومرت ايام.. مااطلع من الغرفه بس من يروح فراس للدوام لو بليل يم جماعته.. نورس فكرهه رايح بعيد.. اني وين والدنيا وين.. لو ينطوني كنوز الدنيا مابدلها بعلي.. البيت انباع.. وخواتي اخذن حصصهن.. بس اني مااخذت بقت حصتي يم نورس.. كالت من يجيج احد تاخذيهن..
وايام تمر واني ع نفس حالي..
وبيوم نورس كانت داتطبخ. رحت وراهه.. احجي وهي تخليني وتروح.. ظليت اركض وراهه لحد ماكملت كلامي..
اريد احجي وياج. كالت بعدين.. لحكتها للحمام راحت للغساله رحت وراهه..
اسمعيني.. كالت من افرغ.. رجعت للمطبخ كلتها بوجهه.
اريد ارجع لدوامي..
وهي دايره وجهه كالت:ليش؟ حته ترجعين تسودين وجوهنا؟
-لا.. بس ضجت وطلعت روحي..
نورس:ماكو رجعة.. وهو بعد منو يقبلج!
-ميخالف.. اريد اكمل دراسه لعد..
نورس:ماجستير تكملين؟
-اي..
نورس:انتي؟ وينج وين الدراسه! هو انتي كليه كوه دبرتيها..
-معليج.. بس خل اقدم وشوفي..
نورس:ماادري.. اشوف فراس وبعدين نقرر اني وشذى وهدى..
-لاتوكفين بطريقي.. اريد اعيش.. كافي عمري الضاع..
نورس:محد ضيعه غيرج.. ميخالف هسه عود اردلج خبر..
ومرت ايام.. واني انتظر نورس تردلي الخبر.. وماكو..
اله لمن رجعت اني فاتحتها.. طلعت حاجيه ويه فراس ومكايل شي.. وخواتي همين قابلات.. بس يمكن تستحسف تكلي..
ماصدكت روحي.. واخيرا راح اشغل نفسي بشي غير الدموع.. غير الذكريات المره.. غير الحب الدمرني..
المهمة الاصعب كانت روحتي للكلية.. حتى اخذ وثيقه واقدم.. شلون اروح.. علي هناك.. اذا شفته شراح يصير بيه.. شكد فكرت وشكد.. اكول شلون اروح وشسوي اذا شفته.. اعاتبه .. احجي.. لو ابجي..
بس كل هذا ماصار.. اجت هدى ع بيت نورس وبيدها وثيقه..
ضجت وفرحت.. ضجت مارحت وشفت علي.. وفرحت لان اذا اشوفه يمكن ارجع سنوات ليوره.. راجعت اشياء من الدرستها..
بس كل ماافتح كتاب.. اتذكر ايام الكلية.. ابد متروح من بالي.. بذاك اليوم الي وكفني وطردني من المحاضره.. اليوم الي طلع بحثي يمه.. اليوم الفشلني ومعرفت اجاوب... ووو يامكثر ذيج الايام الماترد..
قدمت امتحان الكفاءة ..حاسوب وانكليزي واني اثنينهن زينه بيهن..
نجحت بي.. وصار وقت التنافسي هو الي راح يحدد اذا انقبل لولا..
رحت قسم خاص.. وع نفقه الخاصه.. لان معدلي مو ذاك المعدل مال كلية.. والقسم الخاص بالقانون كلش صعب.. بس ردته لان علي هيج اختصاصه..
وانقبلت بالتنافسي.. صح فرحت.. بس فرحة ناقصه..
ناقصهه امي.. ناقصتهه حياة مثل البشر..
خواتي بدن يتجاوبن ويايه.. يسألني عن الدراسه وشلون اقدم وشلون اجي..
المهم.. مرت ايام.. وصار وقت الدوام.. نداوم 3 ايام بالاسبوع.. بس طبعا مو نفس الجامعة الي بيها علي..
مرات اروح باصات ومرات هدى توديني ومرات فراس ونورس..
اخلص نص نهاري بالدوام.. ارجع انام شويه وابلش دراسه وبحث..
وع هيج.. مرت ايام وايام.. امتحنت.. وكل امتحاناتي زينه.. والحمد لله نجحت.. من نجحت احس نفسي رجعت ع طريق صح.. واعيش مثل الناس.. صح مو كل الناس ماشيه عدل.. بس يعني الاغلب العايشين..
كملت السنة التحضيريه ونجحت بالكورس الاول والثاني ..
وبدت حياتي تستقر نوعا ما.. نورس رجعت تعاملني مثل قبل.. بس اني كلش ملتزمه وحريصه وياهه.. مااكدر ازل بحرف كدامهه..
اعرف بيهه ماتنسى..
ومانسيت.. ومانسيت ابد ولا لحظة ولا كلمة ولااي شي..
لا امي ولا علي.. الاثنين صارولي مثل الحلم.. بس امي حلم اعرف وين اشوفه.. مدفونه واعرف مكانهه.. ونروح نزورها بين فتره وفتره..
اريح كلبي واشكيلها واطلب منها تسامحني.. ماتت وماسامحتني.. داارجع بنتج يايمه.. بس حتى ترضين عني .. وترتاحين بگبرج..
علي.. مااعرف عنه ولا خبر.. لا من بعيد ولا من قريب.. لا تلفون عندي ولا لاب.. من اروح للدوام نورس تخلي بيدي تلفون.. تخابرني اكثر من مره واني بالدوام.. وبس ارجع تاخذه مني.. تحسب الرصيد وتدخل ع المكالمات والرسائل.. وطبعا اني مااتجرأ بعد واسويها..
ومرت ايام.. بالاسم عايشه.. من اباوع ع نفسي بالمرايه.. احس هذا الجسم بس واجهه.. الجوه فراغ وظلام كبير.. ظلام يخوف ويخوفني اني بالذات..
الوحدة تقتل.. خاصه من يكون الكل يمي عايش حياته ويه اهله ويه احبابه..
واني وحيده.. غاصه بنص الكتب.. حتى اذا ماعندي شي ادرس..
بلشت ع الرساله مال ماجستير.. تعبت بيها هواي..
ذبيت كل جهدي بيها.. اتذكر بحثي مال تخرج.. شكد كان الي واهس بي لان يم علي.. بس هسه لا اريد اخلص واريد درجة وبس.. ماهمني المشرف ع البحث ولا الي درسني.. اصلا حتى اسماءهم مااعرفهه..
اروح بدربي واجي بدربي...
كملت البحث قبل وقته.. وناقشت بي.. والحمد لله جبت جيد جدا عالي..
بجيت من فرحتي.. واول اهداء خليته برسالتي هو لامي..
تعبت عليه وماشفت مني بس المغثه.. ماتت واني السبب.. وهاي الفكرة الي ليهسه متروح من بالي ابد..
خواتي فرحن بيه كلش.. وسون عزيمه ابيت نورس.. ونوب هدى عزمتنا ع المطعم.. وطبعا هدى ماتطبخ مخلصته مطاعم..
وشذى همين عزمتنا ابيتها..كلش فرحت من رجعت علاقتي بيهن.. وخلصنا اوقات حلوة.. مشتاقه الهن ومشتاقه للمة.. الي ياما ضيعتهه واني مشغوله افكر بعلي وغيرتي عليه من زوجته..
وضيعت اللمات الاهم.. اللمه الي كانت امي تحضرهه.. تكعد بنصنا وتسولف ويانه بصوتهه الهادىء.. مثل الموسيقى تشفي الروح..
كعدت بالبيت فتره.. نقاهه واريح نفسي وعيوني من الدراسه..
مرات من كاعده واصفن.. اكول سويت شي عظيم.. كنت قبل مااقره ولا استوعب اذا اجيت اقره.. وهسه حصلت الماستر وبدرجة عاليه همين..
افتخر بنفسي .. وهذا الشي الوحيد الي عندي افتخر بي..
اما الباقي جانب مظلم من حياتي.. مرات اعصب من نفسي واني اتذكر..
واشوف نفسي كلش سطحيه وسفيهه ع افعالي قبل.. حسيت نفسي طايشه وزعطوطه حيل كنت.. وفعلا هو هيج..
احس الدراسه كبرتني.. وخلت عقل براسي.. وتعودت ع فراك علي..
وصار ذكرى حلوة ومرة.. اقتنع گلبي.. وماعندي غير اسكت..
هو مو الي من البدايه..
كعدت حوالي تلث اشهر ورا مكملت.. نوب طرحت فكرة ارجع اشتغل.
اخذ محاضرات.. نورس اشترطت مو بالجامعه الي بيها علي.. واني وافقت.. اصلا مااريد التقي بي.. ومااريد ارجع مثل قبل مهزوزه وضعيفه كدامه.. بس الصدك.. ماانسى ولا شي بي.. طوله.. عيونه.. حركاته .. صوته وحجاياته.. حتى الغثيثات منهن..
وقدمت ع وحدة من الجامعات.. قابلت العميد وقبلوني.. اخذت مرحلة اولى.. لان حسيت البقيه كبار وشوي صعب التعامل وياهم..
اخذتهم مادة سهله .. وبسطتهه كلش عليهم.. ماتشددت واصلا مابيه اتشدد..
مرات اصفن واضحك. اكول بيوم اني كنت ادرس يم علي.. وكان كلش شديد ويانه.. وبيوم اني اتملل من الدراسه وانغث من الشرح والحجي الهواي مال اساتذه.. وهسه اني صرت هيج..
اشرح هوايه.. صح البعض يملون بسرعه.. بس الاغلب والشطار يردون شرح.. ويتفاعلون ويايه ويسألون فمااكدر اقلل شرح او مااهتم بيهم علمود كم واحد يملون من المحاضره..طبعا مااحب شغله الغياب والحضور.. وطلابي يعرفون هل شي.. خليتهم براحتم الي يعجبه يدخل والي ميريد بكيفه.. وكان حضور كلش زين.... كانو كلش يحبون محاضرتي.. ويكولون انتي اقرب النا لان نحس عمرج قريب منا.. ههه كنت اخجل من يكلولي هيج.. لان مهما يكون.. هو الفرق بيني وبينهم كلش قليل..
بالبدايه اخذت بس الصباحي.. بعدين العميد طرح عليه اخذ المسائي همين..
ترددت بالبدايه.. ومانطيت كلمة راسا..
رجعت للبيت وفاتحت نورس بالموضوع.. كالت بكيفج اذا ادبريها ليش لا..
حسيتها تريد تخليني اتعمق بالتدريس وانسى.. وصدك اني تعمقت بس مانسيت.. بديت اخذ مسائي. كانو كبار بالعمر.. وبالبدايه كلش اخجل منهم وماادري شلون اخلص المحاضره وياهم.. بعدين تعودت.. وحسبتهم اخوان واباء اليه..
ادخل عليهم بأبتسامه.. ابلش محاضره.. انطيهم وقت يرتاحون ويطلعون..
اسويلهم كوزات بين فتره وفتره حتى اعرف مستواهم.. وكنت اسوي كوزات حتى التهي بالبيت بالتصحيح واطلع ع اجابتهم..
غرگت نفسي تغرك.. اروح الصبح ب8 .. مرات اتغده هناك ومرات نورس تمرلي تاخذني اتغده ابيتها وارجع.. اكمل ويه المسائي لل6
ودنيا شته.. يعني اطلع الدنيا مظلمه.. اتصل ع هدى لو نورس ادز فراس اليه.. شالت من بالهه الخوف مني ع زوجهه.. لان عرفت اني ابالي علي وبس..
الاساتذه الي ويايه والعميد كلش راضين عني.. واكثر من مره العميد يشرف ع تدريسي ويشكرني ع الجهد الابذله وياهم.. يعني الصدك.. حطيت روحي وياهم.. مااطلع اذا احس احد بيهم مافاهم لو عنده سؤال..
وهاا.. وليد اتزوج وصار عنده ولد ..وهدى تحسفت لان ماقبلت بي من البدايه.. وصدك.. لو قابله.. كان كل هذا مامريت بي..
رجعت حياتي طبيعيه.. وراتب عندي الحمد لله.. مااخلي احد يشيل همي ومصروفي.. البس كله محتشم وعريض.. مو مثل ايام الجامعه..
كنت البس ضيق واخلي ميك اب هوايه.. هسه اصلا مااخلي..
لان الصار بيه توبني.. والمركز الاني بي كأستاذه مايسمح.. عيب من اوكف اشرح الهم وملابسي ضيقه وتبرز اشياء..
تلفون صار عندي.. منزله بي كل التطبيقات.. بس كان الحجي كله يم الفيس.. فد عالم حلو.. والكوكل همين.. اكثر شغلي بي..
فكنت ارجع للبيت.. لو اشوف الماده الي اشرحها لطلابي شنو.. لو اتصفح بالتلفون.. لو مسويه كوز لو امتحان وداصحح..
طبعا التلفون بدون رمز.. خليته هيج حتى الكل تثق بيه.. ونورس بالذات.. تقريبا نسو او تناسو.. المهم مااحد صار يعيرني.. وسالفتي مر عليها وقت هوايه.. 3 سنوات واكثر.. يوم يمحي يوم من الايام الموزينه..
بالدوام مالي شغل بأحد.. حتى الاستاذات الي ويايه مو هلكد علاقتي بيهن.. مرات احسهن يغارن لان اصغر منهن بهوايه والعميد والاساتذه يسولفون بشرحي وتعبي..
انطي محاضرة واطلع.. اكعد يمهن بالغرفه مدنكه مالي شغل بوحدة..
ومره كملت محاضره.. طلعت من القاعه.. دامشي بالممر..
مااشوف بس ذيج العيون الهلكتني هلاك وصفتني حطام ..
اول شي ماصدكت.. غمضت عيني وفتحت.. هذا علي..
لا لاهاي كذبه! لو اني صرت اتخيله حتى هنا بالدوام..
بس لا هذا هو صدك.. ضحكلي وجاي بأتجاهي..
يمكن بقيت امشي ويمكن وكفت.. ماادري بنفسي شدااسوي..
بس مركزه نظري بوجهه.. عبرات بصدري خنكتني من شفته..
كل المرينا بي وكل لحظة ويا مرت وكل دمعه نزلت بسببه وكل حجايه كالها وكل غصه عافها بگلبي..صارت كبالي.. مثل فديو يمشي سريع..
هو كبال عيني.. الدنيا خلصت من البشر.. بس اني واكفه وهو كبالي..
حتى دخت..
يتبع...
