#مابعد_الخطيئة
الجزء الثالث عشر
Nada hs
adaena7 واتباد
تقرب خطوات.. صار كبالي.. ضحك ضحكة كبيره.. وكال..
علي:صباح الخير.. شلونج منتهى؟
مجاوبت بس صفنت بعيونه.. وصلت اله الجواب بعيوني.. سد حلكه ومضحك.. دنك.. فشل من سؤاله الي شلونج..
باوع بكل وجهه.. مامتغير.. بالعكس حليان اكثر.. عبالك هو الي عمره صغر واني الي كبرت.. هه.. شلون دنيا..
علي:اجيت هنا دزولنا دعوه لان اكو ندوة.. انتي شدسوين هنا؟
ضحكت بأستهزاء..كلت:ادرس هنا.. استاذه يعني..
علي:والله؟ ومن شوكت؟
-من سنة..
علي:وشوكت كملتي وليش ماعندي خبر؟
-ههه اي مو كلش يهمك.. يله مع السلامه..
عفته ورحت.. مااريد اسمع منه بعد.. كل حجايه توجع.. شجابك بعد هل مده كلها.. وليش حظي اله تطلع كبالي.. مو تعودت وردت انسى..
امشي وماادري وين اروح.. گلبي بصفحه وجسمي بصفحة..
وصلت غرفه الاستاذات.. كالن اكو ندوة.. والعميد يريد الكل بيها..
يعني لازم احضر.. وهو موجود.. اخخ شلون راح اتحمل.. اخذت نفس وكلت بداخلي يارب الصبر..
رحت للحمام.. اتأكد من شكلي المفضوح.. ومن حب علي الاحسه انحفر ع جبيني.. ماكو شي.. بس وجهي اصفر..
الوقت يمشي ومااحس بشي.. دخلت القاعه الكبيره.. للندوات..
كان علي وعميد كليتي الي درست بيهه البكالوريوس كاعدين سوا.. فلازم اروح اسلم.. لان بيوم اني كنت طالبه عنده.. رحت سلمت عليه.. عيون علي خلتني مااعرف احجي..
وهو مركز.. وعيونه تفتر ع كل وجهي.
استأذنت منه ورحت كعدت بالسايد الثاني.. حضر عميد الكلية الي اداوم بيهه وبدت الندوة.. ماادري حتى عن شنو تحجي.. عيوني بس ع علي..
شكد حضنت هاي الرگبه.. وشكد اشتميتها.. وشكد ضعت ولكيت نفسي بيك..
بصفي موظفه بالكليه ابتسمت كالت شبيج..
ضحكت ومثلت ماكو شي.. انتبهت ع حالي.. كاعده مكتفه اديه ورجليه بس تهتز.. وخلصت الندوة.. وطلعو الطلاب وبعض الاساتذه.. اني كلبي ماانطاني اطلع.. بقيت اباوع من بعيد لبعيد ..بحجة داحجي ويه الموظفه.. بس عيني ع علي.. هو همين يسولف ويه عميدنا ويرجع يباوعلي يبستم..
هذا الديصير صدك لو حلم.. بينا بس خطوات.. وبينا سنين.. كلهن وجع وهجر وقهر..
من دتحجي الموظفه اني بالي مويمها... بس مجرد اجاوب اي لو لا..
لمن كالت :هذا دكتور علي .. ديباوع هنا عيب اروح اسلم علي.
-دكتور علي؟؟؟
اي.. معاون العميد.. واني بيدي طبعت الدعوة الهم..
-هاا.. اي روحي..
دنكت ومشيت.. انت انعزيت وارتفع مستواك.. واني انذليت وتحطمت..
ودكتور.. صرت دكتور.. لعد شكد راح تقسى وانت بهذا المنصب وهذا الاسم.. حسيت نفسي خلص بعد مااتحمل ابد.. دخلت التواليت سديتها وبجيت بحرگه.. اكتم ع صوت شهكاتي خاف الي يدخل يعرف..
شبعت بجي وطلعت.. عيوني تنفخت.. وخشمي صار هلكده..
رحت عندي محاضره.. اشرح واشوف الطلاب واحد يباوع للثاني ويهمس.. خليت وعفت المحاضره.. اصلا بالي مشتت مااكدر اشرح.. وعيوني فاضحتني من الدموع وصوتي مال واحد داك ولاطم مو بس باجي..
كعدت نص ساعه بالغرفه وحدي.. ضايعه ومشتته مااعرف شريد..
كل هذا التماسك بهاي السنين كلها اتهدم..
الساعه الي بعدها عندي محاضره.. همين دخلت انطيتها شلون مجان..
لل5 اني بالكليه.. روحي رادت تطلع اله شوي.. مااعرف شنو صارلي.. رجعت بيه روح ذيج المراهقه الي ماتعرف تصرف..
تمنيت لو حاجيه ويا.. لو معاتبته.. لو سائلته.. وارجع ارد ع نفسي اكول لا زين الي سويته من مانطيت مجال وماحجيت ويا هوايه..
رجع للبيت مكلوبه احوالي.. كوه مسيطره ع نفسي مااريد نورس تشك بشي.. كعدت يمهم شويه وتعشيت ورحت للغرفه..
اريد استوعب يومي والي صار ويايه.. طفيت الضوه وبلشت بجي..
تكطعت تكطع.. شنو بعد يصير ويايه وشنو تاليتي.. وليش هيج مكتوبلي اتعذب هلكد..
نمت ثاني يوم كان جمعه.. ساعدت نورس بالتنظيف نوب ع غفله عجبها تعزم هدى وشذى.. وصدك بلشنا نسوي دولمه.. اني الف وبالي بعيد كلش.. نورس كل شوي تسألني شبيج اكلها دافكر اخلي اسئله..
شوي كذبه مقنعه. التمن خواتي .. والاجن جابن همين اكل وياهن..
تغدينا نوب سولفنا شويه.. وبعدهه الاطفال صارو هوسه وطشن.. كلمن راحت لبيتها... اني صعدت لغرفتي.. اتذكر واتذكر.. وحياتي خلصت بس ذكريات وامنيات...
ومرت ايام.. دوامت عادي.. بس بداخلي غصه كبيره.. وجرح اكبر..
هو صح الجرح موجود.. بس من شفت علي عبالك انفتح من جديد..
حتى الشرح مالتي وتعبي قل ويه الطلاب .. بحيث انطي المحاضره واكمل يكولون كل شي مافتهمنا.. وايام اني ع هل رنه.. مااعرف شوكت يصفى بالي واكدر افصل الشغل عن حياتي..
خو المسائي.. هم اصلا ميردون محاضرات.. وعددهم قليل.. فانطي شلون ما كان.. الاستاذات اكثرهن مايبقن للمسائي..
رحت للغرفه اي مخصصيها النا.. كعدت دالم اغراضي بالجنطه..
انفتح الباب.. مااشوف بس علي كبالي.. ماصدكت.. واخذتلي صفنه يله استوعبت.. وكفت..
علي:منتهى اه يامنتهى..
احس حتى صوتي رجف من حجيت:هاا؟
علي:وين كنتي؟ شكد صار ادور عليج؟!
-ليش؟
علي:لان مشتاقلج..
-هو انت العفتني لو غيرك؟
صبت دموعي.. قرب يريد يمسح دموعي.. كبل رجعت خطوه ورا..
تفاجىء.. يمكن عباله بعد كل هذا الضيم اجي اخذه بالاحضان..
علي:منتهى شبيج؟
-وتسألني؟
عيوني غوركت كلش.. احجي وماادري بنفسي.. حجيتله شصار بيه من وراه هو ومرته وشلون امي ماتت وشلون اني شايله الذنب ليهسه برگبتي..
بس كال ياروحي.. احس روحي شمعه وانطفت بيده..
غمضت عيني ودرت وجهي.. ياربي مااقاومه.. اريده بكل تفاصيله..
بخطف منه اقترب مني .. لزم وجهي وبسرعه باسني..
همس يم اذني:منتهى.. انتي روحي .. ماانساج طول حياتي..
باوعت بوجهه.. مادري ليش مااصدك.. يمكن ع كد المريت بي. ويمكن هو مو صادق ويايه ابد..
بعدته.. خفت لااحد يدخل لهنا واصير علج بحلك العالم الوياي..
علي:منتهى لا تسوين هيج؟!
-لعد شتريد؟ ارجع اعيد كل اخطائي وياك؟ وتجي مرتك وادمرني دمار مره لخ! عوفني بنيت نفسي من جديد واذا انت مو رجال ومتكدر تزوجني وماعندك رغبه بهل شي فرجاءا روح.. روح ولا تذكرني ابد..
علي:ايي.. اريد اتزوجج..
مصدكت بي وسكتت.. كلت هذا يريد يسكتني حتى يجي يقترب ياخذ بوسه لو حضن..
علي:شنو ماموافقه؟
-ههه كذبه جديده من كذباتك؟
علي:لا والله احجي صدك.. مدااكذب.. تعذبت وانتي مويمي.. لج انتي مرتي من يوم الي......
-كافي لتكمل.. مااريد اذكر.. تريد تعال تقدملي.. وغيره ماعندي حجي وياك..
علي:انطيني رقمج..
-لا مستحيل..
علي:لعد شلون اتواصل وياج؟
-كلت الك اذا تريد روح تقدملي.. مابيه اتحمل صدمات ومهاين بعد!
علي:ها.. ماشي.. كلها كم يوم واجيبج يمي.. بس كوليلي وين ساكنه انتي؟
-يم اختي نورس الكبيره..
علي:اوكي.. بأقرب وقت اجيج للدوام واحجي وياج براحتنه.. بس هسه اني مستعجل ومتقبلين تنطني رقمج.. راح اروح ونلتقي بوقت ثاني..
-ومرتك تقبل؟
علي:معليج بيها..شمرلي بوسه بالهوى وكال احبج..
طلع.. ممصدكه.. معقوله كل هذا العذاب والقهر وهسه يله اجه يريد يتزوجني.. مااصدك ابد.. كم مره مشيت ورا كلبي ومافكرت بعقل.. بس هسه لا مااوكع بنفس الخطا مرتين.. مااصدك اله اذا شفته بالمحكمه ونعقد..
شلت جنطتي وطلعت.. امشي والافكار متجمعه براسي..
زين مرته شلون؟ واذا يحبني هيج ليش مادور عليه؟ يصير انه دور بس ماكدر يوصلي؟ مامعقوله؟! اريد اقنع نفسي بكلامه مااقتنع..
وصلت البيت.. مااريد احجي لنورس وتتخبل عليه.. اخليها سكته احسن لمن صدك يسويها ويجي يتقدملي..ولو اني مأيسه من هل شي
تعشيت ورحت للغرفه.. قلقه ومحتاره.. مثل ماخلص كل عمري هيج..
مرته شراح تسوي اذا عرفت.. وهي تدري كل الي بينا قبل..
نورس راح توافق؟ خواتي؟ اوووه تعبت من التفكير احسن شي انام..
وهي بالاخير تنحل.. نمت تعبانه فكريا وجسديا.. مابيه حيل كل شي..
ومرت ايام.. انقطع بيها علي.. تعودت ع الخيبات منه.. اصلا يجوز راد يضحك عليه بجيته ومن شاف هيج طرح فكرة الزواج..
شكد احبه وشكد تأذيت منه.. ليش هيج تتقصد ترگص ع وجعات گلبي..
تمرضت حيل.. مااعرف شبيه.. مابيه حيل لشي ابد وبس اتقيأ..
حتى اخذت اجازه من الدوام.. كعدت اسبوع بالبيت..
خواتي كلهن اجن وشافني.. خايفات عليه واصرن اله اروح للطبيب..
رحت للطبيب .. كال كلشي مابيهه بس ارق وقلق.. تفكر هوايه وتتعب نفسها.. وصدك كلهن بيه.. من ياصفحه الكاها..
انطاني علاجات. كم اخذه انعس هوايه.. شويه خفت حاله التقيأ عندي..
ازواج خواتي خطيه كلش اهتمو بيه.. ويوميه واحد منهم يجي يزورني..
بس خالد.. استحي اواجهه من يجي هو وهدى.. لان يعرف بكل الماضي الاسود..
نورس من تمرضت.. شفت بيها امي.. هي امي نفسها كانت وتفتر يم راسي.. عافت دوامهه واطفالهه وحارت بيه.. شكد احتقرت نفسي..
اني شسويت وهم شنو ديسوولي..
تخلي الاكل يم راسي.. تفركلي اديه ورجليه.. تقرالي ادعيه وقران.. هي تبجي واني همين من اسمعهه.. نبجي ع هواي شغلات.. اولها امي.. وثانيها ع حالي.. كبرت ومداحصل بس التعب والشگا..
تلزم راسي وتكلي شبيج حبيبتي شنو يوجعج.. حتى من سمعت كلام الطبيب بقت تسألني شنو يوجعج.. واني مايوجعني شي.. بس هيج اتقيأ ومبيه حيل شي.. احضنهه.. واحس دفو حضن امي بيهه..
شكد كانت قاسيه بس كله لمصلحتي .. وماعرفت اله متأخر.. بعد ماوكعت عدة وكعات..
ومرت ايام.. شوي وضعي تحسن.. اخذ علاج وانام ماادري الدنيا وين..
نمت نوم كلش ثگيل.. انقطعت من الدنيا بي..
احس احد يهز بيه يريدني اكعد.. فتحت عيني.. نورس كدامي..
نورس:اكعدي شبيج؟! منتهى انتي زينه؟ احجي الصدك لاتكذبين؟!
هزيت راسي واحسه جبل مو راس..
كوه فاتحة عيني واباوعلهه.. هي تتبسم واحس عدها شي تريد تحجي..
نورس:تدرين منو جوه؟
-منو؟هدى؟
نورس:لالا..
هه من غبائي وشدة الثول الاني بي عبالي امي الجوه.. تخيلتها كاعده وجايه خطار ع بيت نورس ودتشرب مي وتتبسم واني اجيهه اركض وابوسهه وااطلب منهه تسامحني ..هيج فكرت.. وحظرت ابالي شلون اروح احضنها واكلها اشتاقيت لج..
-امي؟
نورس:شبيج منتهى؟ انتي صاحيه؟
-اي.. بس كولي منو جوه؟
نورس:علي..
احس كلبي وكع:هاا؟ اخذت صفنه مصدكت
نورس:اي.. كومي.. صارله ساعه هنا.. وطلبج من فراس..
يمكن فقدت القدرة ع النطق.. لساني اريد احركه مااكدر..
نورس:لج يله كومي!
-يعني.. يعني قبلتو ؟
نورس:اي.. فراس صارله ساعه يحجي ويايه.. والصدك بعد مااحد يجيج.. وعلي دكتور ومعروف.. وحتى لو متزوج.. ع الاقل ننسى الصار.. ونفتح صفحة جديده..
-اقتنعتي مو؟
هزت راسهه اي وضحكت.. يله كومي حتى تنزلين..
ماادري شسوي.. نسيت حتى شلوون اكوم.. جرتني نورس..
كومتني وفتحت الكنتور.. كالت البسي وعدلي نفسج..
هه اصلا شلبس.. كنتوري كله اسود.. وجيه علي مو مال اسود.. مال حمر ابيض.. ههه
طلعت من فساتين الدوام.. اسود وبي بلك.. اباوع ع نفسي بالمرايه.. مداسيطر ع ايدي.. اعدل بالحجاب.. هه واصلا هو شايف شعري خصله خصله.. بس لان فراس موجود وعيب منه..
ماعندي ولا قطعه مكياج.. رشيت العطر ونزلت..
وصلت الصاله.. نورس بالمطبخ مسويه صينيه كيك وعصير..
ارجف واباوعلهه..
نورس:يله.. فوتي قرو فاتحتج بعد..
-منو الي ويا؟
نورس:اخو واخته..
-استحي..
خزرتني بنظره كأنها تذكرني بسوايتي..:فوتي اكلج!
-وانتي؟
نورس:بس اخلي عبايه واجي وراج.. وهدى همين جايه بالطريق..
انطتني الصينيه وفتحت الي الباب.. ااااخخ ااااخخخ.. كاعد والستره مفصله علي تفصال.. وما كأنه جاي يخطب لنفسه.. كلش مترهي بگعدته..
امشي واكول.. راح نخلص.. راح انسى كل الوجع.. راح امشي ويا وكدام الناس كلها.. راح امحي العار الجبته لاخواتي..
قدمت الهم وكعدت ع صفحة..
اول مره اشوف اخته واخو.. اخته قربت يمي.. تضحك وممهتمه اني زوجة ثانيه.. عبالك اخوها هسه راح يتزوج.. بقت تسولف هوايه.. كل ماارفع راسي علي يباوعلي ويضحك..
ماصدكت .. خايفه لااطلع اتحلم من هل نومه الثكيله.. خايفه لاافز والكه نفسي كل هذا مصاير.. دخلت نورس.. كعدت يمي.. وبصفي منا اخت علي.. اشواق اسمهه.. وفراس مندمج كلش وياهم ومقدرهم حيل..
هو فراس بطبعه يحب الناس الواصله ويحترمهم.. عاد عديله وهيج..
طول ماهم كاعدين محد جاب طاري بان زوجة علي..
واخت علي كل شوي تكول يله خل نخابر يجيبون الشيخ ونلبسهم..
نورس تكولها منتظرين هدى اختنا.. وصدك اجت هدى.. خالد وصلها وراح..
سلمت وكعدت .. صرنا نسوان ع جهه وهم ع جهه..
شويه ووصل اخو علي الثاني ووياه الشيخ... كلها لبست عبايات واني همين.. كعدو شويه حجي مامركزه بي.. المهم عندي يعقد النا وخلص..
وعقدنا.. وصارت صدك مو حلم. كمل الشيخ واخذه اخو علي وراحو..
اشواق مامنعت نفسهه وهلهلت وباست اخوهه.. هو يضحك.. اووف ياضحكتك تشلع روحي من جسمي..
كومني اروح بصفه .. متت رجليه تتراجف.. وكل جسمي همين.. ما كأن اني بيوم من الايام كنت بحضنه.. وصلت يمه.. كعدت .. اخته وياهه علاكه بدت اطلع الذهب اني عيوني بس علي.. وهو عين يم فراس وعين يمي..
من ديسولف انتبهت كال من كنت بمصر!
افتهمت هو كان بمصر.. عذرته.. وبذيج اللحظة نسيت كل شي سواه بيه..
لزم ايدي جرهه.. انطته اخته الحلقه.. دخلها بيدي.. مااشوفه زين من دموعي.. يارب اذا حلم لا تخليني اصحى.. ع الاقل خلي يكون حلالي ولو بالحلم..
فقدت ماسيطرت بعد.. عيني بعد ماانفتحت.. واني منا مسطوره من الادويه وكل شي اجه ورا بعضه.. اسمع اصواتهم بس مااكدر افتح عيني ولااكدر احجي..
صحيت ع بروده مي ع وجهي.. اباوع نورس كبالي وميته خوف عليه.. هدى بصفهه وكلهم مسوين لمه عليه.. احس جسم ساندني.. رفعت راسي.. لكيت نفسي بحضن علي.. باوعتله.. جاب راسي وحيل ضمني لصدره..
بجيت اكثر بعد ماكدرت.. صارت شهكات وونين.. كلها تحجي تريد تسكتني ماكدرت.. مو بيدي .. هذا مال سنين هسه طلع..
مسح دموعي بيده.. ياما نزلت هل دموع.. وياما هو مسحهن.. بس هلمره كدام الكل ومخايفه من شي..
كوه سكتت.. انطاني مي شربت شوي ارتاحيت.. رجع لبسني باقي الذهب والكلادة اخته لبستنياهه.. عيوني مانزلت منه.. اريد اشبع عيوني واريد اصدك الي ديصير.. لبست الحلقه واشوفها بعيني بس ممصدكه..
دوخة فضيعه اجتني من هو يمي.. بصفي وكدام كل اهلي.. يمه ريتج موجوده وتشوفين بلكت تسامحيني..وترضين عني..
بقو شويه.. نوب اخته خبصتهم خبص يله ويله.. كلهم اطلعو كدامي هسه اجي... كلهه طلعت.. فراس وصل مهيمن اخو علي واشواق.. وخواتي همين طلعن..
شالني من مكاني خلاني ع فخده وقرب وجهه يمي:ها؟ بعدج ماتريديني؟
حضنته من ركبته.. لا.. بس لا تعوفني مره لخ..
علي:ههههههه لالا مااعوفج.. بس نخلص العقد كبل نتزوج..
-صدك؟
علي:اي..
-ومرتك؟
علي:اني اتصرف معليج.. بس جهزي نفسج زواجنا موهنا!
-لعد وين؟
علي:بلبنان..
-ليش؟ هي متعرف مو؟
علي:كلتلج اني اتصرف.. عوفي كل شي عليه.. لا تشغلين بالج..
-اي.. احبك..
علي:احبج يامجنونه..
بوسني.. حضني حيل وطلع.. ع الباب رجع وكف.. كال الرقم وهزلي ايده..
ياربي هههه مراهق ..
اشواق بوستني وطلعت.. نوب علي غمزلي.. كلهه انتبهت ضحكو وغلسو:.
راحو.. خواتي كانن واكفات اباب المطبخ.. دخلت كبالهن.. رفعت اكتافي وبرطمت.. وتجمعت الدمووع اضعاف اضعاف..
اجن عليه حضنني.. وتلاثتنا بجينا.. ع كل المرينه بي..
يتبع..
