#مابعد_الخطيئة
الجزء الخامس عشر
Nada hs
adaena7 واتبادء
هذا الضحيت وتحملت وجازفت علموده هيج يسوي بيه.. كنت اظن العيشه ويا راح تكون جنة..هاي الفكرة متدخل عقلي.. اتمنى اموت نفسي واخلص.. بس كنت جبانه.. اخاف اسويها صدك واموت واني موجاهزه.. اشواق صارت تتردد عليه.. تحجيلي بعلي وبان.. كأنها تتقصد تحجي سوالفهم كدامي.. هيج طلعو هيج اشترو حسن هيج يكول ملاك هيج كالت لابوها.. تحملتها.. مهما يكون هي جايه لبيت اخوها وحسب مااعتقد علي هو الكان يدزها الي لان وحدي..
ومرت ايام.. وزاد الهجر بينا.. اسبوع وثاني وثالث هو مجايني.. صرت اتصل ع خواتي هنه يمرلي ويكعدن يمي.. ازاوجهن يتسوكولي..
هواي لاموني.. هذا الردتي.. وهذا الكتلتي نفسج علي.. شوفي شسوه بيج..
وصدك انذليت ذله.. صح كاعده بقصر.. واسمي ع اسمه.. بس مامرتاحه ولا مقتنعه بروحي..
سكتت واتحملت.. شهرين وهو هاجرني.. مادري ليش هيج يسوي.. رجع يحب مرته لو شنو..
اتصل بي مره واثنين ميجاوب.. مرات من دوامه يتصل بيه.. ومو اكثر من دقيقه..شلونج شمحتاجه شعندج ويسد التلفون..
حتى بالكذب مايسمع شنو اريد.. بس هو الي يحجي وهو الي يجاوب نفسه.. ادمرت دمار.. واحس عمري انتهى بعد مابي فايده.. لحد مابيوم بالليل..
دزيت اله مسج.. راح تجي لو اموت نفسي..
كبل اتصل.. شكو شبيج..
فقدت كمت اعيط وابجي بالتلفون.. هسه تجي واله مااتشوف وجهي بعد..
ماكو شويه واجاني.. عبالي راح يجي يحضني ويهديني..
لا اجه عبالك شخص غريب كدامه.. من شفت البرود البي وهو منا صارله شهرين هاجرني هجمت علي.. ضربت ع صدره وادفع بي اكوله روح لمرتك حبيبتك.. روح هي اولى بيك.. روح ماريدك جزعت منك..
فقدت.. حضني حيل.. ويكلي كافي كافي..
بعد مااعوفج بس مشغول ومكدرت اجي.. شويه هديت بكلامه.. ورحت اركض منا واجي منا علموده ..حضرت اكل..لان كنت ممتعشيه بس من شفته جعت.. اكلنا سوا.. وبقه يمي ذيج الليله..
كنت عطشانه ع شي اسمه علي.. طول الليل هو نايم واني بس اشبك بي وابوسه.. نسيت شكد هملني وشكد جرحني..
ومرت ايام اكثرهه وحيده ولوما التلفون جان تخبلت يمكن.. وصار سنه ع زواجي من علي.. كل شي ماشفت منهه بس الوجع والقهر.. واليقهر اكثر اني الخسرت كل شي.. امي وظيفتي اهلي وحصلته بس هو... شي مقابل شي..
بان بقت مستمره بوظيفتها.. مامنعها ولا بطلها.. بحجة انها الاولى وانها تأذت بسببنا.. واني التركت وكعدت بين اربع حيطان..
كل هذا وماندمت ع حبه ولا ندمت ع زواجي منه.. المهم هو الي.. صح وياي وحده بي.. بس صار الي..
من دخلنا السنه الثانيه.. ردت طفل.. غريزه وحدها وتولدت عني.. صار حلمي الطفل.. انام اكعد اتخيله.. بس المشكله هل طفل منين يجي..
اذا علي يوصلني مرتين اذا مو مره.. وهل شي سوالي مشاكل ويه خواتي من عرفن.. كامن يحجن عليه وذبن اللوم بيه.. هدى كالت عوفي بالناقص من هيج زواج.. بس مااكدر اتركه لو يذبحوني.. حتى لو اشوفه بس ساعات مااكدر اعوفه.
صارت سولتي الطفل.. اذا طلع بالتلفزيون واذا رحت ويه خواتي فد مكان وشفت طفل صغير واذا شفت مريه حامل.. اختنك خنك من ادخل البيت بطرك روحي.. لا ايد طفل لازمتهه ولا بحضني طفل..
الغروب اختنك .. اطلع ادعيه وقرآن وابقى ادعي.. يارب اريد طفل.. بس طفل كل شي مااريد بعد.. صح كثرت طلباتي بس هذا اخر طلب ومااريد غيره.. كنت من احجي ويه خواتي .. ويجي بالطاري وحده من معارفنه حامل لو جايبه انعفس.. شمعنى اني مااصير ام.. اريد طفل بيدي..
اريد امشي بالبيت واسمع صوت عياط .. اريد امشي واسمع كلمة ماما..
صرت من اطلع السوك تصير سولتي يم الالعاب.. اشتريت لعابة وصرت اتخيلها بنتي.. احضنهه وافتر بيهه.. واخاف اذا اجه علي رأسا اعوفهه خاف يكول عني مخبله ويعوفني.. فترة رجعت ارسم.. كل رسومي صارت اطفال.. مميات.. احذيه صغار.. حتى بالحلم شفتهن...
كبرت وحقي اصير ام.. علي يجي يتقربلي بس مديصير حمل..
فاتحته بالموضوع وكال روحي للطبيبه.. اجت هدى اخذتني..
فحوصات وسونارات وضيم.. رجعت للطبيبه كالت البيوض عندج كلش صغيره حجمها 7 .. من رجعت.. ايست من اسم طفل..
بالرغم الدكتوره كالت اكو امل وهواي هيج حالات ويصير عدهن حمل..
دخلتني هدى بيدهه.. حتى حيل مابقى بيه.. خلتني بالفراش وبقت يمي ..
انفجرت ابجي واكول ليش بس اني.. ليش ماعندي طفل..
صرت اتمنى بس شي يطلع من بطني.. حتى لو بزونه ..
وبدت العلاجات مالتي.. وعلي يدري بيه وممهتم ولا يمي اصلا.. يجي يومين يمي ويومين يم بان..
احجيله علي اريد طفل.. يكلي يجي يجي.. هنيال البرود البيك..
من اشوفه هيج اتهستر.. اظل بس ابجي.. اباوع ع اديه واصفن بيهن.. اكول شوكت راح اشيل بيهن طفل مني..
ايام وايام.. كل ماافوت من يم المرايه اخلي ايدي ع بطني.. واكول شوكت راح تنترس بطفل..
ومرت اشهر.. وماكو حمل.. يوم اتعس من يوم امر بي.. تمرضت حيل.. وتأزمت نفسيتي.. وكله حوبة وعثرة.. اخذت شي مو الي.. وشاركت بي وحده.. وهاي النتيجة.. شكد استغفر بس احس مو مكفي..
ذنوبي هوايه.. يا ذنب منهن ينغفرلي.. ذنب ذيج الليالي واني نايمه بحضن غريب لازوجي ولا شي.. ذنب علي الاخذته من مرته واطفاله..
ذنب امي الماتت بسببي..
بعد 6 اشهر من العلاج والمراجعات .. طلعت حامل واخيرا..
يمكن الفرحه الي حسيت بيهه عوزها شوي واطيرني بالهوى. مكيفه واريد اكمز وابوس اليمي بس اخاف عليه لا يتأذه... خواتي اجن يمي..
كلش فرحن بيه.. وهن يدرن بنفسيتي الصارت زفت .. كالن عسى ولعل يرتاح كلبج وتعيشين مرتاحه..
علي من حجيتله عبالك كلت اله عن الجيران .. مو اني مرته الحامل.. مااهتم ابد.. بس كال اي خوش .. ديري بالج ع نفسج..
بقيت مركزه بعيونه ومااهتميت شكد كلامه يجرح.. المهم جايني طفل منه.. بي من عيونه بي من ملامحه.. هيج تخيلت..
رسمت حته شكل الطفل ابالي..خشن وعيونه ع ابو.. ميخالف بنت او ولد مو مهم.. المهم طفل وهاي امنيتي تحققت..
اشواق صارت تجيني هوايه.. تشتغل شغل البيت وتطبخ وتروح.. والبغشيش مالها يم علي.. كنت اول اشهر مااتحرك بس بالفراش.. اتمنى اكعد واسولف وامشي براحتي
تكسرت من النومه والتمدد.. بس اتحمل.. كله لخاطر طفلي..
كلش تأذيت .. لعبان نفس فضيع وحيل مابيه نحلانه والصخونه نار وتجري بيه.. اليومين الي يجي بيهن علي ابقى بحضنه مااتحرك ولااكوم.. وهو الي يسوي كل شي.. يصب لنفسه ويجيبلي الي همين اكل..
نوعا مااهتم بيه من شاف حالي.. وكلش ضعفت وتغيرت..
تحملت هاي النومه السم ع ظهري 3 اشهر.. ماكوم بس للحمام وللاكل ..
لان كان كلش نازل.. لحد 5 اشهر وهو نازل..
سويت سونار.. وطلع ولد.. ويافرحتي الماتنوصف.. شسمي.. شلون شكله.. يشبه ابو لو لا.. شوكت يجي.. الف سؤال.
يوميه اكعد الصبح بواهس.. اكو فرحة كبيره جايتني ع الطريق.
خواتي هواي يجن يمي.. يخلصن النهار يمي ويرحن..
وعلي همين فرح من عرف الي جاي ولد..
بديت اجهز واشتري .. مو اني وانما اوصي اخواني هن الي يجيبين..
سويتله غرفه.. وع ذوقي وترتيبي.. ابو مايدري شسويت وشخليت..
بس من كملتهه شافهه وانبهر بيهه..
وكل هذا عذاب الظمير ميفارگني.. ع امي ..
وصارت ولادتي قيصيريه.. عندي ضيق فمااكدر طبيعي.. ردت اخر وجه اشوفه هو علي.. وصدك متحملت نفسي قبل لاادخل .. حضنته وبسته من ركبته.. كلهه ضحكت عليه.. وهو استحى وراد بس يبعدني..
دمعت عيوني .. باوعت بوجهه:انتظرني راح اجيب مصطفى واجي..
هيج فجأة خطرلي هذا الاسم.. لان ع اساس اسمي محمد
دخلت عمليه..صحيت ع وجع يكتل.. سجاجين تكطع ببطني وظهري..
اريد اعيط مااكدر.. هدى وشذى ويايه.. علي واشواق همين..
ردت بس علي وابني وامي تكون لازمة ايدي.. مابعيني كل اليمي.. اعيط بلا وعي.. عبالك مو اني الي داحجي.. جيبو ابنيييي.. اون وجع وعياط ماادري شنو صارلي..
شوي شوي بديت اصحصح.. وجابولي صوفي.. صغيرون كلش كلش.. خفت من شفته بهل حجم..
خلو بحظني.. لااراديا دموعي تصب.. اريد اسيطر مااكدر.. علي يم راسي ويمسح ع كصتي .. هدى وشذى يباوعن الي ويبجن.. اشواق تحاول تلطف جو وتذب نكات وتضحك..
بقيت يوم كامل بالمستشفى.. علي ويايه بقه وهدى همين.. البقيه راحو..
بالليل.. مااسمع بس صوت سلام عليكم.. اعرفه هذا الصوت..
التفتت هاي بان.. متت من شفتها.. المن اجت..
هي وبتها وابنها جايه ووراهم مهيمن..
وكفت كبالي عيونها تريد تاكلني.. كالت الحمد لله ع السلامه..
ها ارتاح كلبج هسه.. حجتهه بشقه .. علي خزرها.. مهيمن همين سلم وتحمدلي ع السلامة...
قربت بان من صوفي.. مسحت ع خشمه وكالت مطالع ع ابو!
عبالك تتقصد هيج تسوي.. اطفالهه اول مره اشوفهم والتقي بيهم..
متعجبين ميعرفوني ولا شايفيني ابد.. حسن اجه ع اخو .. يضحك ويكلها مامه صغير ونايم..
هي تضحك بس وراهه غيض كبير..
تباوع ع صوفي بحقد .. سكته محد يحجي ..
علي:شعجب اجيتي؟
بان:داباركلك اجيت.. يتربى بعزك حبيبي..
اخ كدامي وتتغزل بي.. متت قهر ومااكدر احجي ولااسوي شي.. الكل وياهه وهو الحق اصلا وياهه.. بس شسوي لازم اسكت لخاطر علي...
بقت شويه وراحت.. طلع وراهه علي.. اني بس اتلفت اريد اشوفهم اريد اكوم واطلع وراهم... هدى كوه لازمتني وتكلي مراح يطير هسه يجيج..
كوه تحملت لحد مااجه..يضحك وفرحان.. الله اعلم شكانو يحجون..
بقه شويه وبعدين راح.. كلت اي راح وراهه.. عافني وراح ..
متت قهر.. بالليل اجاني .. وصار وقت اطلع.. صوفي حبيبي زين ويرضع..
اخذنا علي اني وهدى للبيت.. اشواق نزلها يم بيتها مرادت تجي ويانه..
دخلت كوه امشي.. صوفي بأيد هدى.. وعلي كدامنه..
واخيرا نورت البيت ياروحي..
خلتلي فراش ونيمتني بغرفه صوفي.. وراحت خطيه خابرت ع نورس لان اطفالهه بقو هناك.. علي كاعد يمنه ومركز نظره ع صوفي حيل.
ممصدكه عيوني.. ذول الاريدهم اثنينهم كدامي.. عايزتج هل كعده يايمه..
ومرن تلث ايام ع ولادتي.. هدى وشذى ونورس يتناوبن يمي.. اشواق كطعت الرجل.. اني مااكدر اسوي شي.. يادوب ملحكه ع صوفي..
بس وضعه لصوفي ابد ماعاجبني.. ينام كلش هوايه.. وميكعد يرضع اله اني اكعده.. نوب مااكدر انطي صدري ميكدر ياخذه.. احس جبل صار ع صدري من كد ما ورم وثگل..
نورس من اجت.. وشافت صوفي تخبلت.. تكلي الولد بي ابو صفار ومخليته هيج.. اني تخبلت.. شنو ابو صفار.. اسمع بي قبل باطفال اخواتي بس ماعرف شنو ولاكلفت نفسي وسألت هو شنو..
خابرت علي صوتي مطبك من البجي.. هو كان بالدوام..
كلتله ع صوفي.. كال العصر يله اكدر اجي..
نورس عدها وصفات عجيبه.. شالت شكو لون اصفر موجود بالغرفه وسوت اله كلاده مال ثوم خلتهه بركبته وهو حبيبي مثل الفاقد.. وصله ونحرك بيها .. بس نفس بي..
ومقبلت نورس اعوفه هيج.. صرت اني اكعده كوه وارضعه..
من اكابله واشوفه هيج مسنح روحي تريد تطلع.. ابقى مكابلته وابجي.. شبيك ياحبيبي شنو اليوجعك.. لو عندك لسان وتشكيلي.. لو اعرف وين علتك..
يوم ع يوم بده يصير احسن.. بس اني ممقتنعه.. ميته خوف علي.. وجلب ويايه اكتئاب مابعد الولاده دمرني دمار..
كل مااصفن اكول ياريت ماجبته وبقيته ابطني احمي.. شنو الصار.. وليش دابجي.. مااعرف بس الخنكه الاحس بيها تكتل.. المشكله مااكدر احجي لاحد عن الي بيه.. وكل مااختلي لوحدي اموت من البجي اله شوي..
خاصه علي كله مشغول ومايدري بينا وين ماوين.. ردته يمي.. يشوفنا ويشوف حال ابنه.. بس هو كله مشغول.. ومنا هم يروح لبان واطفالهه..
تحسن صوفي.. ونورس ويايه خطوه بخطوه هي التعلمني شسوي.. لوما النت المفتوح بينا 24 ساعه مااعرف كان شسويت..
يوم ع يوم اشوف ملامحه.. عيونه .. يتحرك.. بس كلش ضعيف..
علي من يوم الولدت بعد مانمنا بغرفه وحده.. يتحجج يكول مااكدر انام يمكم خاف يكعده صوفي.. وهو اصلا صوفي حتى من يبجي كلش هادىء صوته.
وصدفه .. غسلت الممات وحضرت مي لليل.. دافوت لغرفة صوفي الي اني انام بيهه.. كلت خل اشوف علي شويه.. قبل لااوصل الباب سمعته يحجي..
بس شنو بالضبط ماعرفت.. اريد اسمع ماكو.. بس صوت الدويه مال صوته..
دخلت علي رأسا سد التفون.. كال ها شكو؟
-ويامن تحجي؟
علي:موظف بالجامعه خابرني..
-وبهيج وقت؟ باوعت للساعه ب11..
علي:اي عادي واذا هيج وقت؟!
احس نار وكبت بيه.. بس مااكدر احجي اكثر.. عفته وطلعت..
حسبه تجيب وحسبه تودي.. كلبي حسني انه ضام شي عليه.. ولو بان كان حاجاهه بصوت وعادي يكلي اذا هي تتصل.. بس كلبي خايف من غير شي..
رحت يم صوفي.. خليته بصفي ودك بجي.. مامرتاحه يايمه.. كل هذا لان متي ومارضيتي عني.. غفيت.. تعبانه وهلكانه..
ومرت ايام.. خلصت الاربعين.. شوي خلصت من الاكتئاب.. مااريد اذكره وارجع اوكع بي.. تنظفت وكملت. لازم ارجع علي لحضني.. لازم اعرف ليش كل هلكد مبتعد.. معقوله تلعب نفسه لان والده ستوني..
عاد خابرت هدى.. اجت اخذتني للصالون.. حف وكص شعر وتغيير لون..
صوفي يم هدى.. وهي الحايره بي اخذته ع صفحة تكول موزينه ريحة الصبغ علي..
كملت ورجعت للبيت.. طلبت من هدى تبقى يمي.. سويت اكل وحلويات.. ودخلت حمام ومكيجت وسشورت.. اباوع ع نفسي .. ايبااه.. شكد اهملت نفسي.. وصار كل وقتي ركض بركض.. واني قبل اذا جيت اسبح مو اقل من ساعه. واذا وكفت كبال المرايه يطير الوقت كله واني بعدني ممخلصه..
ابتسمت لنفسي. طالعه حلوه.. بس جسمي خرب من الولادة طلعلي كرش صغير.. واخاف مااكدر البس شي يضبه لان عمليه..
كملت واخذت صوفي من هدى.. هي همين راحت..
خابرت علي.. وتوسلته يجي.. تحجج هوايه بالدوام وملاك مريضه وو كوه قنعته واجه..
اول مادخل رحت علي وحضنته.. حضني .. بس احس اكو برود.. فتور..
اكو شي صاير ويا ميكلي بي..
بسته من خدوده.. باوع بوجهي وابتسم.. ابتسامه بارده وجافه..
وعيونه مابيهن لمعه كبل..
صبيت واكلنا سوه.. واستلمني صوفي طول ماناكل هو يتنغوص.. كوه سكته ونيمته.. علي دخل حمام.. دخلت للغرفه لكيته محضر قاطه يريد يطلع..
جريته منه..
-لتروح حبيبي..
علي:مااكدر عندي شغل.. اجيت علمودج.. مااكدر ابقى اكثر..
-مااخليك.. ومتروح..
علي:هه اي مو اني امشي بكيفج؟!
-ليش هيج تحجي.. مشتاقتلك ومااقبل تروح؟!
كال بزمخ:داكلج مااكدر! كافي تلحين!
-الح؟ براحتك.. روح..
خليت وطلعت من الغرفه.. رحت يم صوفي انفجرت بجي.. اووف .. شديصير وشغيرك ياعلي.. كنت مخليني اول ايام بين اديك.. هسه متريد تبقى يمي.. بان .. اوف بان كون اكطعج.. بس لالا مو هي..اي احس مو هي السبب.. علي عنده شي.. تلفونه بي شي وضامه عليه.. معقوله عنده علاقه؟
منو هاي وشلون تتجرأ؟ مكالي عليه مشاركتني بي وحده؟ نوب اثنين؟!
يتبع...
