مابعد الخطيئة

الثامن

#مابعد_الخطيئة

الجزء الثامن

Nada hs

adaena7 واتباد

صار كل همي شلون ومنين ابدي..واوصل الرقم.. ايام واني احاول.. يوميه فكره .. خلص صبري.. هو رقم ومادبرته..
ماكو غير اتواصل ويه طلاب مرحلتي.. اكيد واحد منهم عنده الرقم.. بس شلون احصلهم وشلون التقي بيهم.. صار مو خطط معضله..
اتصلت بشهد ردت رقم الممثل.. لان دائما ممثلينا يكون عدهم ارقام الاساتذه.. جاوبتني ماعدهه رقمه.. بس تحاول ادبره.. وطبعا فضولهه يقره الف صار.. فأني كلت الها انو اريد رقمه ع اساس اكو صورة الي من مالات التخرج باقيه يمه.. حسيتهه ماصدكت.. واكيد ماصدكت..
المهم يومين بعد مفاوضات وتحريات حصلت رقم الممثل..
كانت علاقتي مو هلكد بي وبكل الطلاب..
فمن خابرته وكلت اني منتهى تفاجىء.. ترددت احجي.. بعدين تذكرت معاناتي واني ادور ارقام منا ومنا.. حجيتهه دفعه وحده..
شسوين بي؟ رد بصدمه كان..
جاوبته:والله محتاجته بشغله.. علمود تقديم دراسات عود..
هاا.. بس هو مااعتقد يساعدج بشي.. شوفي ست اسماء او دكتور فاضل.. هواي احسن منه .. اني انصحج يعني..
-لا مو اريد اقدم ع الخاص .. واريد اعرف شنو اقره ومنين ابدي..
هاا.. والله بكيفج بعد.. بس اني ماعندي رقمه..هو مايقبل ينطي رقمه للطلاب ابد..
واني احجي بالتلفون غميته.. صارلك ساعه تلغي ويايه وماعندك رقمه..
-زين ماتكدر ادبرليا.. ضروري..
ها؟ اي اي.. راح اشوف ابن عمي موظف بالكليه.. اكيد عنده الرقم..
-تسلم تعبتك ويايه.. بس عفيه لاتتأخر بالرقم..
تدللين بعيوني..
سلمت علي ونهيت المكالمه.. اووف ذبيت نفس.. وهاي مهمة خلصت..
خل نشوف شيكدر يسوي.. وهذا همين شك بأمري.. يله مابقت عليه..
خل يفكر الي يريده المهم اوصل لعلي واسمع صوته..
انتظرت يوم والثاني والممثل ماردلي جواب.. كضيت هل يومين ع نار..
لحد ماايست.. شغلت اللاب وكعدت ابجي.. الي يشوفني يكول بطرانه لو مخبله.. اي تخبلت وانجنيت بي.. اتخيله بكل مكان.. بكل زاويه بالغرفه وبكل لحظه احسه ويه النفس يصعد وينزل..
داابجي اسمع صوت رساله ع التلفون.. مهتميت كلت من الشركة لان وقت متأخرعليش متعبه نفسي وكايمه.. صفنت شويه بعدين كلت خل اكوم.. عسى ولعل بيهه الرقم..
ماصدكت من شفت المرسل رقم الممثل..(مساء الخير.. اسف اذا ازعجج بهل وقت.. هذا الرقم واسف مرة لخ ع التأخير)
يالله الفرحة احسهه تطلع من نص گلبي.. شكد  ضجت منه للمثل لان تأخر عليه ولان بقه يلح ويسأل شسوين بي.. بس من دزليا لا اختلف الوضع
مرديت.. حتى لا يكول كاعده ويجوز يرد عليه ومالي خلك اخذ وانطي ويا.. المهم اتأكد من الرقم..
ثبته بالتلفون.. صافنه بي واتأمل كل رقم بي.. اخابر لو ادز مسج..
لالا اخابر اريد اسمع صوته احسن..
دكيت.. كطعته .. مو جاهزه ابد.. اخذت نفس .. اباوع ع ايدي ترجف وجسمي ثلج .. دكيت انتظرت هوايه .. كل دگه تشلع گلبي من مكانه احس الطوط ترن بگلبي.. سكت صوت الطوط.. اسمع الو..
شلت الجهاز من اذني .. .. بده العداد مال مكالمة يشتغل يعني فتح الخط..
بودي احضن التلفون.. بس مااريد اضيع الوقت اريد اسمع صوته..
الوووو؟ متحجي شبيك؟ الو؟!
بقيت ساكته.. ماادري منين طلعت هل دموع الغرگت وجهي.. شهگت.. انسمع صوتي كبل سديته..
ادمرت دمار بعد ماسمعته.. افكار تجيب وافكار تودي.. اكيد هسه يمهه.. اكيد هسه هي بحضنه.. متت قهر.. مخنوكه خنك ومااكدر ابجي بصوت.. امي نايمه بغرفتهه وكانت بدايه شتا.. فالاجهزة كلها طافيه واقل صوت ينسمع.. خليت ايدي ع حلكي وبجيت اكثر..
ماينكتم ولا ينضم هل وجع.. ومحد يحس بي اله المار بي..
اي اني هواي صفات سيئه بيه.. بس حبيته وخلص.. نقطه راس سطر.
بقيت الليل كله ابجي.. افتح التلفون واطلع رقمه ابقى صافنه بي.. كل شوي اغير التسميه..روحي.. گلبي.. نبضاتي.. هواي اسماء خليت..
اخرهه ثبتت ع (المو الي) اسم غريب محد يسمي.. بس واقعي كلش..
ينطبق عليه..
اسمع الاذان اذن.. امي كعدت للصلاة اني كبل طفيت الضوه مال غرفه وسويت نفسي نايمه.. مثلت النوم بس تالي صدك غفيت..
كعدت اباوع للساعه ب2 ظهر.. اووو شنو نوم لو موت..
كمت غسلت.. رحت لامي بغرفتهه..
امي:صح النوم.. بيش الساعه نمتي البارحة؟
-تعبانه ماما..
امي:اي.. 3 مرات اجيتج وانتي فاقده.. ردتج تكعدين تاكلين لكمة.. غرفتج هوسه..
-هسه اكل وانظف..
امي:اي روحي.
طلعت اكلت.. وبلشت تنظيف.. غرفتي مكلوبه كلاب .. اشتغل واباوع ع التلفون.. عبالك ضامه متفجرات بي.. كملت الغرفه.. البيت نظيف امي ممخليه بي شي يعتب عليهه.. كعدت اباوع ع التلفزيون.. حته التلفزيون هجرته من وره علي.. اباوع بس مامركزه.. اريد بس الوقت يمر.. واعرف بنفسي اذا دخلت الغرفه راح الزم التلفون واتصل..
متحملت اكثر من نص ساعه.. كمزت للغرفه ..
كبل للتلفون.. عقلي يريد شي وجسمي يسوي شي ثاني.. احاول امنع نفسي بس مااكدر..
دكيت بسرعه جاوب..
الو.. احجي! الووو!
كطعه من يمه.. نص عمري ضاع بهل لحظات.. بالي اسأل شلونه وينه هسه وشديسوي..
كاعده والتلفون بحضني.. اخذتلي صفنه اهتز التلفون.. فزيت من الهزه..
اباوع هذا نفسه رقم علي.. متت بلعت ريگ وفتحت خط..
بقيت ساكته..
علي:الوو.. متحجي شبيك؟ ليش تتصل اذا هيج!
كان يحجي بنبره هادئه كلش.. بقيت ساكته وهو همين ساكت..اسمع صوت هوى او بسياره.. يمكن برا.. هيج تخيلت..
بقيت مركزه ع الصوت اليمه.. ماكو اصوات بشر ابد..
سمعت اسمي انجاب .. مصدكت.. رجع همس الي وكال:منتهى! احجي! يامنتهى شبيج؟
ماادري اضحك ماادري ابجي.. كنت مفكرته ناسيني.. وناسي اسمي وناسي كل شي ..
رجع عادهه بنفاذ صبر:منتهىىى! جاوبي! احجي!
بقيت ساكته بس كوه متحمله ماابجي.. جر نفس وكال اه اه..
همست بصوت ناصي كلش.. سلامتك من الاه ياروحي..
طالت السكتة بينا.. هو بس يتأفأف ويذب اهات.. واني دموعي تصب..
لحد ما انكطع الخط.. امنيتي اصرخ واطلع البيه.. افلش الغرفه الطم واملخ نفسي.. لو يكون الي لو اموت وينتهي هل عذاب احسن.. الرحمة يارب..
دخلت حمام.. حتى ابجي براحتي.. وماقصرت بيومهه.. احس عيوني رادت تطلع من كد مابجيت..
بالليل.. كعدنه اني ومامه.. اخلص وقت عود.. كل شوي يتخيلي اني اسمع هزه التلفون. اباوع ماكو لا اتصال ولاشي.. بس صار بعقلي يمكن..
راحت امي تنام.. بقيت بالصاله ع تلفزيون..
مر هوايه وقت.. وحيده ودنيا ليل.. صوت هوى قوي برا.. فتحت باب المطبخ.. هدوء عجيب وجو كئيب.. ضربات الهوى تجيب وتودي..
تمنيتها تاخذني يم علي.. حتى النخله .. سعفه تضرب سعفه وتروح وتجي..
بقيت واكفه وصافنه.. مضيعه كلشي بس مااعرف شلون الكا..
نوب صارت الدنيا حمره من التراب.. خليت ودخلت.. وحكمت الابواب بالبيت كله..خليت وصل المسح جوه البيبان..
دخلت الغرفه واباوع ع كل شي يمي بملل.. حتى نومة الليل طارت من عيني.. صار السهر اسمه علي..
اهتز التلفون كمزت جبته من ميز التواليت مخليته عليه..
شفت المتصل هذا المو الي.. طفيت الضوه ورحت مددت بفراشي.. حتى ابجي براحتي من اسمعه..
فتحت خط.. شكد حلو صوتك.. اروح فدوة لكل شي بيك..
علي:الو.. منتهى.. شلونج؟
بقيت ساكته والدمعه بطرف عيني..
همس:لا تشلعين گلبي جاوبي.. منتهى دااسمع نفسج هاي انتي اعرفج..
شلون تعرفني وانت كلت تكرهني.. وشلون تعرف صوت نفسي.. شنو التغير..
علي:لتبجين.. كافي بجي..
انتبهت ع نفسي صدك داابجي.. اي مو كلامك يوجع.. تكلي اسمع نفسج واعرفج.. تريدني اتحمل. بس هم بقيت ساكته..
علي:اوووووف.. كافي دااكلج! كومي غسلي ..
متحملت اكثر كطعته.. شسويت بحالي اني.. شورطني ودورت رقمك وسمعت صوتك.. لو متعلم ع القهر ياكلبي..
رجع دك مره لخ.. ماردت افتح.. بس بأخر لحظات جاوبت..
علي:منتهى ! مو داحجي وياج ردي سمعيني صوتج! منتهىىىى!
-ها
علي:اوووه.. واخيرا.. شبيج ياعيني..
-مابيه شي..بس بيه انته..
علي:بعدج مانسيتي؟
-لا.. العمر كله ماانسه..
علي:شلونج؟
-شتكول انت؟
علي:ماادري..
بقينا ساكتين.. رجع كال:شلعتي كلبي ليش متحجين؟
-ماادري..
علي:منين جبتي الرقم؟
-جبته وخلص..
علي:لج مداانام الليل من صوت شهكاتج! باقيه بأذني..شنو طفله انتي؟
-لا مخبله.. وانت الخبلتني..
علي:منتهى..
-عيونها..
علي:مشتاقلج..
-ها؟
علي:مش تااا قلج ..
-تحجي صدك؟
علي:اي..
-شنو الغيرك؟
علي:ماتغيرت.. بس اشتاقيت..
-لشنو اشتاقيت؟
علي:لوحدة مخبلة اسمها منتهى..
ضحكت.. بس مدااصدك الي يكوله.. اريد اطرح علي الف سؤال بنفس الوقت ومااعرف منين ابدي..
علي:تضحكين مو.. يله كومي اقري باجر عندج امتحان..
خرب صدك انهبطت من كال امتحان.. نسيت اني متخرجة..
-تخرجت وعفت گلبي يمك.. ماعندي امتحان..
علي:اي بيها الخير..
-وين انت؟
علي:بالبيت.. يعني وين؟!
-ووو
من وتوتت عرف اريد اسأل ع مرته.. كال:مو هنا..لتخافين مو يمي..
-لعد وين؟
علي:معليج بيهه.. عوفيهه بحالهه ممأذيتج!
-اغار..
علي:زوجتي هايه.. وحلالي وحقي..
عصبت عليه:كولها بعد كولها.. حبيبتي وروحي وكلبي! دمرني بعد دمرني!
علي:هههه.. مجنونه.. اي احبهه..
-واني؟
علي:مااعرف.. بس مشتاق اشوفج اي..
نزلت دموعي:انت تخابرني متقصد حتى تجرحني؟
علي:انتي الي اتصلتي مو اني ترا؟
-يله باي اريد انام..
علي:لترحين.. خليني اسمع صوتج..
مكدرت ارفض.. علي وطلب مني اسوي شي بعد..
علي:اريد اشوفج منتهى..
-حتى تعيد السويته بيه مو؟
علي:لالا.. بمكان عام.. وموووو..
-افتهمت.. وين؟
علي:بكيفج..
-شوكت؟
علي:همات بكيفج..
-هسه؟!
علي:تخبلتي شنو؟ الساعه وحده ونص والناس بسابع نومة هسه..
-اي تخبلت.. وروحي طلعت وداموت بدونك..
علي:عيب مااكدر اجي هسه..
-بس اشوفك من الباب وروح..
علي:لا منتهى صعبه..
-شنو الي صعب.. بس تعال فوت من يم بابنه.. واني راح اشوفك..
علي:يله جاي..
-انتظرك العمر كله يانور عيوني..
علي:كذابه.. ماعندج صبر وراح تخليني اطلع بهل الجو الحلو .. بس يله ميخالف مااريد ازعلج..
-هههه شكرا..
سمعت صوت حركه يمه.. صوت فتح باب..
علي:خليج ع الخط ..
-ماشي..
سمعت صوت فتح باب السياره.. صوت التشغيل مالتهه.. نوب سمعني صوته:هسه راح احرك.. بالله شتكول العالم عليه؟!
-محد راح يعرف.. بس تعال..
علي:اجيت..
شغل اغاني وعله الصوت.. سرحت كلش ويا..
علي:حتى الشوارع فارغه.. اعتقد راح تمطر..
-الله وينكطع الطريق بيك لاهلك وتبقى يمي..
علي:ههههه مو كاعدين بالصحراء احنه مو..
كنت احجي وامشط بشعري ع المرايه.. لااراديا بديت اخلي كحل وحمرة.. شوفته هي الكحل..
علي:يله وصلت شارعكم.. بس ميصير انتي تشوفيني واني لا؟!
-يعني؟
علي:شارعكم فارغ مااكو احد.. بس اطلعي شويه وخل اشوفج..
طلعت ع كيف لاامي تسمع.. وصلت باب الشارع عواصف قويه..
فتحت الباب شفته طابك كبال بيتنا.. كلش قريب..
مادري شصارلي من شفته.. دموعي كامت تصب ونسيت نفسي واكفه بالباب..
علي:لج ارجعي ! منتهى لاتبجين! راح تخليني اروح!
-لااااا.. ابقى فدوة.. مراح ابجي..
اكولها بس اني ممسيطره ع نفسي وع دموعي.. شفته طفى السيارة وفتح الباب.. نزل واجه يمي.. دفعني جوه ودخل ورايه..
الخط بعده مفتوح.. اني صافنه بي وهو همين..
خله ايده ع وجهي ومسح دموعي.. ورجع حضني حيل..
همس يم اذني:مخبله لاتبجين عيونج راحت!
جلبت حيل بملابسه:حبيبي.. روحي .. عيوني..
اكولها وادفن نفسي حيل بحضنه..
علي:لاتسوين هيج! كافي!
لزم وجهي باثنين ادي وقرب وجهه عليه:مجنونه كافي!
قربت وجهي منه.. اشتميت رگبته.. كلها عطر نسائي..
طبع بوسه ع خدي..باوع بعيوني حيل..
علي:سويتيها صدك وجبتيني الج..
حضنته حيل.. ممصدكه نفسي .. شكد كنت اباوعله واتمنى نفسي بحضنه..
وهسه صارت صدك.. مااريد هل لحظه تنتهي.. احس كل وجع بيه طلع واني مخليه راسي ع صدره..
-لتروح..
علي:لاا.. لازم اروح.. فوتي جوه حبيبتي..
ابتعدت عنه وباوعت بوجهه حيل:شگلت؟ كلت حبيبتي؟!
ضحك وكال:اي حبيبتي.. ارتاحيتي.. يله فوتي داروح لا نوكع بمشكلة..
راد يطلع جريت ايده.. بستهه .. رجع حضني..
علي:خل اروح لج لا تصير مشكلة!
باسني من شفتي.. مااعرف شوكت عافني وطلع ع كد مافقدت ويا..
باوعت شفته كاعد بالسياره.. لزم شفته واشرلي.. لزمت شفتي وضحكت..
شغل السياره وراح.. ماكو احد بالشارع همزين.. واصلا شارعنه ناس ميته
مابي روح..مكدرت ادخل جوه.. بقيت افتر بالكراج..
عبالك لحظات مثل الحلم.. شلون وشوكت اجه..وشنو الي صار.. كلمة حبيبتي تتردد بعقلي.. صدك صرت حبيبته لو بس حجايه وطلعت..
لالا يجوز متعود يكولها لمرته.. وتيه عباله اني مرته..
اي اكيد هسه راح الها.. واكيد هذا العطر الشميته بي عطرهه..
اخ شلون بيك ياكلبي.. بقيت اروح وارجع بالكراج.. حسبة تجيب وحسبة تودي..  متت قلق نوب.. كنت بحلم وردي وصحيت ع واقع مزعج..
هنه دقيقتين الاجه بيهن.. بس نسيت الدنيا ومابيهه ويا..
وكعت قطرة مي ع راسي.. نوب القطرة وصارت زخات مطر..
خليت وفتت لغرفتي.. شلت مخدتي ورحت يم مامه.. خل اكون يمهه بلكي ارتاح ويطمئن كلبي.. من حست بيه حضنتني.. مثل طفل صغير..
شكد افتقدج يايمه.. التهيت هواي ونسيت حضنج والدفو البي
نمت يمهه.. احساس غريب اجاني واني بحضنهه..
فشله ع خجل ع ندم وحيرة.. خنت الثقه يايمه.. مااعرف شلون الي عين اجي واخلي راسي ع ايدج.. دمعت عيوني كوه سيطرت حتى ماابجي اكثر غفيت واني يمهه..
كعدت الصبح.. امي مكمله الغدا ودتنظف.. كبل اكلت لكمة وبلشت تنظيف وياهه.. مطر البارحه مو مي.. لا طين.. وهي منا صارت عاصفه ترابيه قبلهه.. البيت متروس تراب.. بلشنه انظف .. وامي بيهه حاله كون البيت يلمع متقبل بأقل من هيج.. والف شغله طلعت النوب...للعصر يله كملنا ..
رحت للتلفون ملكيت لا رساله لااتصال.. كنت اشتغل ومتأملة..
وخاب ضني كلشي مالكيت..
المغرب اجت هدى.. هي وزيود وخالد.. جايبه عشه وجايه.. ع ما رتبنا وكملنا
كعدنه ناكل سوه.. بس هدى ماشالت عينهه مني.. خفت لا تكون عرفت شي عن جية علي البارحة.. من خلصنا عشه دنغسل ونسوي جاي بالمطبخ صفت يمي وكالت:خالد جاي علمود يحجي وياج ع وليد..
ردت احجي كبل عاطت بيه:اش ولا كلمة.. هواي انطيناج مجال ترا! وحمدي ربج واحد مثل وليد راكض وراج لهسه وخابص الامه بيج!
-مااريده.. ومااتزوج.. ارتاحيتي؟!
هدى:اوصل سوالفج كلها لنورس.. وشوفي منو اختج الصدك!
-فدوة.. بداعه ماما وبروح بابا لا تخليهه تصير.. مااريد افشلج وياهم والله.. مااتحمل احد وخلگي ضيك ومو بعيني غير علي.. لا تشيلين ذنبي وذنب وليد..
هدى:اخخ كون اموتج هسه..
-ياريت..
هدى:انجبي.. اخذي المي وروحي كدامي.. واذا خالد حجه كولي بعدين ارد جواب ماشي؟
-اي

يتبع...