#مابعد_الخطيئة
الجزء السابع
Nada hs
واتبادadaena7
درت وجهي اريد اروح.. لزمني من بطني وطبكني اله..
همس يم اذني:اذا شفتج كبالي بعد مره لخ اسوي الي ماسويته اليوم.. وكولي اني شريفه عود..
انعصرت عصر بحجايته.. صبت دموعي واني بين ادي.. فلتني من ايده ودفعني:يله ولي..
طلعت من البيت.. مااندل دربي .. ماادري شلون شغلت السياره وحركت..
امشي واصرخ.. مو بس دموع لا صراخ و غصات..
باوعت التلفون بالسياره.. امي داكه عليه مرتين.. الساعه ب2 وبالعاده بالامتحانات مااتأخر هلكد.بس اني كلت الها احتمال اتأخر لان اخر يوم ونلتم .. طبكت ع صفحه مسحت دموعي..
حاولت ابين صوتي طبيعي..
امي:وينج مامه.. شو تأخرتي ؟
-مامه مو كتلج اتأخر.. هسه اني جايه بالطريق..
امي:شبي صوتج؟ شنو باجيه؟
-لا .. بس هيج ضجت لان بعد مااشوف صديقاتي.
امي:ديله تعالي تغدي لان هدى يمنه ومنتظرتج..
-ماشي جايه..
حركت السياره امشي ع كيفي.. مااريد استعجل بالرجعه.. اريد اعصابي تهده شويه واستوعب الي صار..
كل مااتذكر عيوني تنترس دموع.. كل هذا لان ذنبي حبيتك! تشوفني مو شريفه.. ياريت الله ياخذ عمري هل سوايه..
من كد الصدمه نسيت الاثر البرگبتي.. رفعت حجابي شفته بالمرايه ازرك..
عزه شلون اخفي.. وهدى يمنه..
وصلت للبيت.. سلمت ع هدى وامي..
كبل شكن بأمري.. تحججت بوداع صديقاتي وبجينه ..
امي:يا مامه كولي الحمد لله.. خلصتي بعد ماكو دراسه وان شاء الله تصيرين احسن محاميه..
دنكت وسكتت..
هدى:عادي كلنا هيج من نتخرج لازم نبجي شويه.. بس انتي شدعوه هيج مسويه بنفسج..
امي:روحي غسلي وتعالي تغدي راح اصبلج..
-لا مااريد.. بس اريد انام مااريد شي..
رحت للحمام غسلت .. باوعت ع رگبتي شلون راح اخفيهه شلون.. لفيت الخاولي ع ركبتي من طلعت وكبل للغرفه..قفلت الباب..
ذبيت نفسي بالفراش ودك بجي.. احس حتى دموعي من تطلع ماتكفي اطلع الوجع البداخلي.. كنت طايره فرح واكول اي يحبني..
تالي صدمني صدمه بحياتي ماصارت بيه هيج من يوم وفاة بابا..
بالليل طلعت من الغرفه.. هدى بعدها يمنه..
اني لافه ركبتي بشال حتى اضم المصيبه السواهه بيه..
كعدنه نسولف.. اسولف بس خاطري مكسور.. اصفن بوجه امي واكول لوتدرين شبيه يايمه.. لو تدرين شنو الصار بيه..
شويه واجه خالد اخذهه هي وابنهه..
دخلت غرفتي بعد ماطلعت منهه.. ثاني يوم اول ماكعدت نسيت ردت افتح الباب واطلع.. اتذكرت ملافه الشال.. خليته ع ركبتي وطلعت..
كعدت اتريك.. امي مكابلتني وتسولف ع اطفال خواتي.. اني بالي مو يمهه
بس اكول اي اي ومااعرف شنو الحجي بالضبط..
سكتت شويه رجعت كالت:ليش لافه شال.. شنو بردانه!
-هاا.. لا شويه بلاعيمي مأذيتني..
امي:لعد ماتحجين.. روحي جيبي دوه شي. هسه توكعين بالفراش .. اعرفج من تممرضين..
-لا ماكو داعي.. هو ادفي بلعومي ومااشرب اشياء بارده واطيب..
امي:ديري بالج ع نفسج.. هاي كله لان تنامين ع المكيف وراسج مبلل.. ماتجوزين من هل عادة..
سكتت..
خلتني وراحت تنظف.. اني رجعت للغرفه.. شغلت اللاب ع اغاني حزن..
اتذكر الصار البارحه ودموعي تصب..
هسه هو عايش مرتاح ورجع كمل يومه كأن ماصار شي.. واني الي انكسرت وتحطمت ..
مرت ايام..ع نفس حالي.. متحطمه تحطم.. الاثر خف هوايه.. وهمزين لحد اللحظه مااحد شافه..
خابرتني ساره.. كالت الاحد نتائجنا.. انقبض كلبي من سمعت.. اول شي اجه ابالي هو علي.. صار الاحد ورحت.. ماخايفه من نتيجة ولا من رسوب ولا من اي شي ثاني.. خايفه من علي.. مو من افعاله.. لا من نظرته .. شلون راح اشوفه ..
كعدت شويه اخذت نفس.. بعدين انصاح اسمي .. اخذت النتيجة.. باوعت طالعه اكمال..ماصدكت .. اني وقريت وجاوبت ادري بنفسي..
رجعت قريتهه مره لخ.. واكعه بالدولي .. اتعس وانحس ماده.. ماصدكت نفسي بيوم الخلصت من امتحانهه.. بقيت مثل الثوله لازمه الورقه بيدي ..
بهتت وراح حيلي ..
بالايام الي مااقره بيهه وأايس من النجاح اطلع ناحجة.. وبالايام القريت واعرف نفسي محاوبه رسبت! ليش .. شهل حظ..
صديقاتي نجحن.. بس اني مصيفه.. سلمت عليهن وطلعت..
حارة واني منا روحي طلعت ووصلت حدهه..
صعدت السياره..بطريقي للبيت.. مااسمع بس سياره خبصتني خبص بالهورنات.. باوعت هذا علي.. معقوله؟ شجابه.. ظل ورايه يمشي.
ايباه ذاك اليوم انت تمشي وتجرجر بيه.. هسه شجابك ورايه..
كملت طريقي للبيت.. سويت نفسي مااشوفه وممهتمه.. هو بقى ورايه لحد ماشافني دخلت البيت..
كلبي انشلع ع ما وصلت البيت.. الف فكرة اجت براسي.. شجابه وشيريد وليش يدك دك هورنات..
طلعت النتيجة مالتي وانطيتها لامي.. باوعت بصدمه ع الدرجات..
رجعت طبطبت ع كتفي كالت ميخالف مامه.. اقري وتنجحين..
الدمعه بطرف عيني كلش.. اخذت الورقه من امي وباوعت بيهه..
اول مره انتبه عندي امتياز.. بيمن .. بالبحث.. يعني علي مخليلي امتياز!
اول مره بحياتي من دخلت الجامعه اعرف شنو امتتياز..
دخلت الغرفه واباوع ع الامتياز واشبع بجي.. شنو انت ياعلي شنو..
ليش امتياز وليش تكلي مو شريفه..
احس راسي انفخ من كد البجي.. اخر شي خليت ونمت..
كعدت العصر مكسر جسمي.. وراسي مااكدر اشيله وحتى بلاعيمي مطبكه من كد البجي.. بقيت بالفراش مالي خلك اي شي..
ايام مرت واني مابيه حيل شي.. لاقريت ولاطلعت لمكان ولا حتى اتهنيت بشي من العطله..
طبعا خواتي كلش متنرفزات مني. حسن اكو شي ضامته.. والي نرفزهن اكثر هو اصراري انه ماكو شي..
هدى اجت بيوم فاتحتني .. كالت وليد رايدج وحاجي لامه عليج...
وانتي شوفي نفسج .. بس اني انصح تقبلين بي تغيرين نفسيتج ووضعج
-لا.. مستحيل اتزوج هسه..
هدى:ليش؟ بعدج عايشه وي الاوهام!
-لا.. بس اني هيج مااريد..
هدى:لج وليد ميتفوت والله.. حتى كلمته هو المسموعه يم عمي وخالتي..
كريم وجيبه مو اله.. لج ويحبج موت شتردين بعد!
-مااكدر.. موبيدي مدااقتنع هدى!
هدى:ماشي.. انطيج فرصه فكري ورجعيلي جواب..
-ع الاقل خل امتحن وبعدين انطيني فرصه! شجاكم عليه؟
هدى:شبيج حبيبتي.. ترا مدااجبرج والله.. وكلنا مانقبل اذا انتي ممقتنعه.. بس لاتتوترين وفكري ع كيفج.
هزيت راسي بأي.. صفنت ع الكاشي.. شلون اكدر انساه.. لو بس اعرف شلون اطلع من بالي..كل السواه بيه وبعده گلبي ميت بي..
مرت ايام. رجعت ادرس.. الناس تنجح تشوف مستقبلها اني رجعت ادرس..
كل واهس وخلك ماكو.. فكرة الزواج ابد مافكرت بيهه..
هواي حنيت.. ياعلي هواي حنيت..
صرت احسب العطله يوم يوم تخلص ويصير وقت الامتحان.. عسى ولعل اشوفه لاخر مره.. عرفت يوم امتحاني.. استعديت ع هل اساس..
رحت امتحن.. اول بدايه شغلت نفسي بالدراسه والمراجعه السريعه قبل الامتحان.. دخلت الامتحان وكملت .. مجاوبة.. بس همين خايفه لا اطلع واكعه بي.. لان سبق وكنت متأكدة من نفسي زينه بس وكعت..
الكلية اعداد قليله كلش. كنت ماله من روحي.. باوعت ع الكليه..
يمكن هذا اخر يوم هنا.. مشيت بالكليه.. الممرات.. القاعات..
السنتر.. النادي.. هنا مشيت.. هنا وكفت وسولفت.. هنا ضحكنه.. هنا شفت علي.. منا طلعت دموعي تارسه عيني.. منا اجي الصبح طالعه روحي من الدوام كنت.. وبيوم وليله صرت احب الكليه لان علي بيهه..
احس گلبي انقبض وثگل صار ع صدري من اشوف الكليه فارغه واذكر اني بعد مااشوفهه.. والاخص مااشوف علي..
اختنكت كلش ردت ابجي اله شوي.. صاح عليه واحد من الامنيه.. يبنيه اطلعي اكو طلاب بعدهه تمتحن.
خليت وطلعت.. وين اروح.. ياريت اموت وهنا يدفنوني حتى كل ما يمر علي احس بي.. التفتت شفته ورايه.. ماصدكت.. وكفت بمكاني وانداريت عليه.. اي هو علي.. خطف من يمي كأنه ميشوفني..
نسيت؟ لو متريد تلوث نفسك بيه؟ لان اني مو شريفه..
دنكت ومشيت للكراج.. شغلت السياره وطلعت.. ميته قهر وهم وضيم..
الي يشوفني يكول مرتاحه ..شنو عدها.. اهلها مدلليها وسياره ولبس وتطلع ع كيفها.. بس بداخلي اشتعل واطفى.. نار الحب والفراگ تسعر بيه سعر..
ومو بس هيج.. اغار علي .. اغار من زوجته.. اتحسدها ومرات حتى ادعي عليهم ينفصلون.. حتى لو مايتزوجني المهم يعوفهه..
اني بشر.. والي يكون بمكاني هم راح يسوي نفس الشي.. مو كلنا ملائكة.. والي يكول انانيه وحقيره وو.. اي وياك الحق.. بس موبيدي..
مرت ايام.. حال الضيم حالي.. والقهر بگلبي لااكدر احجي ولااكدر اتحمل اكثر... اكثر من مره احجي ويه امي بنتر.. واحنا مامتعودين هيج..
اتندم وارجع اعتذر منهه.. بس كل تصرفاتي كانت موبيدي.. احس شي واكف ع راسي ويكلي سوي هيج ولاتسوين هيج وماعندي غير الخضوع..
وبيوم تجمعن خواتي يمنه.. مثل كل جمعه متعودات يجن..
صارت سوالف وضحك.. بين ماناكل..
كنت ممركزه وحتى مالي خلك اضحك ولااجامل..سرحانه وافكر اكول هسه ديتغده ومرته يمه ويتغزل بيهه.. صرت اتخيله حتى شلون كاعد.. صوته وعيونه..
امي بصفي كاعده واني اكل.. كالت:كومي جيبي خبز مامه..
عطت بدون قصد.. من انقطع فكري بعلي تهسترت:ايييييه كل شوي كومي كومي! مااكوم..
كان صوت هوسه.. وفجأة انكطع الصوت.. اخواتي كلهن يباوعن بوجهي.
نورس:شبيج! وجع! تعيطين بوجه مامه! كومي منا كومي!
عاطت بيه.. نورس ماتتجادل.. ومن نوع متسلطه شويه.. ماعدهه شقه ولا لعب.. حياتهه كلهه جد بجد.. كمت.. اصلا شيكعدني بعد يمهه وشيخلصني..
دخلت الغرفه.. باوعت ع نفسي بالمرايه اني شدااسوي.. شسويت بحالي.. ليش ياربي ليش.. انفجرت ابجي .. تخبلت فد مره.. صرت ادك ع نفسي..
جبت راسي وضربت الكنتور اكثر من مره..
دخلت هدى وشهذى عليه.. اني فاقده ماادري بنفسي شسوي.. احس نفسي ضايعه ومداطلع من ضياعي..
هدى اجت تريد تكومني:لج كافي شدسوين بنفسج! تخبلتي؟
شذى اقتربت همين تريد تشيلني.. دفعتهن عني.. عطت بيهن:عوفني! وخرو مني لااحرك نفسي هسه!
شذى:منوش.. ع كيفج حبيبتي .. لاتهتمين يعني انتي ماتعرفين نورس؟
دكيت ع رجليه حيل.. وعطت صوتي مبحوح والخنگه بنص صدري: مو من نورس.. مو منها! من حظي ..
بقيت ادك واكرر من حظي..
اجن اثنينهن حضنني كل وحده من جهه.. امي همين ونورس اجن للغرفه..
امي:يمه؟ شبيهه ولجن! شصار؟
هدى:مابيهه شي مامه.. عوفيهه ترتاح شويه..
امي:ولج شلون اعوفهه! اختج شبيهه!
اباوع لامي انخطف لونهه وعيونهه رادت تطلع.. اني اشهك وابجي..
خلني ع جرباتي.. دنكت وبقيت اجر حسرات..
مااعرف شنو الصار وخلاني هيج انهار.. عبالك گلبي وعقلي منتظر احد يندحك بيه وانفجر..
اسمع الباب انسد.. شلت راسي شفت بس هدى باقيه يمي..
كعدت بصفي وتعدل بشعري:شبيج حبيبتي؟
حضنتهه وصرخت:راح اموت.. هدى راح اموت..
شدت عليه:اسم الله! لج شبيج احجي؟
بديت اخربط.. اذكر كلت اسم علي اكثر من مره واني ابجي.. بس مااذكر شحجيت بالضبط..
بعدتني عنهه وباوعت بوجهي حيل:منو هذا؟ ومن شوكت هل حجي..
-استاذ علي تذكري؟
هدى:صدك تحجين؟ تخبلتي شنو؟ اصحي ع نفسج اصحي!
دنكت ابجي:كافي لاتصيرين انتي همين عليه!
هدى:لج بابا دتكولين متزوج ومو بحالج ودازه هديه ومعترفتله ورافضج اكثر من مره! اني وين من هذا كله! ليش ماحجيتي ! انتي صاحيه من سويتي سوايتج!
-اش فدوه لا تصيحين وتخلين نورس تعرف..
هدى:يعني تخافين من نورس .. لج انتي شنو؟
-موبيدي هدى.. انتي مو حبيتي؟ مو تعرفين شنو حب! لاتلوميني!
هدى عاطت بيه:من حبيت مارحت ع متزوج! ولا رفضني! هو الي اجاني برجليه! لج هسه شيكول عنج يااغبيه! غبيه!
ماكو شي بعد ينضم اكثر كلتها الها:كال عني مو شريفه..
غمتني بأيدهه..:شفتي! امداج..! تسكتين ومااريد امي تعرف! اذا عرفت تنجلط من وره سوالفج..
كامت من يمي.. باوعت بالغرفه..
هدى:وين سويج السياره.. جيبي..
طلعته الهه من الجنطه ونطيتهيا..
هدى:بعد ماكو سياره ولا طلعه بكيفج.. تخابرين عليه اني اجيج.. افتهمتي؟
هزيت راسي بأي..
طلعت واني رجعت دفنت راسي بالفراش وابجي.. فقدت واني ابجي ..
لحد ماغفيت.. كعدت مالي وجه اطلع من الغرفه.. مااعرف اخواتي راحن لو بعدهن.. ومااريد اطلع وتشوفني امي وهمين ترجع تسأل..
بقيت بالفراش اتكلب.. ساعه وساعتين وتلاثه..
اجتني امي.. كعدت يم راسي.. مسحت ع وجهي وكالت:يمه ينيتي.. شظفه من الگمر.. شبيهه منو وياهه..
قربت راسي ع رجلها وباوعت بوجهه:محد ويايه.. اني هيج تخبلت وحدي..
امي:لاتزعلين من خواتج.. هن يردن مصلحتج ويعلمنج..
-لا مامه مازعلانه..
امي:اذا ع نورس اني اخليهه تصالحج.. والسياره اجيبلج بدالهه احدث واحسن.. هي مو كلتي موزينه صايره تعتعت؟!
-اي .. ما محتاجتهه.. وهدى كالت اني اجيج من تردين اطلعين..
امي:خوش.. كلش زين.. دكومي غسلي وتعاي نسويلنه لكمه اني وياج..
-اي..
طلعت من الغرفه.. اخذت ملابسي ورحت للحمام.. سبحت وطلعت لماما..
لكيتهه بالمطبخ مسويه كباب ودتثرم زلاطه.. اخذتهه منهه وكملتهه عنهه..
كعدنه تعشينه اني وياهه.. شكد حلوه كعدتهه وحجايتهه.. ياريتني التهيت ويه مامه احسن ماالتهي افكر بشي مستحيل يصير..
كملنه العشه.. نظفنه المطبخ ورحنه للصاله.. سهرت ويايه خطيه..
هي بطبعهه تنام من وقت بس علمودي بقت .. يمكن تشوف نفسهه مقصره ويايه وتريد تعوضني.. هيج حسيت..
بيومهه ماردت افارك امي.. رحت وياهه ونمت بحضنهه.. اريد ارجع طفله لا هم ولاغم.. اريد بابا يمي.. اريد نرجع اني وخواتي بهذا البيت وع نفس لمتنه.. مااريد ابقى وحيده.. الليل كله هيج افكر.. نفس الفكره وتنعاد..
يمكن تخبلت.. يله ميخالف احسن ع الاقل محد يحاسبني ع افعالي..
ومرت ايام.. وصار وقت اروح استلم النتيجة..
ماعندي سياره ومااريد اخابر هدى هي تجي.. لان اكيد راح تبقى رجلهه ع رجلي متعوفني.. فكلت لمامه.. ولان هي متدري بشي سمحتلي اروح باصات.. صح مسافه طويله.. بس مااكدر اخذ تكسي وحدي..
تلث ارباع روحتي علمود اشوفه.. اي مانسيت.. مو بسرعه انسى ولا بسرعه اتخلى عن شي اريده..
روح الحماس ارتفعت عندي كلش.. شوق وحنين للماضي.. حتى لو انعاد الماضي همين راح احبه.. وهمين اسوي نفس الشي..
وصلت ع الكليه.. اخذت النتيجة.. اوووه واخيرا ناجحه.. هسه صار وقت اشوفه.. رحت ادور علي.. مالكيته.. سألت الامنيه كالو ماجاي اليوم..
اوف منك ياحظي.. يله مو مشكله.. اريده وع كد محبتي اله اريد يجمعني بي بأقرب وقت.. رجعت للبيت..
فرحت امي ع نجاحي.. واني بالي مو يم النجاح.. كنت اتمناه بس من صار صدك راحت فرحتي بي.. المهم شلون احصل علي.. شلون اخلي يحبني ويجي يتقدملي..
صفنت ع تلفوني بيدي.. اني ليش مادبرت رقمه كل هاي المده؟
بس لا بالبدايه ماكنت هيج.. كنت اخاف اتصل وتعرف مرته وتسويلي مشكله.. هسه لا طبها وجع حتى اذا عرفت.. واني اريدهه تعرف حتى تصير مشاكل بينهم..
امي خابرت خواتي ع نجاحي.. بس طبعا هدى تخبلت من عرفت اني رايحه وحدي.. بقت ساعه تلاسن ويه امي وتكلها ليش خليتيها .. امي بالهه طويل وابد ماتشكك بينا.. فبقت تساير بهدى..
ومرت ايام .. اشتغل ع مخططي.. احصل رقم علي.. اريد اعرف وقت نومته كعدته اكله شربه. حتى لو بس اتصل واسمع صوته..
يتبع...
