#مابعد_الخطيئة
الحادي عشر
Nada hs
adaena7 واتباد
بالرجعةمرات ارجع وحدي.. هدى مرات ماتمرلي .. وصلت البيت شفت سيارة خالد يمنا.. عجيب.. اذا هم يمنا شعجب مااحد اجاني..
وصلت للبيت نورس وهدى بالمطبخ.. سلمت محد ردت عليه..
رادن ياكلني بعيونهن.. انغز كلبي.. حسيت اكو شي مو خاليه هل نظرات..
دخلت الصاله سلمت ع امي وخالد همين موجود..
حتى خالد من شافني بقه يباوعلي بنظره حايره..
هنا تأكدت اكو شي صاير.. دخلت ابدل.. بعدني ممكمله وفاتن عليه هدى ونورس.. صفنت بيهن.. وحده تباوع للخ ويرجعن يباوعلي..
كملت لبس..
-ها؟ شكو؟
مااحس اله نورس ركعتني راشدي.. كل جسمي كب نار..
نورس:ولج اليوم اشرب من دمج وماارتاح!
-شكووو؟
هدى:اكلي خرا وتسألين شكو؟
رجعت نورس لزمتني من شعري وباوعت بعيوني حيل:رجليج اكسرهن بدع اذا طلعتي من هذا الباب..
هدى تبحوش بجنطتي.. اشوفهه طلعت تلفوني.. اصلا هو بدون خط وهيج اخذته ويايه..
هدى:ليش مابي شبكة.. هااا؟ مطلعه الخط؟ وينه جيبي!
صبت بدموعي:كسرته..
نورس:وينه داتكلج احجييييي!
صار عالي صوت نورس.. خايفه لا امي تسمع..
-كسرته! دااكلج كسرته!
رجعت ركعتني راشدي ثاني.. بقت تضرب بيه.. حتى شعري ملخته.. مادفعت ولا قاومت.. بس بجيت حيل.. هذا الي استاهله من زمان..
عصبت كلش عليه.. وصارت تضرب بدون وعي.. فشرت عليه وغلط..
حجت عن زوجة علي شلون رايحه لهدى ومشتكيه يمهه مني.. حاجيه كل شي.. كل الي تعرفه حاجيته..
ماكنت احس بضرباتهه.. كنت بس مركزه شتحجي وهي تضرب وابجي..
نورس:اخخخ لج اليوم اموتج والله! انتي وحده ادبسز ونكسه! صوج امي انطتج مجال.. تجي المريه تعيرنا بيج! ولج شبيج ماعندج عقل! نوب تفوتي للغرفه! يابويه اليوم املخها والله..
هدى:كافي نورس..
امي فتحت الباب ودخلت مرعوبه:شكو.. يمه! شجاجن! ولج نورس يمه؟!
تقربت تريد توخرها مني.. مكدرت.. نورس ضخمه وطويله..
نورس فقدت كلش..:بنتج مصادقه متزوج! ومو بس مصادقه! حتى نايم وياهه! راحت كبال امي وعوزها بس ماتطلم تعيط وتصيح :نايم وياهه يمه! نام بنص بيتج وانتي ماتدرين!
هدى ركضت ع نورس تريد تسكتها مكدرت. نورس وفقدت بعد..
خالد:ع كيفكم شلقصه! صوتكم وصل للشارع.. كل شي بتفاهم...
يحجي ويباوعلي واني بالكاع كفشتي منثوره ودموعي تصب..
امي ضربت ع صدرهه.. :جذابه؟ منو الكالج؟! ولج نورس شتحجين ؟!
نورس حيل مركزه بعيون امي وتحجي بصوت عالي:ايي مرته اجت تشتكي! يجي هنا ابيتج ويدخل وانتي ماتدرين! كليلي هاي شسوي بيهه؟ احجيلي وين اطم هذا العار!
هدى:نورس!!! كافي لخاطر امي!
امي تباوعلي.. وجهه قطره دم مابقى بي.. من شفتهه هيج متت قهر عليها.. اتمنى تجي وتضربني تعيط عليه.. بس ماكو لحظات وغمضت عينهه ورادت توكع.. لزموهه هدى ونورس وخالد..
طلعوهه من غرفتي للصاله.. طلعت وراهم.. خلوهه ع التخم..
هدى ركضت جابت مي.. اني مخليه ايدي ع صدري وابجي..
التفتت نورس صدفه.. شافتني كبل عاطت بيه.. روحي مناااا!
خالد اشرلي اروح.. مكدرت.. هاي امي.. والي صار بيهه من ورايه..
خالد:ناخذهه للمستشفى؟
هدى:خل نصحيها اول..
رحت ادنيت يم باب غرفتي.. اباوع وميته من الخوف.. كوه واكفه ع طولي.. مااشوف من امي شي.. كلهم محوطيها.. اسمع امي شهكت..
روحي رادت تطلع.. صحت امي كوه..
كعدوهه ع حيلهه .. بقت تباوعلي وتبجي.. دارت وجهه مني..
احس خلص الدنيا انتهت بالنسبه الي..دخلت الغرفه.. اباوع ع روحي بالمرايه.. صدك مثل ماكالو.. اني نكسه.. اشتهيت أأذي نفسي بكل صوره.. جبت ايدي وضربتهه بالمرايه.. تفلشت وايدي تجرحت..
فقدت كلش.. ابجي بصوت عالي مثل الي ميت اله احد..
لزمت باب الكنتور فلشت راسي بي.. كل شي صار كبالي ضربت نفسي بي.. لحد ماوكعت من طولي.. وماارتاحيت رجعت ادك ع وجهي وع رجليه.. ااااااه.. صوتي صار مشرح من كد البجي..
ياريت لو ارتاح.. ياريت لو الله ياخذ عمري.. ياريت ماصرت لهاي الدنيا..
ياريت ما درست ولا دخلت جامعه ولا شفتك يا علي.. خلص ادمرت..
ماظل بيه شي .. اسم جسم بدون روح..
قرفصت بالكاع وبقيت ابجي.. لحد مافقدت وعيي ونمت..
كعدت كل مكان يوجعني... ايدي الدم يابس عليهه وحتى كزاز باقي ..
مااريد اطلع من الغرفه .. اسمع اصواتهم يحجون ويه امي وارتاح هي بخير.. بقيت لليل بالغرفه.. كل مااتذكر ابجي .. حتى دموعي خلصت.. ابجي بس ونين.. مو بيدي كل هذا مو بيدي.. مرض ودخل بيه مايطلع ابد.. واني بهذا حالي اشتاقله واريده..
دخلت هدى عليه اشرتلي انطيني:جيبي السيم كارت..
-كسرته اكلج.. كسرته والله كسرته.. ركضت ع السله مال زباله بغرفتي.. كلبتهه بنص الغرفه وطلعت السيم وانطيته الها..
هدى:ليش كسرتي؟
-عفته ارتاحو.. مااريده بعد ..
هدى:مااصدك بيج .. شوفي خالد عرف بكل شي.. وليد وطار.. وعلي ومايكلب وحده انطته جسمهه! راح تبقين طول عمرج ذليله! وكله من ايدج ولا تلومين احد..
دنكت وسكتت..
عافتني وطلعت.. بقيت الوب واني بالغرفه.. ايدي احسها صارت نار من الصخونه البيها.. والدم يابس عليهه.. طلعت من الغرفه.. نورس تفتر بالمطبخ.. هدى ماكو يمكن راحت.. دخلت الحمام غسلت ايدي..
المي يجري ع ايدي واباوع صفنت صفنه وبيهه الف غصه..
ليش سوتهه وراحت لهدى.. ليش حجت.. وعلي وينك من هذا كله.. ليش ماسألت ولا كلفت نفسك..
طلعت من الحمام كب للغرفة.. مكلوبه كلاب.. اوراق وكواغد مطشره من الزباله المرايه مفلشه..
دخلت نورس ورايه:اطلعي من الغرفه.. يله يله..
بعد مالج كعده وحدج.. متنعافين ابد.. فراشج ونومتج بغرفه امي.. اني باقيه هنا واريد اشوف شتسوين..
رحت لغرفه امي.. كانت امي كاعده ع الكرسي من شافتني برطمت وخلت وطلعت.. رحت نمت بفراشهه.. غفيت شويه ومااحس اله واحد يعت بيه عت
هدى وشذى ونورس كبالي.. واسمع صوت خالد بالصاله
شذى اول مابلشت تفلت بوجهي.. واشتغلت غلط ورزايل..
نورس:اوكفن خل نفتهم.. كعدت كبالي.. كالت:احجيلي بالتفصيل.. وين شفتي وشوكت بده يجيج وشسويتي ويا..
هدى:حجتلي قبل .. بس ماعبالي هيج راح تصخم وجوهنه..
التفتت ع هدى وكالت:هو مااحد طلع عينهه غيرج انتي وامي!
شذى:كوليلي هسه انت بنيه لو لا؟!!!
-اي.. ماصار شي..
نورس عاطت وهي تخزرني:لعد شلون مرته هيج تكول! من جان يجي شتسوين احجييي!
كمت اشهك وابجي.. حجيت شلون كان يجي.. وشلون ادخله للغرفه.. وشنو الي يصير بينا.. هواتي تلاثتهن ع راسي.. واني كوه احجي..
كملت كبل اجتني شذى كفختني ع راسي..
شذى:تدرن اذا قاسم(زوج شذى) عرف شيسوي! ضربت ع رجلهه وكالت:يطلكنييي! وبسبب منو؟ بسبب هاي الحيوانه!
هدى:اسكتي خالد عرف وميته قهر وفشلة منه..
نورس:ههه اني اذا عرف هو يجي يذبحهه بيده ويطم عارهه..
هدى:بس اوكفي داتكلج هي بعدها بنيه.. لا تستعجلين وتحجيله..
بلكت يتقدم الها احد ونخلص..
نورس:وليد مابي مجال؟
هدى:هو يكيف بس خالد مستحيل يقبل بعد..
شذى:لو اعمى لو اعور هم خل تتزوج.. ماصارت هاي!
هدى:هو وين منو جايهه..
-مااتزوج .. موتوني ولا اتزوج غير علي..
كلهن عاطن بيه فد عيطه وهجمن عليه.. حتى مااعرف شنو يحجن بالضبط .. صار الضرب ماله والي عليه.. خالد ادخل وخلصني منهن.. عافني ورا ظهره وكال:ع كيفكم! كل شوية كابين! امكم ارحمو بيهه!
اباوع لامي مدنكه وكاعده بالصاله..
بنص هاي الهوسه تمنيت اطلع منهم بدون رجعه.. بقن يلاسنن ويتعاركن من ورايه..كعدت ع صفحة وصافنه ع حالي..
وره ساعات خواتي راحن.. بقت بس هدى وخالد يمنا.. متحاجيني ولا تباوع بوجهي.. خالد راح جاب عشا .. اجاني هو لغرفة امي جابلي عشه.. مكدرت اكل.. الهبطات الصارت بيه سدت نفسي من كل شي..
بقو كاعدين لوقت متأخر.. اني تعبانه من كد البجي والعياط والكتل..
نمت.. كعدت الصبح امي باقيه بالصاله نايمه ع تخم.. هدى وزوجهه وابنهه بغرفتي .. غسلت وبقيت انتظر شوكت يكعدون هدى وخالد.. اريد اخذ ملابس علمود ابدل اروح لدوامي.. كعدت هدى..
هدى:هاا؟ شناويه علينا هل مره..
-اريد ملابس الدوام مالتي..
هدى:ارتاحي بعد ماكو دوام.. عوفيهه للوظيفه مو الج حطوهه.. حطوهه للاوادم..
-عندي دوااام!
هدى:واني وشذى ونورس اتفقنا بعد مااداومين!
-ليش؟ بس انتي مسموح لج واني لا؟ مسموح الج تحبين وتزوجين التحبي واني لا؟
خزرتني وكالت:حبيت بس ماسويت سواياتج! كله تدرون بي! انتي وامي ماضميت عليكم!
دنكت.. رجعت للغرفه.. ميته قهر .. شلون اكدر اعيش هيج.. ع الاقل اذا طلعت للوظيفه ارتاح واغير جو وانسى يجوز! بس ماديسمحولي..
كعدت ضمدت ايدي.. مطلعه دم وجراحه.. والشك الي صاير من فوك ايدي مفتوح ومبين شي ابيض.. يمكن عضم ويمكن طبقه جلد.. كوه استحملت من عقمتهه.. لفيتهه.. رجعت نمت مااريد اكعد.. ومااريد اتذكر الصار..
خل انام بلكت مااكعد..
ومرت ايام.. ع نفس الحال.. منبوذه ومحد بحالي.. وظيفه عفتها.. مراقبه عليه حتى من انام افز ع صوت فتح الباب .. يتأكدون ماعندي شي يله يطلعون.. هدى استقرت يمنا وبغرفتي.. نورس ماعافتنا ابد.. كل يومين تلاثه تجي وتخلص يوم بطوله يمنا.. ومن تجي ماتخلي حجايه ماتعيرني بيهه..
تعودت ع حجيهن.. اصلا ضكت الاصعب من هذا كله.. ضكت لوعه فراك علي.. ضكت النبذ من علي قبل.. ضكت التهديد والخوف من انكشف.. وصارت وانكشفت وانتهينا..
امي ابد متحاجيني.. وكل مالكاهه تبجي وصافنه.. ازواج شذى ونورس ماعرفو.. بس خالد يعرف بكل شي.. ومااعرف ليش حته حجتله هدى؟
يمكن صارت كباله السالفه ويمكن هي حجت..
ساعات تخلص من عمري.. لا اني استفاديت ولا فدت غيري بهل عمر الاكشر.. عايشه مضره مو نفع..
بالليل.. ماكو غصه ماتسكن بنص كلبي.. حتى البجي ميفيد يطلعها.. الندم اخ الندم ورثت روحي من ورا.. مو ندم لان حبيته..لا لان سلمته نفسي وخليته يتماده وياي.. واني كنت اعرف بي هو مو الي.. وكنت اعرف راح يجي هذا اليوم .. بس ماكدرت ع نفسي.. يكولون امارة بالسوء.. واني مو بس سوء.. لكل درب اعوج نفسي أمرتني..
ومرت ايام.. محد يحس بيه.. بنظرهم اني اذنبت وبلا احساس وممهتمه.. واني البروحي يفلش جبال..
انقطعت عن الدنيا فد مره.. كلمن عايش حياته.. خواتي.. الاقارب الناس.. كلهه اله اني.. وصلت نقطه بعد مااكدر اسوي اي شي.. وجودي بالدنيا هو بس اتنفس واتحرك واكل واشرب..
هدى طلعت حامل.. وطبعا بقت يمنا.. زوجهه مرات يبات يمنا ومرات يروح لاهله.. هو كلش متذمر من كعدتهم ويانه.. نورس هم وره فتره طلعت حامل.. شذى بقت ع اطفالهه الاثنين..
اسمع من يحجن سوه.. لان اصلا محد يحاجيني.. حتى امي شكد توددت الها.. بس ماسامحتني ابد.. اكثر من مره انزل ع راسهه ابوسه واديها وحتى رجليها بس تدفعني ومتباوع بوجهي اصلا.. صارت امي مكسورة مو مثل كبل من تسولف كل حجيها عبر ومواعظ.. صارت دوم تبجي وضعفت حيل.. يوميه ضغطهه مرتفع.. يوميه وجهه يشحب اكثر..والتعب بين عليها كلش.. لحد ما بيوم عود دخلت تسبح.. الصبح..طولت .. ساعه كامله وماطلعت..
دكيت الباب اصيح يمه مامه ماكو رد..صوت المي يجري..
دفعت الباب.. لكيتهه امدده وواكعه.. احس رجليه ماعاد تشيلني .. بس مو وقت اضعف.. كبل اخذت ثوبهه لبستهه وطلعتهه من الحمام جر..
شويه هي ثكيله مااكدر وحدي .. ابجي واجر بيهه كوه..
يمه اصحي.. مامه دخيلج..
لزمت النبض.. كلش ضعيف.. دكه اكو ودكات لا.. حتى تلفون ماكو بالبيت..
سحبو حتى تلفون امي من عرفو بسالفتي.. كبل طلعت للجيران.. فلشت الباب واصيح الحكولي امي.. طلع جيرانا ابو طه..
ركض يكلي عمو شكو شبيكم.. اني ماادري شحجي .. بس اكول امي امي واشر ع باب بيتنا.. كال دقايق بس اشغل السياره..
دخلت بيتنا.. اجت ام طه ورايه.. شافت امي منتهيه كبل انخطف لونهه..
قربت يمهه وخلت راسهه ع صدر امي.. محجت شي.. اني ارجف وواكفه ع صفحه.. كالت يله ساعديني نشيلها..
مكدرنا.. اجه ابو طه ساعدنه.. لفيت امي بعبايتهه واخذناهه.. مخليتهه بحضني واعيط وج يمه اكعدي.. اضرب خفيف ع وجهه.. ماادري بنفسي لزمت ايدي ام طه وكالت ع كيفج هسه نوصل ومابيهه شي ان شاء الله..
من شفت وجهه..شلون صوفرت وثلجت اطرافهه اتذكرت ابويه من مات ورحت علي اركض لزمت ايده همين ثلج.. متت خوف.. ماانحسد واني مخليه امي بحظني واعيط وماادري اذا عايشه لولا..
اتلمس النبض كلش خفيف..
وصلنا كبل خلوهه بسديه وع الطوارئ.. اجو الاطباء وممرضين..
فحصوهه.. كالو البقيه بحياتكم.. انطتكم عمرهه..
مستوعبت شيكولون.. ارجع عليه واكله شنو؟ ليش هيج تكول؟
اني اسف بس الحجية متوفيه..
عطت بي اكله ارجع افحصهه.. بيهه نبض.. بيهه روح.. امي ماماتت..
ام طه تجر بيه بس تريد اطلعني.. واني بس اريد احضن امي واشوفهه زين..
فلتت نفسي منها كوه.. شمرت روحي ع صدرهه.. اباوع وجهه ابيض صار كطن.. مغمضه عيونهه ومابيهه لا نفس ولا نبض.. اديها خشبه ..تخبلت الزم ايدها نوب ارجع اخلي راسي ع صدرها اريد اسمع..تأكدت كلام الممرض صحيح.. انمردت مرد.. عبالك مو كافي كل المريت بي. اجاني وجع اكبر بقاطات..
فزيت من مكاني بلا وعي ادك ع راسي وكل الاشوفه اكله امي ماتت.. امي ماتت.. مادري شلون خواتي اجن.. ومادري منو الي كال الهن ..
ازواجهن وياهن.. انكلبت المستشفى مناحه.. كل وحده بصفحه وتبجي..
ام طه ماعافتني.. لازمتني كل قوتهه.. تريد تخنكني اله شوي..
بقو ازاوج خواتي هم متكفلين بالوضع.. واحنا رجعونه ع البيت بسياره خالد.. بالسياره ونورس هجمت عليه تريد تكتلني وتكلي امي من وراج ماتت.. اسمعهه واحس نار تكب بصدري.. صدك اني الموتتها..
اني المرضتها.. اخخ لو الله ماخذني بدالهه..
كوه لزمتهه شذى.. تبجي وتكلها كافي فضايح رحمة لالله!
وصلنا ع البيت.. نورس كابلتني ودكت دك مصاير.. كطعت نفسهه..
تلطم وتكلي من وراج.. من سوالفج.. كبالتهه وملخت نفسي همين.. اصرخ واكلها الله ياخذ روحي الله يموتني وارتاح..
من بدت النسوان تفوت علينا هدى وشذى اخذن نورس كوه من كبالي.. كعدنها وبقن سوا تلاثتهن يلطمن.. بس اني انعزلت.. كاعده ع صفحة واملخ بنفسي..
اباوع للبيت انملى نسوان.. وقبل ساعات امي كانت تفتر هنا.. حضرت ثوبهه والخاولي ودخلت الحمام كل شي مابيهه.. بس بعد ماطلعت سالمه..
ليش يمه رحتي وانتي ماراضيه عليه.. ليش تموتين وانتي مامسامحتني..
اتذكر من كانت تبعدني عنها.. اختنك بالبجي..
واتذكر قبل شلون كنت مدللة ومحد يوصلني .. من تجي وتحجي وتسولف ويايه عبالك صديقه مو ام..
اني الموتتها.. اني القضيت ع عمرها.. صدك تمنيت الموت .. بس وينه؟ مااجه؟ راح ع امي واخذ روحها..
اجت خالتي ونسوان خوالي.. اقاربنا.. كلها متعجبه ليش امي ماتت بهل سرعه وهي ماعدهه شي بس الضغط ومن زمان هو بيها..
اثاري وجعة امي كلش كبيره ومحد عرفهه.. وجعتهه اني جبتها الها واني الربيتهه بنص گلبهه.. اتذكر من خليت راسي ع صدرها بالمستشفى..
ماكو ولا صوت ولا دكة.. وجهه الابيض صار نور..اديها الثلجت..
عسى گبرج نور مثل وجهج..
يتبع..
