#مابعد_الخطيئة
الجزء الخامس
Nada hs
adaena7 واتباد
باوعت .. اجت عيني ع الهديه بعلاكتهه.. مخليهه ع الميز..
كام من مكانه.. صار كبالي.. احس الهوى انكطع من هو كبالي.. اتمنى اغمض عيني والكه نفسي بين ادي..
خله اديه بجيابه وكال بأستهزاء:شنو هل حركات الي دتسويهه؟! وين عايشه انتي؟
دنكت.. احس الدم كله تجمع بوجهي وراسي.. حته احس بنبض قوي براسي..
علي:احجي! شدتسوين انتي؟ وين تردين توصلين بالضبط؟
استاذ..
علي:شوفي.. هل حركات مو عليه.. انتي لو دازج احد توكعيني لو تردين اسئله ودرجات براسي.. حالج حال الي اجن قبلج..
رفعت راسي بصدمه:بس اني احبك!
علي:حبج ربج.. اني هم احبكم بنتي..
عطت ع كيف:لا تعاملني هيج! اني مو بنتك! اني احبك احبك سمعت!
علي:بابا بعدج عقلج صغير.. انضجي واعرفي شنو تحجين.. خوش بنتي؟
تقربت منه خطوات:شوف مو ع كيفك.. اني احبك.. واني مو بنتك! وراح تحبني غصبا عنك!
علي:ههههههههههههههه! لج بابا اني متزوج! واحب زوجتي وماابدلهه بوحده مثلج..
كلش انجرحت من حجايته.. وممتوقعتهه.. بجيت وكلت:مثلي؟ ليش هي تحبك مثلي؟ هي تستاهلك بكد مااني استاهلك؟ هي تسهر لان تحبك؟ هي تعرف شنو قيمتك ؟ ياريتها مثلي وياريت الله يضوكهه مثل عذاب كلبي..
علي:كافي.. امسحي دموعج واطلعي منا.. مامستعد اسمع شي منج..
-راح تسمعني! وراح تحبني غصبا عليك ! سمعت! راح تحبني!
طلعت وركعت الباب حيل.. كبل رحت للحمامات.. ماكو احد ماانتبه ع دموعي.. نوب اريد اسكت ماكو.. كلماته مثل السجين انغرزت بيه..
مكياجي كله خرب.. ويومي وحياتي كلهه خربت من وره علي..
طلعت للبيت بعد مااتحمل اكثر..
دخلت الغرفه ودك بجي.. امي تحاجيني اكلهه موزينه بالامتحان.. ترد عليه بس انتي ماكلتي عندج امتحان.. جاوبتهه سوولنا فجأة ومجاوبت وترزلت..
هيج يله عافتني.. حسيت نفسي كلش غبيه.. بالي حجيته والي سويته..
اخخ كون اموت نفسي واخلص.. خره بروحي امداني..
دكيت ع وجهي وملخت شعري.. وجع.. وجع بنص صدري..
بقيت الليل كله كاعده .. كل مااتذكر ارجع ابجي.. هيج صعبه عليك تحبني.. هيج اني بنظرك ! يكلي ماابدل زوجتي بوحده مثلج! مثلي؟ ليش الي مثلي شنو.. مو ذنبي .. هو حبك مرض وصار بيه بعد.. ياريت اكو علاج او شي واخلص منه... شبعت بجي وعتاب لوجه الصبح.. تالي رحت نمت يم امي.. حسيت نفسي بحاجتهه..
خليت راسي يم ظهرهه ونمت..
ثاني يوم ماداومت.. مااريد اروح ع الفشله السواهه بيه.. وع الكلام الي كاله
بقيت طول اليوم بغرفتي.. مشغله اللاب ع اغاني وابجي..
لليل طلعت سبحت واكلت.. كملت ورحت نمت من وقت.. كنت مقرره اداوم.. بس من كعدت الصبح.. متكأبه وروحي طالعه..
كلت ع شنو رايحه.. انعل ابو الكليه عساهه تحترك.. بس علي كون مو بيهه من تحترك..
رجعت نمت.. مااريد اعوف الفراش..
العصر خابرتني شهد... تسأل ليش ممداومه.. كلت الها مالي خلك اختصرت السالفه وكطعته... وصدك مالي خلك.. مالي خلك واحد يسألني لو يحاجيني
بس يمكن اذا كلولي علي يحاجيج انسه الاول والتالي ويا.. ماامل ..
اسبوع اني ممداومه.. شهد اتصلت اكثر من مره..
امي شكت بيه كلش.. لزمتهه تخابر بهدى.. تحجيلهه اختج مادري شبيهه صارلهه اسبوع ممداومه وكل مااكولها داومي تكول مالي خلك..
عرفت من كلام امي هدى راح تجي علمود تعرف شبيه..
كان لازم اجهز كذبه.. مااريد تعرف بعلي..
كمت سبحت ورتبت نفسي قبل لاتجي هدى.. تصرفت ممهتمه مااريد ابين اكثر وانفضح..
اجت هدى.. تباوعلي من فوك لجوه بقلق.. كعدت هي ومامه شويه..
نوب كالت تعالي اريد احاجيج.. رحنه للغرفه ..
كعدت ع الجربايه .. هي كابلتني وكعدت..
هدى:اذا متحجين مااطلع اليوم منا!
-شحجي؟
هدى:لج لاتخبليني! انتي شبيج بس فهميني شديصير وياج!
-ماكو شي.. بس تعبانه شوي وكلت ارتاح .. بيهه شي؟
هدى:ليش تبجين وحالتج حالة لعد؟
-امي تبالغ.. هيج مرات اضوج عليج وابجي..
هدى:يعني تردين تقنعيني ماكو شي؟
-اي ماكو شي..
هدى:احد مبتزج مهددج متحرش بيج؟ احجي قبل لا تكبر السالفه..
-لااا.. شنو هل حجي.. اني لو اكو شي كان حجيتلج..
هدى:تحبين؟
دنكت وسكتت.. مااكدر اكذب اكثر..
هدى:منو؟ وليش هيج شالع كلبج؟
-بس اني احبه.. ميحبني هو..
هدى:شلون عرفتي..
توترت..هيج مبين من عيونه..
هدى:طالب وياج؟ شنو اسمه؟
هنا كان لازم اكذب..:اي.. عوفي اسمه..
هدى:براحتج.. بس ليش متحجيلي.. ليش تضمين بكلبج وتتعب نفسيتج؟!
-مو شي مستاهل.. وكلتلج هو ميحبني..
هدى:ميخالف حبيبتي.. اله مايجي يوم ويعرف قيمتج.. بس انتي لا تخلين هل شي يأثر ع دوامج .. داومي واتونسي واكسري بضحكتج..
-اي.. الاحد اداوم..
هدى:اي عفيه.. لا تنهزمين من اولها..
ماشي.
خلت ايدهه ع رجلي وكالت:مره ثانيه لا تضمين عليه.. اني اختج واشيل الهم وياج.. لاتحبسين بكلبج..
هزيت راسي اي.. خلت وطلعت.. اكيد راح تبشر مامه..
بقيت افكر معقوله لهدرجة وصلت؟ يشكون بيه متحارشين بيه لو مبتزيني يبووو كله منك ياعلي.. اخ لو بس تحس بيه شويه..
بقت هدى يمنه.. كالت اريد نلتم كلنا..خابرنه ع خواتي شذى ونورس..
اجن هنه وازواجهن.. وخالد همين اجه..
حلوة اللمه .. بس مو للمحب.. مفضوحه عينه وضحكته.. ذاك هو يصيح اني عاشگ وولهان..
تغدينا سوا.. وبعدهه كلمن راح ع بيته.. صفينه اني وامي..
احس نظرتهه تغيرت.. مو قلقه.. مرتاحه من تشوفني.. قبل..عبالهه بيه شي يمكن..
يوم الاحد .. رحت للدوام.. اتمنى مااشوفه ولاالتقي بي.. بكل خطوه امشيهه اتذكر كلامه.. عبالك هسه ديكوله اليه..
من دخل محاضرته علينه..نسيت كل الي كاله.. عبالك مساحه ومسحت كل الي كنت افكر بي. صافنه بس بعيونه..
لحد ماطلع.. رجعت لعالمي.. ورجعت اتذكر كلماته مثل السم..
بس شنو.. شوفه عيونه زادتني اصرار.. وكلامي ويا همين.. ماردت اكول شي ومااسوي. واني وعدته اخلي يحبني.. بس شلون ياربي شلون..
اديه ورجليه مربطات.. مااكدر اسوي شي واتأكد منه فعلا صار يحبني..
كملت دوامي.. اريد اطلع.. شفت مرته جايه..
تجاهلتهه.. وهي باوعتلي بنظره شفقه.. يمكن هيج باوعتلي ويمكن اني الحسيته هيج.. راحتله للغرفه.. كملت طريقي ع كيف امشي.. بلكت يطلعون واشوفهم سوه..
وصلت سيارتي. هو ومرته طلعو من الباب.. الضحكة تارسهه وجهه.. وواحدهم غركان بعيون الثاني.. شبيدي وشسوي واطلعك من كلبي وعقلي..
اعرفك مو الي اي غير اقتنع وانساك..
فتح الها الباب.. ورجع ع السريع كعد بصفهه... متحملت اشوف اكثر.. كل سرعتي دست بانزين وطلعتهم.. مهتميت حتى اذا اسوي حادث ..
طبني مرض.. بعد ماشفته هيج تخبلت انجنيت..
حسيت كل حركه منه مقصوده.. حته جيتها للكليه مقصوده..
عيوني انترست دموع.. كوه تمالكت نفسي علما وصلت للبيت.. دخلت الغرفه ركعت الباب.. مداسيطر ع نفسي.. شمرت الكتب وجنطتي كل قوتي
شمرت نفسي بالفراش ودك بجي..
اجت امي يمي.. عطت بيهه عوفيني وروحي.. عوفيني اطلعي منا..
طلعت وعافتني..
بعد ماشبعت بجي.. انتبهت ع نفسي.. عليت صوتي ع امي.. وبحياتي ممسويتها.. لا اني ولا اي وحده من اخواتي بيوم رفعت صوتها ع امي..
رحت غسلت وجهي.. داريد اصالحهه.. رحت لكيتهه نايمه..
اخخ.. شكد غبيه وفاشله اني.. صار القهر اثنين..
نامت امي زعلانه مني.. اوف كون اشنقها لروحي.. ضجت كلش ..
خليت ونمت.. احسن حل انهزم بي من الدنيا..
كعدت المغربيه..دورت امي لكيتهه تتوضى.. لزمت ايدهه بستهه .. كبل جرتهه مني وبقت تكمل وضوئهه.. بستهه من راسهه.. بعدتني..
بقت تحجي همس.. يمكن ادعيه او ايات..
بقيت امشي وراهه.. كعدت ع التخم بالصاله.. خلته ع القران وبقت تسبح..
اريدهه ادير وجهه عليه ماكو..
نزلت للكاع كبالهه.. خليت راسي ع ركبها وهي كاعده.. بدون مااحس ع نفسي كمت ابجي.. والبجي صار شهكات ومشتكى..
مسحت ع شعري.. شالت راسي وباوعت بوجهي وبكل هدوء ووجه مسامح كالت:مو هيج مامه.. تعذبيني وتعذبين نفسج.. مو هيج.. كومي توضي وتعالي صلي ويايه.. هسه يرتاح كلبج ويرتاح عقلج.. صدكيني مامه.. احجي لمصلحتج..
-مامه اسفه.. سامحيني فدوه.. اموت ولاتزعلين مني..
ماما:هههه يايمه ومنو يكدر ع زعل منوشه.. دكومي فدوة لطولج مامه.. روحي توضي وتعالي نصلي ونذكر الله سويه..
هزيت راسي اي.. كبل كمت.. ناسيه حتى الوضوء شلون يصير.. استحيت اصيح امي واكلها علميني نسيت.. فتوضيت حسب معرفتي السابقه..
ونويت.. كان صدك بنيتي اتجه للخالق.. اريد يريح بالي ويدلني للصواب..
مااريد ابقى هيج ضايعه..
وكفت بصف امي.. اصلي ودموعي تصب.. اعرف كل حياتي خطأ..
بس مااعرف شسوي وشلون اخلص نفسي..
كملنه.. بقيت كاعده يم امي.. تحجيلي بالصبر وسوالف قديمه.. شي ركزت بيهه وشي اصلا ولا يم امي .. تعشينه فاكهه... نوب امي نعست راحت نامت.. اني همين.. رحت سبحت.. ونمت...
ثاني يوم مداومت.. ماعدنه عقود يعني علي مايجي.. بقيت نايمه ماطلعت من الغرفه اله وي اذان الظهر... تغديت.. امي اصرت اله اصلي..
صليت بس ممقتنعه بنفسي.. اعرف اني خطأ.. بس شسوي مااكدر اعوف كلبي ولااكدر اتجاهل..
مرت ايام.. اداوم بس علمود اشوفه.. غياباتي كثرت.. نزل اسمي بالانذارات
وكان من ضمن الانذارات بمادة العقود.. يم علي... لكيتها حجة حتى اروح ويدخل ويمحي غياباتي قبل لا انفصل.. هو ماعنده مانع..
ياما فصل طلاب بس بمادته.. لذلك كانو الاكثريه ميغيبون عنده.. بس اني لا هواي ايام ماحضرت.. وايام ماادخل لان مااتحمل اشوفه وهو كبال عيني ومو الي..
رحت امشي لغرفته.. ماعندي حجي ومفكرت شنو اكول.. بس الي يهمني اوصل يمه واشوفه..
دكيت الباب ودخلت..
كان رافع عيونه وحواجبه يريد يعرف منو دخل.. كل شي بيك عاجبني.. حتى كسرات جبينه من كان رافع عيونه وحواجبه احبهن.
باوعتله بنظره.. مكسوره واريده بس يحس بيه..
علي:خير؟
-ماادري..
علي:عندج شي؟ اذا ماعندج شي تفضلي اطلعي!
-كافي.. دااموت وانت السبب..حس شويه بيه..
رجع نفسه ع الكرسي مخلي ايده ع حنجه.. وباوعلي من فوك لجوه..
علي:امج واختج يعرفن بهذا التخربط الي دتسوي؟
-معليك بأمي..
علي:انتي ليش لسانج طويل؟ ترا هسه اكتب بيج مطالعه وتروح للعميد!
-شو سويهه؟ سويهه حتى ادمرك والله!
ضرب ع الميز بيده:انتي شنو؟ منو انتي وتهددين!
-اني الي ضاع نص عمري بعيونك..
التفت ع الشباك ورا وكال:عجيب! بابا اني استاذج! تعرفين شنو يعني استاذج.. يعني ع الاقل احترمي نفسج وكافي تنزلين كرامتج!
-انتحر والله.. انتحر وانت السبب..
كام من مكانه واشرلي ع الباب:اطلعي برا..
-مااطلع.. واذا تبقى هيج تعاملني اني اموت نفسي..
رفع ايده كبال عيني..:دشوفين! هاي حلقه.. اني متزوج.. متزوج! روحي وياج طلاب هوايه ودوريلج واحد وسوي علاقه ويا! افتهمي اني مو الي ابالج!
ضربت رجلي بالكاع وكلت:ابالي .. انت ابالي.. كلهه ماتسوه اضفرك بعيني
رفع راسه للسكف ولزم حنجه ونزل ايده ع بلعومه:وتالي؟
-احبك..
علي:اوكح بنيه شفتهه بحياتي هي انتي.. اطلعي..
-انت خليتني هيج اصير..
علي:اتفضلي برا.. اني صوجي اخذ وانطي وياج بالحجي..
درت وجهي .. مشيت خطوات وصلت يم الباب .. قبل لاافتح درت وجهي علي وابتسمت:راح تندم..
علي:اي يله ميخالف..
طلعت.. اخخ احر ماعندي ثلج ع گلبه.. اتمنى افلش الحايط بيدي.. مااعرف نفسي شداسوي.. ليش هيج .. ليش كل مااحاول اطلع نفسي اغوص اكثر..
وين راح اوصل وياك.. بقيت اعصر بيدي.. ومو كافي .. اتمنى اكعد والطم بنص الكليه.. طلعت من الكليه.. بقيت افتر بالشوارع..
اسوق ودموعي تصب.. بكل مكان اشوفه.. بكل مكان اسمع صوته..
طبكت ع صفحه.. باوعت ع السيارات.. بيني وبين الموت شعره..
كلش طخت ابالي اشمر نفسي واخلص.. كافي سويت خطأ كبير .. ومو واحد اخطاء.. ومداحصل نتيجة..
الف مره تكرر ابالي الي حجيته ويا.. اني شلون هددته مااعرف.. شلون حجيت هيج مااعرف.. بس من كنت اشوفه مصر ميريدني كنت اتهستر بالزايد..
بقيت ابجي.. كلهه انتبهت عليه.. ومااهتميت..رجعت للسياره.. وصلت البيت ودفنت نفسي بالغرفه بنص وجعاتي.. عساني بوجعه مااطلع منها..
يارب ليش .. احبه والله احبه.. مااتخيل نفسي شلون اكون اذا رفضني للابد
اصلا ماراح يجي هل يوم الي يرفضني ويطلعني من حياته للابد..
لان راح اموت نفسي.. شنو حياتي اذا مو ويا..
نمت شويه.. كعدت ادرس.. اصلا مااعرف وين واصلين.. عليك ياالله قريت
ثاني يوم.. داومت.. كمل شرح.. كال اليوم عندي محاضره بسيطه الكم..
هي عن الاخلاق والاحترام.. بس كال هيج عرفت اني المقصوده..
علي:صحيح هذا مو موضوعنه.. بس همين احنا كتدريسين واكاديميين لازم نوعي طلابنه والمجتمع..
صفنت بعيونه.. وهو هم اخذله نظره طويله من يحجي ع الاخلاق والتربيه الصالحة وووو.. اصلا مااهتميت شنو يكول.. بقيت اباوعله بحزن.. بتأمل ورجاء.. انطه محاضره عن الاخلاق.. هههه اي اخلاقي موزينه..
لان حبيتك .. لان ورطت نفسي ..
طلع وعاف كل جرح هلكده بيه.. شكد حقير.. فعلا حقير.. عوزه بس مايجيب اسمي يخلي ويشرح عليه...
مامنعت نفسي.. رحت ورا للغرفه.. بس للاسف.. كان بعده بالباب.. وماانطاني فرصه احجي.. كال عندج شي احجي هنا..
باوعتله بيأس.. انملت عيوني دموع.. نزلن بالاخير مكدرت الزمهن..
مسحت دموعي وكلت:لا ماعندي شي.. ماقصرت ينطيك العافيه الماعندي..
خليته ورحت للحمامات.. مسحت دموعي.. رتبت مكياجي..
كلت بداخلي مو اني الي انكسر.. كافي مااطلع من الكليه.. وراح احضر كل المحاضرات.. وسويتهه .. وحضرت الكل..
اتذكر حجايته من يكلي وياج طلاب وسوي علاقه وياهم.. لك هم بعيني صفر كبالك.. صفررر... اصلا مااعتبرهم موجودين .. احسهم زعاطيط..
بس انت الناضج والكبير.. وانت المفصل عليه تفصال.. مااريد غيرك..
ومرت ايام.. صعبه كلش،. اريد اعوفه بس مااكدر..
انجنيت بشي اسمه علي.. اغنيه الاقي فين زيك ياعلي ماتطفى من اللاب مالتي.. اه لو بس تحس..
هو بقى ع نفس موقفه.. ميباوعلي ولا معترف بوجودي.. بس بيوم الي انطى محاضره الاخلاق بقى مركز عليه اكثر شي.. يمكن حته الطلاب انتبهو..
بعد ابد ماانتبه لعيوني.. ولا لوجودي كباله اصلا..
صدك كمت ادعي ع نفسي بالموت..
ومرت الايام.. وصار وقت الامتحانات.. ضربة حظ امتحنت.. ولا امتحان صار عنده مراقبه علينا.. ويمكن هو تقصد مايجي يراقب علينه..
اي يريد يخلص مني بكل صوره.. بس مو ع كيفه.. خلص بعد دخلت عقلي وصارت عناد ..
خلصت الامتحانات وبعد ماشفته..
وبدت العطله... قضيتها بين نوم وبجي اكثر الوقت.. خواتي هوايه اجن علينا.. هدى اكثر شي كانت تبقى يمنه استلمت النتيجة ناجحة.. كله مقبول متوسط.. بس المهم خلصت.. بقت فد هلسنه وياك ياعلي.. عسى عمري ينتهي بعدهه.. طبقت شهر بالمحكمة.. اروح من لاجارة مااعرف اي شي بس صنم وكاعد بالجلسات..
.. وبنهايه العطله من دخلت هدى بشهرهه اجت يمنه.. وزوجهه خالد تخبل عليهه ميكدر يفاركهه.. صار يجي يمنه وميروح لليل يله...
امي اكثر من مره كالت اله ابقى بات هنا.. بس هو ميقبل.. يمكن يحسهه نقص اذا بات يمنا..
وصارت ولادة هدى بالليل.. العصر كان خالد يمنه.. ومكالت ولااشتكت من شي.. اشو ورا ماراح بساعتين بدت تلوب وتكول يمه وجع راح اموت يمه..
امي كبل عرفتهه ولاده.. جهزت الها اغراضهه.. وكالت لمن تشتد كلش يله ناخذهه..
